Matius 1
1
Yesus Kristus pe orang tua dulu-dulu pe turunan
(Luk. 3:23-38)
1Yesus Kristus itu turunan dari raja Daud deng bapa Abraham. Ini Dia pe orang tua dulu-dulu pe nama-nama:
2Abraham pe ana Ishak,
Ishak pe ana Yakub,
Yakub pe ana Yehuda,
deng Yehuda pe sudara-sudara yang laeng.
3Yehuda pe ana Peres deng Zerah, dari dia pe bini Tamar.
Peres pe ana Hezron,
Hezron pe ana Ram,
4Ram pe ana Aminadab,
Aminadab pe ana Nahason,
Nahason pe ana Salmon,
5Salmon pe ana Boas dari dia pe bini Rahab,
Boas pe ana Obed dari dia pe bini Rut,
Obed pe ana Isai,
6kong Isai pe ana Daud.
Daud itu yang jadi orang Israel pe raja.
Daud pe ana Salomo dari dia pe bini Batsyeba. Batsyeba itu Uria pe bini dulu.
7Salomo pe ana Rehabeam,
Rehabeam pe ana Abia,
Abia pe ana Asa,
8Asa pe ana Yosafat,
Yosafat pe ana Yoram,
Yoram pe ana Uzia,
9Uzia pe ana Yotam,
Yotam pe ana Ahas,
Ahas pe ana Hizkia,
10Hizkia pe ana Manasye,
Manasye pe ana Amon,
Amon pe ana Yosia,
11 #
2Raj. 24:14-15; 2Taw. 36:10; Yer. 27:20 kong Yosia pe ana Yekhonya deng ana-ana laeng waktu bangsa Israel dapa buang di Babel deng dapa jaja di sana.
12Turus, waktu bangsa Israel so pulang dari Babel,
Yekhonya pe ana Sealtiel,
Sealtiel pe ana Zerubabel,
13Zerubabel pe ana Abihud,
Abihud pe ana Elyakim,
Elyakim pe ana Azor,
14Azor pe ana Zadok,
Zadok pe ana Akhim,
Akhim pe ana Eliud,
15Eliud pe ana Eleazar,
Eleazar pe ana Matan,
Matan pe ana Yakub,
16kong Yakub pe ana Yusuf.
Yusuf ini yang kawing deng Maria,
kong Maria ini yang kase lahir pa Yesus.
Yesus ini suda yang orang jaga pangge pa Dia Kristus, Raja yang Tuhan Allah janji mo kase slamat pa manusia.
17Jadi mulai dari Abraham sampe pa raja Daud, ada ampa blas turunan. Dari raja Daud sampe waktu bangsa Israel dapa buang deng dapa jaja di Babel, ada ampa blas turunan lagi. Kong dari bangsa Israel hidup di Babel sampe waktu Yesus Kristus lahir, ada ampa blas turunan.
Yesus Kristus lahir
(Luk. 2:1-7)
18 #
Luk. 1:27
Yesus Kristus lahir, pe carita bagini: Maria, Yesus pe mama itu so baku janji mo kawing deng Yusuf. Maria ini bolong tau laki-laki, tau-tau dia so hamil. Maria hamil karna Roh Kudus. 19Yusuf ini orang yang hidup butul pa Tuhan Allah pe muka. Waktu dia tau Maria hamil, dia barencana dalam hati mo kase tinggal pa Maria deng babadiam. Barang, dia tara mau biking malu pa Maria di orang banya pe muka.
20Tapi waktu Yusuf masi pikir-pikir dia pe rencana itu, Tuhan Allah pe malaekat datang pa dia dalam mimpi, kong bilang pa dia, “Yusuf, raja Daud pe turunan. Ngana tara usa tako ambe pa Maria jadi ngana pe bini, karna ana yang ada pa dia pe dalam puru itu dari Roh Kudus. 21#Luk. 1:31Maria mo melahirkan ana laki-laki satu. Kong ngana musti kase nama pa ana itu Yesus,#1:21: Nama Yesus pe arti, ‘Tuhan kase slamat manusia’. barang Dia itu nanti yang mo kase slamat pa Dia pe umat dari dorang pe dosa-dosa.”
22Samua itu Tuhan Allah so bilang dulu pa Dia pe nabi, kong skarang samua itu so jadi. Yang Tuhan Allah bilang itu bagini, 23#Yes. 7:14“Nanti ada nona satu yang bolong tau laki-laki, mo hamil. Dia mo kase lahir ana laki-laki satu, kong orang-orang mo pangge pa Anak itu, Imanuel.” (Imanuel dari kata Ibrani, yang pe arti, ‘Tuhan Allah ada sama-sama deng torang’).
24Bagitu Yusuf bangun tidor, dia biking samua yang Tuhan Allah pe malaekat bilang pa dia. Dia ambe pa Maria jadi dia pe bini. 25#Luk. 2:31Tapi Yusuf tara tidor sama-sama deng Maria sampe Anak itu lahir. Bagitu Anak itu so lahir, Yusuf kase nama pa Dia, Yesus.
Currently Selected:
Matius 1: PB MMU
Highlight
Share
Copy
Want to have your highlights saved across all your devices? Sign up or sign in
Perjanjian Baru Bahasa Melayu Maluku Utara @ Lembaga Alkitab Indonesia 2020