JOŊRE 4
4
Piyer daana Zaŋ tiinə kaa kəmtəŋ kə kaanə Ziwifiŋa
1Də ko bə minti anə Piyer daana Zaŋ kəm bə waate kela wəra a kaŋ, *kaa kə keere Pepeŋ, kəkamna də kaa kə gole cəərə *Kuli kə Pepeŋ daana kaanə *Saduseyeŋ#4.1 Kaanə Saduseyeŋ, yə paapa gə doo-de haa minti kaŋ hare yaŋ wəra dədərgə adordə meŋa ba. tuukuŋ ciiri ada faɗi. 2Tərməyi supniy wəra ablaw gud bə minti *kaa kə vaa-veŋ ɓasi keɗe bə hate kaŋa daana yə bə wəətiya minti: Yeesu Kristu haraŋ wəra dədərgə adordə meŋa səm moŋ, kaa kə mee-meŋ neke bə hare wəra dədərgə adordə meŋa gəm. 3Kəya yə tupnuy, yə kooroŋ diiri bə ɗe a vay a daŋgaya minti yə həə la ada na gud bə minti cəwaŋ wəra də darə-dere. 4Də teŋ keɗe, ablaw də kaa gə minti a əskəŋ kel kə waatə-waateŋ wəraŋ doŋ guudi. Kəya aŋke də kaa kə doo-deŋ zeŋ maŋ apəya kampar guɓ-guɓi wiiɗiwa.
5Ɗeŋ a deye dibiinim kəyaŋ, kəkamna kə kaanə Ziwifiŋ, də kaa kəmtəŋ gə tiinə kaŋ daana *kaa kə hate ku gili kə Pepeŋ, təpaŋ ciiri wəra Zeruzalema. 6A jəŋ adəwaldə kaa teŋa ha'aŋ, anə kumna boblo bə keereŋ, yə məntu Annə, də Kayifi, Zaŋ, Aleksandərə, də kaayaŋ gə ger *kumna boblo bə keere Pepeŋ neŋneŋ keɗe gəm. 7Kəya yə vaŋ kaa bə ɗe a humi kaa kə vaa-ve da warda tiiniy da. Kəya yə əsəŋ bə lay kuya minti: «Aŋ teŋ lakaŋ, aŋ seereŋ hulum bə hurufiŋ ha'aŋ də səɓaki məntə mo? Aŋ gaŋ haa sam mindi bə siiru wəraŋ mo?»
8Kəya Piyer bə ɗosə-ɗose də Tiiru Cetcetaŋ, hərnəy kel minti: 9«Aŋ kəkamnaŋ, aŋ kaa kəmtəŋ gə tiinə kaanə Ziwifiŋ, dayna aŋ bə le ku are cəərə pisi bə minti are juunu sar hulum bə hurufiŋa, minti hulum toŋ seereŋ wəra haa naanaanə seere mo? 10Bə hebkənaŋ ha'aŋ, aŋ keɗe, də kaanə Israyel neŋneŋ keɗe gəm, aŋ asə la wəra pisi minti: hulum toŋ gil tiiniŋaŋ wəra bə seerə-seere, wə seereŋ ha'aŋ də səɓaki də sam Yeesu bə Nazaretiŋ. Haa Yeesu tó bə minti aŋ a ɓəlnu wəra a kəbaŋ gə largaŋa daana bə minti Pepeŋ hərnu wəra dədərgə adordə meŋaŋ. 11Yeesu toŋ haa hulum bə minti Kefter kə Pepeŋ a waataŋ wəra cuuru minti: ‹Pərki tó bə minti kaa kə hərsiŋ a gəənu warna ha'aŋ, wə koloŋ pərki pisi bə deŋe kumsuŋ a hərsi bə kuliŋa haa tó ɗaw#4.11 Ps. 118.22.› 12Neke bə seere kaŋ haa Yeesu ɗaaməna faɗi. Gud maa mo Pepeŋ ayaŋ sam hulum baalaŋ a kaŋ kəna adawra kir minti áŋ falə seereŋ la guuduŋ pəda; wə ayaŋ ha'aŋ, sam Yeesu məna faɗi.»
13*Kaa kəmtəŋ gə jeme kəəti kə kaanə Ziwifiŋ ŋələŋ ablaw a kəkəy bə minti yə asaŋ anə Piyer daana Zaŋ bə waate kela wəra bay walkaŋ. Yə asaŋ wəra pəɗaki minti yə haa kaa akas kaa kaayaŋa ana gəm, kefter nuutu paapa də diri bə pa. Karman bə minti yə haraŋ bə ɗe a əsu siri ha'aŋ, haa bə minti yə a jəŋ kaa gə minti a jəŋ bə gəryiti də Yeesuŋ. 14Səma hel də minti yə harə kel la dəərəŋ a niini paapa də diri pəda, gud bə minti yə bə ase hulum bə minti a seereŋ wəraŋ ada gil sar anə Piyera daana Zaŋ toki faɗi pa.
15Kəya yə wəətənəy minti yə vaa la wəra, yə yaakə giidə kuli kə kaa kəmtəŋ gə jeme kəəti kə kaanə Ziwifiŋ la. Yə haraŋ bə ɗe a ke gədəəgi də kel adəwaldə kumsi. 16Yə əsəŋ bə waate kumsi minti: «Kaa teŋ, áŋ bə jəy la haa naanaanə mo? Gud maa mo, wəra də dər kaanə Zeruzalem neŋneŋ keɗe minti jəŋ miɗiŋ haa té. Bədoona ta, áŋ neke bə ce awəy naanaanə ce mo? 17Marya áŋ jəməy təbay la, áŋ hay kuy la wəra minti yə a waate sam Yeesu a hulum anə məna ba, kir minti kel teŋ a duusi warna minti kaa iskiy la ablaw ba.»
18Bə minti yə təwaŋ nele neeteŋ warda tawə, yə haraŋ bə mante anə Piyer da daana Zaŋ faɗi. Yə bəŋ a wəətəy minti: «Aŋ hebkəna ha'aŋ, kəkəy paapa cəərəŋa bə waate sam Yeesu daana bə hate sam toŋ a kaŋ ba anə ceki faɗi!» 19Səma anə Piyer daana Zaŋ hərnəy kel minti: «Aŋ gosə jamə kəəti toŋ la kəm aŋ də kusrəŋ mo: dər Pepeŋa pisi haa minti are doo la guudəŋa mo, are doo la guudu mo? 20Naareŋ haa səmaŋ, are neke bə yaake kel gə minti are əsnəy daana gə minti are iskiniy bay waate a kaŋ ba.» 21Kəya kaa kəmtəŋ kə kaanə Ziwifiŋ jəmnəy təbay pa, yə haraŋ bə vaya. Yə nəkaŋ bə fele disi də kel gə minti té jəy la diiri ba gud bə minti kaŋ neŋneŋ keɗe bə tokɗe Pepeŋa gud kel gə minti a jəŋ wəraŋ. 22Hulum bə minti seereŋ wəra də miɗi toŋ ha'aŋ, wə haa hulum bə minti laate du pisi hor-hor waaɗe mo, bədoona.
Toose bə minti kaa kə doo-deŋ tuusunuŋ
23Də ko bə minti anə Piyer daana Zaŋ vaŋ wəra vaa kəyaŋ, yə raawaŋ soki sar gədəəri gə doo-deŋ faɗi. Yə ɗeŋ a hare bə tupuy gud kel gə minti kəkamnaŋ kə *kaa kə keere Pepeŋ daana kaa kəmtəŋ gə tiinə kaanə Ziwifiŋ a wəətənəy di daŋ. 24Də ko bə minti yə əskəŋ kel teŋ əska tə pə moŋ, kaa kə doo-deŋ təpaŋ kuy ɗaaməna bə toose Pepeŋa minti: «Hulum bə hateŋ, jəŋ ko bə apəyaŋ, seŋkaŋ, kan kəmtəŋ, də kar gə minti giidiŋ keɗe, haa tam. 25Tam haa hulum bə minti gaŋ Tiiru Cetcetaŋ da bə bi a kole kel nəmti wəra ku moomo də are *Davidi, hulum bə joŋre nəmtiŋ, bə waate wəra minti ba:
‹Kaa gə minti teŋ paapa kaanə Ziwifiŋ baŋ hopte gəbyi bə maa mo?
Yə təpaŋ ciiri bə lese kusri bə jeme gud Pepeŋa bə maa mo?
26Kəkamnaŋ gə cəərə seŋkaŋ jaaraŋ wəra bə duuriŋ.
Kaa gə abay-abay doŋ ku kumsi bə jeme acukur wəra də Barkaŋ Pepeŋ,
də *Hulum bə minti wə ŋəmnu wəraŋ gəm#4.26 Ps. 2.1-2.›
27Kel teŋ jəŋ bədoona gəəzi. Anə *Erodi də *Ponsə Pilati təpaŋ kuy wəra də kaa gə minti teŋ paapa gə Ziwifi baŋ daana də kaanə *Israyel giidə kuli bə Zeruzalema kəna, bə jeme acukura wəra də Yeesu, hulum bə joŋre nəmti cetceti bə minti tam a ŋəmnu wəraŋ. 28Bədoona ta, yə doŋ wəra ha'aŋ ku kel gə minti tam a ɗikniy wəra hãã acekjewa minti yə ɗee la a ji bədoonaŋ. Tam ɗəkəŋ kel teŋ gud səɓaki nəmtiŋa daana gud bə minti giidim a bəlaŋ wəra minti yə jəə la bədoonaŋ. 29Bə hebkənaŋ ha'aŋ Barkaŋ, asə təbay də minti yə bə cəma a areŋ la gəm. Ayə səɓaki la a are, kaa kə joŋre nəmtiŋ, bə waatam kel nəmtiŋa wəra a kaŋ bay walka. 30Vaɗə səɓaki nəmti la wəra kir minti, də sam Yeesu, hulum bə joŋre nəmti cetcetiŋ, are seertə kaŋ la wəra, are jəətə kar gə məɗ-miɗi la, də kar gə ŋili kaŋ gəm.» 31Də ko bə minti yə ɗeŋ a tewe tooseŋ kəyaŋ, ko bə minti yə a təpaŋ ciiri laki adaŋ miiriŋ wəra ŋiɗ-ŋiɗ-ŋiɗi. Kəya Tiiru Cetcetaŋ ɗustiniy wəra keɗe, yə əsəŋ bə waate kel kə Pepeŋa máŋ wəra bay walka.
Kaa kə doo-deŋ tepe kar neeteŋ wəra məna'i
32Kaa kə doo-deŋ keɗe a jəŋ wəra gə doo-de ku kumsi anə kaŋkaŋ; ku tərməyi məna, ɗiki di məna gəm. Hulum anə məna guudi waataŋ hõy minti: «Karman katən kəya, wə katən bay cəərən», waataŋ hõy ba. Səma, kar gə minti aduubə diŋ, yə haa kar neete, yə ciiri tapi keɗe. 33*Kaa kə vaa-veŋ bə ji kəmnə də kəkəya də səɓaki ablaw minti: Barkaŋ Yeesu haraŋ wəra dədərgə adordə meŋa ŋaanaanə mo. Kəya Pepeŋ jəŋ pisiŋ siri neŋneŋ keɗe faɗi gəm. 34Hulum anə məna gud kaa kə doo-deŋa hagaŋ caaca də karman hõy ba. Gud maa mo kaa gə minti də akaŋ, kumundu ba də kuli kəəsiŋ, yə gustiy wəra. Soloy bə minti yə fəltu də kar teŋ kəyaŋ, 35yə bi a əyu a kaa kə vaa-veŋ. Adoro kəyaŋ, kaa kə vaa-veŋ hare bə ɓərsu wəra cəərə kaŋa. Hulum bə minti dər caacaŋa fele bə he kel kə suruŋ wəra.
36Bədoona ana, hulum kəman a jəŋ ada, yə məntu minti Zosefi. Wə haa a kaasaw də *Levi, wə waŋ giidə seŋka də Sipərəŋa. Hulum toŋ, kaa kə vaa-veŋ məlnu səmu minti Barnabasi. Gud sam toŋ haa minti: «Hulum bə teŋe dər kaŋ.» 37Wə gusuŋ aka də minti a jəŋ kəəsu wəra, wə humuŋ suŋku də da keɗe, wə bəŋ a əyu a kaa kə vaa-veŋ faɗi.
Currently Selected:
JOŊRE 4: KERNT05
Highlight
Share
Copy
Want to have your highlights saved across all your devices? Sign up or sign in
Texte de la Bible: Kera © Alliance Biblique du Tchad, 2004.