JOŊRE 7
7
1Kəya *kumna boblo bə keere Pepeŋ əsəŋ bə le ku Etiyena minti: «Kel gə minti yə wəətəy cəərəma ha'aŋ, tam jiiniy nuutu gəəzi mo?» 2Kəya Etiyen hərnəy kel minti: «Aŋ kəsaanan, aŋ kamnan, pisi ablaw, aŋ jeɓrə la! Pep bə minti dər məyan də apəy daŋ a vəɗaŋ kusru dayday a moomo də áŋ *Abraham a kəkəy bə minti wə a jəŋ giidə seŋka də Mesopotami daŋ, acekjew də minti wə kəm bay ɗe isi warna Araŋ naŋ. 3Pepeŋ wəətunu minti: ‹Faa la wəra giidə seŋka nəmtiŋa. Yaakə kaa gə minti a kaasaw dəma la wəra, ɗee la a seŋka də minti ten gam dərəm yaŋ adaŋ.› 4Kəya Abraham yaakaŋ seŋka də Kaldeŋ wəra ha'aŋ bədoona ana'i, wə ɗeŋ a isi warna Araŋ na. Adordə ko bə minti buru meŋ warda də ada meŋ, Pepeŋ məlnu a seŋka də minti áŋ laki hebkəna adaŋ. 5Anaaŋa wə a əynu ko dər nuutu a ko toŋa anə weseki ba, koo ko bə mele kampa a nuunu paapa ada ba. Səma wə wəətunu wəra kaŋkaŋ minti tó aye seŋkaŋ anə neŋneŋ keɗe a nuunu, də kaasaw du gə minti bə kole yaŋ a kuɗu daŋ keɗe. Ana də ko toŋ ha'aŋ, beebe anə məna paapa kasi Abrahama kəm ba.
6Kəya Pepeŋ wəətunu minti: ‹Kaa gə minti a kaasaw dəma ɗe a kole yaŋ warna a seŋka də irku na. Kaa gə ko toŋ humuy yaŋ damdi kafkam neete ana, yə jəy daŋgay di yaŋ də ada laate kəs-kəsi waaɗe. 7Səma, ten ji daŋgay də kaa té gə minti a jiiniy damdi kafkam ana yaŋ gəm. Adordə kel teŋa kəyaŋ, kaasaw dəm bə yaake seŋka də irku taŋ yaŋ da, yə hare yaŋ giidə seŋka taŋ da ta'i kandaŋ bə bi a kan awalna.› 8Kəya Pepeŋ də Abraham doŋ *jaa aduubə də kumsi. Karman bə aduubə də jaa neeteŋ ha'aŋ, *jeme bə tantaŋ. Gud teŋa ta, aluma məna adordə we də kurmuyu *Izakiŋaŋ, Abraham ɗeŋ a jəmu tənturu wəra faɗi. Bədoona ana pa, Izaki *jəmaŋ tantar *Zakopi haa adordə hiti nuutu seeɗa'i bə we duŋa gəm, daana Zakopi cəmaŋ tantar kəmoomo də áŋ kəmtəŋ#7.8 Kəmoomo də áŋ kəmtəŋ kaayaŋ hor ciiri ɓasiŋ, haa kaa gə minti jəwaŋ kaŋ a kaasaw di ta'-ta'i hor ciiri ɓasiŋ. Haa kaa gə minti gaŋ kaasaw də kaanə Israyel. kaayaŋ hor ciiri ɓasiŋ haa bədoona gəm.
9Kəmoomo də áŋ kəmtəŋ jəŋ də sərkə sar siini Zosefiŋa səm moŋ, yə gusnu warna kasi kaa kəmana gə minti kooroŋ duuru Eziptəŋ. A ko tó na ta, wə koloŋ kafkam. Səma Pepeŋ jəŋ duuru saksaki, wə yəəkunu wəra ba. 10Pepeŋ tupnu wəra ku gəəli bə minti fəltunuŋ keɗe. Də ko bə minti Zosefi tuluŋ tiinə Farawoŋ, kumna bə Eziptə, Pepeŋ əynu aseŋ kir minti wə daw duru la. Kəya Farawoŋ usnu kumna cəərə seŋka də Eziptəŋa keɗe, cəərə kuli nuutuŋa wəra keɗe gəm.
11Kəya tay mooto-mooto awaŋ giidə seŋka də Eziptəŋa warna neŋneŋ keɗe, giidə seŋka də Kanaaŋa gəm. Də ko toŋ ha'aŋ, kaŋ ləsaŋ ablaw, kəmoomo də áŋ fəlaŋ karman bə hame anə ke'i ba. 12Də ko bə minti Zakopi əskəŋ kay minti kaasaw yaŋ Eziptəŋ, wə vaŋ kərmuyuŋ, kəmoomo də áŋ, acekjew bə ɗe a gusi kaasaw da ada faɗi. 13Də ko bə minti yə haraŋ Eziptə na bə ɓasiŋ, Zosefi gaŋ gud kusru wəra a kəsəənuŋ faɗi. Kəya Farawoŋ asaŋ kəm ta minti kamnə Zosefiŋ doloy kəna anə mindi moŋ. 14A ko toŋa kəya Zosefi vaŋ kəsəənu minti yə ɗee la a waate bar tó minti yə bəəda warda Eziptə da də gidiirə toŋ anə tew-tew keɗe. Gidiiruŋ təpaŋ neŋneŋ keɗe hor-hor seeɗa ciiri wiiɗiw. 15Kəya Zakopi kooroŋ nuutu warna Eziptə na faɗi ta. Wə təwaŋ pəərəŋki warna ada na, wə fəlaŋ meŋ haa ada na faɗi gəm, də kəmoomo də áŋ kəmtəŋ keɗe gəm. 16Kəya yə təknəy titi di da, bə ɗe a kay giidə teɗker də minti Abraham a gusnə hõy də soloy kasi kormə Emora giidə seŋka də Sikemaŋ.
17A ko bə minti hiŋ máŋ wəra maŋ bə neke kir minti Pepeŋ de ku kel nuutu gə minti wə a wəətənəy wəra kaŋkaŋ a Abraham ha'aŋ, kaasaw də náŋ əsəŋ bə zuli ablaw pisi zulə Eziptə. 18Kəya Farawoŋ baalaŋ koloŋ a kumnaŋa cəərə seŋka də Eziptəŋa. Zosefi haa mindi mo, paapa də duru ba. 19Wə jəŋ dər kaa náŋ baymel-baymele. Wə ləsnəy ablaw hãã bə minti wə ɗeŋ a kole bə wəətiya wəra minti: kərməyi gə minti yə bə waya kəmarwaŋ, yə kayə la warna pal-pal, yə a si kəmar kəncəŋ teŋ ba. 20Kəya *Moyisi waŋ də ko toŋ faɗi, wə haa beebe pisi bə minti doŋ dər Pepeŋ. Wə jəŋ kitir haa soope faɗi bə si ger buru. 21Də ko bə minti kəmnu bə gəənu warnaŋ, tərnə Farawoŋ həənu bə si damdi korməya ana. 22Kaanə Eziptəŋ a jəŋ haa kaa kə hel gə asə-ase kar gə ablaw-ablaw səm moŋ, Moyisi suŋ haa bə hate hel neeteŋa faɗ-faɗi gəm. Wə koloŋ ha'aŋ hulum bə minti kel kə waateŋ də duru, wə də səɓaki a kel gə minti wə bə jiyaŋ keɗe gəm.
23Laate du ɗeŋ a tepe hor-hor waaɗe kəyaŋ, wə minti tó hare sar kəsaanə tó gə *Israyel bə ɗe a hilɗiy. 24Də ko bə minti wə máŋ sar kəsəənu naŋ, hulum bə Eziptə doŋ məna bə lete guudi pəta. Moyisi əsəŋ bə keye gud siinuŋa minti tó gaw abal nuutuŋ. Kəya wə awaŋ hulum bə Eziptə tó bə minti a jəŋ bə lete siinuŋaŋ wəra. 25Moyisi a ɗəkəŋ haa minti kəsaanə toŋ iski yaŋ minti Pepeŋ bə siiriy yaŋ wəra dər lasi neeteŋa haa də tó, səma yə paapa bə əski gud kel teŋa ba.
26Ɗeŋ a deye dibiinim, wə asaŋ kaa ɓasi gud gə Israyela ɗəlaŋ kumsi. Wə bəŋ a isi bə piliya wəra. Wə haraŋ, wə əsəŋ bə təpəy aduubə di. Wə minti: ‹Gədaarənti, aŋ haa paapa kəsaanə kumsuŋ bə mo? Aŋ ji kumsəŋ baymele səm pə mo?› 27Səma hulum naayaw tó bə minti a jəŋ bə lete siinuŋaŋ zogoŋ Moyisi warna anə day də kel ada na anə tap-tapi a nuunu minti: ‹Tam gadte dər kela minti harmə mo? Mindi gaanam da bə bi a isi kumna cəərə are mo, bə jeme kəəti də are mo? 28Tam ɗiki haa minti tam bə awan yaŋ akas hulum bə Eziptə bə minti tam əwnu deegŋ ana pə mo?› 29Də ko bə minti Moyisi əskəŋ kel teŋ kəyaŋ, wə gədaŋ wəra, wə kooroŋ giidə seŋka də Madiyaŋ. Wə koloŋ bə de həlgə warna ada na, wə waŋ kəmar kaŋkar ɓasi dəərə gəm.
30Də ko bə minti Moyisi jəŋ laate hor-hor waaɗe'iŋ ada naŋ, wə ɗeŋ giidə ful də minti sar pərki bə Sinayiŋa maŋ. Kəya *hulum bə digi kə Pepeŋ kəman vəɗaŋ kusru wəra a nuunu aduubə də kəsəlɗə cəwa də kəbaŋ kəmana anə naɓi bə do'e anə hər-hər-hər. 31Moyisi bə ŋələ-ŋili gil kas karman bə minti vəɗaŋ wəra duruŋ. Kəya wə əsəŋ bə zeede da maŋ sar karman toŋ da minti tó ɗe a gulu wəra pisi golə. Ɗe a goleŋa, wə əskəŋ dordə Barkaŋ bə wəətu da minti: 32‹Ten Pep kə kəmoomo dəm, kə Abraham, kə Izakiŋ, də kə Zakopiŋ gəm.› Bə minti wə əskəŋ kel teŋ kəyaŋ, wə əsəŋ bə miiri wəra lad-lad-ladi. Wə paapa kirka a he duru apəya bə gole pəda. 33Kəya Barkaŋ haraŋ bə wəətu minti: ‹Kalmasi nəmti kemkem, pəy la wəra, gud maa mo ko bə minti tam gil adaŋ, wə haa ko bə malə-mele wəra dəra a Pepeŋ. 34Gəəzi, gəəli bə minti kaa katən bə sawa Eziptəŋ, ten əsnu ne. Nuumi bə minti yə bə nuumuŋ kəlaŋ kosnon na. Gud teŋa ta, ten vaŋ warda adawra da hebkəna da ha'aŋ, bə bi a doy wəra ku lasi neeteŋa. Tam hebkəna, zee da kanda sarən da. Ten gam Eziptə, bə ɗe a don ku mini katən.›
35Kaanə Israyel a haraŋ dər Moyisi warna də kel minti: ‹Mindi gaanam da bə bi a isi kumna cəərə are mo, bə jeme kəəti də are moŋ?› Səma haa tó Moyisi toŋ ta bə minti Pepeŋ gəənu bə ɗe a ji kumna daana bə ɗe de kaanə Israyel wardaŋ də səɓaki kə hulum bə digi kə Pepeŋ bə minti a vəɗaŋ duru dər kəbaŋ naɓiŋ daŋ. 36Vəənəy warda Eziptə da haa tó pa, a kəkəy bə minti wə jəətəŋ kar gə məɗ-miɗi, də kar kə ŋili kaŋ giidə seŋka tá daŋ, ku kan kəmtəŋ gə minti yə məntəy ‹kan kəələŋ› daana dər laate bə minti wə juunu hor-hor waaɗe'iŋ diiri giidə ful na. 37Waataŋ kaanə Israyel minti: ‹Pep nəətiŋ bə gaŋ *hulum bə jogte ku mini da pa damdi wə a gaanan da a nəənəŋ ha'aŋ ana gəm. Hulum toŋ bə pi duru ha'aŋ gud kaasaw dəŋa toki pa›, haa tó pa. 38Də ko bə minti kaa náŋ təpaŋ wəra gil giidə fulaŋ, hulum bə minti jəŋ joŋreŋ aduubə də hulum bə digi kə Pepeŋ bə minti bə wəətu kel da cəərə pərki bə Sinay da, də kəmoomo də áŋ, haa tó pa. Kəya Pepeŋ ayaŋ kel kə dədərgəŋ da haa kəəsu da, minti wə juguy la wəra a áŋ.
39Səma kəmoomo də áŋ ɗempa a bele usku ku ba. Yə gəənu warna kirki na anə day daana ɗiki di məlaŋ haa minti té harə la Eziptə. 40Kəya yə ɗeŋ a waate Aroŋ, seenə Moyisiŋ, minti: ‹Jəə pepe kəman la a áŋ kir minti kaa vaa la bə ɗe diiri tiinə áŋa a kəkəy bə ɗe náŋa. Gud maa mo, Moyisi tó bə minti a vaŋ áŋ warda Eziptə daŋ, wə jeŋ da naanaanə ɗawmay, teŋ paapa də dər áŋ pəda.› 41Də ko toŋ kəyaŋ, yə ɗompoŋ kormə kurki a kusri minti wə jəə la pepe neeteŋ, yə jəŋ keere a nuunu kintiɓ. Yə təpaŋ ciiri bə waale dər kəɗwəy té kəmtəŋa bə hage sam boblo də karman bə minti yə a ɗəmpunu té də kəəsi. 42Gud teŋa ta, Pepeŋ koloŋ kirku a niini faɗi, wə ŋuryunuy a awalna neete də minti yə bə kaara a anə seskaŋ, kitir daana cəwaŋ; kar teŋ gə minti paapa Pep baŋ. Kel teŋ haa ta kəna wəra gə jeerə-jeere giidə kefter bə minti *kaa kə jogte ku mini kə Pepeŋ a jiirunu wəraŋ minti:
‹Aŋ kaanə Israyel, kar gə minti aŋ əwnəy bə ji keereŋ dər laate hor-hor waaɗe'iŋa giidə fula ha'aŋ,
aŋ keereŋ diiri haa mindi mo, ten nuutu mo?
43Paapa! Aŋ vaŋ kaa tiiniŋa bə ɗe haa də muryuki kə pepe nəətiŋ Moloki, də pepe nəəti seskaŋ Rafaŋ gəm,
kar té gə minti aŋ a jiiniy də kaasaŋ minti aŋ kay awalna laŋ.
Gud teŋa ta, ten bə jəŋ karman yaŋ kir minti yə humuŋ la bə ɗe a məlaŋ warna a seŋka na tooto dəŋaŋ Babilon#7.43 Amos 5.25-27.›»
44Kəya Etiyen raawaŋ bə waate minti: «Də ko bə minti kəmoomo də áŋ a giidə ful daŋ, yə a də *muryuki kəəsi. Muryuki taŋ a bə gay diri minti Pepeŋ a jəŋ aduubə də té. A də jəə-ji ha'aŋ, damdi nayta də minti Pepeŋ a vaɗna dər Moyisi minti wə bə jəə nayta la bədoona ana gəm. 45Adordə kəmoomo də áŋa kəyaŋ, yə ayaŋ muryuki taŋ da a kərməyiŋ faɗi gəm. Də ko bə minti yə gud Zosuwe bə ve giidə seŋka də minti Pepeŋ a sarmaŋ kəmnə dəŋ wəra tiiniyaŋ, yə haŋ muryukiŋ kəəsi da. Muryuki taŋ bə jəŋ a ko toŋa ada hãã dər *Davidi. 46Davidi haa hulum bə minti doŋ dər Pepeŋ. Wə mantaŋ kəkəy kəəsu minti: ‹Ayan kəkəy la bə hərsi kuli a nəənəm, tam Pep bə minti Zakopi a kəənu awalnaŋ.› 47Səma bə ɗeŋ a hərsi kuli toŋ wəra haa kurmuyu *Salomoŋ. 48Ana Pep bə Daŋə-Deŋeŋ neke bə hi giidə kuli bə minti hulum hursunu də kəəsu toki bə pa. Haa kəya sar kel gə minti Ezay, hulum bə jogte ku mini kə Pepeŋ, a wəətənəy warda minti:
49‹Barkaŋ minti: tarmə pepeŋ haa damdi jaaŋa kətan də kumna ana,
daana seŋkaŋ haa damdi tərnə jaaŋa kətan bə feke kamparən cəərəŋ ana gəm.
Bə jəəne bədoona, aŋ bə hərsən toŋ ha'aŋ gidiirə kuli muntu pə mo?
Ko bə isi toŋ muntu mo minti ten bə isi adaŋ?
50Jəŋ kar teŋ bədoona gilaŋ, paapa ten bə mo#7.50 Es. 66.1-2?›»
51Kəya Etiyen haraŋ bə wəətiya pa minti: «Aŋ, aŋ kaa kə ŋelə-ŋele wəra hasi! Aŋ bə ɗiki minti aŋ kaa pəsaŋ tiinə Pepeŋa gud bə minti aŋ *jəmaŋ tantəraŋ wəra, anaaŋa ku tarməyaŋ wəra də hẽŋə-hẽŋe, daana kosnoŋ wəra bə ruptə-rupti bə de kel nuutuŋ. Aŋ paapa bə humi kosoŋa cəərə Tiiru Cetcetaŋa bə gəm. Aŋ lakaŋ, aŋ akas kəmoomo dəŋa ana dege'-dege'i pa! 52Hulum bə jogte ku mini kə Pep muntu du anə məna də dərəŋ minti kəmoomo dəŋ ləsaŋ toŋ ba mo? Kaa gə minti a waataŋ nuutu minti Hulum Ɗekeriŋ bə bi yaŋ, kəmoomo dəŋ əwnəy wəra. Aŋ gə hebkəna ha'aŋ jəŋ akoloki daana awaŋ Hulum Ɗekeri toŋ wəra haa máŋ aŋ ɗaw! 53Gəəzi, *ku gili bə minti Pepeŋ əynu da a kaŋ kasi *kaa kə digi nuutu daŋ, fəlnu haa aŋ. Də teŋ keɗe, aŋ humuŋ kosoŋ cuuru ba anə ceki!»
Yə awe Etiyen wəra
54Də ko bə minti *kaa kəmtəŋ gə minti jeme kəəti kə kaanə Ziwifiŋ əskəŋ kel teŋ kəyaŋ, yə hoptoŋ anə lam-lam kas waŋ cəərə Etiyena, yə əsəŋ nuutu bə herɗe kisni anə gil-gil-gil. 55Səma Etiyen bə ɗosə-ɗose də Tiiru Cetcetaŋ tə pə moŋ, wə haŋ duru apəya bə gole tarmə pepeŋa tew-tew-tew. Wə ɗe a gole ha'aŋ, pəɗaki kə Pepeŋ apəy da ta'i daana Yeesu sə kampa gil sar Pepeŋa a kəəsu kemera. 56Kəya Etiyen waataŋ minti: «Gosə gole la! Ten gole haa tarmə pepeŋ wəra də bəŋə-biŋi daana *Kormə Hulúm sə kampa gil sar Pepeŋa a kəəsu kemera.»
57Də ko toŋ kəya, kaa kəmtəŋ kə kaanə Ziwifiŋ humuŋ bə naakte kuya, kəəsi gə maltə-malte kusni ɓasi keɗe-ɓasi keɗe. Yə caŋ cuuru na anə həə'a keɗe, yə gəɓtunu anə gil-gil, yə duunu, 58yə təɗtunu warna kerkə vil də Zeruzalem na. Kəya yə əsəŋ bə kawa də pərkiŋ minti té əwu la wəra. Kaa gə minti a gaŋ gud kel wəra cuuruŋ pəŋ dəməəmə neete də cəərə kumsəŋ wəra, yə vaana kampar puranul kəmana bə nakə-neke, səmu minti Sol. 59Də ko bə minti yə kəm bə ke Etiyena də pərkiŋ, wə toosoŋ minti: «Barkaŋ Yeesu, don tiirən la kaasəma.» 60Kəya wə vaŋ də guguuru adawra, wə naakaŋ ku də səɓaki minti: «Barkaŋ, cəərəm a ji ɗəki cəərə baymele bə minti yə bə jəwa ba!» Wə waataŋ kel teŋ waata kəyaŋ, wə guɓuŋ duru faɗi.
Currently Selected:
JOŊRE 7: KERNT05
Highlight
Share
Copy
Want to have your highlights saved across all your devices? Sign up or sign in
Texte de la Bible: Kera © Alliance Biblique du Tchad, 2004.