Luka 2
2
Byin Yesu hu
(Mat 1:18-25)
1Di̱n jen nang á̱ mbyin Yesu a̱ni, Kaisar A̱ugustut, a̱gba̱ndang a̱gwam shan A̱romawa wu, si̱ nwuak doka; nyia̱ ku yet ta hwa á̱ fang a̱mgba̱m á̱niet ba mi̱ bibyin ku shya̱ mbwak tyok A̱romawa hu a̱ni. 2(Fang huni hwa ku yet si̱ nang á̱ ntsa di̱n jen nang Ki̱ri̱niyat ku nyia̱ tyok tazwa a̱byin Suriya ka a̱ni). 3A̱wot konyan si̱ bwuok a̱ nat a̱keang a̱tyia̱ a̱khwop gu, da̱nian á̱ ka lyuut a̱lyoot nggu ka, á̱ fang gu a̱ja. 4Huhwa Isuu si̱ doot ma̱ a̱keang Na̱za̱ra̱t, mi̱ fam a̱byin Ga̱lili. A̱ si̱ nat Ba̱italami a̱keang Da̱wuda mi̱ fam a̱byin Yahudiya, mat a̱ ku neet mi̱ kwai a̱gwam Da̱wuda ja.
5Isuu ku nat ndung ma̱ng Ma̱ryamu, a̱sak nggu wu nang á̱ nda̱p ba nyeang hu a̱ni, nang gu shya̱ ma̱ng a̱fa#2:5 Wa̱i a̱lyiat: Nang gu shya̱ ma̱ng a̱fa. Mi̱ Mat 1:24 Isuu wa ka̱n kyiak Ma̱ryamu a̱ nat ndyo a̱mali nggu nang a̱byii̱k nggu a̱ni. A̱wot ba̱ ku lyen á̱ghyang nang a̱byii̱k ma̱ng a̱tyok a̱ni bah, si̱ nang á̱ mbyin Yesu. Mat a̱nia, á̱ kyiak Isuu ma̱ng Ma̱ryamu nang ba̱ ni̱ nyia̱ si̱sak hwa ma̱ng á̱ghyang.. 6Nang ba̱ nshya̱ a̱ja a̱ni, jen byin nggwon Ma̱ryamu ji si̱ nyia̱. 7A̱wot a̱ si̱ byin nggwon a̱ni̱nap nggu ka, ka̱ yet a̱sam a̱ni. A̱ si̱ kup ka ma̱ng a̱yaatoot lurung nggwon. A̱ si̱ myiai nka mi̱ kukwon nang á̱ nka̱u nkyang zwa yak a̱ni. Mat ba̱ ku shya̱ a̱vwuo kwai ma a̱chya̱ khwat á̱nietchen ka bah.
A̱yaata̱m Tswa A̱gwaza Tak Á̱niet Chok Zón Seap Byin Yesu hu
8Á̱ ku byia̱ á̱niet chok zón seap ba̱ si̱ khwat mi̱ kyai kpa̱mkpaan ma̱ a̱keang a̱kya; nang ba̱ chok a̱ka̱sorong zón seap mba na a̱tyetuk a̱kya. 9A̱ta̱m tswa A̱gwaza si̱ kin ghwut a̱ yong kpa̱sai da̱ a̱vwuo mba ma̱ tsi̱m! A̱wot a̱kyenkyai shi A̱gwaza wu si̱ tyia̱ ma̱ mya̱ra̱m a̱ tyong ba a̱ keang; ba̱ si̱ fa̱k a̱wun ba̱t!
10A̱wot a̱ta̱m tswa wu si̱ nyia̱ ma̱ng a̱mba,
“Nyi yok fa̱k a̱wun bah!
N bai ma̱ng a̱nyin A̱sham Nkhang,
ka̱ na tyia̱ a̱mgba̱m á̱niet ba a̱gba̱ndang a̱gwai a̱ni!
11Mat a̱fwun kani, mi̱ Ba̱italami a̱keang a̱gwam Da̱wuda,
á̱ byin nyin nggwon,
ka̱ yet A̱tyusan!
Kikya bu yet Kristi, a̱tyu nang A̱gwaza kup ka tyok a̱ni;
kikya bu yet A̱tyoli wu.
12A̱wot a̱lama a̱ na tyia̱ nyi nfi̱k ka a̱ni, nggu wa yet;
nyi na shya̱ nggwon a̱fai
nang á̱ kup ka ma̱ng a̱yaatoot lurung nggwon,
nang ka̱ myian mi̱ kukwon ka̱u nkyang zwa yak.”
13Mi̱ di̱ yong a̱hwa, á̱kpa a̱yaata̱m tswá A̱gwaza si̱ kin tyia̱ pwut á̱ ghwut kpa̱sai neet Ma A̱gwaza tswazwa mbeang a̱ta̱m tswa a̱nyiung wu! Ba̱ si̱ ta̱bat dyep A̱gwaza nyia̱,
14“Zi̱ dyep A̱gwaza a̱ shya̱ tswazwa a̱ni!
A̱wot yok swat nyinyang ku bai da̱ a̱vwuo á̱niet mi̱ swanta ba,
nang A̱gwaza fwuong nyinyang mba a̱ni!”
15Nang a̱yaata̱m tswá ba mbwuok á̱ nat Ma A̱gwaza tswazwa ka a̱ni, á̱niet chok zón seap ba si̱ nyia̱ ma̱ng á̱ghyang mba, “Nyi bai ma̱ninika zi̱ nat Ba̱italami; zi̱ ka li kyang ku bai nang A̱gwaza tak ma̱ng a̱nzi̱t a̱ni!”
16Ba̱ si̱ ghan á̱ nat Ba̱italami. Ba̱ si̱si̱ shya̱ Ma̱ryamu ma̱ng Isuu; a̱wot nang nggwon ka myian mi̱ kukwon nang á̱ nka̱u nkyang zwa na yak a̱ni.
17Nang á̱niet chok zón seap ba ndi nggwon ka a̱ni, ba̱ si̱ tak ma̱ng kuzang a̱yin kyang hu ku bai a̱ni; ma̱ng nkhang nang a̱ta̱m tswa A̱gwaza wu tak ma̱ng a̱mba tazwa nggwon ka a̱ni. 18A̱mgba̱m á̱niet ba, ba̱ fa̱k nkhang nang á̱niet chok zón seap ba hyia̱ ma̱ng a̱mba tazwa nggwon ka a̱ni, si̱ fa̱k a̱ga̱de!
19A̱wot Ma̱ryamu si̱ ba̱ng a̱mgba̱m a̱lyiat nani mi̱ fwuo nggu hu. A̱ si̱ nyia̱ a̱di̱dam da̱ na kuzang jen. 20A̱wot mba, á̱niet chok zón seap ba si̱ bwuok á̱ nat di̱n tyan chok zón seap ji. Ba̱ si̱si̱ dyep A̱gwaza á̱ tsa á̱ bu nwuat gu shi. Mat a̱mgba̱m nkyang nang ba̱ fa̱k, ba̱ si̱ bu li a̱ni, na̱ nat cha̱chaat ma̱nang a̱ta̱m tswa wu ku ntak ma̱ng a̱mba a̱ni!
Á̱ Neap Yesu A̱mali Nwuat Za̱nang A̱gwaza
21A̱tuk nang nggwon ka nnyia̱ mam a̱ni̱nai di̱ mbyin, jen si̱ nyia̱ nang á̱ na ntyia̱ nka mi̱ chen a̱ni. Ba̱ si̱ tyia̱ nka a̱lyoot “Yesu.” Neet nang Ma̱ryamu ka̱n byin nggwon ka bah, a̱ta̱m tswa A̱gwaza wu ku tak ma̱ng a̱nggu nyia̱ á̱ na yei a̱lyoot nggwon ka “Yesu.”
22Jen si̱ nyia̱ nang ba̱ na nkwi a̱na̱ndyung mba wu ba̱ neap za̱nang, ma̱nang á̱ ndyuut mi̱ doká Musa ji di̱n jen nang á̱ mbyin nggwon a̱ni. Mat a̱nia, á̱niet mbyin Yesu ba si̱ nat ma̱ng a̱nggu mi̱ Urusha̱lima, ba̱ ka neap gu a̱zaghyi A̱gwaza. 23Ma̱nang á̱ ndyuut mi̱ doka A̱gwaza ji a̱ni nyia̱,
“Kuzang nggwon ni̱nap nang á̱ byin ka̱ yet a̱sam a̱ni;
ku yet ta hwa á̱ neap ka a̱zaghyi A̱gwaza.”#2:23 Ghw 13:2.
24A̱wot ba̱ neap za̱nang ma̱nang á̱ ntyiet mami doka A̱gwaza ji a̱ni, nyia̱,
“Ku yet ta hwa á̱ neap a̱chyuang a̱yaabwa a̱feang;
ku mman a̱cha̱chet a̱yaabwa a̱mali a̱feang.”#2:24 Li̱v 12:8.
Simiyon Tak Á̱zanson tazwa Yesu
25A̱ghyang a̱niet ku nshya̱ mi̱ Urusha̱lima di̱n jen a̱ja. Á̱ si̱ ngyei nggu Simiyon. A̱ ku nyia̱ tsotswat. A̱ si̱ bu yet a̱tyu fwuong a̱wun A̱gwaza ba̱t. A̱ si̱ fwuong jen ji nang Kristi#2:25 Wa̱i a̱lyiat: Kristi fa “A̱tyu nang A̱gwaza kup gu tyok a̱ni.” Ma̱r 1:1; Yon 1:41. na nsan á̱niet Isi̱rela ba a̱ni. A̱wot A̱za̱za̱rak Ntswa wu si̱ shya̱ da̱ nggu.
26A̱wot A̱za̱za̱rak Ntswa wu ku mi̱ ntak ma̱ng Simiyon, nyia̱ da̱ a̱ na khwu bah, si̱ nang gu li Kristi, a̱tyu nang A̱gwaza kup gu tyok a̱ni. 27A̱tuk a̱kya, A̱za̱za̱rak Ntswa wu si̱ nat ma̱ng a̱nggu mi̱ didyaat A̱mali Nwuat Za̱nang A̱gwaza ka; nang Isuu ma̱ng Ma̱ryamu nnwuo A̱mali Nwuat Za̱nang ka ba̱ neap Yesu a̱zaghyi A̱gwaza, cha̱chaat ma̱nang á̱ ndyuut ma̱ doka A̱gwaza ji a̱ni. 28Simiyon si̱ kin tyia̱ gba̱ng ma̱ng a̱mba! A̱ si̱ san nggwon ka mbwak nfeang, a̱ si̱ dyep A̱gwaza nyia̱,
29“A̱gwaza, ma̱ninika yok a̱khwo ang wu
a̱ nkat mami nyinyang;
ma̱nang a ka̱n nyia̱ nung a̱li̱ka̱uli wu a̱ni!
30Mat ma̱ninika á̱ghyi nung ba li A̱tyusan wu,
31nang a jhyi sak da̱nian a̱mgba̱m nnwap mi̱ bibyin swanta na
ba̱ ka li nggu a̱ni!
32A̱ yet long sang ku na sai,
ku tyai A̱gwaza kpa̱sai da̱ a̱vwuo Nnwap na̱ nwai yet A̱yahudawa a̱ni.
A̱wot nggu wa bu na nwuak á̱niet Isi̱rela ba
ba̱ yet á̱niet ang ba a̱ni shi.”
33A̱tyia̱ ma̱ng a̱yang Yesu wu si̱ fa̱k a̱ga̱de da̱ a̱lyiat nang Simiyon lyiat tazwa Yesu a̱ni! 34A̱jawa Simiyon si̱ nang mba a̱nu. A̱ si̱ tak á̱zanson tazwa nggwon ka da̱ a̱vwuo Ma̱ryamu a̱yang nggwon wu nyia̱,
“Á̱ sak nggwon kani,
ka̱ tyia̱ á̱niet ma̱ a̱di̱di̱t mi̱ Isi̱rela ba̱ kwa.
A̱wot ka̱ bu na yet kyang a̱gwai
da̱ a̱vwuo á̱ghyang á̱niet ma̱ a̱di̱di̱t.
A̱gwaza bu na ta̱m nggwon nggu kani,
ka̱ ka yet a̱lama a̱ neet da̱ a̱vwuo A̱gwaza a̱ni.
A̱mgba̱m ma̱ng a̱nia, á̱niet ma̱ a̱di̱di̱t na lak li nkaa.
35Mat a̱nia, A̱gwaza ta̱m ma̱ng a̱nka
da̱nian á̱tsatsak a̱di̱dam nfwuo á̱niet ma̱ a̱di̱di̱t
ba̱ ka ghwut kpa̱sai.
A̱wot nwan Ma̱ryamu meang,
a na fa̱k mi̱ fwuo ang hu,
á ngyei tswat ja nang á̱ nti̱p huu.”
Hanatu Tak Á̱zanson tazwa Yesu
36A̱byii̱k a̱ghyang a̱ ku yet a̱ta̱m a̱kwonu A̱gwaza a̱ni, á̱ si̱ ngyei nggu Hanatu; ku mun a̱ shya̱ mi̱ didyaat A̱mali Nwuat Za̱nang A̱gwaza hu, da̱ a̱cha̱chaat njen a̱wa. A̱ ku yet nggwon Fanuwel mi̱ kwai A̱shi̱ru. A̱wot a̱ si̱ yet a̱khwukhwop a̱byii̱k wa ba̱t. A̱tyok nggu wu ku khwu nang ba̱ shya̱ da̱ a̱lyia̱ a̱natat kya mi̱ nyeang hu. 37A̱wot Hanatu si̱ ya a̱son ma̱ng swan swat a̱byii̱k nang a̱tyok nggu wu ka̱n khwu a̱ni. A̱wot ma̱ninika, a̱ yet a̱lyia̱ nswak a̱ni̱nai ma̱ a̱naai di̱ mbyin. Da̱ nggu, a̱ ni̱ ghwon A̱li Nwuat Za̱nang A̱gwaza ka bah. Kuzang jen a̱ ni̱ shya̱ a̱ja a̱ta̱mam ma̱ng a̱tyetuk, a̱ kwok ntong a̱zaghyi A̱gwaza, a̱ tsa a̱ bu nnaai nggu a̱fa a̱khwot.
38Hanatu si̱ nwuo mi̱ didyaat A̱mali Nwuat Za̱nang A̱gwaza hu, ma̱ a̱cha̱chaat jen nang Simiyon ndyiat ma̱ng Isuu ma̱ng Ma̱ryamu a̱ni. A̱wot Hanatu si̱ kin nwuo dyep A̱gwaza tazwa nggwon ka! A̱ si̱ shei nkhang nggwon na da̱ a̱vwuo a̱mgba̱m á̱niet, ba̱ fwuong jen ji nang A̱gwaza na nsan á̱niet Urusha̱lima ba, a̱ tyia̱ mba ba̱ yet á̱sa̱t á̱niet a̱ni.
39Jen nang Isuu ma̱ng Ma̱ryamu ntyak khwi kuzang kyang ma̱nang doka A̱gwaza ji̱ nhyia̱ a̱ni; ba̱ si̱ bwuok á̱ nat a̱mali ma̱ a̱keang Na̱za̱ra̱t, mi̱ fam a̱byin Ga̱lili hu. 40A̱wot Yesu a̱ yet nggwon nka a̱ni si̱ laai, a̱ si̱ tyia̱ chet, a̱ si̱ byia̱ mumwang ba̱t. A̱wot A̱gwaza si̱ nyia̱ nggu shok.
Yesu Lyiat ma̱ng Á̱niet Tyiet Doka nang gu yet Nggwon Seam
41Kuzang a̱lyia̱, á̱niet mbyin Yesu ba ni̱ nat Urusha̱lima, da̱nian ba̱ ka song A̱yet Ghwut Mman Isi̱rela mi̱ Khwo. 42Nang Yesu ntat a̱lyia̱ swak ma̱ a̱feang di̱ mbyin a̱ni, á̱niet byin nggu ba si̱ nat song a̱yet ji ma̱ng a̱nggu, ma̱nang ba̱ mmeang a̱ni.
43A̱wot nang á̱ ntyak song A̱yet ji a̱ni, nang á̱niet mbyin Yesu ba nshya̱ di̱ bwuot naat a̱mali Na̱za̱ra̱t a̱ni; Yesu si̱ bwuok a̱ swan mi̱ Urusha̱lima, di̱ mi̱n lyen á̱niet mbyin nggu ba! 44Ba̱ si̱ chong a̱kwa mam, ba̱ ngyei Yesu shya̱ ndung ma̱ng á̱niet ba ma̱ a̱chyet ka. Nang ba̱ ndi nggu a̱ni bah, ba̱ si̱ nwuo chat gu mami á̱na̱nyiuk ma̱ng á̱kpa̱ndang a̱chyet mba ba.
45Nang ba̱ nshya̱ nggu a̱ni bah, ba̱ si̱ bwuok á̱ nat Urusha̱lima di̱ chat gu hu. 46Ba̱ si̱ bwuo mam tat nang ba̱ chat gu, ba̱ sii du ba̱ shya̱ nggu mi̱ didyaat A̱mali Nwuat Za̱nang A̱gwaza hu; nang gu swan ma̱ a̱ka̱wa̱tyia̱ á̱niet tyiet doka, a̱ myiai a̱fufwuo a̱ bu ndyi̱ri̱m mba nkyang!
47Á̱niet ba ba̱ ku myiai a̱fufwuo á̱ fwuong Yesu a̱ni, si̱ fa̱k a̱ga̱de mat si̱sak ji nang gu nfi̱k nkyang na, a̱ bu tsa a̱ nnwuat mba shim a̱ni!
48Nang á̱niet mbyin nggu ba ndi gu a̱ni, ba̱ si̱ fa̱k a̱ga̱de. A̱yang nggu wu si̱ ngai ma̱ng a̱nggu, nyia̱, “Nggwon nung, yihwa mbyia̱ a nnyia̱ nzi̱t a̱nia? Nung ma̱ng a̱tyia̱ ang wu ka̱n swuo a̱bung ma̱ng byian nfwuo za̱m di̱ chat zi̱ shya̱ ang!”
49Yesu si̱ myiai a̱nu, a̱ si̱ lyip ba nyia̱, “Yihwa mbyia̱ nyi nchat nung? Nyi lyen nang ku ngyet ta hwa n nyia̱ ta̱m A̱tyia̱ nung hu baa?#2:49 Ku: “Nyi lyen nang ku ngyet ta hwa n swan a̱mali A̱tyia̱ nung ka baa?”” 50A̱mgba̱m ma̱ng a̱nia, ba̱ si̱ fi̱k kyang hu nang Yesu fa a̱ni bah.
51A̱ si̱ bwuok dundung ma̱ng mba á̱ nat Na̱za̱ra̱t. A̱wot a̱ si̱ khwi a̱lyiat mba na. A̱yang nggu wu si̱ sak a̱mgba̱m kyang nani mi̱ fwuo, a̱ si̱ nyia̱ a̱di̱dam tazwa na.
52A̱wot Yesu a̱ yet nggwon seam ka a̱ni, si̱ laai a̱ mban mumwang, ma̱ng a̱za. A̱wot A̱gwaza ma̱ng a̱mgba̱m á̱niet ba si̱ fa̱k shok gu.
Currently Selected:
Luka 2: TyapNT
Highlight
Share
Copy
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.