Marko 1
1
Yoohanahi Enenyet Baattissiyo Yeesso jit ihara
(Mattaayo 3:1-12, Luuka 3:1-8, Yoohana 1:19-28)
1Waha a uumacchoti Wori Haaggane, Yeesso Kiriistohi Weeli Waakhe miinsan.
2Wihi Isaayahi Waákh íyeyyeedo chiire kallaayo,
“Yeya, ergattiteey ortaahha erga iche rubeyohi enenyete tannabissa.#1:2 Malaaki 3:1.
3Ergattita la hidaade karirriirta,
‘Kamur jit imujjummoocha, jiti us leeyamiit ficcha,#1:3 Isaaya 40:3.’ iche elatta.”
4ꞌDeerka Yoohanahi Enenyet Baattissiyo hidaad yimiyye wori baattissiyo cheeke. Us enenyete baattissiye uskeelicho kasoonokhtaane, ꞌdee Waakh uskeelicho ikakuta. 5Enenyet boroofenhi Yaꞌhuudiya tuumman ichoow ilkerengeetti weene Yeerusaleem tuumman ka soobahe, Yoohana iyimiy. Eti tuummane uskeeliis Waakh icheekte la, Yoohana hawti Yoordane ꞌdusso ka baattissiye.
6Yoohana gaaddi us khabe tinti gaale lakahaaggiche. Saabi us dabar kakhabe la niibe lakahaaggiche. Gololi us yuhum la a gubaal ichoow malab. 7Wori us orey on cheeke a kan, “Etoo ani weyti ikaween ꞌdubeey ka a yamiit. An walah an ahe mele, gulguubsanaanki an gulguubsadi an falfihi kobtiis laka jalkhicho ma muꞌdan. 8Ani toolla bicche atin kabaattissiya, iꞌdaasenyi us berri Rubeyti Munyee ka a atin baattissiya.”
Yeesso labaattissiya toro lakaja
(Mattaayo 3:13-4:11, Luuka 3:21-22, 4:1-13)
9Saahka Yeesso ilkerengeetti Naasaret layadeehe, boroofenhi Gaalilaaya kijirto kayimiyye, Yoohana la hawti Yoordane ꞌdusso ka usu baattissiye. 10Chirra Yeesso bicche goya kasoobaho, sereyti kharradde Rubeyti Munyee la iꞌdi kutukuurrug u isooyagto arge. 11Hooyoo serey kasooyeede, wihi us yidah, “Ati a Weeleeyki an weyti ꞌdoono, weyti ikahamaadicho.”
12Chirraas on Rubeyti Munyee Yeesso hidaad ieregte. 13Ibeen tomon affar Yeesso hidaaddaas on kijire, Seytaan la kajmeti uskeel kaluguꞌddo ikeene. Hidaaddaas ka binahi yibaat on leejire, herti Waakh la Yeesso ihisse.
Abattiti Yeesso kolooraat wahe
(Mattaayo 4:12-22, Luuka 4:14-15, 5:1-11)
14Inkoo Yoohana jeela lagesse ka, Yeesso boroofenhi Gaalilaaya irte. Intaas ka, Wori Haaggane Waakh kayimiy on cheeka. 15Wihi us yidah, “Il kola a yitah! Dakhi Waakh kola a soodowwaate! Uskeeliin kasoonokhda, Wora Haaggane ani atin idowo rummeesda!”
16Yeesso Beyti Buurenye Gaalilaaya afiche kasohtaayi, eti Siimon layadeeh ichoow walaaliiski Andereeya layadeeh, arge. Oroohti bahag lakakhabti, iche bey goya isaate, a mehe iche hiliche a ki bahag lakhabti. 17Yeesso la wihi us iyidah, “Kaaleya, isooraaha abattiteey ateeha, hiloo husube enenyet Waakh liikeeno a atin korcho.” 18Chirraas on oroohti kootte iche bahag kakhabatti ꞌdiisse, Yeesso raahte.
19Yeesso iꞌdaaru marah on orey isohte, Yaakoobohi inam Sebedaayee ichoow walaaliiski Yoohana layadeeh ichehi kooban goya fiddiito, oroohti bahag lakakhabti haagsatti arge. 20Chirraas on lammache wahe, iche la aabbahiche ichoow ꞌdooꞌdi lakireeste kooban goya katabte Yeesso raahte.
Yeesso enenyet antohiis tusa
(Luuka 4:31-37)
21Yeesso ichoow abattitiis ilkerengeetti Kafarnaaꞌhum irteen. Saahka Seeri Lanaso ka, Yeesso minki weysiite Yaꞌhuud gele, enenyet wori Waakh abin sookhabte. 22Enenyet tuummamba saggi usu ꞌdooꞌd walah iabcho, kagirmeeste, a mehe iꞌdi tagaammeti amurre menye, iꞌdi etoo anto khabo, iche ꞌdooꞌd walah iabche. 23Chirraas on etoo ginnatoo dakhatti minkichoki weysiit kijire riire, 24“Wooy! Yeessohi Naasaret, ati mehe nah kaꞌdoonta?” yidah. “Nahe nah massin timiy? Ani alah eti at tahe a garda, at a Ki Munyeenye Waakh kayimiy!”
25Yeesso ginna leejaakhe, “Gammadiche, etaas goya kasoobah!” iyidah. 26Ginnataas chirraakka etaas kafadisse, riirte, et kasoobahte.
27Enenyet tuumman girmeeste. “Waha iꞌdee a mehe?” isworsate. “A yeedi husube, toro anto khabo! Ginnayyo laka amur on ibahcha, icho la yeediis raahaan.” 28Wori usu miinsan dowwa on boroofenhi Gaalilaaya tuumman kataaꞌhe.
Yeesso ꞌdooꞌdi ittaawe samaacha
(Mattaayo 8:14-17, Luuka 4:38-41)
29Uun icho minki weysiit kabaheen, Yaakoobo ichoow Yoohana khabaayi, irteene ichoowka min is Andereeya ichoow Siimon geleen. 30Seyyoh Siimon la sare kululaatta, siriire kajiifta. Chirraas on Yeesso saggi araarri ikhannanyahe liicheeke. 31Ulla irte, dahan sookhabte, sootoolliche. Lakabukkhe iche la icho goollin sookhabatte.
32Gelebtaas, inkoo orrahe dihte ka, enenyet ꞌdooꞌdi khakkhannan ichoow ki ginna dakhatti tuumman ba Yeesso ikeene. 33Ilkerengeet tuumman soobahte, min afiis buuhisse. 34Yeesso la ꞌdooꞌdi ittaawenye sugeerreti yeerare khabo samaache. ꞌDooꞌdi ittaawenye ginnayyo dakhtaan laka, ginnayyo kabahche. Iꞌdaasenyi ginnayyo amuri icho kasooyeedaan tirte, a mehe eti usu yahe a garteenee.
Yeesso Gaalilaaya ka Yeedi Waakh cheeka
(Luuka 4:42-44)
35Yeesso baryoti booran ka kahe, min kabahe, inti enenyet ikijirin irte, weeste. 36Siimon ichoow wahalhiis ba irteene, usu yowteen. 37Chirri icho ꞌheleen ka, wihi icho iyidaaheen, “Enenyet tuumman ati kiyowta.”
38Yeesso wihi us ilaabe, “Kaaleya, intoo addan a iranni, iꞌdi maanta ilkerengeetohi soodow a iranni, ꞌdee Yeedi Waakh a cheeko. An alah wahaase iimiy.” 39ꞌDeerka boroofenhi Gaalilaaya tuumman goya kasohte, Yeedi Waakh minassichoki weysiite Yaꞌhuud ka cheeke, ꞌdooꞌdi ginnayyo dakhtaan la ginnayyo kabahche.
Yeesso etoo buꞌda sar kasoofoofte samaacha
(Mattaayo 8:1-4, Luuka 5:12-16)
40Saahka etoo buꞌdatoo uskul sar kasoofoofte Yeesso iyimiy. Ortiis ka jilbo il kaguꞌdde, hawwaaste, wihi us yidah, “Chirri at ꞌdoonto, at biꞌdir ibihin a tabuuꞌd.”
41Yeesso etaas weyti uur isoonugleeste, dahan ooge et ꞌdaare, wihi us iyidah, “A ꞌdoona, biꞌdir bah!” 42Chirraas on buꞌdati kootte etaas sar kasoofoofte baabaate, et samaate.
43Yeesso chirraas on et erge, weyti tootooche wihi us iyidah, 44“Etoo kalday laka jit ka aleeyeedine, iꞌdaasenyi kuhaani iiro saggi at isamaatte istus. Sadakhati amurre Muusa kachiirane eti buꞌda lakabahche bahcho bihiche, ꞌdee garti saggi lakisamaache a titaahe.” 45Iꞌdaasenyi etaas irte, enenyet tuumman yeedaas icheeke, woraas taaꞌhiche. Yeesso saahka jeentetaas u chiꞌ laargo ilkerengeet gelin ma yabuuꞌd, iꞌdaasenyi hidaad on fiddiya. Eheetteey laka, enenyet Yeesso ma ꞌdiicho, ꞌdollo tuumman ka a iyamiit on.
Currently Selected:
Marko 1: rel
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.