योहन 20
20
येसु मल्स जीवा अरयह्तोग़
(मत्याल 28:1-9; मार्कल 16:1-9; लूकाल 24:1-10)
1मूंड दियाने, इतेके वारमता मुनेता दिया ऐतारम,#बळयिर 20:7; 1 कुरिंततोर 16:2; तोहचीतव पोल्लोङ 1:10 कोग़ कूसेङ पिङपङ आयनामुनेने, मग्डला नाटेनद मरियाल इनदनदु, गुमयातगा वाता. अस्के गुमयाता अग़दुह्क तिळ्ह्प कीस मतद बंडा, ओर्के तेंडिस मतद तान्क दिसता. 2अस्के सिमोन पत्रुनके ओसो येसु पका जीवा कीतोग़ कग़यवानके, अद वित वाता, वासि इता, “ओरु सामिना सेत्तातुन गुमयातग्डाह ओतोर, ओसो अदिन बेगा तासतोरो, अद माक तेळियो” इता. 3इदिन केंजिसि, ओर इर्वुर गुमयातके दायलाह पेसतोर. 4अस्के ओर इर्वुर आसि ऐंगे वित बोटटोर. इह वितेङ, अह वितेङ, पत्रुना तोळतोग़ गुमयातगा मुने एवतोग़. 5एव्सि, ओल्लिस ऊळनेके, ओन्क सिरपि हामुर-गेंदेङ अर्स मतव दिसताङ, मति ओग़ लोप्पा नेङोग़. 6-7गळ्क मनेके, सिमोन पत्रु वने ओना पयाह एवतोग़. एव्सि तुर्म्ने लोप्पा नेङतोग़, नेङिसि हामुर-गेंदेङ अरतविन ऊळतोग़. ओसो सेत्ताता तलातगा ऊर्हच मतद दुपटि,#11:44 हामुर-गेंदेना एरे इले, मति ओर्केडा बाजे गीळ आसि अर्स मतदिन ओग़ ऊळतोग़. 8पया दुस्रोग़ कग़यवाल वने लोप्पा नेङिसि अविन ऊळतोग़, ऊळिसिये येसु जीवा अरतोग़ इन्जि, विस्वस कीयलाह आतोग़. 9बाराह्क इतेके येसु हामुरताहि ओसो जीवा अरयनद गावले, इद्रम सास्त्रमते रासिस मतद पोल्लो, ओरिह्क अचानाहि तेळियवाय मता.#लूकाल 24:26-27,46; बळयिर 17:3 10पया ओर इर्वुर मल्सि, तमाङ लोह्क अतोर.#लूकाल 24:12
11अचोटेने मरियालि (गुमयातेहु मल्स वाता,) अगाने अळसोरे पलते निच मता. पया अळसोर-अळसोर, अद गुमयातेह माळ्किस ऊळता. 12ऊळतस्के, येसुना सेत्तातुन तासिस मतद जागाते, पोळ्दलेह्का मांजतप पांड्रि गेंदेङ केग़तवु रेंड देवतुल्कु उंद बारा तलावडातेके, उंद बारा कालवडातेके, उदिस मतव तान्क दिसताङ. 13अव पया तान इताङ, “बाराह्क अळयह्निन बायि?” इताङ. “ओरु नावा सामिना सेत्तातुन ओतोर, ओस अदिन बेगा तासतोरो, पुनोन इनजोर अळयह्नन,” इन्जि मरियालि अविस्किन इता. 14अह इन्जि अद पेग़्के मल्स ऊळता, मल्स ऊळनेके, अगा येसु निच मतद तान्क दिसतोग़. मति ओग़ येसुये इनजोर अद पुनो.#लूकाल 24:16; योहन 21:4 15अस्के येसु तान इतोग़, “बाराह्क अळयह्निन? बोन पर्ह्किह्निन?” ओग़ वाळुमतुन ऊळेवाळे केवाल मनदनोग़ बहे इन्जि, ओन इता, “दादा, निमा ओना सेत्तातुन इग्डाह ओतेके, तान बेगा तासतिन, इद नाक वेहा. अस्के नना अदिन ओसि, (ओसो बेस पोहतकन),” इता. 16येसु पया तान “मरिया!” इनजोर केयतोग़, अस्के अद पेग़्के मिळ्न्दिस येसुन पुता, पुन्जि ओन इब्रि पोल्लोते “रबोनि!” (इतेके “नावा गूरु”) इनजोर इता. 17अस्के (मरियालि ओनाङ काल्क अरताह्कु,) येसु इतोग़ “नावाङ काल्किन ओग़्ङिस मनमा मरिया, बाराह्क इतेके नना इंका वने बाबानेके पोग़ोन अनोने#7:33; 14:12,28; 16:5,10,17,28; 17:11,13. मति निमा मावोर कग़यवालोरेके अन्जि ओरिन वेहा, ‘मीवा-नावा बाबानेके,#इब्रितोर 2:11 मीवा-नावा देवुळतके नना पोग़ोन दाय्ह्नन,’” इन्जि येसु तान वेहतोग़. 18अस्के मग्डला नाटेना मरियाल अन्जि, “नना येसुसामिन ऊळतन, ओग़ नाक इद्रम-इद्रमताङ गोटिङ वेहतोग़,” इनजोर अद ओर कग़यवालोरिह्क वेहता.#मार्कल 16:10; लूकाल 24:10,23
येसु तनाङ कग़यवालोरिह्कु दिसिह्तोग़
19अदे ऐतारमता दिया मुलतस्के, यहुदिराङ पेदल्किन रेयिसि,#7:13; 9:22; 12:42; 19:38 ओर कग़यवालोर अरातगा तेल्प केहच तालम ईसि मकिस मनदह्पा, येसु अगा वासि लोप्पा नेङतोग़. नेङिसि, ओरगा नडुम निचि, ओरिन इतोग़, “मीक सुकम दोर्कि, रेयमाटु!”#1 कुरिंततोर 15:5 20इनजोर वेहचि, ओरिन तनाङ कय्कनाङ ओसो सेंकाता देबान तोहतोग़.#लूकाल 24:39-40; योहन 19:34; 20:27 सामिन ऊळिसि ओरिह्क गिर्दा वाता.
21ओसो उंद मल्का येसु ओरिन इतोग़, “मीक सुकम दोर्कि, रेयमाटु! बहलेह्का बाबाल नाक इद दुनियाते लोहतोग़, अहलेह्का नना वने मीक दुनियाते लोहतह्नन.#मत्याल 10:16; लूकाल 10:3; योहन 4:38; 17:18” 22इद्रम वळ्ह्किसि ओग़ ओरिन ऊकुर ऊरतोग़, अह कीस इतोग़, “नना मीकु देवुळता पवित्र जीवा ईय्ह्नन. 23तेना अदिकरते मीटु बोनाय पापमतुन मापि कीतिर इतेके, देवुळ वने ओना पापमतुन मापि कीताये. ओसो पवित्र जीवाता अदिकरते बोना पापमतुन मीट मापि केविर इतेके, ओग़ मापि आयवाय मनदनोग़,” इन्जि इतोग़.#मत्याल 16:19; 18:18
तोमाल उन्क-मन्क आस्तोग़
24ओर बळयिर बारा मन्कलोरग्डाहि, ओर्वोग़ तोमाल इनवाल मतोग़, ओन दिदुमि (इतेके एमोह पेकाल) वने इंदुर.#11:16 येसु वातोग़ अस्के, ओग़ तोमाल ओरा संगे इलेग़ आसि. 25अदिह्क ओग़ वातस्के, “माट सामिन ऊळतोम, रा!” इनजोर ओन ओर वेहतोर. तेला मति ओग़ सेतेम पोयोग़, ओग़ इतोग़, “ओनाङ कय्कनगा मोल्लाना देबानु ऊळवालेवा, अगा वेळ्न्ज तोग़्किसि ऊळवालेवा, ओसो ओना सेंकाता देबातुन कय बोयिस ऊळवालेवा, ओग़ येसुसामिये आंदोग़ इन्जि, नना मुर्तिय नमोन,”#मार्कल 16:11; लूकाल 24:11 इनजोर इतोग़.
26पया वारममेटा पेग़्के, ओर कग़यवालोर ओसो लोनलोप्पा मनेके, तोमाल वने ओराय संगे मतोग़. अस्के तेल्पिङ केहच तालम ईसाय मति, येसु ओरा नडुम वास निच इतोग़, “मीक सुकम दोर्कि, रेयमाटु!” 27पया ओग़ तोमान इतोग़, “निमा नीवा वेळ्न्जतुन नावा कयदा देबातगा तोग़्किस ऊळा. ओसो नीवा कय इके मुनेह कीसि, नावा सेंकातगा बोयिस ऊळा.#लूकाल 24:40; योहन 20:20 अह कीसि, निमा नमवोना लेह्का मनमा, मति उन्क-मन्क आयवा, विस्वस कीमु,” इनजोर इतोग़. 28इतस्के “ओ नावा सामिनिन, नावा देवुळतिन!” इन्जि तोमाल येसुन इतोग़. 29“निमा नाकु ऊळताह्कु विस्वस कीतिन, तोमा. मति बोर नाक ऊळवाय विस्वस कीस्तोर, ओर देय्वातोरु!”#1 पत्रु 1:8 इन्जि येसु तोमान इतोग़.
30इद पुस्तकते रासववु, ओसो वेल्लाङे बामिह कीयनाङ सीनाङ, येसु तनाङ कग़यवालोरा मुनेह कीस तोहतोग़.#21:25 31मति इव पोल्लोङ बाराह्क रासिस मन्ह्ताङ इतेके, देवुळ लोहतोग़ पिसिह केवाल राजाल येसुये आंदोग़, ओसो ओग़े देवुळता मग़ आंदोग़ इन्जि मीट नमना.#19:35 इद्रम नमतेके, मीक येसुना संगे अमेसाता पिसमुळ दोर्कग़ा.#3:15-16,36; 5:24; 6:47; 11:26
Currently Selected:
योहन 20: माडियाबाय्बल
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.