Luka 22
22
Ba wuna nu na be vo Yɛsu
(Mat 26:1-5; Mar 14:1-2; Yoh 11:45-53)
1Nzem Kpam-tuk Sana Géy-sing de be tâng nɛ, à Nzem Gyilsit Nelɔ BeIsrayɛl na vey bagat. 2Begbɔng bepiris tanga bemât basâ Badu ba sé ra gwong na be vo Yɛsu, na yɛn a tɛ̀ be mɔrɔ hɛ. Ko yɛn a wok bengyip bemat.
Yuda a simo a row Yɛsu
(Mat 26:14-16; Mar 14:10-11)
3E bama mo, Shetan a yel e ji Yuda de ba tang ɛ, à Iskaryot. Yɛ á sè gwining e ji bemât masâ fwôm Yɛsu kuru na vɛ beba. 4Yuda mo a nusu, ko a wɔ̀ ha na begbɔng bepiris tanga begbɔng o vê bemât gyeng Gbɔng Duk Re Fongol e ra gwong de ê row a yɛn Yɛsu. 5Yɛn a vɔk yey pyɛng, ko yɛn a yang ɛ, yɛn ê tala hɛ dyām. 6Yuda a simo, ko a hwo jāma begwong de ê row Yɛsu sana tɔ̂k bemat.
Yɛsu a tɛ̀ be yong pyɛ̂ nzem
(Mat 26:17-25; Mar 14:12-21; Yoh 13:21-30)
7E jeng Nzem Kpam-tuk Sana Géy-sing, tuk de ba yɛt beturuk besɛl yaga yông pyɛ̂ Nzem Gyilsit Nelɔ BeIsrayɛl ha vey. 8Ko Yɛsu a hwo pat Bitrus tanga Yohana, a yang ɛn, “Ci wɔ̀ yong a wot hin pyɛ̂ nzem, na wot a bin re.”
9Yɛn a rangal hɛ, ba ye, “Hwó simo wot a wɔ̀ yong yɛ̄ e gwa arɛt?”
10A yang ɛn, “Sede yin a sé yel e ji repomo, ko yin a rɔda man na mwat de a tos nshi. Raa hin hɛ vɔk e lɔ de yɛ a rɔda yel ɛ̀, 11ko yang in dâ lɔ mo ngan: ‘Da mot a rangal hwo: Duk a wɛ de me tanga bemât masâ fwom hom wot a rɔda re ɛ̀ pyɛ̂ nzem o arɛt?’ 12Ko dâ lɔ mo a rɔda dura a yin gbɔng duk hwak e lɔ̂ rak o de ba ga tɔrɔ wɛ na pyɛ́. Yóng a wot hin kayɛ pyɛ e hwomo.”
13Yɛn a kyè, ko ba sɛ̀ kayɛ pyɛ tyɛng na pyɛ de Yɛsu a ha a yɛn; ko yɛn a yong pyɛ̂ nzem o.
Rê Pyɛ̂ Darwey
(Mat 26:26-30; Mar 14:22-26; 1Kɔr 11:23-25)
14Sede jeng o ya vey, Yɛsu a kaba kwɔ̂n sangal, na a hwo re pyɛ́ na bemât masâ fwom mɛ. 15Ko a yang ɛn, “Ma kana tɛ̀ e yey sizɔng, na me re pyɛ̂ Nzem Gyilsit Nelɔ BeIsrayɛl yemo tanga yin gyam na me sɔ reyɔm! 16Yaga ma sé ha a yin, ma rɔda to ba re yɛ̄ wɛt, sɛ̌ há de ba ga ha e ra yɛ̄ ha sila jeng de Dagwi a rɔda ba re negwɔm e ra jey.”
17Ano kwong, Yɛsu a jut keshi, a feng a Dagwi, ko a ye, “Ná in, na yin a gas a bato min. 18Yaga ma sé ha a yin, yi e ngamo nuyel ma rɔda to ba sɔ nshî anap wɛt sɛ̌ jeng de Dagwi a rɔda hwo re negwɔm e ra jey.”
19Ano mo, a jut kpam-tuk, a feng a Dagwi, a kwɔrɔs wɛ, ko a nɔ̂ng bemât masâ fwom mɛ, a ye, “Rebek hom a remo de ba nɔng yaga yin. Rá in ano, na yin a bin bare mɛ̀ na me.” 20Ano arɔng, e bamâ rê pyɛ́, a jut keshi, a ye, “Keshi kemo ka sé wuna-na-sira pas de Dagwi a man na nemi hom de ba rɔda shushu yaga yin.
21“Ko di in! Womo de a rɔda row me a sé tɛ̀ vwɔ mɛ e shǐ pyɛ́ tanga me! 22Me de ma tɛ́ me mwat ma rɔda jut bol, sede remo de Dagwi à ga kana yong ɛ̀. Ko gawey e ra womo de a rɔda row me!”
23Ko yɛn a hwo rangsâl bemɛn kɛ e wɛ̌ e ji mɛn de e kyè wɔ̀ ra ano.
Nenan e ra mwat de a dal na nerey
(Mat 20:25-28; 19:28; Mar 10:42-45)
24Ko nenan na sogo e ji bemât masâ fwôm Yɛsu, kɛ e wà e ji mɛn de ba jut, a dal na nerey arɛt. 25Ko Yɛsu a hwo yang ɛn, “Begbɔng begwɔ̀m yére dyuk be re negwɔm e ra bemat mɛn na retek, ko vemo de ba vɔk reto arɔng be simo be tang ɛn, à bemât sɛlɛ̂ bemat. 26A sé ano na yin wɛt. Ko mwat de a dal in na nerey, tik na a tɛ́ ɛ sede swɛl o e negya, ko mwât nuyel a tɛ́ ɛ sede mwât fwom. 27E wà de a dal na nerey ɛ? Womo de e sangal na a re pyɛ́, kɛ womo de a sé mwât fwom de e nɔngɔs hɛ pyɛ́ mo arɛt? A sé e womo de e sangal na a re pyɛ́ mo. Ko me ma sé e ji min sede mwât fwom.
28“E yin vɛ de yin a nàra tanga me yi e jeng de ma sɔ negbang detidetu. 29Tyɛng sede remo de Da hom a nɔng me reto na me re negwɔm, ano arɔng me ma sé nɔng in reto mo. 30Yin a rɔda ba re, ko yin ê ba sɔ tanga me e ji segwɔm hom, ko yin a rɔda to ba sangal e ra beta negwɔm, na yin a ra a yére kuru na yɛ bya (12) yê Israyɛl shɔt.”
Yɛsu a ye, Bitrus a rɔda tono na yɛ
(Mat 26:31-35; Mar 14:27-31; Yoh 13:36-38)
31“À Simɔn, à Simɔn! Shetan a ga jāma reto na a bin masa hin, na a gas vemo de ba sé berat yi e beves o, sede remo de be wolom byɛmɛ yi e yéneng pyɛ́. 32Ko ma ga ra won yaga hwo, na hwo tik nà sêy tsak o na me wɛt. Ko jeng de hwó to ba doyo vey na me, tik na hwo gwɛ̌ a begwa mō gap.”
33Bitrus a yang ɛ, “À Darwey, ma ga yong me na me kyè vɔk e ngyang tanga hwo, na me to ku tanga hwo arɔng!”
34Ko Yɛsu a toyo a yɛ, a yang ɛ, “À Bitrus, ma sé ha a hwo, gyam na rungat wo ba dak segwɔm yunung, hwà ga kana tono tɔ́k hom zang tat.”
Rabâk dyām, malâ won, na wal
35E bama mo, Yɛsu a yang ɛn, “Jeng de ma kana tomo hin sana jut rabâk dyām, kɛ malâ won, kɛ bekpatak, yin á kana bidɛ pyɛ cak arɛt?”
Yɛn a yang ɛ, “Wey, wot a bidɛ pyɛ wɛt.”
36Yɛsu a yang ɛn, “Ko a remo, kawɛ mwat de a vɔk rabâk dyām kɛ malâ won, tik na a jut wɛ. Ko womo de a vɔk wal wɛt, tik na a row pyɛ banga mɛ, na a sey mɛ̀ wɛ. 37Yaga bà jɛk e Bwok-basa Dagwi wɔgɔ, ‘Ba ga bɛrɛng hɛ sede hwak e ji bemat de be gyenges badu wɛt.’ Ko ma sé ha a yin, a sé gbing-gbing na há mo he sila hɛ e ra me. Mwin, mwa pyɛ́ de bà jɛk e ra me ya sé kyè wɔ̀ sila hɛ.”
38Ko bemât masâ fwom mɛ ba hwo yang ɛ, “À Darwey, ko sɛ́ sede bewal beba a vemo kɛk ɛ̀!”
Ko Yɛsu a yang ɛn, “Hā ga vey ano!”
Yɛsu a ra won e Raku Pàt
(Mat 26:36-46; Mar 14:32-42)
39Yɛsu a nu ɛ yi e repomo mo, ko a kyè vɔk e Raku Pàt, sede remo de a ga tɔ́k ɛ mɛ̀; ko bemât masâ fwom mɛ ba raa hɛ. 40Jeng de a pom e kwɔn o, a yang ɛn, “Rá in won, yaga na yin a gaba wɛt jeng de yin a yel e mara.”
41E bama mo, yɛ nju mɛ a gwɛ̌ kyè tyɔng sede nelîs barâk gwofwa, a pom, a ye guduruk e vwel, ko a ra won. 42A ye, “À Da, ka sede hwà simo, jut keshi reyɔm kemo yi na me. Ko mwa ano, rá pyɛ de hwó simo zɔng, ko pyɛ de me simo wɛt.” [ 43Ko tom-lagwi a vey na yɛ, a gwɛ̌ a yɛ gap. 44Ko sede a sé sɔ reyɔm sizɔng, a gwɛ̌ ra won na yey mɛ mwa, ko selong mɛ sa sé sede bāgat nemi de ba gabsa e vwel.]
45Jeng de a sogo yi e de won, a to ɛ vɔk e dem bemât masâ fwom mɛ, a pom, ko a sɛ̀ ɛn e de nevwa, yaga yey mɛn ya lashe hɛ ding-ding. 46A yang ɛn, “Yaga sɛ́ de yin a sê nevwa arɛt? Sogo hin, na yin a ra won, yaga na yin a gaba wɛt jeng de yin a yel e mara.”
Vô Yɛsu
(Mat 26:47-56; Mar 14:43-50; Yoh 18:3-11)
47Jeng de Yɛsu á sè rɔ̌ ha, regyɛng bemat ra yi. Ko Yuda, yɛ gwining e ji bemât masâ fwom mɛ kuru na vɛ beba, a sey a yɛn yel, ko a kyè vɔk na Yɛsu na a wɔ̀ man ranang na yɛ, na a yang ɛ mɛ̀ show. 48Ko Yɛsu a yang ɛ, “Káa! À Yuda! A sé yi na mân ranang de hwô row mɛ̀ Me de ma tɛ́ me mwat arɛt?”
49Jeng de bemat de ba sé tanga Yɛsu ba di pyɛ de ye kyè wɔ̀ té, yɛn a ye, “À Darwey, wot tow ɛn na bewal mot arɛt?” 50Ko hwak e ji mɛn a tara sam darwêy bepiris, a tùt a yɛ fwông vwɔ yege.
51Ko Yɛsu a yang ɛn, “Tík in ano!” A ra fwông mwat o, ko a tɛ̀ ɛ tyang.
52Ano a yâng begbɔng bepiris, na begbɔng o vê bemât gyeng Gbɔng Duk Re Fongol, tanga bemakuk, de ba wɔ́ e hwomo na be wɔ̀ vo ɛ, “Ko sɛ̌ yin a nusu na bewal tanga bekpurûng begele sede ma sé gbik arɛt? 53Kahɛ tuk ma sè tanga yin e Gbɔng Duk, ko yin a nára vɔ min na yin a vo me wɛt. Ko a remo, jeng min à yemo tanga jeng gwɔ̀m cēng de e re negwɔm e lwīl.”
Bitrus a tono na Yɛsu
(Mat 26:57-58, 69-75; Mar 14:53-54, 66-72; Yoh 18:12-18, 25-27)
54Bemat o ba vo Yɛsu, ba kyè na yɛ vɔk e lɔ darwêy bepiris. Ko Bitrus a raa e bama yikyik tyɔng. 55Ba ga pɛl kya e tê lala mo, ko Bitrus a pom, a wuna hɛ na vemo de ba sé sangal e hwomo. 56Ko gwining e ji behwông fwôm lɔ mo a di ɛ e negbêy kya mo e sangal, a hwo bɛrɛng hɛ yɛɛlɛl, a ye, “Mwat womo á sè tanga yɛ!”
57Ko Bitrus a tono, a ye, “À hwong, ma ka tɔk ɛ wɛt!”
58E bamâ jeng tyɔng, mwat hwak a di ɛ, a ye, “Hwo arɔng hwà sé gwining e ji mɛn!”
Ko Bitrus a toyo a yɛ, a yang ɛ, “À sa, ma sé wɛt!”
59Sede ba to sangal sede dyam-gwi jining, mwat o hwak a to tɛ̀ kaashash e ra yɛ, a ye, “Vit à cuna cak! Mwat womo á sè tanga yɛ, yaga yɛ arɔng a sé mwât Galili.”
60Ko Bitrus a toyo a yɛ, a yang ɛ, “À sa, ma ka tɔk pyɛ de hwó ha e ra tɛt o wɛt!”
E ji jeng de a sé rɔɔ ha, rungat wa vɛ̌ dak segwɔm. 61Darwey a doyo, a bɛrɛng Bitrus gbir, ko Bitrus a pere bare na há de Darwey á kana ha a yɛ wɔgɔ, “Gyam na rungat wo ba dak segwɔm yunung, hwà ga kana tono tɔ́k hom zang tat.” 62Ko Bitrus a nusu e jey, a wɔ̀ tosho tyɔng wɛt.
Ba shɛgɛsh Yɛsu, ko ba dak ɛ
(Mat 26:67-68; Mar 14:65)
63Bemat de ba gyeng Yɛsu ba hwo shɛgɛsh hɛ, ko ba dak ɛ. 64Yɛn a bang a yɛ bayis, ko ba rangal hɛ, ba ye, “Kɛ hwô tɔk ha a wot mwat de a ga rusu hwo arɛt?” 65Ko yɛn a gwɛ̌ tabas a yɛ nengyas.
Yɛsu e nuyêl bemakûk badu
(Mat 26:59-66; Mar 14:55-64; Yoh 18:19-24)
66Jeng de gasi ha ye gbey, bemakûk BeYuda, na begbɔng bepiris, tanga bemât basâ Badu ba man, ko ba wɔ́ na Yɛsu e nuyel mɛn. 67Ko yɛn a yang ɛ, “Hā a wot, hwà sé Mwat de Dagwi a kasa na a sey bemat arɛt?”
Yɛsu a hanat, a yang ɛn, “Ka ma ka ha a yin, ko yin a rɔda sey tsak o na há hom wɛt; 68ko ka sede ma ka rangal hin pyɛ cak, yin a rɔda toyo a me wɛt. 69Ko e ngamo nuyel, Me de ma tɛ́ me mwat ma rɔda sangal e vwɔ yegê Dagwi Wo Reto Mwa.”
70Yɛn mwa hɛn ba ye, “Ko sɛ̌ hwà sé Hwey Dagwi arɛt?”
Yɛsu a toyo a yɛn, a ye, “Yin a ha tyɛng, e me wɛ.”
71Ko ba ye, “Wot e to simo vɛ̌ bemât nuha arɛt? Wot pyɛ mot, wot a ga wok há mo e nu mɛ!”
Currently Selected:
Luka 22: bomBI
Highlight
Share
Copy
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
