San Mateo 2
2
Ca benni te elha rien guecani guanalhicana Jesús
1Atti rinnabia Herodes, lania nua uli Jesús lheꞌesi lá Belén nu re lo yu te láni Judea. Lania nna bisína ttulhe ca benni te elha rieni guecani lheꞌe yiesi Jerusalén, ca unnuha nna dacana daca atta riria tatubisa-na. 2Lacana nna unnaba tisacana rácana:
—¿Na unto chi ulbaha, Benni aca nu innabia gue ca benni Israel-ni? Cumu riꞌitu nna chi bilentu beli nu riguixxiꞌa gue Ben-na, biríana daca atta riria tatubisa-na. Denuala nna datu nii qui udú xibitu loe.
3Atti bienin Herodes nu rá ca nua nna attulade bichacha iquini, anáguaba ca benni seꞌe Jerusalén lhe. 4Laniala uxi Herodes iyába ca nu lo gue ca bixxudiha, ca nu ruleꞌe nu rá lo ca ley bocaꞌana Moisés lhe qui unnaba tisana ca unnuha gue gaxa gali Benni anque Cristu. 5Ca unnuha nna becabicana rácana:
—Lheꞌesi lá Belén nu re lo yu gue Judea-ni, nía gali Benniha, cumu anába rá lo ca sitsi beni profeta gue Tata Do Iyyabaaha. Biꞌiniha nna rábi:
6Lu, lheꞌesi Belén, nu re lo yu gue Judá,
tsa läga ancalu yiesi chicaꞌaru re lagüi gue adí ca yiesi xeni seꞌe lo yu gue Judá,
cumu lagüi gue ca benni guelha iría ttu Benni aque nu innabia.
Benniha nna nnerue lo ca benni quia anca benni Israel.#2:6 Miqueas 5:2
7Herodes nna uxttebana ca nu te elha rieni guecaniha ttu atta gatsi qui unnaba tisa tseena ca unnuha gue nucattiga ucaxxe beliha. 8Laniala udhelhana ca unnuha Belén, nianna rán ca unnuha:
—Gualtsia nna tsee tseeru gualinnaba tisa gue untoha. Gansi chi guattiꞌale nua nna ettettixxiꞌenle neti qui anáguaba neti tsiaguaba sadú xibia loni.
9Ca unnuha nna dequide chi ubienquinna nu rá Herodes, uluꞌuttebacana neda diacana. Beli nu biláquinna ucaxxe daca atta riria tatubisa-na diabana neruna locani, axta liba bisínna lhixxa xequi atta te untoha, lania liba nna gualedana. 10Atti biláni ca nu te elha rieni guecaniha chi gualheda beliha nna attulade beꞌo tsitsia lecani. 11Atti utaꞌacana lheꞌe yoꞌoha nna biláttebaquinna untoha lenie nan guee, María. Laniala nna bedú xibicani lo Benniha, ulequi xencane lhe. Nianna udhalttebacana roꞌo ca nu nujacanaha, qui betecana len Benniha oro lhe yala lhe seti nu rure xixxi te láni mirra lhe. 12Lenla nna bitsiattebaquinna yiela rá Tata Do Iyyabaaha cana, bitturu eyequicana etecana atta do Herodes. Larcala nna attu neda subiba bodaxxucana deyyacana lheꞌe yies guecaniha.
Ca tata nan gue Jesús bexunni lencabi Benniha diacabi Egipto
13Dequide chi deyya ca nu te elha rieni guecaniha nna bitsiattebani José ttu yiela. Lo yiela guebiha nna ucaxxe ttu ingeli gue Tata Do Iyyabaaha rábi:
—Guadha, bedaxxu unto-na lenie nan guee-na, bexunni lenque güia daca lo yu te láni Egipto. Níaba udo axta liba quixxiꞌatia lu nucaxa edálu nía, cumu Herodes idhelhana ca nu eguilacana unto-na qui utticane.
14Laniala nna guadhatteba José lo rela lenbi María, bedaxxuttebacabi untoha dia lencabi Benniha Egipto. 15Níaba useꞌecabi axta liba utti Herodes. Aníaba uca qui guaxxína ca tisa betee Tata Do Iyyabaaha leni benni uca profeta guee. Biꞌiniha nna unnebi rábi: “Egiptoli do Xiꞌiniha atti beaxie.”#2:15 Oseas 11:1
16Atti chi utedaani Herodes uxíyiaba ca benni te elha rieni guecaniha na, bisaꞌatsitsiabinna. Nianna benttebana mandadu utticana iyába ca unto chicaꞌa anca unbiyuu, desdeba ca nu chi ulba axtaba ca nu chi ancani chupa ida seꞌe lheꞌesi Belén leni adí ca lheꞌesi seꞌe sabiꞌaba nía. Lana nna bedaxxu niꞌani nu utixxiꞌa ca benni te elha rieni gueniha. 17Lania guaxxína uca nu utixxiꞌa profeta Jeremías, atti rábi:
18Lheꞌesi lá Ramá bieni tsiꞌi ttu benni
ribesiꞌana, rixxaxxatta roꞌoni lhe ribes güena lhe de relenixxattinna.
Raquelba nua ribesixxattana gue ca xiꞌinniha.
Lana nna tsaba bittu raca leni edína elha xen lasi,
cumu utti ca xiꞌiniha.#2:18 Jeremías 31:15
Ca tata nan gue Jesús besincabi lheꞌesi Nazaret
19Dequide chi utti Herodes, atti sna doba José lo yu lá Egipto nna labi nna bitsienbi ttu yiela. Lo yiela guebiha nna ucaxxe ttu ingeli gue Tata Do Iyyabaaha. 20Ingeliha nna rábi José:
—Guadha beche unto-na lanie nan guee-na, gualequi gualeyya lo yu gue ca benni Israel, cumu chiba utti ca nu rdacacana utticana unto-na.
21Lania nna guadha José lenbi María deyya lencabi untoha deca Israel. 22Ttiaca atti bina José dequi xiꞌinbiyuu Herodes nu lá Arquelao, unnuhaba rinnabiana lo yu te láni Judea cuenta gue tata gueniha, labi nna usinbi eyyabi nía. Dequide utixxiꞌen Tata Do Iyyabaaha bi lo bisiela guebi bixa anca nu unbi nna deyyattebabi lo yu te láni Galilea. 23Atti chi besinbi nía nna beyyattebabi guadobi lheꞌe yiesi lá Nazaret. Anía uca qui guaxxína nu chi rá ca profeta gue Tata Do Iyyabaaha, atti rácabi: “Jesús gatta lee nazareno”.
Currently Selected:
San Mateo 2: zaq
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.