Juan 2
2
Yakuta vïnuman Jesús tikratsinqan
1Tsaypita kimsa junaqtanam Galilea Caná markachö juk runa casararqan. Tsaychömi Jesúspa mamanpis kaykarqan. 2Tsaymanmi Jesústapis discïpulunkunatawan invitayarqan. 3Fiesta manaraq ushakaptinmi vïnunkuna ushakaskirqan. Tsaymi Jesústa maman nirqan: <<Vïnunkunam ushakashqa>>.
4Tsaynam Jesús nirqan: <<Mamay, ¿imanirtan tsaynö nimanki? Manaraqmi hörä chämunraqtsu>>.
5Jesúspa mamannam servikuqkunata nirqan: <<Jesús niyäshunqaykita llapanta rurayay>>.
6Tsaychömi rumipita rurashqa soqta urpukuna karqan. Tsay urpukunamanmi costumbrinmannö purificäkuyänanpaq yakuta wiñäyaq. Tsay urpukunamanmi pachak (100) litru yaku yaykuq. 7Servikuqkunatam Jesús nirqan: <<Tsay urpukunaman juntat yakuta wiñäyay>>.
Tsaymi juntanqanyaq yakuta wiñäyarqan. 8Juntaskatsiyaptinnam Jesús nirqan: <<Ichikllata chaqarkur mayor servikuq yawananpaq apayay>>.
Tsaynö niptinnam Jesús ninqannölla chaqarkur apayarqan. 9Mayor servikuq yawarkurnam alli vïnu kanqanta tantiyarqan. Peru manam maypita apayanqantapis musyarqantsu. Servikuqkunallam maypita kanqantapis musyayarqan. Yawarkurnam casaraq jövinta qayaskir 10nirqan: <<Wakin runakunaqa fiesta qallanan höram alli kaq vïnuta qarakuyan. Alli upyaskiyaptinnam qamya kaqllatana qarayan. Peru qamqa fiesta ushakaptinraqmi mas allin kaq vïnuta qarakatsinki>>.
11Tsaynömi Galileachö kaykaq Caná markachö punta kaq milagruta Jesús rurarqan. Poderösu kanqanta rikarmi discïpulunkuna payman creyikuyarqan.
12Tsaypitanam mamanwan, wawqinkunawan y discïpulunkunawanpis Capernaúm markaman Jesús aywarqan.#Mat. 4.13. Tsaychömi juk ishkay junaq qoyäyarqan.
Templuchö rantikuqkunata Jesús qarqunqan
Mateo 21.12-13; Marcos 11.15-17; Lucas 19.45-46
13Israel runakunapa Pascua#Éxo. 12.1-27; Deut. 16.1-8. fiestan qallananpaqna kaykaptinmi Jerusalénman Jesús aywarqan. 14Chaykurmi templupa patiunchö törukunata, üshakunata y palumakunatapis rantikuykäyaqta tarirqan. Tsaynöllam qellay trukatsiqkunata tarirqan.#2.14 Jesús kawanqan witsaymi Roma runakunapa qellayninkunata Israel runakuna imatapis rantipakuyänanpaq manijayaq. Peru Dios Yayapaq ofrendata apayänanpaqmi sïqa templuman apayänanpaq kaq qellaytaraq rantiyaq. 15Tsaynö tariskirmi chicötita ruraskir üshakunata y törukunata templupa patiunpita Jesús qarqurqan. Qellay trukatsiqkunapa mësankunatapis tikraskirmi qellayninkunatapis witsiskirqan. 16Paluma rantikuqkunatanam nirqan: <<¡Kaykunata jipiyay! ¡Imanirtan taytäpa wajinta mercäduman tikratsiyashkanki!>>
17Jesús tsaynö ruraptinmi discïpulunkuna yarpäyarqan Dios Yayapa palabranchö ninqanta: <<Templuykitam wañur kawarpis respitatsishaq>>.#Sal. 69.9.
18Israel autoridäkunanam Jesústa niyarqan: <<¿Ima podernikiwantan rantikuqkunata qarqushkanki? Mä poderösu kanqaykita musyayänäpaq milagruta ruramuy>>.
19Jesúsnam nirqan: <<Kay templuta juchuskatsiyay. Juchuskatsiyaptiki kimsa junaqllatam sharkatsimushaq>>.#Mat. 26.61; 27.40; Mar. 14.58; 15.29.
20Tsaynö niptinmi autoridäkuna niyarqan: <<Kay templutaqa chusku chunka soqta (46) watatam shäritsiyashqa. ¿Imanöpatan qam kimsa junaqllata sharkatsimunkiman?>>
21Peru tsaynö parlarqa manam templupaqtsu Jesús parlarqan, sinöqa templuman iwalatsikurmi kikinpaq parlarqan. 22Jesús wañunqanpita kawaskamuptinnam discïpulunkuna tsaynö ninqanta yarpaskiyarqan. Tsaynöpam Jesús ninqanta y Dios Yayapa palabran ninqanta creyiyarqan.
Runakuna imata yarpäyanqanta Jesús musyanqan
23Jerusalénchö kaykar Pascua fiestachö milagrukunata Jesús ruranqanta rikarmi Jesúsman atskaq runakuna creyikuyarqan. 24Peru tsaynö kaptinpis janan shonqulla creyiyanqanta musyarmi paykunaman Jesús confiakurqantsu. 25Mana willaykäyaptinmi runakuna imata yarpäyanqantapis musyarqan.
Currently Selected:
Juan 2: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.