1 โมเซ 4
4
ไลลวง คาอิน ไม่ เฮเบ่น
1เญือม เอีจ โฮลฮ อาดั่ม ยุ ปุ แตะ ไม่ เอวา ปรโปวน เญือะ แตะ เซ, ปุย เญือะ อื เซ โรวก. ฟวยจ เซ เกิต คาอิน นึง. เอวา เซ อัฮ เฮี, “อาึ เอีจ โฮลฮ กวน รเมะ แตะ เบือ เรอึม พะจาว แตะ,” อัฮ เซ. 2ฟวยจ เซ เกิต แม ปุ. มอยฮ อื มัฮ เฮเบ่น.
เฮเบ่น เซ มัฮ ป เลียง แกะ. คาอิน เซ มัฮ ป ยุฮ รปึม. 3ไก ติ ซเงะ คาอิน โรวก เปลิ โคะ เปลิ เอาะ ละ ซ ทไว แตะ ละ พะจาว. 4เฮเบ่น เซ โรวก โรฮ โม กวน แกะ เกิต โรง ยุฮ แตะ ง่อน. มอก อื. โตะ อื ไม่ ลออยฮ อื เซ ตอง ทไว อื ละ พะจาว. เฮเบ่น เซ ปุก รพาวม พะจาว. ป ทไว อื เซ ปุก โรฮ รพาวม อื. 5คาอิน เซ ปุก โตว รพาวม พะจาว. ป ทไว อื เซ ปุ โรฮ ปุก อื. คาอิน รอก ลัมเลือ รพาวม. นา มึต นา มอง ฆาื อื.
6 พะจาว อัฮ เฮี ละ คาอิน, “เมอ รอก พาวม เปอะ นึง อื? มัฮ ฆาื เมอ ป นา มึต นา มอง เปอะ ฆาื อื? 7ดัฮ ปะ ยุฮ ป ปุก โฮ, โม่ ซ ปุก โรฮ ละ อาึ อื? ดัฮ ปะ ยุฮ ป โอ ปุก, มั่ป เซ เอีจ อาวต นึง โตะ รเวือะ ละ ซ ดัม อื บุก ปะ ตอก ซัตซิง โฮ, นึง ฆวต เป อื ปะ. ไมจ เปอะ โตว เกือฮ ติ แตะ ไป นึง,” อัฮ เซ ละ อื พะจาว เยอ.
8คาอิน อัฮ เฮี ละ เฮเบ่น ป มัฮ ปุ แตะ เซ, “โฮว, โฮว ดิ นึง รปึม และ,” อัฮ เซ. ฟวยจ เซ โฮว เนอึม. เญือม อาวต ดิ อื นึง รปึม เซ คาอิน โกฮ ยุฮ ยุม ไม่ ปุ แตะ เซ.
9ฟวยจ เซ พะจาว อัฮ เฮี ละ คาอิน, “เฮเบ่น ป มัฮ ปุ เปอะ เซ อาวต ก เมอ?” อัฮ เซ. คาอิน โลยฮ อื, “ยุง โตว ก อาวต ปุ แตะ เซ. มัฮ โตว อาึ ป แลน แก เยอ. เกียฮ ไฮมญ โน่ง เปอะ อาึ นึง เมอ?” อัฮ เซ.
10 พะจาว อัฮ เฮี, “ปะ เกียฮ ยุฮ โน่ง เปอะ โอเอีฮ ตอก เซ เมอ? ฮนัม ปุ เปอะ ป ปัต ลังเตะ เซ ตอก เอิน ป รโอง ดวน อาึ โรก เวน ละ ปะ. 11ปะ ซ ลอก เปอะ ป ตึก นึง โซะ แตะ ฆาื อื. เฆิม เฮี ซ กี เตะ ไฮจ รอาวม ละ เปอะ, นึง เอีจ มัฮ เตะ เฮี ป ลอก ฮนัม ปุ เปอะ เซ ไม่ ฟอง โรฮ อื ปะ ละ อาึ. 12เญือม ยุฮ เปอะ รปึม เญือะ ซ ลุก โตว ป ซมา ลโลวง เปอะ นึง ฆาื อื ตอก ไพรม แตะ. ปะ ซ โฮลฮ เปอะ โตว อาวต ไมจ ตอก ปุย. ซ โฮลฮ เปอะ ตอ ไป ตอ มา ลอป นึง ปลัฮเตะ เฮี ฆาื อื,” อัฮ เซ ละ อื พะจาว.
13คาอิน อัฮ เฮี ละ พะจาว, “ตุต เกือฮ เปอะ อาึ ลอก เฮี เอีจ โฮฮ ฮา ปุน โอต เตอะ. 14ปะ เอีจ โครฮ เปอะ อาึ โอก ฮา ปลัฮเตะ ไมจ. เอีจ เกือฮ เปอะ อาึ ซไง ฮา โกะ แตะ. อาึ ซ โฮลฮ โฮว ไป โฮว มา ลอต แปน ปุย โอ ไก เญือะ อาวต คราว โซม ฆาื อื. ปุย ดัฮ รโตฮ ยุ อาึ ตึน ซ ยุฮ ยุม ไม่ เยอะ,” อัฮ เซ คาอิน เซ.
15 พะจาว อัฮ เฮี, “มัฮ โตว ตอก เซ. ดัฮ ไก ป ยุฮ ยุม ไม่ ปะ อา, ปุย เซ ซ ลอก ตุต ฆาื อื อาแลฮ เตะ เซ เอิน,” อัฮ เซ ละ คาอิน. เญือม เซ พะจาว ไม อาึง คาอิน ติ เจือ, นึง ซ แปน อื ควน เกือฮ ปุย ยุง โอ แตะ ไมจ ยุฮ ยุม ไม่ อื เญือม รโตฮ อื ยุ คาอิน เซ. 16คาอิน โอก ซไง ฮา ก อาวต พะจาว. อาวต นึง เมือง โนต,#4:16 นึง ลปุง ฮีบรู โนต มัฮ อัฮ อื ตอ ไป ตอ มา ไม่ อื. บลัฮ รปึม เอเด่น เซ ลวง ลั่ก โอก ซเงะ นึง อื.
ไลลวง จัตเจือ คาอิน
17คาอิน ไม่ ปรโปวน เญือะ อื โฮลฮ กวน รเมะ แตะ ติ. อัฮ เอโนก ละ อื. เญือม เกิต เอโนก เซ คาอิน ปุก เญือม ตัง อื ย่วง ติ. ลอต อัฮ ย่วง เอโนก ไม่ อื ฆาื อื. 18กังเคะ เอ เอโนก เซ ไก โรฮ กวน รเมะ, มอยฮ อื มัฮ อิรัต. อิรัต เซ มัฮ เปือะ เมฮุยาเอน. เมฮุยาเอน เซ มัฮ เปือะ เมทูชาเอน. เมทูชาเอน เซ มัฮ เปือะ ลาเมก.
19ลาเมก เซ ไก ปรโปวน เญือะ ลอา ปุย. มอยฮ อื มัฮ อาด่า ไม่ ซินลา. 20กวน อาด่า เซ มัฮ ยาบั่น. โม ป อาวต นึง พากัง เมือ โรง อื ละ ซ เลียง แตะ ซัตซิง เอีจ มัฮ จัตเจือ ยาบั่น เซ. 21ปุ ยาบั่น เซ มัฮ ยูบั่น. โม ป เกง นึง เตียต แตะ ซึง โฮวน ไซ ไม่ โม ป เกียฮ ปาึง เปี มัฮ จัตเจือ ยูบั่น เซ. 22ซินลา ไก โรฮ กวน รเมะ ติ. มอยฮ อื มัฮ ทูบั่นคาอิน. ปุย เซ มัฮ จังเคือง เกียฮ แตม โอเอีฮ นึง ไร ซเงี ไม่ ไร เฮลีจ. รนัน ทูบั่นคาอิน เซ มัฮ นาอามา.
23ลาเมก อัฮ เฮี ละ ปรโปวน เญือะ แตะ นึง รซอม แล่ แตะ, “อาด่า, ซินลา, ง่อต ที ลปุง อาึ เฮี. ไก ปรเมะ นุม ติ ปุย, เคียต ปุฮ อาึ. อาึ ปังเมอ โรก เอิน ละ อื ปอ ยุม อื. 24ปุย ดัฮ ยุฮ ยุม ไม่ คาอิน โฮ, จัมเปน ลอก ตุต แตะ ฆาื อื อาแลฮ เตะ. ดัฮ มัฮ ตอก เซ, ปุย ยุฮ ยุม ไม่ อาึ อื ปังเมอ ซ ลอก เอิน ตุต แตะ ฆาื อื อาลแฆลฮ โรฮ อาแลฮ เตะ เอิน,” อัฮ เซ ละ อื.
ไลลวง เซต
25กังเคะ เอ, อาดั่ม ไม่ เอวา เซ ไก แม โรฮ กวน รเมะ อื. เญือม เซ เอวา อัฮ เฮี, “พะจาว เอีจ เกือฮ แม กวน รเมะ เนิ ตัง เฮเบ่น ป ยุฮ คาอิน ยุม ไม่ เซ,” อัฮ เซ. ปุก มอยฮ กวน แตะ เซ. อัฮ เซต ละ อื. 26เซต เซ ไก โรฮ กวน รเมะ ติ. อัฮ เอโนต ละ อื.
มัฮ เญือม เซ เญือม อัฮ โรง ปุย พะเยโฮวา เญือม ไววอน แตะ.
Currently Selected:
1 โมเซ 4: lcp
Highlight
Share
Copy
Want to have your highlights saved across all your devices? Sign up or sign in
© (Active), Thai Bible Society