JOŊRE 6
6
Yə ŋeme kaa seeɗa bə keye kaa gə vaa-veŋ
1Də ko toŋ ateŋa ha'aŋ, kaa kə doo-deŋ əsəŋ bə zuli ablaw səm moŋ, kaayaŋ té gə Ziwifi gə minti waate ku Gerekiŋ əsəŋ bə ŋorme kuya cəərə kaayaŋ gə waate ku Hebereŋa. A jəŋ dər hitiŋa saksaki ha'aŋ, yə ɓarse kar a kəram gə bay. Kaaya té gə waate ku Gerekiŋ ŋorme kuy haa gud bə minti yə ɗeŋ a ase ha'aŋ, kəram gə bay neeteŋ paapa bə fele keye neeteŋa akəsa ba. 2Bədoona kəya taŋ, *kaa kə vaa-ve hor ciiri ɓasiŋ təpaŋ cəərə kaa kə doo-deŋ keɗe. Yə əsəŋ bə wəətiya minti: «Kəya paapa pisi ba jəəne minti are yaakaŋ kel kə Pepeŋ ne bay waate wəra gud ɓarse bə kar kə hameŋaŋ. 3Gud teŋa ta, kəsaanə areŋ, aŋ ŋamtə kaa la adəwaldəŋa seeɗa kir minti áŋ əyəy joŋre toŋ la kəya kəəsi. Kaa teŋ jəə la kaa gə minti kaŋ wəra bə wəətəy səməya pisi, kaa gə minti tərməyi wəra də ɗosə-ɗose də Tiiru Cetcetaŋ, daana yə jəə la kaa kə zuuri kel gəm. 4Kəya are fele kəkəy yaŋ bə isi wəra laki cəərə tooseŋa daana joŋre bə hateŋa.»
5Kel teŋ kəya doŋ dər kaa kə doo-deŋ keɗe faɗi. Yə ŋəmaŋ hulum kəman yə məntu minti Etiyen. Wə haa hulum bə doo-de anə kaŋkaŋ daana wə wəra də ɗosə-ɗose də Tiiru Cetcetaŋ. Kəya yə ŋamtaŋ anə Filipi, Porokor, Nikanor, Timoŋ, Parmanasi daana Nikola ada pa. Nikola toŋ, haa hulum bə Antiyosi bə minti a koloŋ kusru wəra hulum bə Ziwifi kole gud kel kə Pepeŋaŋ. 6Kəya kaa kə doo-deŋ isniy wəra tiinə kaa kə vaa-veŋa laki, yə toosoŋ ciiri, yə məltənəy kasi wəra ciiri faɗi gəm.
7Daŋgeŋ ha'aŋ, kel kə Pepeŋ wəra bə duusi pisi duusa. Aŋke də kaa kə doo-deŋ əsəŋ bə zuli pisi zulə Zeruzalema. *Kaa kə keere Pepeŋ ablaw əsəŋ bə humi kosoŋa cəərə de bə gud Yeesuŋa.
Etiyen ji bərdə kəkəy cəərə Yeesu Kristu
8Etiyen ha'aŋ, Pepeŋ jəŋ pisi suru daana wə əynu səɓaki bə ji kar kəmtəŋ gə ŋili kaŋ, daana bə ji kar gə məɗ-miɗi kəmtəŋa aduubə də kaanə Ziwifiŋa. 9Səma sərdə kaa kəman gargaŋ də awəy duuru. Kaa teŋ haa kaa gə giidə *kuli bə toose kə kaanə Ziwifi bə minti yə məntu minti «Kuli bə toose kə kaa gə bədə-bidiŋ#6.9 Yə məntu bədoona haa gud bə minti pəəti a jəəti tooseŋ giidu ha'aŋ, karmə kaa gə minti yə a humnuy warna dayday kawsay a seŋka kəman na. Hebkəna yə yaakaŋ tiinə karmə kaa teŋ də máŋ boo minti yə harə la giidə seŋka neeteŋ.». Dər kaa teŋ gə tapə-tepe də kaanə Ziwifi gə Siren, gə Aleksandəriŋ, gə Silisiŋ daana də kaayaŋ té gə seŋka də Aziŋ gəm. 10Səma Tiiru Cetcetaŋ ayaŋ ase wəra a Etiyen bə hərəy kel. Yə máŋ də kusri kəyaŋ, kel neeteŋ paapa bə he karmana anə pələki suru pəda. 11Bədoona kəyaŋ, yə gusuŋ kaa wəra minti yə waatə la minti: «Are fəlnu bə sarte sam *Moyisi, sam Pepeŋa gəm!» 12Bədoona ana, yə əsəŋ bə susli tarmə kaŋa, tarmə kamnaŋ gə tiinə kaŋa, daana tarmə *kaa kə hate ku gili kə Pepeŋ də kel teŋ gəm. Yə co'oŋ anə gurusi faɗi cəərə Etiyena. Yə duunu, yə kooroŋ duuru tiinə *kaa kəmtəŋ gə jeme kəəti kə kaanə Ziwifi faɗi. 13Kəya yə humuŋ kaa da ada ɓasi bə bi a ŋitu kel suru. Kaa té ɓasiŋ minti: «Hulum toŋ gil sarəŋaŋ, wə waate kel kə bayməlaŋ saksaki cəərə *Kuli kə Pep cetcetiŋa, cəərə *ku gili kə Moyisiŋa gəm. 14Gud maa mo are əskəŋ ku, wə bə waate minti Yeesu bə Nazareti toŋ ha'aŋ, wə ɓalke Kuli kə Pepeŋ yaŋ wəra; to'osi kə Moyisi də minti wə a hataŋ áŋ dəərəŋ, tó bə kola yaŋ gəm.» 15Kəya kaa gə minti a jəŋ cin-cin a tepe kə kaa kəmtəŋ gə jeme kəəti kə kaanə Ziwifiŋa keɗeŋ, əsəŋ bə gole Etiyena tew-tew-tew. Yə ɗeŋ a ase ha'aŋ, duru koloŋ damdi kə *hulum bə digi kə Pepeŋ ana.
Currently Selected:
JOŊRE 6: KERNT05
Highlight
Share
Copy
Want to have your highlights saved across all your devices? Sign up or sign in
Texte de la Bible: Kera © Alliance Biblique du Tchad, 2004.