Mariko 13
13
Yesu wakuyowoya za kubwanganduka kwa Nyumba ya Chiuta
(Mat 24.1-2; Luk 21.5-6)
1Apo Yesu wakafumanga mu Nyumba ya Chiuta, yumoza wa ŵasambiri ŵakhe wakati, “Musambizgi, wonani ukuru wa mawe agha na nyumba izi.”
2Yesu wakazgora wakati, “Mukuwona nyumba zikuruzikuru izi? Palije nanga ndi libwe limoza ilo lamkurekeka pachanya pa libwe linyakhe kwambula kuwiskikira pasi.”
Visuzgo na kuzikizgika
(Mat 24.3-14; Luk 21.7-19)
3Apo Yesu wakakhara pasi pa Phiri la maOlive kuthyana waka na Nyumba ya Chiuta, Petrosi, Yakhobe, Yohane na Andreya ŵakamufumba pa yekha ŵakati, 4“Mutiphalire, kasi vinthu ivi vizamkuŵako pauli? Ndipo kuŵenge chimanyikwiro uli kurongora kuti vyose ivi vili pafupi kufiskika?”
5Yesu wakati kwa iwo, “Chenjerani ndipo paŵavye munthu wamupuruskani. 6Chifukwa ŵanandi ŵamkwiza mu zina lane na kuyowoya kuti, ‘Khristu ndine’ ndipo ŵamkupuruska ŵanthu ŵanandi. 7Para mwamkupulika chiwawa cha zinkhondo za pafupi na mbiri ya zinkhondo zakuchitika kutali, mungakenjerwanga. Pakuti vya ntheura ivi vikwenera kuŵako nadi, kweni kuti ndiwo umaliro chara. 8Pakuti mtundu wamkuwukira mtundu unyakhe, ndipo ufumu nawo wamkuwukirana na ufumu unyakhe. Kwamkuŵako vindindindi mu malo ghakupambanapambana ndipo kwamkuŵakoso njara. Uku ndiko kwamba kwa nyengo ya visuzgo.”
9Kweni Yesu wakati, Imwe muchenjere, ŵanthu ŵamkumuperekani ku zimphara na kumweruzgani ndipo ŵamkumutimbirani mu nyumba zawo zakusoperamo. Mwamkwimilira panthazi pa nduna na ŵakaronga chifukwa cha zina lane kuti mukaŵe ŵakaboni ŵane panthazi pawo.#Mat 10.17-20; Luk 12.11-12 10Kweni Uthenga Uweme ukwenera kupharazgika danga ku mafuko ghose. 11Para mwakoreka na kutorekera ku mphara, mungakenjerwanga na icho mwamkuyowoya. Kweni mwamkuyowoya icho Chiuta wamkumupani pa nyengo yira, chifukwa ndimwe mwamkuyowoya chara kweni Mzimu Mutuŵa. 12Mubali wamkwendera mphiska mubali wakhe kuti wakomeke, wiske wamkumwendera mphiska mwana wakhe kuti wakomeke. Ŵana nawo ŵamkwendera mphiska ŵapapi ŵawo kuti ŵakomeke. 13Ŵanthu wose ŵamkumutinkhani chifukwa cha zina lane. Kweni uyo wamkuzizipizga mpaka ku umaliro, ndiyo wamkuponoskeka.#Mat 10.22
Suzgo yikuru
(Mat 24.15-28; Luk 21.20-24)
14“Para mukuwona chanthontho chakuparanya chikwimilira pa malo ghambula kwenerera kuŵapo (uyo wakuŵazga wapulikiske), penepapo awo ŵali mu Yudeya ŵachimbilire ku mapiri.#Dan 9.27, 11.31, 12.11 15Uyo wali pachanya pa nyumba yakhe wareke kwikha kuti wakatore kanthu mu nyumba mwakhe.#Luk 17.31 16Uyo wali ku munda wareke kuwerera ku nyumba kuya katora chakuvwara chakhe. 17Soka ku ŵanakazi awo ŵizamkuŵa na nthumbo pa nyengo yira na awo ŵizamkonkheska twana! 18Rombani kuti ivi vireke kwiza kachitika pa nyengo ya chiwuvi. 19Pakuti mu mazuŵa agho kwizamkuŵa suzgo iyo yindaŵeko na kale chara, kufuma ku mutendeko apo Chiuta wakalengera charu, mpaka sono, ndipo yizamkuŵakoso ya ntheura chara.#Dan 12.1; Uvu 7.14 20Ntheura Fumu yirekenge kudumurizga mazuŵa agho, mphanyi palije munthu wakuponapo. Kweni chifukwa cha ŵakusoreka ŵakhe yikaghadumurizgako.
21“Ndipo usange munthu wakuyowoya kwa imwe kuti, ‘Wonani, Mesiya wali pano!’ Panji, ‘Wonani, yura para!’ Mungakamupulikanga chara. 22Pakuti ŵamesiya ŵa utesi na nchimi za utesi zamkuwuka ndipo zamkurongora vimanyikwiro vikuru na minthondwe mwakuti usange nchamachitiko ŵapusiske ŵakusoreka ŵa Chiuta. 23Kweni imwe muchenjere. Ndamuphalirani nkhanira vinthu ivi vindachitike.”
Kwiza kwa Mwana wa Munthu
(Mat 24.29-31; Luk 21.25-28)
24“Kweni mu mazuŵa agho pamanyuma pa visuzgo vira, dazi lizamkufipiskika, na mwezi nawo kuti wamkuŵala chara.#Yes 13.10; Eze 32.7; Yoy 2.10, 31, 3.15; Uvu 6.12 25Ndipo nyenyezi zamkumbotoka kufuma kuchanya, nkhongono za mlengalenga zamkusunkhunyika!#Yes 34.4; Yoy 2.10; Uvu 6.13 26Penepapo ŵanthu ŵamkuwona Mwana wa Munthu wakwiza mu maŵingu na nkhongono zikuru na uchindami.#Dan 7.13; Uvu 1.7 27Ndipo wamkutuma ŵangelo ŵakhe kuti ŵakawunganye ŵakusoreka ŵakhe kufuma ku mphepo zinayi, na kufuma ku mphererekezgo za charu na mtambo.”
Chisambizgo chakufuma mu chikuyu
(Mat 24.32-35; Luk 21.29-33)
28“Sambiraniko chisambizgo ichi kufuma ku khuni la chikuyu. Para mukuwona kuti minthavi yakhe yayamba kusunda na kuŵa na mahamba, mukumanya kuti chifuku chili pafupi. 29Ntheura pera, para mukuwona vinthu ivi vikuchitika, manyani kuti wali pafupi ndipo wali pa muryango. 30Nadi nkhumuphalirani kuti, ŵanthu ŵa muwiro uwu kuti ŵamarenge chara, visuke vinthu vyose ivi vichitike. 31Kuchanya na pasi vimarenge, kweni mazgu ghane kuti ghati ghamarenge chara.”
Palije munthu uyo wakumanya zuŵa panji ora
(Mat 24.36-44)
32“Palije munthu na yumoza uyo wakumanya vya zuŵa ilo panji ora nanga mbangelo ŵa kuchanya, nesi Mwana kweni Ŵadada pera.#Mat 24.36 33Chenjerani, muŵe maso, chifukwa mukumanya apo nyengo yikwanirenge chara. 34Kuli nga ndi mwene-nyumba mweneuyo wakuruta pa ulendo, ndipo wakupereka nyumba yakhe mu mazaza gha ŵateŵeti ŵakhe, yose chigaŵa chakhe, ndipo wakuphalira mulinda wa pa muryango kuti waŵe maso.#Luk 12.36-38, 19.12 35Ntheura muŵe maso, chifukwa mukumanya chara apo mwene-nyumba wizirenge, panji na mise, panji na usiku pakati panji ku matandakucha para ŵatambala ŵakulira, panji na mulenje, 36mzire para wakwiza mu mabuchibuchi, wizakamusangani muli mu tulo. 37Icho nkhumuyowoyerani imwe, nkhuyowoyera wose, ‘Muŵe maso.’ ”
Currently Selected:
Mariko 13: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi