Lúkasɛ 14

14
Yə́susu a nɔ́ mɔndɔ wa mɔɔ́mbɔ niŋəsiə
1Ɔ hímotí hinó hɛ́ Sábatɛ, Yə́susu a ná ákáná ɔ ɔmbɛ́la wɔ́ yɛmɔtɛ́ isə́lúkú yɛ Bɛfalísia ɔkɛaka ɔwá a nɛaka. Bááyɛ́ ɔbá bá ná báá ɔmɔ́tɔ́yɛ́, bá Yə́susu tɛ́káka hoóyíhoóyi. 2Mɔndɔ wa mɔɔ́mbɔ a ka báá ɔmɔ́yɛ́ á Yə́susu busíə́, a ka báá náatɔ́ ɔ tɔndɛmá. 3Yə́susu a ná ɛtambá ɛ́ta, a ná bamanyumbə́ndə́ na Bɛfalísia batá a sɛ́á: «Wə́súə́ umbə́ndə́ wɔ́ ndɔ kuənjə índiə ata ɔ mɔndɔ uniŋəsiə ɔ hinó hɛ́ Sábatɛ ə́ə́?» 4Mba, bá sa hikiə ɔbɛ́kámɔsɔna; nɔ́yɛ́, Yə́susu a ná ɛnákɛnákɛ itíə́lə, a ná wɛɛ́ya niŋə́síə́, a ná wɛɛ́ya tilə́síə́. 5Ɔwɔŋgɔkɔnɔ, a ná bəə́bu lɛ́na a sɛ́á: «Ɛ́yánɛ́ ɔ uwə́nú ətíə́, ábá wayɛ́á mɔná ata yáyɛ́á ɛfɔŋɔ yɛ́ ná kɔ́á ɔ hɛfɛa hɛ́ mənífə́, a sɔ́ ŋɔ yɛɛ́ta húliə tɔfá ata ɔ hinó hɛ́ Sábatɛ əə́?» 6Bá sa óso ɔ yɛ́táyɛ́ ɛmbataka ɔbɛ́kámɔsɔna.
Ɔtɛ́fa á ɛbɔ́ka yɛ́ nitifə́
7Yə́susu a ná ɛ́ná ɛ́sɛ́á bɛndɔ ɔbá bá ná ɛ́lɛ́ákɛ́na bá ndɔ tɛ́fa há bɛbɔ́ka bɛɛsɛ; ɛlɔ́áyɛ́ nɔ́yɛ́, a ná bəkimə wúuwu ɔŋana tɛ́ná a sɛ́á: 8«Ábá mɔndɔ a ná aŋɔ́á ɛ́lɛ́ákɛ́na ɔ nɛnɛ́á nɛ́ nɛ́bɛ́lɛna, ɔ lɛ kətuə́nə ɔ ɛbɔ́ka yíbúsíə́ bɔkɔasɛ́á, bá óso ɔ mɔndɔ wa tuúmə ɔwɛ́lɛakɛna ɔwá a ná aŋɔ́á yayɛna, 9ɔkɛaka ɔwá mɔndɔ ɔwá a ná bənú ɛ́lɛ́ákɛ́na, a lɛ ndasá ɔwáwɔ ɔ ndalɛ́na a sɛ́á, niasɛ́ná wɛɛ́ya yɛ́ɛ́yɛ́ ɛbɔ́ka. Nɔ́yɛ́, ɔ hɔalɛna na ɛsɛ́má yikimə, ɔ ákána ukətúə́nə ɔ ɛbɔ́ka yɛ́ nitifə́. 10Ɔ nifəŋə, ikúílí bá ná aŋɔ́á ɛ́lɛ́ákɛ́na, káka tuə́nə́ ɔ ɛbɔ́ka yɛ́ nitifə́ ɔkɛaka ɔwá, wɛ́ɛ́yɛ́ ɔwá a ná aŋɔ́á ɛ́lɛ́ákɛ́na, a nda aŋɔ́á lɛ́na a sɛ́á: “Á yamɛ́á ɛŋgɔ́áyɛ́ sɔ́nɔ ɔ ndə́túə́nə ɔ ɛbɔ́ka yɛɛsɛ.” Nɔ́yɛ́ ɔ ŋɔ bá na tuúmə ubusíə́ bɔ́ bááyɛ́ bəkimə ɔbá bá ŋɔ báá ɔ ɛtáka na aŋɔ́á. 11Ɔ taká, ata ɛ́yánɛ́ mɔndɔ ɔwá a ndɔ bíbə́liə, bá ŋɔ wɛɛ́ya lolosoliə; wɛ́ɛ́yɛ́ ɔwá a ndɔ bílólosoliə, bá ŋɔ wɛɛ́ya bə́ləliə.»
12Yə́susu a ná wɛ́ɛ́yɛ́ lɛ́na ɔwá a ná wɛɛ́ya ɛ́lɛ́ákɛ́na a sɛ́á: «Ikúílí ɔ nɔ́ nɛnɛ́á índiə ɔ kɔɔsɔ mbá ata ɔ bɛkɔlakɔ́lá, ɔ lɛ máwɔ́á maŋgɔ́áyɛ́ ɛ́lɛ́ná, ata báwɔ́á bənínyə́, bɛndɔ bá nɛ́áwɔ́á nikúlə, ata báwɔ́á bənísə́ bá bɔ́ŋɔ́tɔ bá ɛmɛ́ŋɛ́; yɛ́ sá báá nɔ́yɛ́, ikúílí bááyɛ́ bá ŋɔ aŋɔ́á ɛ́lɛakɛna, bá ŋɔ aŋɔ́á híə́niniə yatɛ́ ɔyɛ́á ɔ ná bəə́bu índíə́kínə. 13Ɔ nifəŋə, ikúílí ɔ ndɔ nɛnɛ́á tíkə, ɛ́lɛ́ákɛ́ná tɔtɔyɔ́nɔ́, bɛáta, bɛkátá na bəndímə́ndímə. 14Ɔ ŋɔ bá na nɛhɔnɔ bɔkɔasɛ́á, bátáyɛ́ bá sɔ́ ŋɔ óso ɔ ɔwáwɔ uhíə́niniə yatɛ́ ɔyɛ́á ɔ ná bəə́bu kɛ́áka. Ɔ taká, Huɛlɛ́ a ŋɔ aŋɔ́á híə́niniə bɛ́táyɛ́ bikimə ɔ nɛhɔŋɔa nɛ́ bátaká.»
Ɔŋana wɔ́ nɛnɛ́á
(Mat 22.1-10)
15Əlimə yɛ bɛ́ɛ́yɛ́ bɛtambá ɔwɔ́kɔ, ɔmɔtɛ́ ɔwá a ná báá ɛtáka, a ná Yə́susu lɛ́na a sɛ́á: «Nɛhɔnɔ na wɛ́ɛ́yɛ́ ɔwá a ŋɔ nioko ɛta ɔ nɛnɛ́á ikúílí ɔyɛ́á Huɛlɛ́ a ŋɔ ndahíáná ɔ ɔwayɛ́ Nɛmanɛna.» 16Yə́susu a ná wɛɛ́ya wúuwu ɔŋana tɛ́ná a sɛ́á: «Mɔndɔ ɔmɔtɛ́ a ka nɛnɛ́á tíkə, a ná ɛ́lɛ́ákɛ́ná bɛndɔ bəəŋí. 17Ikúílí yɛ́ ɔnɛ́á yɛ́ ná ndáfámá, a ná wayɛ́á mɔnyɛna lɔ́má ɔwá a bááyɛ́ siə́kə ɔbá a ná ɛlɛ́ákɛ́na, a sɛ́á: “Nɔ́ sɔ́nɔ isíŋáka bikimə bɛ́ lɛa tábɔ́nákátɔ.”»
18«Nɔ́yɛ́, ɔ́maná ɛ́sɛ́á bá ná hɔ́kɛ́na ɔbánɔ́, bəkimə bá ná lúmə ɔ ɔbɛ́níásɛna.» Wəbusíə́ a ná mɔnyɛna lɛ́na a sɛ́á: «Mɛ nɔ́ húlə ɔ ɛtɔbɔtɔ́bɔ́ ɔwɔ́ndɔ. Yɛ́ lɛa hɔ́ánánátɔ́ ɔwá mɛ ká yɛɛ́ta siəlínə, tɔ́kɔ́lɛ, niasɛ́na mɛaŋɔ́á.» 19Wɔmɔtɛ́ a sɛ́á: «Mɛ ka mahámɔ́ má bɛfɔŋɔ ɔ́ndɔ álánɔ, mɛ ndɔ siə mɛ ká bɛɛ́ta bɛ́kánɛ́na ɔ ɔnyɛna; tɔ́kɔ́lɛ niasɛ́ná mɛaŋɔ́á» 20Wɔmɔtɛ́ a sɛ́á: «Mɛ nɔ́ húlə ɔ ɔbɛ́lɛna; ɛlɔ́áyɛ́ nɔ́yɛ́ mɛ sa ósó ɔndafama.» 21Ikúílí mɔnyɛna a ná kə́tílə́ ɔ bɔsɔ́ma, a ná Isə́lúkú nífúnə́kínə́ ɛ́sɛ́á bá ná wɛɛ́ya bɛ́kámɔ́sɔ́na. Ɔ umisíúmə́, muití ɔmbɛ́la a ná məsə́kə ɔkɔ, a na mɔnyɛna lɛ́na a sɛ́á: «Tɛbálɛ́na, káka ɔ bɛbɔ́ka bikimə, na ɔ bɛnɔ́mɛ bikimə bɛ́ bətínə́, húlə́nə́ tɔtɔyɔ́nɔ́ háha, bɛkátá, bəndímə́ndímə na bitíndə.» 22Əlimə yɛ ikúílí, mɔnyɛna a ná Isə́lúkú lɛ́na a sɛ́á: «Yatɛ́ ɔyɛ́á ɔ ná manɛ́na, mɛ ná kɛ́áká, mba, bituənínə́ bɛ́ nabáka.» 23Isə́lúkú a ná yɛ́ɛ́yɛ́ ikúíli mɔnyɛna bíhíə́níníə́ a sɛ́á: «Fáma, káka ɔ bɛnɔ́mɛ bikimə bɛ́ mahɔ́ma na bɛ́ ɛmɛ́ŋɛ́ mɛkákɔ, íkíníə́ bəə́bu bá fíə́kínə ɔ kɛaka ɔwá yamɛ́á miímə yɛ́ úndúə́.» 24Ɔ taká, mɛ ndɔ bənú nɔ́yɛ́ lɛna: Ata ɔmɔtɛ́ ɔbá mɛ ná ɛlɛ́ákɛ́na, a sa ndá bɛ́ámɛ́á bɛ́labɔ́nɛ́á ɔ́kɔ́lɛ́na.
Mɔkɔ́nɛna a ná hɔ́ánána ɔ bikimə ɔbɛ́sáŋɔ́na
(Mat 10.37-38)
25Iloŋo yɛ́ bɛndɔ yɛ́ ka báá yɛ́ ndɔ kɛnda na Yə́susu, á bɛ́kɔ́ŋɔ́ná, a ná bəkimə lɛ́na a sɛ́á: 26«Ata ɛ́yánɛ́ ɔwá a ndɔ ndasá na mɛaŋɔ́á a ná hɔ́ánána ɔwámɛ uhikiə yáyɛ́ná yayɛ́á isə́, yayɛ́á inyə́, wayɛ́á muəndú na báyɛ́á baná, báyɛ́á bənísə́ ɔ balɛ́mɛndɔ́, na bəəndú, yáyɛ́ná bɔ́áyɛ́á buɔmɔ́ bɔ́ bɛ́múɛ́tɛ́. Yɛ́ sá báá nɔ́yɛ́, a sa ósó ɔbáá wamɛ́á mɔkɔ́nɛna. 27Wɛ́ɛ́yɛ́ ɔwá a lɛ ndɔ wə́yíə́ ɔmbásá túána ɔkɛaka ɔwá a mɛaŋɔ́á ɔ́ŋgɔ́kɔ, a sa ósó ɔbáá wamɛ́á mɔkɔ́nɛna.»
28«Ɔ taká, ɛ́yánɛ́ ɔ uwənú ətíə́ ɔwá a ndɔ siə ɔ miímə mɛŋɛ́ŋa ɔ ɔfalaba, a lɛ naŋɔ́ tuənə ɔ misí ɔkɛaka ɔwá, a masɛma fanáká mbá a manyá ábá a lɛa na məndunə́ má buolí ɔ ɔhɔ́nala əə́? 29Ábá a ná miímə tɛ́kɛ́ná a lɛ hɔ́nála ɔ ɔfalaba, bəkimə ɔbá bá ŋɔ nɔ́yɛ́ siəkinə, bá ŋɔ wɛɛ́ya ɔnɔkɔ.» 30Bá sɛ́á: «Wɔ́ɔwɔ mɔndɔ a ka botoliə ɔ miímə ɔfalaba, mba, a sa kafáma ɔ ɔhɔ́nala.»
31Hɔ́ánánátɔ́, ábá munəni ɔmɔtɛ́ a ndɔ siə ɔwakána ɔ bilə́ na wɔmɔtɛ́ munəni, a ndɔ naŋɔ́ tuənə ɔ misí, a bɛ́bata a sɛ́á: «Mɛ báka na niómo nɛ́ tukóló nɛ́ bɛndɔ. Mɛ ósó ɔ wamɛ́á mubəniə ɔkásɔ́na ɔwá a lɛ́á na moómo áfandɛ́ má tukóló má bɛndɔ ə́ə́?» 32Mba, yɛ́ sá báá nɔ́yɛ́, ikúílí ɔyɛ́á wɛ́ɛ́yɛ́ munəni a nalɛ́á hata, a wɛɛ́ya basɔ́másɔma lɔ́mɛ́na ɔwá bá bumbə́nú tɔa. 33Hɔ́ánánátɔ́, ata ɔmɔtɛ́ ɔ uwə́nú ətíə́ a sa ósó ɔbáá wamɛ́á mɔkɔ́nɛna ábá a sá sáŋɔ́na bikimə ɔbɛ́á a lɛ́á itíə́nə́tɔ.
Ibusə́ yɛ́ Sɔnɔ́átɔ
(Mat 5.13; Mə́l 9.50)
34«Ibusə́ yɛ́ lɛa bɔɔ́la buɛsɛ; mba ɛ́bá yɛ́ ná sɔnɔ́á na yatɛ́ bá ŋɔ máyɛ́á matáma híə́niə əə́? 35Yɛ́ lɛ báá yɛɛsɛ ata ɔ misí mbá ata ɔ nianá: Bá yɛɛ́ta omboko ɔ niə́lətíə́. Wɛ́ɛ́yɛ́ ɔwá a lɛ́á na məlúə́ má ɔ́wɔ́kɔ́nɔ, á ɔ́kɔ́kɛ́na.»

Currently Selected:

Lúkasɛ 14: tvu

Highlight

Share

Copy

None

Want to have your highlights saved across all your devices? Sign up or sign in

Free Reading Plans and Devotionals related to Lúkasɛ 14

YouVersion uses cookies to personalize your experience. By using our website, you accept our use of cookies as described in our Privacy Policy