Mateo 7
7
Kebhui Kukulu Nɛ Ɔhayɛ
1“Tɛ kuluebhui nɛ anɔ, tɛ le be kulu nɛ wɔ tsyɛ. 2Alasɛ kana gɛ okuluebhui nɛ banɔ, kana le be kulu nɛ wɔ tsyɛ, klɛ kedzyidzyi nɔɔ nɛ gɛ ɔyɛkɔ odzyidzyi kɔ anɔ, kalɛ la ba yɛkɔ edzyidzyi kɔ wɔ tsyɛ.
3“Kide pɛ odoo di kishi bhli nɛ gɛ kpasɛ wɔhaɛ nɛ kɛwɔ̃hũ nɛ mɛ ɔkɔ, pɛ ɔshɛnahwɛ kesukpogunu nɛ gɛ ka kpasɛ wɔɛ yɛ nɛ mɛ nɛ shu? 4Kɛlɛ obo tsre wadzya sɛ, ‘Kɔ mɛ bu kishi nɛ kɛwɔhũ nɛ mɛ kɔ wɔ,’ nɛ kibe lɛ gɛ kesukpogunu alɛ wɔɛyɛ nɛ mɛ kibenyɛbe? 5Wɔ etroni, bu kesukpogunu nɛ wɔ kɛwɔ̃hũ nɛ mɛ, tɛ ɔmɔ mɔmɔ kɔ wadzya nɛ yɛ tɛbubu.
6“Tɛ yɛkɔ kɛdɔnɔɔ nɛ gɛ kɛlɛ shu bhui nɛ ɔkɔ bukudzɔgɛ, tɛ yɛkɔ wɔ kɛdɔ ŋɛŋaedzi nɛ ɔtɛɛ kpɛ kɔ bahɛ. Onu gɛ ɔbhɛtɛ ana, ba ba ga kɛlɛa bha nɛ balɛ ɛtsrɛ, klɛ le be tsyina atɔ wɔ klɛ la ba tswɛ wɔ mɛ akpɛ bupɛ pɛɛpɛ.
Bisi, Pɛɛ, Bho Opupu
7“Bisi tɛ ba kɔ wɔ, pɛɛ tɛ ɔmɔ, bho opupu tɛ ba danɛ akɔ wɔ. 8Alasɛ, anɔnyanɔ gɛ eebisi ayɛkɛ; agɛ apɛɛ kɛdɔ amɔɛ dɔ, klɛ agɛ eebho opupu ba danɛ akɔ yɛ.
9“Anee gɛ yeyi ebe bisi yɛ gbɛgbɛvu pɛ aba yɛkɔ kɛklãgbu akɔ yɛ? 10Ɔdɔgɔsɛ ebisi kɛkpã pɛ aba yɛkɔ eblidzya akɔ yɛ? 11Onu wɔnɔ, kɛlɛ lɛm sɛ nɔ tsɔmɔ pɔ, no ti kana gɛ nɔ bɔ yɛkɔ kɛdɔ dzyɔgo ɔkɔ wɔnɔ bunuvɔɛ, kɛlɛ ɔyɛkɔ dɛ wɔnɔ Aka nɛ owũsise nɛ ataa yɛkɔ kɛdɔ dzyɔgo akɔ bagɛ bee bisi yɛ! 12So, nɛ kibuinyɛbui mɛ, bhɛtɛ kibui ɔvɛnɔ anɔbhlatɔ kɔ ansɛ gɛ ɔpɛɛ sɛ babhɛtɛ amɛna wɔ kɔ, alasɛ kɛɛnɛ kɛlɛ xogo bhɛtɛ Ɔshã anɛ Batɔnu.
Budunu Shuɛ Nɛ Bunɛnɛ
13“Ga kidzo shuɛ nɛ otsoku. Alasɛ, kedunu nɛnɛ nɛ kidzo nɛnɛ kɛlɛ da yi buzizi mɛ, klɛ be gelee baa ga kɛlɛ etsoku. 14Pɔ kedunu bhli nɛ kidzo shuɛ kɛlɛ tɔnɔ vɛ ɛkpã mɛ, klɛ banɔ bhli teli ko ba la mɔɛ lɛ.
Osi Nɛ Ɔlɛ Eyuyu
15“No lu awɔ̃ nɛ itro batɔnu. Baa ba wɔnɔ amɛ nɛ ibhoshi buplukpa kɛdɔnyunyumu mɛ, pɔ nɛ kɛmɛ, be nu ayakpam bukudzɔgɛ tsutsɔmɔ. 16Ganɔ balɛ eyuyu nɛ mɛ nɔ bɔ yɛkɔ ɔkpɛ balɛ kɛxawũ. Ba gɔ omumɔɛ edenɔ magɔsim pɛ ɔdɔgɔsɛ ɔgɔ denɔ buli mɛ? 17Kana osi dzyɔgo kanyaka ooyu eyuyu dzyɔgo, pɔ osi kpã eyuyu kpã loo yu. 18Osi dzyɔgo ɔtɛ bo yu eyuyu kpã, klɛ osi kpã ɔtɛ bo yu eyuyu dzyɔgo. 19Osi kanyaka gɛ otoo yu eyuyu dzyɔgo be te ɔlɛ ebho klɛ baa yɛkɔ atɛ̃ akpɛ kifum. 20Kɛlɛ so, ganɔ balɛ eyuyu nɛ mɛ ɔbɔ yɛkɔ ɔkpɛ balɛ kɛxawũ.
21“Ganɛ anɔnyanɔ gɛ eekulu mɛ asɛ, ‘Apalete, Apalete,’ yɛ ebe tsoku bukusi ɔŋakɔ nɛ owũsise, pɔ aanɔ nɛ gɛ aabhɛtɛ atrɔ mɛ Aka nɛ gɛ alɛ owũsise nɛ tɛpɛpɛa bha. 22Bee gelee aba ɖɔ etsre mɛ nɛ kiwi lɛ nɛa bha sɛ, ‘Apalete, Apalete ganɛ wɔɛ nyi mɛ lɔɔ ɖɔ ebui lu, klɛ lɔ kɛka ɛfufɔɛkpã bu klɛ bu bhɛtɛ ebui gɛ eyinɔ anɔ gelee?’ 23Kɛlɛ mɛ ɛba tsre alɛ wee sɛ, ‘Itinyi nɔ. Nɔ tsuvɛ nɛ mɛ ɔbha, wɔnɔ ebuikpã bhɛbhɛtɛ elete!’
Ebuinyi Nɛ Agã Bevudzu
24“Kɛlɛ so anɔnyanɔ gɛ enu mɛ ebuia nɛ, klɛ ayɛkɔ alɛ akpɛ tɛbhɛbhɛtɛ mɛ asɔnɔ anɔ nyinyibui gɛ edzu buvu atrɔ kɛklãgbua bha. 25Subha aba dɔ, nɛ budekeni, klɛ kɛlɛɛ ba fu hunɔ buvu; tsyɛ bɔdɛ kpa, alasɛ buvu nɛ bu denɔ bɔlɛ kesikpɛkpɛ nɛ kɛklãgbua bha. 26Pɔ anɔnyanɔ gɛ enu mɛ ebuia klɛ adɛ yɛkɔ kpɛ tɛbhɛbhɛtɛ mɛ asɔnɔ agã gɛ edzu buvu atrɔ anyɛsɛa bha. 27Subha aba dɔ, nɛ budekeni, klɛ kɛlɛɛ nɛ ba fu hunɔ buvu klɛ butsra.”
28Gɛ Yesu aɖɔ ebuia nɛ beke, yɛ kɛdɔkɛkasɛ nɛ bhɛtɛ banɔɛza nɛ bi, 29alasɛ akasɛ kɛdɔ ansɛ anɔ gɛ kabhaŋɛŋa ka lɛ yɛ ahwɛ, klɛ ganɛ ansɛ balɛ ɛshãdɔkasɛ.
Currently Selected:
Mateo 7: tcd
Highlight
Share
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation