SAN MATEO 4
4
Jesús ekyekkónma kelyekhama'
(Mr 1.12-13; Lc 4.1-13)
1Apyentegkek axta Espíritu Jesús yókxexma meykexa énxet yakwayam enxoho keykkónek kelyekhama', natámen xa.#He 2.18; 4.15.
2Apheykmek axta cuarenta ekhem tén han cuarenta axta'a meyke apto m'a, keñe axta eyakha meyk. 3Yo'ókmek axta Jesús kelyekhama' yakwayam keykkónek. Entahak axta eyáneya s'e:
—Nakso' agkok xép aptaha Dios Apketche, yána katnekxak apto s'e meteymog nak.
4Aptahak axta apchátegmowágko Jesús se'e:
—Entemék eknaktáxésamaxche weykcha'áhak se'e: ‘Háwe ekwánxa agkok nento ekyennaktéso apnenyek énxet, akke anhan ekyennaktéso apnenyek ma'a ekyókxoho ektémakxa nak Dios appeywa.’#Dt 8.3.
5Keñe axta ekyentamákxo Jesús kelyekhama' m'a tegma apwányam aptakmela nak Jerusalén, kenátchesákxeyk axta ektahakxa nak netno' agko' tegma appagkanamap. 6Entahak axta eyáneya s'e:
—Nakso' agkok xép aptaha Dios Apketche, enextegenta' náxop; hakte entemék eknaktáxésamaxche weykcha'áhak se'e:
‘Dios sat eláphaksek apkelásenneykha
yakwayam etakmelchesek xép.
Emágwatak sat xép,
yakwayam enxoho metyegwaték meteymog xama enxoho.’#Sal 91.11-12.
7Aptahak axta apchátegmowágko Jesús se'e:
—Temegkek nahan eknaktáxésamaxche weykcha'áhak se'e: ‘Nágkólyekkón aksa Wese' kélagkok Dios.’#Dt 6.16.
8Yentamákxeyk axta makham Jesús kelyekhama' xama egkexe ektahakxa axta netno' agko'. Xekmósek axta ekyókxoho apkelókxa keso náxop, tén han ma'a ektémakxa nak eltakmalma apkelókxa. 9Entahak axta eyáneya s'e:
—Asawhohok sat ko'o almések xép ekyókxoho xa aksok nak, cham'a apkeltekxeya enxoho aptapnák xóp selpeykáso.
10Aptahak axta apchátegmowágko Jesús se'e:
—Kaxeg, kelyekhama', hakte entemék eknaktáxésamaxche weykcha'áhak se'e: ‘Kólpeykesho Dios Wese' egegkok, kólteme wánxa kéláyo m'a.’#Dt 6.13.
11Keñe axta ekyenyawa Jesús kelyekhama', yetlókók axta anhan apkelwe Dios apkelásenneykha aphakxa Jesús, apmésa m'a aksok eyéméxchexa axta.
Jesús apchénamo aptamheykha yókxexma Galilea
(Mr 1.14-15; Lc 4.14-15)
12Xama axta apleg'a amya'a Jesús kélhésekmo Juan sẽlpextétamakxa,#Mt 14.3; Mr 6.17; Lc 3.19-20. apmahágkek axta yókxexma Galilea. 13Apyeyk'ak axta tegma apwányam Nazaret, axta eyke aphákxak ma'a tegma apwányam Capernaum,#Jn 2.12. cham'a apyetnama nak neyáwa wátsam ekpayhegwayam, yókxexma apheykegkaxa axta Zabulón énxet'ák apagkok, tén han ma'a Neftalí. 14Temék axta xa yakwayam enxoho katnehek ma'a ektémakxa axta apnaktáxeséyak weykcha'áhak Isaías, aptaha axta Dios appeywa aplegaso aptéma axta s'e:
15“Yókxexma apheykegkaxa nak Zabulón énxet'ák apagkok
tén han ma'a Neftalí,
cham'a ekpayho nak neyp wátsam Jordán,
ekpayho nak han neyáwa wátsam ekwányam,
tén han ma'a yókxexma Galilea,
apheykegkaxa nak énxet'ák melya'áseyak nak Dios.
16Cháxa apkelteyáseykegkaxa axta énxet'ák
neyseksa ekyaktésakxaxma xa,
apwet'ak axta ekyawe agko' elseyexma;
chápogwatchek axta xa elseyexma nak,
nepyeseksa m'a énxet'ák
apheykencha'a axta nétsapmakxa.”#Is 9.1-2.
17Apchénawók axta apkeltenneykha Jesús ma'a, aptahak axta s'e: “Kólyakmagkas kélwáxok, chágketwa'ak kaxwo' ma'a aptémakxa nak Wese' apwányam Dios.”#Mt 3.2.
Jesús apkelwóneykha hawók nápakha énxet tegye kelasma
(Mr 1.16-20; Lc 5.1-11)
18Apweynchámeyha axta Jesús neyáwa wátsam ekpayhegwayam ekwesey nak Galilea, apkelwetágwokmek axta apkánet énxet, apyáxeg apagko' axta apxegexma: Simón axta apwesey xama, apkeltamhomakpo axta Pedro, keñe axta pók apwesey Andrés. Kelasma axta cha'a etegyagkohok xa énxet'ák nak, apyenyenteyk axta yam'én apagkok neygmen. 19Aptahak axta apkeláneya Jesús se'e:
—Helyetlogma ko'o, atnésesek sat kéxegke kéltegye énxet.
20Ñohok axta appekkenákxo yam'én apagkok, apkelyetlókek axta.
21Apxegákxeyk axta makham Jesús, apwetágwokmek axta makham apkánet énxet apyáxeg apagko' axta apxegexma m'a, Zebedeo axta apketchek xa apkánet nak: Santiago axta apwesey xama, keñe axta pók apwesey Juan, yetlo Zebedeo axta anhan apkelánegkakxo yam'én apagkok kañe' yántakpayhe awáxok xa énxet'ák nak. Apkelwóneyha axta Jesús. 22Ñohok axta appekkenákxo yántakpayhe apagkok xa énxet'ák nak, apyenyókek axta aksa anhan apyap, keñe axta apkelyetlawa Jesús.
Jesús apkelxekmóso énxet apxámokma
(Lc 6.17-19)
23Apsawhekxók axta apweynchámeykha Jesús ma'a yókxexma Galilea, elxekmóshok axta cha'a énxet'ák apchakneykekxexa judíos ekyókxoho yókxexma. Eltennaha axta cha'a tásek amya'a ekxeyenma m'a aptémakxa nak Wese' apwányam Dios, eltakmelchesamhok axta cha'a énxet ekxámokxoho ektémakxa nak apkelháxamap, tén han ma'a ekyókxoho ektémakxa nak apkellegeykegkoho ekmáske.#Mt 9.35; Mr 1.39. 24Ekyókxoho yókxexma Siria axta apxénamakpok Jesús, kélnaklókasegkek axta ekyókxoho ektémakxa nak elmasagcha'a apkelháxamap, tén han ma'a ekyókxoho ektémakxa nak apkellegeykegkoho ekmáske, tén han ma'a kelyekhama' eknaktawáseykha nak, tén han ma'a énxet'ák apkeletsapeykekxoho axta cha'a, tén han ma'a énxet'ák megkamopwána axta cha'a eltakheykha. Apkeltakmelcheseykmek axta cha'a Jesús xa.
25Apxámok axta énxet apkeleñama Galilea apkelyetlákxo Jesús, tén han apkeleñama m'a tegma apwányam Decápolis, tén han apkeleñama m'a tegma apwányam Jerusalén, tén han apkeleñama m'a yókxexma Judea, tén han apkeleñama m'a yókxexma ekpayho nak ekteyapmakxa ekhem wátsam Jordán.
Currently Selected:
SAN MATEO 4: LEGN
Highlight
Share
Copy
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.