JOŊRE 5
5
1-2Hulum kəman yə məntu minti Ananiyasi a jəŋ aduubə də kaa kə doo-deŋa ada gəm, sam muru minti Safira. Yə təpaŋ kuy tapə də muruŋ kəyaŋ, wə kooroŋ bə ɗe a gusi aka neeteŋ wəra. Wə humuŋ sərdə suŋku, wə yaakaŋ toŋ wəra a kusru. Muruŋ a asaŋ kel teŋ wəra keɗe gəm. Nayto bə minti yaakaŋ kəyaŋ, wə ɗeŋ a əyu a *kaa kə vaa-veŋ. 3Kəya Piyer wəətunu minti: «Ananiyasi, maa toŋ bə jəənəm pə mo minti tam yaakaŋ *Sataŋ bə kele ku tarməyamaŋ? Gud kel naataŋa ta, tam ŋeteŋ kel a Tiiru Cetcetaŋ a kəkəy bə minti tam ŋoyoŋ sərdə soloy bə minti tam a fəlnu də akaŋ wardaŋ. 4Ajew faɗiŋ, minti tam a kəm bay gusi akaŋ wəraŋ, a haa aka nəmti bə mo? Tam bə haraŋ adoro minti tam gusnə wəraŋ, soloy a haa nəmti bə mo, paapa mo? Bə jəŋ naanaanə mo minti tam bə haraŋ bə ɗiki gal giidima bə ji kel kə bayməlaŋ teŋ bədoona anə day paŋ mo? Tam ŋeteŋ kel ha'aŋ, paapa a kaa kəsarkaŋ təwa ba, tam ŋeteŋ kel haa a Pepeŋ faɗi!»
5Bə minti Ananiyasi əskeŋ kel teŋ kəyaŋ, wə awaŋ anə ɗar bə mee-me faɗi! Walka jəmaŋ kaa gə minti əskəŋ kel teŋ kəyaŋ wəra jiɗiɗi. 6Kəmar kaalay pətəŋ da bə bi a kulu wəra də dəməəmə. Adoro yə həənu bə ɗe a ge warna a tələŋkə na faɗi.
7Jaŋ saa ba, mar Ananiyasi tuluŋ sar kaa kə vaa-veŋ na faɗi. Kel gə minti a jəŋ a əsnəy kəm bə ceki gəm. 8Kəya Piyer waatəna minti: «Te, gosə waatan la kəm mo, haa kəya nuutu soloy bə minti aŋ fəlnu də akaŋ nuutu faɗi mo?» A hərnu kel minti: «Ãã, akaŋ gusuŋ haa bədoona.» 9Kəya Piyer haraŋ bə waata minti: «Aŋ a ɗəkəŋ haa minti harmə mo minti aŋ təpaŋ kuŋ bə gole koɗ Tiiru kə Barkaŋ də baymele nəətiŋ? Jeɓrə la! Kampar kaa gə minti a ɗeŋ a ge gidriŋ a tələŋkəŋ haa bə ɗoote ku kuliŋaŋ. Te də kusri, yə hay hebkəna ha'aŋ bə ɗe a ge a tələŋkə gəm.» 10Hebkəna anəkay faɗi, a awaŋ anə pəŋ kampar kaa kə vaa-veŋa də mee-me faɗi. Kəmar kaalay vaŋ kay daŋ, yə falna bəy də mee-me. Yə haana faɗi, yə ɗeŋ a gaara warna a tələŋkə na sar gedraŋ na. 11Kaa kə Tapiŋ keɗe, də kaa gə minti a əskəŋ kel teŋ kəyaŋ keɗe, walka jəmnəy wəra jiɗiɗi.
12Kaa kə vaa-veŋ əsəŋ bə jəəti anə miɗiŋa də kar gə ŋili kaŋ ablaw adəwaldə kaŋa. Də ko toŋ kəya taŋ, kaa kə doo-deŋ, kuy də kumsi tapə məna səm moŋ, yə ɗe a tapte ciiri warna saksaki gud Gadlay kə *Salomoŋ na. 13Hulum baalaŋ paapa bə ge sam ɗe a tepe diiri ba. Anaaŋa kaŋ nuutu bə əŋkəya minti yə kaa pəsaŋ faɗi pəta. 14Gud kaayaŋ gə minti kəm paapa gə doo-de baŋ, sərdə kaa kaŋkar də kəram ablaw əsəŋ bə de gud Barkaŋa, yə ɗe a feke ku kaa kə doo-deŋa ada. 15Gud kel gə minti kaa kə vaa-veŋ bə ji kar kə miɗiŋa ha'aŋ, kaŋ əsəŋ bə humti kaa kə ɗeme da warda agəjaŋ də kəkəy da. Yə bi kay a kəɓəra, sirdiŋ a gisiŋa adawra bəy-bəy kir minti Piyer bə kəlaŋ ne, kəsaatərna du gaa la cəərə huluma məna mo to'i. 16Kaa gə minti də kuliŋ giidə ko bə minti wəra cəərə Zeruzalema ɓəkiŋ, pətəŋ da nuutu anə dimbil-dimbil də kaa kə ɗeme neeteŋ, də kaa gə minti kəwal liitiniy wəraŋ, bə bi diiri sar kaa kə vaa-veŋa. Kaa teŋ gila keɗe seerteŋ warna.
Kaŋ lese kaa kə vaa-veŋ
17Kəya *kumna boblo bə keere Pepeŋ də kaa gə minti cuuruŋ keɗe, haa kaa gə minti teŋ gud kaanə *Saduseyeŋa, hoptoŋ wəra kas waŋ anə je'-je'i. Kəya yə doŋ ku kumsi wəra minti té ɗee la a ɗele *kaa kə vaa-veŋ. 18Yə humuŋ kaa kə vaa-veŋ, yə ɗeŋ a vay a kuli bə daŋgaya. 19Səma, ɗeŋ a deye duugŋ kəyaŋ, *hulum bə digi kə Barkaŋ bəŋəŋ ku kuli bə daŋgay wəra. Wə vaŋ kaa kə vaa-veŋ wəra vaa tiilima kəyaŋ, wə wəətənəy minti: 20«Aŋ ɗee la giidə *Kuli kə Pepeŋ bə ɗe a waate kel wəra a kaŋ cəərə kel kə dədərgə təmarwaŋa#5.20 Dədərgə təmarwaŋ waate haa sam kel kəmarwaŋ gə minti kaŋ fələy a kəkəy bə minti yə doŋ gud Yeesu Kristu: anə seereŋ, də dədərgə də bay teweŋ gəm. keɗe.» 21Kaa kə vaa-veŋ duunu ku faɗi. Koŋ ɗeŋ a jeme warda hərhər kəyaŋ, yə kooroŋ bə ɗe a ve giidə Kuli kə Pepeŋa, yə ɗəlaŋ hate kaŋ faɗi gəm.
Də ko toŋ kəyaŋ, kumna boblo bə keereŋ tuluŋ wəra gil də kaa kə cuuruŋ faɗi. Kəya wə əsəŋ bə waate minti té mantə *kaa kəmtəŋ gə jeme kəəti kə kaanə Ziwifiŋ da, də kaa kəmtəŋ gə tiinə kaanə *Israyel minti yə tapə la. Kəya yə vaŋ gumiya neeteŋ bə ɗe a golde kaa kə vaa-veŋ a daŋgay da minti yə hare da diiri a té. 22Gumiyaŋ kooroŋ nuutu faɗi. Səma, də ko bə minti yə co'oŋ warna ada naŋ, yə fəlnəy a ko bə daŋgaya ba. Yə haraŋ na harə tə pə moŋ, yə ɗeŋ a hare waate neeteŋ damdi ha'aŋ ana: 23«Are ɗeŋ a fele ku kuli bə daŋgay a kəəsuŋa bə gisə-gisi anə lẽẽt-lẽẽti. Kaa kə gole ku kuliŋ ada laki sə kampa. Səma, də ko bə minti are ɗeŋ a biŋi koŋ kəyaŋ, are fəlaŋ hulum ada anə məna ba.» 24Bə minti kumna də kaa kə gole cəərə Kuli kə Pepeŋ, də kəkamnaŋ kə *kaa kə keere Pepeŋ əskəŋ kel teŋ kəyaŋ, yə meŋ cəki. Yə əsəŋ bə le ku kusri minti: «Kel teŋ bə ɗe a ji ajew na haa naanaanə ji mo?» 25Də ko bə minti yə kəm bə waate bədoona kəyaŋ, hulum kəman tuluŋ siri ada faɗi. Wə wəətənəy minti: «Kaa gə minti aŋ a vəənəy a daŋgayaŋ, yə warda kanda laki ku Kuli kə Pepeŋ da bə hate kaŋ da.» 26Kumna də kaa kə gole Kuli kə Pepeŋ əskəŋ kel teŋ kəyaŋ, wə faŋ cəlam faɗi, wə kooroŋ də sərdə kaa kə gole ku kuliŋ guudu. Yə ɗeŋ, yə humuŋ kaa kə vaa-veŋ da anə eŋŋa bay humtuy diri gud bə minti wəra ciiri minti té humtiniy diriŋ ne kənaŋ, kaŋ ke té də pərki ɗawmay mo.
27Yə humnuy da humə kəyaŋ, yə ɗeŋ diiri tiinə kaa kəmtəŋ gə jeme kəəti kə kaanə Ziwifiŋ. Kəya kumna boblo bə keere Pepeŋ gəənəy də kel faɗi minti: 28«Are a waatənaŋ wəra minti aŋ a hatə kaŋ də sam hulum toŋ#5.28 Hulum toŋ, haa Yeesu. ba anə faɗi. Ana doloy aŋ wəra bə duusi hate toŋa Zeruzalema! Kel teŋ kəya seepeneŋ bə pa, aŋ golde bə waate minti kor də hulum toŋ harə la cəərə are pa, are bəlaŋ ba!»
29Səma Piyer də kaa kə vaa-veŋ hərnəy kel minti: «Are teŋ, are kir jeɓre haa ku Pepeŋ dəŋaŋ bə minti are jeɓre ku kaa kəsarkaŋ. 30Pep kə kəmoomo də áŋ gə dayday haraŋ Yeesu wəra dədərgə adordə meŋa. Haa Yeesu tó bə minti aŋ ɓəlnu wəra a kəbaŋ gə largaŋa, kəya aŋ əwnu wəraŋ. 31Haa tó bə minti Pepeŋ həənu warna apəy na bə ɗe isi a kəəsu kemeraŋ. Wə usnu Kumna Boblo, wə usnu Hulum bə seere kaŋ, kir minti kaanə *Israyel nakə la bə kole kirki a baymele neeteŋ daana bə fele vəəgi bə giidu cuuruŋ. 32Are, də Tiiru Cetcetaŋ də minti Pepeŋ a ayna a kaa kə daw kuŋ, are teŋ kəmnə də kəkəy də kel teŋ.»
33Bə minti kaa kəmtəŋ kə kaanə Ziwifiŋ əskəŋ kel teŋ kəyaŋ, yə koloŋ waŋ maŋ pisi kolə. Kəya yə ɗəkəŋ máŋ haa minti té awə kaa kə vaa-veŋ la wəra. 34Səma hulum kəman bə *Farisiyeŋ gud kaa kəmtəŋ gə jeme kəəti kə kaanə Ziwifiŋ ada toki, yə məntu minti Gamaleyel, faŋ apəya bə waate kela. Wə haa *hulum boblo bə hate ku gili kə Pepeŋ, kaŋ neŋneŋ keɗe jəw kese du. Kəya wə minti yə vaa kaa kə vaa-veŋ la wəra kəm tiilima bə isi anə sawəwa bagŋ. 35Kəya wə əsəŋ bə waate kaa kəmtəŋ kə kaanə Ziwifiŋ minti: «Aŋ kaanə Israyel, aŋ ɗəkə kel gə minti aŋ bele jəy də kaa teŋ la wəra kəm pisi. 36Hebkəna, paapa laate ablaw ba, hulum kəman yə məntu minti Tedasi, faŋ ne kəna tiinə kaŋa minti tó hulum pisi ba ga'i ba. Wə təɗaŋ kaa guudu kəna anə vələl pisi kəsi waaɗe. Ana kaŋ bə əwnu wəra nuutu də teŋ keɗe pa. Kəya kaa gə minti a jəŋ guuduŋ lama keɗe meereŋ wəra; hulum iskiniy simiy hõy bə waate a ko anə weseka pəda. 37Adordə hulum toŋa, hulum kəman bə Galile, sam toŋ minti Zudasi, pəŋ duru ne kəna də ko bə minti jeere bə kaŋ jəŋ pa. Wə haŋ kaŋ guudu anə cenen gəm. Səma kaŋ əwnu wəra akas bə ajewa ana gəm. Kəya kaa gə minti a jəŋ guudu keɗeŋ haraŋ bə meere wəra gəm. 38Haa taŋa, kel té gə minti bə jəəti hebkəna ha'aŋ, ten bele waataŋ kel ciiri minti: aŋ yaakə kəkəy də kaa teŋ la. Aŋ yəəkəy la, yə ɗee la. Jəəne minti ɗiki di bə ɗampə-ɗampeŋ daana joŋre neeteŋ bəŋ da ne ku tarmə kaa kəsarkaŋ da təwaŋ, ɗiki də joŋre toŋ bese yaŋ wəra a kəkəya boobo. 39Səma, jəəne minti Pepeŋ əynəy kəkəy bə ji kel teŋa haa toŋ, kel teŋ neke bə ɓalke wəra kaasəŋa ba. Aŋ amə kusrəŋ la pisi kir minti aŋ a kole kaa kə ɗele Pepeŋ waŋ ba!»
Kaa kəmtəŋ kə kaanə Ziwifiŋ doŋ haa də kel gə minti Gamaleyel wəətənəy diŋ. 40Kəya yə haraŋ bə mante kaa kə vaa-veŋ da. Yə vaŋ kaa ciiri, kaa teŋ lətnəy wəra kaŋkaŋ. Adoro yə wəətənəy minti yə a waate kel a kaŋ də sam Yeesu pəda anə hasi. Kəya yə haraŋ bə vaya faɗi. 41Kaa kə vaa-veŋ vaŋ warda giidə kuli kə kaa kəmtəŋ gə jeme kəəti kə kaanə Ziwifi da bə kooreŋ. Ku tərməyi jəŋ wəra də waale gud bə minti Pepeŋ wəra bə ɗəkə-ɗiki ciiri minti yə gə nakə-neke bə hale kel gə gul-gulaŋ gud sam Yeesu. 42Dər hitiŋa saksaki, yə kəm nuutu bə ɗeete ku Kuli kə Pepeŋa, kumundu ba aker na ger kaa na, bə ɗe a hate kaŋ daana bə wəətəy *Kel pəsaŋ kəmarwaŋa cəərə Yeesu, *Hulum bə minti Pepeŋ ŋəmnuŋ.
Currently Selected:
JOŊRE 5: KERNT05
Highlight
Share
Copy
Want to have your highlights saved across all your devices? Sign up or sign in
Texte de la Bible: Kera © Alliance Biblique du Tchad, 2004.