Mariko 16
16
Yesu wawuka ku ŵakufwa
(Mat 28.1-8; Luk 24.1-12; Yoh 20.1-10)
1Para zuŵa la Sabata likati lajumpha, Mariya wa ku Magadala, Mariya nyina wa Yakhobe na Salome ŵakagula vyakununkhiskira kuti ŵakaphakazge thupi la Yesu. 2Na mulenjelenje pa zuŵa lakudanga mu Sabata, apo dazi likati lafuma waka, ŵakaruta ku dindi, 3ndipo ŵakayowoyeskananga kuti, “Kasi ndi njani wamkutiwuskirapo libwe pa muryango wa dindi?” 4Para ŵakati ŵinuska maso ŵakawona kuti libwe lawuskikapo kale pa dindi. Likaŵa libwe likuru chomene. 5Ŵakati ŵanjira mu dindi, ŵakawona munyamata mweneuyo wakavwara munjilira utuŵa, wakhara ku dera la maryero ndipo iwo ŵakazukuma.
6Munyamata wakaŵaphalira kuti, “Rekani kuzukuma. Mukupenja Yesu wa ku Nazarete uyo ŵakamupayika pa mphinjika. Wawuka ku ŵakufwa! Wali pano chara. Wonani malo agha ŵakamugonekapo. 7Kweni rutani mukaŵaphalire ŵasambiri ŵakhe na Petrosi kuti, ‘Wamudangirirani ku Galileya ndiko mwamkumuwona nga ndi umo wakamuphalirirani.’ ”#Mat 26.32; Mrk 14.28
8Penepapo ŵakafumamo mu dindi na kuchimbira, ŵakatenthema na kuzizwa pa ivyo ŵakawona. Ŵakayowoya kanthu ku waliyose chara, chifukwa ŵakaŵa na wofi.
Umo Uthenga uwu ukamaliranga kale
16.9-20
Yesu wakuwonekera kwa Mariya wa ku Magadala
(Mat 28.9-10; Yoh 20.11-18)
[9Yesu wakati wawuka ku ŵakufwa na mulenjelenje pa zuŵa lakudanga la Sabata, wakawonekera danga kwa Mariya wa ku Magadala, mweneuyo wakamufumyamo viŵanda vinkhonde na viŵiri. 10Mariya wakaruta kuya kaŵaphalira awo ŵakakharanga na Yesu apo ŵakatengeranga na kulira. 11Para ŵakati ŵapulika kuti Yesu ngwamoyo, na kuti Mariya wa ku Magadala wamuwona, kuti ŵakapulikana chara.
Yesu wakuwonekera ku ŵasambiri ŵaŵiri
(Luk 24.13-35)
12Pamanyuma pa ichi, Yesu wakawoneka mu kaŵiro kanyakhe ku ŵasambiri ŵaŵiri ŵa iwo apo ŵakarutanga kwawo. 13Penepapo ŵasambiri aŵa ŵakawerera na kuya kaŵaphalira ŵanyawo, kweni kuti ŵakapulikana nawo chara.
Yesu wakuwonekera ku ŵasambiri 11
(Mat 28.16-20; Luk 24.36-49; Yoh 20.19-23; Mil 1.6-8)
14Pa umaliro, Yesu wakajirongora ku ŵakhe 11#16.14 11: Ndiwo ŵasambiri 11, Yudasi Isikariyoti wati wafwa. apo ŵakaryanga. Wakaŵachenya chifukwa chakuwura kupulikana kwawo, ndiposo na unonono wa mitima yawo. Pakuti ŵakawura kugomezga awo ŵakamuwona wakati wawuka ku ŵakufwa. 15Ndipo wakati kwa iwo, “Rutani mu charu chose, mukapharazge Uthenga Uweme ku vilengiwa vyose.#Mil 1.8 16Yose uyo wakupulikana na kubapatizika wamkuponoskeka, kweni uyo wamkuwura kupulikana wamkususkika. 17Awo ŵamkupulikana ŵamkuchita vimanyikwiro ivi: Mu zina lane ŵamkufumiska viŵanda ndipo ŵamkuyowoya mu viyowoyero vya chilendo. 18Ŵamkukora njoka ndipo usange ŵamkumwa kanthu kakukoma kuti ŵamkupwetekeka chara. Ŵamkuŵika mawoko ghawo pa ŵarwari ndipo ŵamkuchira.”
Yesu wakutorekera kuchanya
(Luk 24.50-53; Mil 1.9-11)
19Fumu Yesu wakati wayowoya nawo, wakatorekera kuchanya ndipo wakakhara ku woko la maryero la Chiuta.#Mil 1.9-11 20Ntheura ŵasambiri ŵakaruta ndipo ŵakaya kapharazga kosekose, apo Fumu yikateŵeta nawo pamoza, na kukhozga upharazgi wawo na vimanyikwiro. Ameni.]
Kamarizgiro kanyakhe ka kale
16.9-10
[9Ŵanakazi ŵakaruta kwa Petrosi na ŵanyakhe ndipo ŵakaŵakonkhoskera vyose ivyo ŵakaphalirika. 10Pamanyuma pa ivi, Yesu mwenecho, kwizira mu ŵasambiri ŵakhe kufuma ku vuma mpaka ku zambwe, wakatuma uthenga wa chiponosko cha muyirayira uwo ngwa kupatulika na wamoyo.]
Currently Selected:
Mariko 16: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi