Yɔhánɛsɛ 1
1
Ɛtambá ɔyɛ́á yɛ́ ndɔ buɔmɔ́ índiə
1Ɔ nɛbalɛ́ná Ɛtambá yɛ́ ka báá, Ɛtambá yɛ́ ka báá ɔ ɛmɛ́ŋɛ́ yɛ Huɛlɛ́, Ɛtambá tɔ́na á Huɛlɛ́. 2Ɔ nɛbalɛ́ná Ɛtambá yɛ́ ka báá ɛmɛ́ŋɛ́ yɛ Huɛlɛ́. 3Ɔ tɔ́mbákɛna yɛ́táyɛ́ Ɛtambá á bikimə bɛ́ ná bɛbɔta, ɛŋaná yɛɛ́ta ata bɔɔ́la bɔ́mɔtɛ́ bɔ́ sa bɛ́bɔ́ta; ɛŋaná yɛɛ́ta ata bɔɔ́la bɔ́mɔtɛ́ bɔ́ sa bɛ́tábɔ́na. 4Ɛtambá yɛ́ ka báá hɛnyɔ́nyɔ hɛ́ buɔmɔ́, buɔmɔ́ bɔ́ ka báá isəmú ɔyɛ́á yɛ́ ndɔ bɛndɔ numiə. 5Isəmú yɛ́ nɔmaka ɔ ibínə́binə nuúmə́, ibínə́binə yɛ́ sa yɛɛ́ta halɛna. 6Huɛlɛ́ a ka mɔndɔ lɔ́ma ɔmɔtɛ́, nɛ́áyɛ́á niínyə á Yɔhánɛsɛ. 7A ka ndasá ɛ́sɛ́á mumbóŋímboŋi, ɔ imbóŋi uhíə́niniə isəmú ɔkɛaka ɔwá, bəkimə bá lumínínə ɔ tɔ́mbákɛna na wɛɛ́ya. 8Mɔ́táyɛ́ mɔndɔ a sa báá isəmú, mba, a ka báá hɔ́yɛ́ ɔ imbóŋi uhíə́niniə ɔ isəmú. 9Ɛtambá yɛ́ ka báá taká yɛ isəmú; ɛnaka yɛ́ ndáfámá ɔ misí yɛ́ nɔmakɛna ɔ bɛndɔ bəkimə.
10Ɛtambá yɛ́ ka báá ɔ misí, na yɛɛ́ta á misí yɛ́ ná bɛbɔta, mba, misí yɛ́ sa yɛɛ́ta lɛnda. 11A ka ndasá á bɔayɛ́, mba, bɔayɛ́ bá sa wɛɛ́ya káha. 12Ata nɔ́yɛ́, bááyɛ́ ɔbá bá ná wɛɛ́ya káhá, bááyɛ́ ɔbá bá ná yə́búə́ yɔnɛ́nɛna tálɛ́ná ɔ ɔwayɛ́ niínyə, a ka kɛaka ɔwá bá híáná baná bá Huɛlɛ́. 13Bá sa bíbíə́nə na manɔ́ŋɔ́, ata na uhikiə wɔ́ mɔsá, ata na ɛfɛka yɛ́ mɔndɔ, mba, bá ka bíbíə́nə na uhikiə wɔ́ Huɛlɛ́.
14Ɛtambá yɛ́ ka bɛ́kɛaka mɔndɔ, yɛ́ ka tuənəkinə ɔ uwəsú ətíə́, tɔ ka tɔ́áyɛ́á tuúmə siəkinə, tuúmə ɔtɔ́á tɔ́ ndɔ húlínə na Isə́ ɛ́sɛ́á yohí yɛ́ mɔná úndúə́tɔ́ na nyɔnɔ, na taká. 15Yɔhánɛsɛ Mɔsɔabɛndɔ a ndɔ wɛɛ́ya imbóŋi híə́niniə a sɛ́á: «Á wɔ́ɔwɔ mɛ́ ná bá mɛ ndɔ laa ɔwá, wɛ́ɛ́yɛ́ ɔwá a lɛ́á ɔ ɔsákɔna ɔwámɛ əlimə, a lɛa mɔŋɛ́ŋa yáyɛ́ná mɛaŋɔ́á bɔkɔasɛ́á, ɔwámɛ busíə́ a ka báá.» 16Bəsú bəkimə tɔ ka nɛ́áyɛ́á nɛmbiaŋɛ nɛ́ nyɔnɔ afakana, tɔ ka nyɔnɔ kusənə ɔ mɛɛ́lɔ yɛ nyɔnɔ. 17Əlimə yɛ umbə́ndə́ ɔwá Mósisi a ná mə́nyə́síə́, nyɔnɔ na taká bɛ́ ka húlínə na Yə́susu Kilísitusu. 18Ata mɔndɔ a lɛa boóko a ná Huɛlɛ́ sínə, á yohí yɛ́ Mɔná, ɔwá a lɛ́á Huɛlɛ́, hoóyi na Isə́; wɛɛ́ya a ná kɛ́áka ɔwá tɔ wɛɛ́ya manya.
Imbóŋi yɛ Yɔhánɛsɛ Mɔsɔabɛndɔ
(Mat 3.1-12; Mə́l 1.1-8; Lúk 3.1-18)
19Ɔ́ imbóŋi yɛ Yɔhánɛsɛ yɛ́ɛyɛ, ikúílí Bɛyútɛnɛ bəə́bu ɔ Yəlúsalɛma bá ná bətitiəmahánɛna na Bɛlə́witi lɔ́má ɔ ɔwayɛ́ busíə́ ɔwayɛ́ ɔbata bá sɛ́á: «Baánɛ, aŋɔ́á ɛ́yánɛ́ əə́?» 20Á sa kinə ɔ ɔbɛ́kámɔsɔna, mba, a ná bífə́mə́lə́níə́ ɔ uwəbú busíə́ a sɛ́á: «Mɛ lɛ báá Mɛ́sia.» 21Bá ná wɛɛ́ya batá bá sɛ́á: «Mba, aŋɔ́á ɛ́yánɛ́ nə́ə əə́? Aŋɔ́á á Ɛlíásɛ əə́?» A sɛ́á: «Bóo! Tátá mɛaŋɔ́á.» Aŋɔ́á Mɔhɛ́nátɔtányɛ́ əə́? A sɛ́á: «Bóo!» 22Ɔ yɛ́ɛ́yɛ́ ikúílí, bá ná wɛɛ́ya batá bá sɛ́á: «Mba aŋɔ́á ɛ́yánɛ́ nə́ə əə́? Tɔ ndɔ siə ɔ bááyɛ́ bíhíə́niniə ɔbá bá ná bəsú lɔ́má. Nəníə́ ɔ ndɔ bɛ́laa aŋɔ́á bɛ́múɛ́tɛ́ əə́?» 23Yɔhánɛsɛ a sɛ́á: «Mɛaŋɔ́á mɛ lɛ́á wɛ́ɛ́yɛ́ ɔwá a ndɔ yə́mə ɔ mándaŋɛ́á: “Nɔ́ ɛnɔ́mɛ yɛ́ Isə́lúkú sɛ́kɔ́náká muɛsɛ!” Ɛ́sɛ́á mɔhɛ́nátɔtányɛ́ á Isáya a ná hɔɔkɔ.» 24Ətíə́ yɛ bɛndɔ ɔbá bá ná lɔ́má á Yɔhánɛsɛ busíə́, bɔ́mɔtɛ́ bá ka báá Bɛfalísia. 25Bá ná wɛɛ́ya batá tɔ́na bá sɛ́á: «Ábá ɔ lɛ bá Mɛ́sia, ata á Ɛlíásɛ mbá ata Mɔhɛ́nátɔtányɛ́, ɛlɔ́áyɛ́ yatɛ́ ɔ ndɔ nɛsɔa índiənə əə́?» 26A ná bəə́bu bíhíə́níníə́ a sɛ́á: «Ɔwámɛ, mɛ ndɔ nɛsɔa índiənə na mənífə́; mba uwənú ətíə́, mɔndɔ a báka ɔwá nɔ lɛ ndɔ manya. 27A lɛa ɔ ɔsákɔna ɔwámɛ əlimə, mɛ lɛ bá hɔ́ánánátɔ́ ɔ mikolí yɛ́ bɛ́áyɛ́á bɛtafɛ́ná uhumbulə». 28Bɛ́táyɛ́ bɛkɔa bikimə bɛ́ ka bɛ́tɔ́mbáka ɔ Bɛtánia ɔ yííní ɛsɛ́lɛ́ yɛ́ Yúlútɛnɛ ɔ ɛbɔ́ka ɔyɛ́á Yɔhánɛsɛ a ná báá a ndɔ nɛsɔa índiənə.
Yə́susu Mɔnándɔ́mbá wa Huɛlɛ́
29Ɛnaka ɔyáá wɔ́ yáá, Yɔhánɛsɛ a ná Yə́susu yámá ɔ ɔsákɔna ɔwayɛ́ busíə́, a sɛ́á: «Ɔ́ Mɔnándɔ́mbá wa Huɛlɛ́ wɔ́ɔwɔ ɔwá a ndɔ bɔbɛ́á bɔ́ bɛndɔ bá misí hɛ́kɛa. 30Ɔ ɔwayɛ́ mɛ́ ná báá mɛ ndɔ laa mɛ sɛ́á: “Mɔndɔ a lɛa ɔ ɔsákɔna ɔwámɛ əlimə, a lɛa mɔŋɛ́ŋa yáyɛ́ná mɛaŋɔ́á bɔkɔasɛ́á, a ka báá wəbusíə́ na mɛaŋɔ́á”. 31Ɔwámɛ, mɛ sa bá mɛ ndɔ wɛɛ́ya manya. Mba, mɛ ka ndasá ɔ nɛsɔa uwíndiənə na mənífə́ ɔkɛaka ɔwá ilúkunə yɛ́ Ísilahɛ́lɛ yɛ́ wɛɛ́ya manya.» 32Yɔhánɛsɛ a ka yɛ́ɛ́yɛ́ imbóŋi fə́mə́ləniə a sɛ́á: «Mɛ ka Umbúínyi Mɔnaŋanaŋa siəkinə wɔ́ nɔ́ húlínə ɔ nɔɔ́mɛná ɛ́sɛ́á hibúbə́, wɔ́ ná Yə́susu tálɛ́mɛ́na ɔ mɔlɔ́á. 33Ubusíə́ bɔ́ ikúílí, mɛ sa bá mɛ ndɔ wɛɛ́ya manya, mba, wɛ́ɛ́yɛ́ ɔwá a ná mɛaŋɔ́á lɔ́má a sɛ́á mɛ nɛsɔa índíə́kínə́nə́ na mənífə́, a ka mɛaŋɔ́á lɛna a sɛ́á: “Wɛ́ɛ́yɛ́ ɔwá ɔ ŋɔ siəkinə Umbúínyi Mɔnaŋanaŋa wɔ́ nɔ́ tálɛ́mɛna, wɛɛ́ya á ŋɔ nɛsɔa índiəkinənə na Umbúínyi Mɔnaŋanaŋa.” 34Ɔwámɛ, mɛ ka nɔ́yɛ́ siəkinə, mɛ ndɔ imbóŋi índiə ɔwá, wɛɛ́ya a lɛ́á Mɔná wa Huɛlɛ́.»
Bɔkɔ́nɛna bə́búsíə́
35Ɔ ɔyáyáka, Yɔhánɛsɛ a ka báá ɔmɔ́tɔ́yɛ́ na báyɛ́á bɔkɔ́nɛna báfandɛ́. 36Ikúílí Yə́susu a ná báá ɔ ɔtɔ́mbáka, a ná wɛɛ́ya məə́sə tála, a sɛ́á: «Ɔ́ Mɔnándɔ́mbá wa Huɛlɛ́ wɔ́ɔwɔ.» 37Ɛnaka bááyɛ́ bɔkɔ́nɛna báfandɛ́ bá Yɔhánɛsɛ bá bɛ́ɛ́yɛ́ bɛtambá ɔ́kɔ́, bá ná Yə́susu ɔŋgɔ́kɔ. 38A ná bɛkɔŋɔna, a ná yámá ɔwá bá ndɔ wɛɛ́ya ɔŋgɔ; a ná bəə́bu batá a sɛ́á: «Yatɛ́ nɔ́ ndɔ siə əə́?» Bá sɛ́á: «Á Lábi (ɔ́ niɔŋɔ́, á Mulə́liə) baánɛ, hə́níə́ ɔ ndɔ tuənə əə́?» 39A sɛ́á: «Nɔ́ sɔ́nɔ, nɔ́ ndɔ siəkinə.» Bá ná ákáná, bá ná bɔ́ŋɔ́ ɔ ɛbɔ́ka ɔyɛ́á a ná bá a ndɔ tuənə; ɔ bɔ́táyɛ́ buɔsɛ́, bá ná tuə́nə́ na wɛɛ́ya. Yɛ́ ka báá hoóyi na ɛŋgɛ́ŋɛ́ ínisə yɛ́ əlimə yɛ kɔɔsɔ.
40Andɛlɛ́, munínyə́ wa Símono Bíə́lə, a ka báá ɔmɔtɛ́ wa bááyɛ́ báfandɛ́ ɔbá bá ná bɛtambá bɛ́ Yɔhánɛsɛ ɔ́kɔ́kɛ́na, bá ná Yə́susu ɔŋgɔ́kɔ. 41Mɔndɔ wəbusíə́ ɔwá Andɛlɛ́ a ná kɔ́ána, á Símono ɔ wayɛ́á munínyə́. A ná wɛɛ́ya lɛ́na a sɛ́á: «Tɔ ná Mɛ́sia bɔŋɔ.» 42Əlimə yɛ nɔ́yɛ́ Andɛlɛ́ a ná wayɛ́á munínyə́ ɛ́tá á Yə́susu busíə́. Yə́susu á wɛɛ́ya məə́sə tálá, a sɛ́á: «Aŋɔ́á ɔ lɛ́á Símono, á mɔná wa Yɔhánɛsɛ; bá ŋɔ aŋɔ́á ɛ́lɛakɛna Kɛ́fasɛ» (ɔ́ niɔŋɔ́ ɔ sɛ́á á Muɔkɔ).
43Ɔyáyáka, Yə́susu a ná mɔkɛnda ɛtá ɔ wákaka ɔ Kalɛ́lɛa. A ná Filíbo ɛ́nyánána, a ná wɛɛ́ya lɛ́na a sɛ́á: «Ɔŋgɔ́kɔ́ mɛaŋɔ́á!» 44Filíbo a ka báá wa Bɛtɛsayíta, ɔ bətínə́ yɛ Andɛlɛ́ na Bíə́lə. 45A ná Natanahɛ́lɛ ɛ́nyánána, a ná wɛɛ́ya lɛ́na a sɛ́á: «Tɔ ná wɛ́ɛ́yɛ́ yámá ɔwá Mósisi a ná hɔ́kɛ́na ɔ hiəfulə hɛ́ umbə́ndə́, wɛ́ɛ́yɛ́ ɔwá bɔhɛ́nátɔtányɛ́ bá ná hɔ́kɛ́na: Á Yə́susu á mɔndɔ wa Násalɛtɛ, mɔná wa Yɔ́sɛbɛ.» 46Natanahɛ́lɛ a ná wɛɛ́ya lɛ́na a sɛ́á: «Baánɛ, yatɛ́ bɔɔ́la buɛsɛ bɔ́ óso ɔfáma ɔ Násalɛtɛ əə́? » Filíbo a sɛ́á: «Sɔ́nɔ, ɔ ndɔ siəkinə.»
47Yə́susu a ná Natanahɛ́lɛ yámá ɔsákɔna ɔwayɛ́ busíə́, a ná hɔ́lɛ́na ɔ ɔwayɛ́ ɛsalɛ a sɛ́á: «Ɔ taká, ɔ́ tokó yɛ mɔndɔ wa Ísilahɛ́lɛ wɔ́ɔwɔ ɔwá a lɛ́á ɛŋana hɛkabalɛ.» 48Natanahɛ́lɛ a ná wɛɛ́ya batá a sɛ́á: «Hə́níə́ ɔ ndɔ mɛaŋɔ́á manyɛna əə́?» Yə́susu a sɛ́á: «Ubusíə́ ɔbɔ́á Filíbo a aŋɔ́á ɛ́lɛ́ákɛ́na, mɛ ka aŋɔ́á siəkinə ɔ indínə́ yɛ bɔlɛ́á ɔbɔ́á bá ndɔ ɛ́lɛnɛna bá sɛ́á bufíkiə.» 49Ɔ yɛ́ɛ́yɛ́ ikúílí, Natanahɛ́lɛ a ná wɛɛ́ya lɛ́na a sɛ́á: «Á Lábi, aŋɔ́á ɔ lɛ́á Mɔná wa Huɛlɛ́, ɔ lɛa munəni wa Ísilahɛ́lɛ!» 50Yə́susu a sɛ́á: «Ɔ ndɔ luminə ɔbánɔ́ bɔkɔasɛ́á, mɛ ná aŋɔ́á lɛ́na ɔwá mɛ ka aŋɔ́á siəkinə ɔ indínə́ yɛ bɔlɛ́á bɔ́ fíkiə. Ɔ́ ŋɔ bɛkɔa biəŋí siəkinə bɛŋɛ́ŋa yáyɛ́ná bɛ́ɛbɛ. 51Ɛ́ɛ! Taká mɛ ndɔ bənú lɛna: Nɔ́ ŋɔ siəkinə nɔɔ́mɛná yɛ́ nɔ́ bíúbúnə, bɛáŋgɛlɛ bɛ́ Huɛlɛ́ bɛ́ bálaka bɛ́ lɔɔkɔ ɔ mɔlɔ́á wɔ́ Mɔná wa mɔndɔ.»
Currently Selected:
Yɔhánɛsɛ 1: tvu
Highlight
Share
Copy
Want to have your highlights saved across all your devices? Sign up or sign in
© 2019, CABTAL