Juan 7
7
Wawqinkunapis Jesúsman mana creyiyanqan
1Tsaypitanam Galileachö markakunapa Jesús yachatsikur purirqan. Israel autoridäkuna wañutsiyta munayaptinmi Judea provinciaman aywayta munarqantsu.
2Israel runakunapa Ramäda fiestankunapaq#Lev. 23.34; Deut. 16.13. juk ishkay junaqllana faltaykaptinmi 3wawqinkuna Jesústa niyarqan: <<Milagru ruranqaykita discïpuluykikuna rikäyänanpaq Judeaman ayway. 4Reqishqa kayta munarqa manam kayllachötsu milagruta rurankiman, sinöqa llapan runakuna rikäyänanpaq ruray>>.
5Jesúspa wawqinkuna payman mana creyirmi tsaynö niyarqan.
6Tsaymi wawqinkunata Jesús nirqan: <<Noqa aywanäpaqqa manam hörä chämunraqtsu. Peru qamkunam sïqa imay hörapis aywayankiman. 7Qamkunataqa runakuna manam chikiyäshunkitsu. Peru noqatam sïqa rurayninkuna mana alli kanqanta niptï chikiyäman. 8Tsay fiestamanqa qamkunalla aywayay. Noqa aywanäpaqqa manam hörä chämunraqtsu>>.
9Tsaynö nirmi Galileachö Jesús quëdarqan.
Ramäda fiestaman Jesús aywanqan
10Peru wawqinkuna aywaskiyaptinnam Jesúspis tsinkayllapa Ramäda fiestaman aywarqan. 11Fiestachö Jesústa ashirpis mana tarirmi Israel autoridäkuna niyarqan: <<¿Maychöraq tsay runa kaykan?>>
12Jerusalénchö qorikaq wakin runakunam niyarqan: <<Jesúsqa alli runam>>.
Peru wakinnam niyarqan: <<Mana allitam yachatsikun>>.
13Israel autoridäkunapita mantsakurmi kikinkunapuralla tsaynö parlayarqan.
14Pullan fiestachö kaykäyaptinmi templupa patiunman yaykuskir Jesús yachatsikur qallaykurqan. 15Yachatsikunqanta wiyarmi Israel runakuna mantsakar niyarqan: <<Ley yachatsikuqkunawanpis mana puriykarqa ¿imanötan kay runa kayläya yachan?>>
16Jesúsnam nirqan: <<Yachatsikunqäqa manam yarpaylläpitatsu, sinöqa kachamaqnï Dios Yayapitam. 17Pipis Dios Yaya munanqanta rurayta munarqa yachatsikunqäkuna Diospita kanqanta o yarpaylläpita kanqantam tantiyanman.
18<<Kikinkunapa yarpayllankunapita yachatsikuqkunaqa aläbashqa kayta munarllam yachatsikuyan. Peru noqam sïqa kachamaqnï Dios Yaya alabashqa kananpaq rasun kaqllata yachatsikü. 19Qamkunaqa Moisés qellqanqan leykunata chaskirpis manam ni mayqayki cumpliyankitsu. ¿Imanirtan wañutsiyämayta munayanki?>>
20Runakunanam niyarqan: <<¡Supaychi löcuyaykätsishunki! ¿Pitan wañutsiynikita munan?>>
21Jesúsnam nirqan: <<Jamay junaqchö milagruta ruranqäpitam#Juan 5.1-9. rabyashqa kaykäyanki. 22Mä, tantiyakuyay. Ollqu wamrata señalanapaqmi Moisés yachatsikurqan.#Lev. 12.3. (Moisés yachatsikuptinpis tsay costumbriqa Abrahampitam karqan.)#Gén. 17.10. Moisés qellqanqankunata cumplir ¿manaku jamay junaq kaptinpis ollqu wamrata señalayanki? 23Ollqu wamraykikunata jamay junaq kaykaptinpis señalaykarqa ¿imanirtan rabyaykäyanki qeshyaykaq runata jamay junaqchö kutikätsinqäpita?#Juan 5.9-10, 16. 24Shumaq mana tantiyaykarqa mana allikunata ama parlayaytsu. Shumaq tantiyakurraq imatapis parlayay>>.
Maypita kanqanta Jesús willakunqan
25Tsaymi Jerusalénchö täkuq wakin runakuna niyarqan: <<¿Manaku kay runaqa wañutsiyänanpaq ashiyanqan? 26Llapanpa puntanchö yachatsikuptinpis manatsaq pipis ima nintsu. ¿Dios Yaya kachamunqan Cristo kanqantatsuraq mandakuqkunapis yarpaykäyan? 27Peru noqantsikqa may markapita kanqantam musyantsik. Dios Yaya kachamunqan Cristo shamuptinqa maypita kanqantapis manam ni pï musyanqatsu>>.
28Tsaynö parlayanqanta musyaskirmi templupa patiunchö yachatsikuykar Jesús jinchi nirqan: <<Pï kanqäta reqiyämaptiki y maypita shamunqäta musyayaptikipis manam kikïpa munaylläpitatsu shamushkä, sinöqa Dios Yaya kachamaptinmi. Paytaqa manam reqiyankitsu. 29Pay kachamashqa kaptinmi noqaqa reqï>>.
30Tsaynö niptinmi autoridäkuna Jesústa prësu achkuyta munayarqan. Peru manaraq höran kaptinmi achkuyarqantsu. 31Atskaq runakunam payman creyikur niyarqan: <<Dios Yaya kachamunqan Cristo shamur kay runa milagruta ruranqanpita ¿mastatsuraq ruranqa?>>
Fariseukuna Jesústa prësu achkuyämunanpaq kachayanqan
32Jesúspaq parlayanqanta wiyaskirmi mandakuq sacerdötikunawan fariseukuna Jesústa prësu achkuyämunanpaq templu täpaq wardiakunata kachayarqan. 33Manaraq chäyaptinmi Jesús nirqan: <<Pöcu tiempullanam qamkunawan kashaq. Kachamaqnï kaqmannam aywakushaq. 34Noqa aywanqämanqa manam aywayta puëdiyankitsu. Ashiyämarpis manam tariyämankitsu>>.
35Jesús tsaynö niptinmi Israel autoridäkuna kikinkunapura ninakuyarqan: <<Mana tarinapaqqa ¿mayparaq aywanqa? ¿Juklä nacionchö täkuq marka majintsikkunamantsuraq yachatsiq aywanqa? Tsaychöqa talvezchi griego runakunatapis yachatsinqa. 36¿Imanirtan <ashirpis manam tariyämankitsu> nimantsik? ¿Imanirtan <aywanqäman manam chayta puëdiyankitsu> nimantsik?>>
Kawatsikuq yakupaq ninqan
37 Ramäda fiesta diya junaqnam#Lev. 23.36; Núm. 29.35. llapan runakuna wiyayänanpaq Jesús jinchi nirqan: <<Pipis yakunaq kaqqa noqaman shamur upyatsun.#Juan 4.13-14. 38Dios Yayapa palabran ninqannömi noqaman creyikamuqkunapa shonqunpita kawatsikuq yaku mayunöraq pashtamunqa>>.
39Tsaynö nirmi Jesús tantiyatsirqan payman creyikuqkuna Espíritu Santuta chaskiyänanpaq kanqanta. Tsay witsayqa Espíritu Santu manaraqmi shamurqanraqtsu. Gloriaman Jesús kutiskiptinraqmi shamurqan.
Runakuna rakikäyanqan
40Jesús tsaynö ninqanta wiyaskirmi wakin runakuna niyarqan: <<Moisés ninqannö shamunanpaq kaq profëtam payqa>>.#Deut. 18.15, 18.
41Wakin runakunam niyarqan: <<Payqa Dios Yaya kachamunqan Cristum>>.
Wakin kaqnam niyarqan: <<¿Imanöpatan Galileapita Cristo shamunman? 42Dios Yayapa palabranmi nin rey Davidpa castanpita Cristo kanqanta.#2Sam. 7.12-13; Sal. 89.3-4; 132.11-12. Tsaynöllam nin David täkunqan Belénchö yurinanpaq kanqanta>>.#Miq. 5.2.
43Tsaynö nirmi Jesús janan rakikäyarqan. 44Wakin kaqkuna prësu achkuyta munarpis manam ni mayqan achkuyta valorayarqantsu.
Israel autoridäkuna mana creyiyanqan
45Tsaypitanam mandakuq sacerdötikunawan fariseukuna kayanqanman templu täpaq wardiakuna kutiyarqan. Chaykuyaptinmi niyarqan: <<¿Imanirtan Jesústa prësu apayämushkankitsu?>>
46Wardiakunanam niyarqan: <<¡Pay parlanqannöqa manam ni pipis parlantsu!>>
47Tsaynö niyaptinmi fariseukuna niyarqan: <<¿Hasta qamkunatapis engañaskiyäshurquykiku? 48Tsay runataqa manam mayqan autoridäkuna ni fariseukunapis creyiyantsu. 49Moisés qellqanqan leykunata mana yachaq runakunallam paytaqa creyiyan. ¡Tsay runakunaqa maldicionädum kayan!>>
50Tsaynö niyaptinmi Jesúsman aywaq fariseo runa Nicodemo#Juan 3.1-2. nirqan: 51<<Leynintsikkuna ninqannömi pitapis juzganapaqqa kikin parlanqantaraq puntata wiyashun y ruranqankunataraq shumaq musyashun>>.
52Tsaymi fariseukuna niyarqan: <<¿Qampis favornin shärinaykipaq marka majinku kanki? Maski Dios Yayapa palabranta shumaq liyiy. ¡Manam imaypis nimantsiktsu Galileapita profëta kanqanta!>>
53[Tsaypitanam wajinkunapana llapan kutikuyarqan.
Currently Selected:
Juan 7: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.