لَاتَانٛوجِ 18
18
اَللَّه عَنْدِنِ إِبْرَاهِيمَ دَࢩٜىٰکِ إِسْحَاقَ
1جَوْمِرَاوٛ وَنغَنِ إِبْرَاهِيمَ حَا لٜطّٜ مَوْطٜ حَا مَمْرٜ، يَاکٜ عٛطٛنّٛ جٛوطِ حَا دَمُّغَلْ سُودُ لَيْمَارُ مَاکٛ وَکَّتِ نَانغٜ طٛنْ وُلَ؞ 2عٛࢡَنغْتِ غِتٜ، عٛلَارِ، وٛرْࢡٜ تَتٛ طٛنْ ندَرِ ࢡَدِيطُمْ بٜى مَاکٛ؞ ندٜ عٛيِعِ ࢡٜ، عٛدٛغِّ نغَمْ ڢٛتُّغٛ بٜى مَࢡّٜ#عِبْرَنِنغْکٜعٜنْ 13:2؞ دِغَ دَمُّغَلْ لَيْمَارُ، عٛسُجِدِ حَا لٜسْدِ؞ 3عٛوِعِ: «جَوْمِرَاوٛ، تٛ مِحٜࢡِ مٛعّٜرٜ يٜىٰسٛ مَاطَ، عُسٜنِ، تَا سَالَ کٛمْبِ سَارٜ مَشُّطٛ مَاطَ! 4ࢡٜنغَدَّ ندِيَمْ سٜطَّ، عٛنْ لٛوتَ کٛسْطٜ مٛوطٛنْ، ندٜنْ شِوْتٜ لٜسْ لٜکِّ کِعِ؞ 5مِوَدَّنَ عٛنْ ࢩَامْدُ سٜطَّ نغَمْ عٛنْ کٜࢡَ سٜمْبٜ حِدّٜکٛ عٛنْ تٛکِّتِنَ لَاوٛلْ مٛوطٛنْ، نغَمْ عٛنْ نجَالِ کٛمْبِ سَارٜ مَشُّطٛ مٛوطٛنْ»؞ ࢡٜنجَابِ: «وَطْ کٛ مبِعْطَ؞» 6ندٜنْ إِبْرَاهِيمَ لٛرْتِ بٜى جَاوَلْ ندٜرْ لَيْمَارُ مُوطُمْ، وِعِ سَارَةُ: «لَوْ، حٛوعُ کِلٛ کُرٛورِ طِغُّندِ نٛوغَسْ عٜ جٛوِ، تَمْسُ تَمْسٜىٰجٜ!» 7ࢡَاوٛ مَاجُمْ عٛدٛغِّ غَلْ نَعِ، عٛحٛوعِ ࢩَلْبٜلْ بٛوطْنغٜلْ، حٛکِّ نغٜلْ سُکَ؞ کَنغْکٛ بٛو، عٛيَاوِ تَاسْکِتِنْغٛ نغٜلْ؞ 8ندٜنْ إِبْرَاهِيمَ طَࢡِّتِ کٜتُّنغٛلْ بٜلْنغٛلْ عٜ ࢡِرَاطَمْ عٜ کُسٜلْ غَغّٜلْ غٛ، عٛجٛعِّنِ طُمْ يٜىٰسٛ مَࢡّٜ؞ عٛدَرِ کٛمْبِ مَࢡّٜ لٜسْ لٜکِّ، يَاکٜ ࢡٜطٛنّٛ ࢩَامَ؞#رٛمَعٜنْ 9:9؞
9ࢡٜࢨَمِمٛ: «تٛيْ دٜبّٛ مَاطَ سَارَةُ؟» عٛجَابِ ࢡٜ: «ندَا عٛطٛنْ لٜسْ لَيْمَارُ»؞ 10غٛوتٛ شَکَ مَࢡّٜ وِعِ: «ڢَکَتْ، مِلٛرْتٛتٛ حَا مَاطَ مَوْرِ بَنَ جٛنْتَ؞ ندٜنْ دٜبّٛ مَاطَ سَارَةُ مَرَنْ ࢡِطّٛ غٛرْکٛ؞» سَارَةُ طٛنّٛ حٜطِتٛ حَا دَمُّغَلْ لَيْمَارُ، ࢡَاوٛ کٛطٛ؞ 11إِبْرَاهِيمَ عٜ سَارَةُ ڢُو ندٛتِّدِ، ࢡٜ طُوطَ-دُوࢡِعٜنْ؞ عَلْعَادَ رٜوْࢡٜ#18:11 عَلْعَادَ رٜوْࢡٜ طُمْ وَکَّتِ حَيْلَ؞ تَعِ حَا سَارَةُ؞ 12سَارَةُ جَلِ ندٜرْ ࢡٜرْندٜ مُوطُمْ، وِعِ: «جٛنْتَ بَنَ نَيْوِرْمِ نِي، سُونٛ غٛرْکٛ نغٛيٜ مَاتَنْمِ؟ جَوْمُ سَارٜ عَمْ بٛو نَيْوِ؞» 13جَوْمِرَاوٛ وِعِ إِبْرَاهِيمَ: «نغَمْ طُمٜ سَارَةُ جَلِ، وِعِ: غٛونغَ کَدِ مِدَࢩَنْ ندٜ نَيْوُمِ نَ؟ 14وٛودِ کٛ جَوْمِرَاوٛ وَاوَتَا وَطُغٛ نَ#لُکَ 1:37؞؟ مَوْرِ بَنَ جٛنْتَ، ندٜ مِلٛرْتٛيْتٛ حَا مَاطَ، سَارَةُ مَرَنْ ࢡِطّٛ غٛرْکٛ؞» 15سَارَةُ حُلِ، نغَمْ مَاجُمْ عٛيٜدِّ، عٛوِعِ: «مِجَلَايْ؞» کَنغْکٛ بٛو عٛوِعِ: «عَاعَ، عَ جَلْطٛ؞»
إِبْرَاهِيمَ تٛرِ نغَمْ سٛدٛمَ عٜ غٛمٛرَّ
16وٛرْࢡٜ غٛ عُمِّ، تِيتِ سٛدٛمَ، إِبْرَاهِيمَ يَحْدِ بٜى مَࢡّٜ، طٛڢْتِ ࢡٜ؞ 17جَوْمِرَاوٛ وِعِ: «مِسُوطَتَا إِبْرَاهِيمَ کٛ مِتَمِّ وَطُغٛ؞ 18ڢَکَتْ، عٛلَاتٛتٛ کَاکِرَاوٛ عُمَّاتٛورٜ مَوْندٜ، مَرْندٜ بَاوْطٜ؞ عُمَّاتٛوجٜ دُنِيَارُ ڢُو کٜࢡَنْ بَرْکَ نغَمْ دَلِيلَ مَاکٛ؞ 19مِسُࢡِمٛ نغَمْ عٛعُمْرَ ࢡِکّٛيْ مَاکٛ عٜ سَارٜ مَاکٛ ࢡٜکَکِّلَنَ لَاوٛلْ عَمْ، ࢡٜمبَطَ ݠٛتُّطُمْ عٜ عَدِلِيجُمْ ࢡَاوٛ مَاکٛ، نغَمْ مِحٜبِّنَنَ مٛ کٛ مِعِينَنِمٛ؞» 20ندٜنْ جَوْمِرَاوٛ وِعِ إِبْرَاهِيمَ: «غُلَّالِ دٛوْ سٛدٛمَ عٜ غٛمٛرَّ طُوطِ، حَکّٜ جٛوطِيࢡٜ تٛنْ مَوْنِ مَسِنْ؞ 21مِيَحَنْ، مِلَارَ تٛ ࢡٜمبَطِ ڢَکَتْ بَنَ غُلَّالِ غَرْطِ يٜىٰسٛ عَمْ؞ تٛ نَا نٛنْ، مِعَنْدَنْ طُمْ بٛو؞»
22وٛرْࢡٜ طِطٛ کَمْ ندِلِّ، تِيتِ سٛدٛمَ؞ عَمَّا إِبْرَاهِيمَ لُتِّ طٛنْ دَرِ تَوٛنْ يٜىٰسٛ جَوْمِرَاوٛ؞ 23إِبْرَاهِيمَ ࢡَدِتِ، ࢨَمِمٛ: «غٛونغَ عَحَلْکِدَنْ عَدِلِيجٛ بٜى کَلُّطٛ نَ؟ 24تٜىٰمَ عَدِلِعٜنْ شَݠَّنْطٜ نجٛوٛ طٛنْ ندٜرْ بٜرْنِوٛلْ؞ غٛونغَ عَحَلْکَنْ ࢡٜ بٛو نَ؟ عَيَاڢَتَاکٛ بٜرْنِوٛلْ نغٛعٛلْ نغَمْ دَلِيلَ عَدِلِعٜنْ شَݠَّنْطٜ نجٛوٛ وٛنْࢡٜ ندٜرْ مَاغٛلْ نَ؟ 25عَوَطَتَا عِرِنْ طُعُمْ! عَمبَرْدَ عَدِلِيجٛ بٜى کَلُّطٛ، عَحِيتٛ ࢡٜ کَلْ-کَلْ! وَطَتَاکٛ! کَدِ کِيتٛووٛ دُنِيَارُ ڢُو وَطَتَا کِيتَ نغٛونغْطُکَ نَ؟» 26جَوْمِرَاوٛ وِعِ: «تٛ مِتَوِ ندٜرْ سٛدٛمَ عَدِلِعٜنْ شَݠَّنْطٜ نجٛوٛ، ندٜنْ کَمْ مِيَاڢٛتٛ بٜرْنِوٛلْ ڢُو نغَمْ دَلِيلَ مَࢡّٜ؞» 27إِبْرَاهِيمَ وِعِ: «يَاڢَمْ، نغَمْ مِعَاࢨِ وٛلْوَنْغٛ جَوْمِرَاوٛ عَمْ، مِنْ مٛ مبُلْوُلْدِ عٜ ندٛونْدِ مٜىٰرٜ! 28تٜىٰمَ عَدِلِعٜنْ نجٛوٛ نغَکِّ حَا شَݠَّنْطٜ نجٛوٛ؞ عَحَلْکَنْ بٜرْنِوٛلْ ڢُو نغَمْ دَلِيلَ مَࢡّٜ نَ؟» جَوْمِرَاوٛ جَابِ: «مِحَلْکَتَا نغٛلْ، تٛ مِتَوِ تٛنْ شَݠَّنْطٜ نَيٛ عٜ نجٛوٛ (45)؞» 29إِبْرَاهِيمَ تٛکِّ وٛلْوَنْغٛ مٛ، وِعِ: «تٜىٰمَ عَدِلِعٜنْ شَݠَّنْطٜ نَيٛ تَنْ نغٛنِ تٛنْ؞» جَوْمِرَاوٛ جَابِ: «مِحَلْکَتَا بٜرْنِوٛلْ نغَمْ دَلِيلَ شَݠَّنْطٜ نَيٛ ࢡٜعٜ؞» 30إِبْرَاهِيمَ وِعِ: «يَا جَوْمِرَاوٛ، تَا تِکُّ، حَا مِوٛلْوَنٜ ڢَحِنْ؞ تٜىٰمَ شَݠَّنْطٜ تَتٛ نٛنْ نغٛنِ تٛنْ؞» جَوْمِرَاوٛ جَابِ: «مِوَطَتَا کٛو طُمٜ، تٛ مِتَوِ تٛنْ شَݠَّنْطٜ تَتٛ؞» 31إِبْرَاهِيمَ وِعِ: «ندَا مِعَاࢨِ وٛلْوَنْغٛ جَوْمِرَاوٛ؞ تٜىٰمَ سٜيْ نٛوغَسْ نٛنْ طٛنْ تٛنْ؞» عٛجَابِ: «مِحَلْکَتَا نغٛلْ نغَمْ دَلِيلَ نٛوغَسْ ࢡٜعٜ؞» 32إِبْرَاهِيمَ وِعِ: «تَا تِکُّ، يَا جَوْمِرَاوٛ، حَا مِࢡٜسْدَ وٛلْوَنْغٛ مَ ندٜ وٛورٜ تَنْ؞ تٜىٰمَ سٜيْ سَݠّٛ تَنْ نغٛنِ تٛنْ؞» عٛجَابِ: «مِحَلْکَتَا نغٛلْ نغَمْ دَلِيلَ سَݠّٛ ࢡٜعٜ؞» 33جَوْمِرَاوٛ دِلِّ ندٜ عٛتِمِّنِ وٛلْوِدِدْغٛ بٜى إِبْرَاهِيمَ، إِبْرَاهِيمَ بٛو لٛرِ حَا نٛکُّورٜ مُوطُمْ؞
Currently Selected:
لَاتَانٛوجِ 18: داَ
Highlight
Share
Copy
Want to have your highlights saved across all your devices? Sign up or sign in
Fulfulde Bible Ajamiya © Bible Society of Cameroon, 2016.