Yosua 7
7
Nabunii Akhan to ewanan dipangnganggai diala
1Mangkami Napangparentan Puang Allataala lako to-Israel kumua, sininna apa llan kota Yerikho la dilanynya'i ngasan, te'da lalo apa wa'ding diala. Apa ia joo parenta te'da naturu'i Akhan, anakkana Karmi, ampona Zabdi, ampo uttu'na Zerah, suku Yehuda, apa kanni mbunianan ewanan to dipatuju lako Puang Allataala. Iamo joo nagaja galli PUANG Allataala lako to-Israel.
2Ia joo wattu nasuai Yosua ba'tu pira-pira to taunna male jio mai kota Yerikho lako kota Ai, siandahna Bet-Awen, jio kadellekanna Betel. Nakua “Male kamu' mmataii joo kota.” Malemi joo tau mmatai kota Ai. 3la tonna polemo to mata-mata, napaumi lako Yosua apa to nakita. Nakua, “Danggi'mo tasussai ngasan bangngi to surudadu male parari, ganna'mo ke denni duang sa'bu ba'tu tallung sa'bu surudadu tasua male rrarii joo kota, nasaba' ci'di'ra taunna joo kota Ai.” 4Jaji ia to surudadu male parari, agi-agira tallung sa'bu tau, apa nataloi to-Ai nasipalaian pole. 5Naula'i to-Ai jio mai babangan kota ratu lako Syebarim#7:5Syebarim battuananna: ngenan dinii mangtambang, nadipatei to to-Israel agi-agi tallung pulo annan tau jiong awa' buntu. Iamo napumoro' penawanna to to-Israel nasimalajatan.
6Naca'ceanmi Yosua sola tomatua-tua to-Israel to baju lando napake, nasuju' do' litak jio olo Patti Basse-Na PUANG Allataala, ratu lako karuen. Napade'ii au to ulunna, tandana kumua massei namasussa penawanna. 7Mangkadami Yosua lako Puang Allataala nakua, “Oo PUANG Allataala to kusompa, apara battuananna Tasuakan llambanni Sa'dan Yordan? La Tabawarakanka lako to-Amori napateikan? La'biranmo ia kenna danggi' bangmo kilamban sambali' mai Sa'dan Yordan! 8Oo Puang Allataala, apamora la kupau, naditalomi to to-Israel! 9Ia ke nasa'dingngi to-Kanaan sola sininna tau inde' tana Kanaan to kaditaloanki', nang la ratui ntalimbungkan napatei ngasankan. Na apara la Tapugauk nada'tan diangga' to sangan-Ta' to liwa' mala'bih?”
10Nakuamo PUANG Allataala lako Yosua, “Ke'dehmoko! Ammusuju' susira tuu? 11Iamo najaji susi tee, nasaba' mpugaukki kasalan to to-Israel. Te'da naturu'i to apa mangka Kupangparentan. Denni mangka mboko apa dipattantu la dilanynya'i, nabunii tama alla' ewananna, nakua nadanggi' nakaissenan. 12Iamo joo napusaba' nate'da nakullei nnewa ewana. Natalomi ewana, nasaba' mbokoi ewanan to dipattantu dilanynya'i. Iamo joo nadipattantu toomi la dilanynya'i. Te'damo Kulantulung kamu', ke te'dapi nadilanynya'i joo ewanan diboko. 13Ke'dehmoko mane! Suai to to-Israel napaccingngi kalena, nasadia mangngolo lako Aku' masawa. Kuanni kumua susi tee kadan-Na PUANG Allataala to nasompa to-Israel, ‘Ee to-Israel, mangkami Kupangparentan kumua lanynya'i ngasanni to apa llan joo kota. Apa den kamu' nnala ori pira'. Ianna te'da mialaii llan mai alla'mi, nang la te'da mikullei nnewa ewami.’ 14Pauanni kumua masawa makale' la mangngolo kamu' simesa'-mesa' suku lako Aku'. La Kupattantui indanna suku to nakanna undi. Iami suku to nakanna undi la mangngolo simesa'-mesa' rapu. Iami rapu to nakanna undi la mangngoloi simesa'-mesa' repok. Iami repok to nakanna undi la mangngolo simesa'-mesa'i. Kupattantui indannara to mpugauk kasalan. 15Inda-inda to diampa' nnannai joo ewanan dipangnganggai diala, la ditunu api sola repokkona na sininna ewananna, nasaba' te'da naturu'i to parenta-Ku' na ncarepai to-Israel.”
16Masawanna joo too, makale' unapa, nasuai Yosua to to-Israel mangngolo simesa'-mesa' suku, nadiampa' kumua suku Yehuda. 17Disuami mangngolo simesa'-mesa' to rapu suku Yehuda, nadiampa' kumua rapunna Zerah. Ia tonna disua simesa'-mesa'mo to repok rapunna Zerah, diampa' kumua repokkona Zabdi. 18Ia tonna disua simesa'-mesa'mo to repokkona Zabdi, diampa'i kumua Akhan, anakkana Karmi, ampona Zabdi, ampo uttu'na Zerah, suku Yehuda to mangpugauk. 19Nakuamo Yosua lako Akhan, “Ee anakku', massapahko lako PUANG Allataala to nasompa to-Israel, mangngakuko jio olo-Na, mupauanna' to apa mangka mupugauk, danggi' naden mubuni.” 20Nakuamo Akhan, “Tongan, aku' to mpugauk kasalan lako PUANG Allataala to nasompa to-Israel. Susi tee to mangka kupugauk: 21Ia to ewanan dirampa, den baju lando liwa' melo panggaraganna to-Babilonia#7:21 to-Babilonia Llan basa Ibrani ia bang una Sinear., den too pera' agi-agi dua kilo na sangbatang bulawan la'bih sitangnga kilo. Gaja kukadoangngii, angkualai, kukalii to litak llan tendaku' kunii mbunii. Kupajiong laloi liu to pera'.”
22Nasuami Yosua to ba'tu pira-pira tau madoi' male lako tendana Akhan. Naampa' tonganni joo ewanan dipangnganggai diala jio tendana Akhan, dilamun jiong litak, na ia to pera' jiongna lalo liu. 23Naalami joo ewanan, nabawai lako olona Yosua sola to-Israel nadipajio olo-Na PUANG Allataala. 24Mangkai joo too, dialami to Akhan ampo uttu'na Zerah, nabawai Yosua sola to-Israel lako Lombok Akhor sola repokkona. Dibawa tooi to sininna sapinna, keledainna, bembala'na, tendana sola sininna to naampui, sola pera', bulawan na baju lando to naboko. 25Ia tonna ratumo lako Lombok Akhor, nakuamo Yosua lako Akhan, “Susi to kamacilakan muparatuanki', susi toomi la Nasessako PUANG Allataala.” Nasilekko'imi batu to-Israel to Akhan sola repokkona, arannai mate ngasan, nadisumpun sola sininna to naampui sola ewanan to naboko, 26namane' ditombonni buda batu joo ngenan. Mangkai joo too, te'damo Namagalli PUANG Allataala. Iamo joo, naratu lako too allo, disanga Lombok Akhor joo ngenan battuananna kamasussan.
Currently Selected:
Yosua 7: mvpAD
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.