Genesis 1
1
Iqmoeq 1
Nqtavq khi mail miltsaq bhai teivq-a nail ganl
1Iqmoeq ilmoeq Miqyail neq, nqtavq khi mail miltsaq bhai teivq-a nail ngaol.
2Miltsaq neq, khul nail maolkhoel dai maq dov-ail, aqnieivq pevq nail ngaol. Navq dee dee nail ulcuvq lavqkhoel bha aqnav-i mail jaol pheeq gil khi, Miqyail nail Aqhaqlal neq, ulcuvq nail kovtavq bhai ail lal nail ngaol.
3Miqyail neq, "Aqbhaq dov lal yaoq" dai, daoq bivq-u phao, aqbhaq dov lal-a nail ngaol.
4Miqyail neq, aqbhaq bhai hel daiq moel-u phao, aqmeeq nial dai, hel daiq moel nail ngaol. A bhai nee ngal-aq, aqbhaq dai khi aqnav tsel pav-a nail ngaol.
5Aqbhaq bhai neq, n-gaol dai, khul khi aqnav bhai neq, nqkiv dai, khul-a nail ngaol. Kivqhail lailma phao nee daq-n khi, nqhao phao kev dai jel lal-a nail neq, iqmoeq khal moeq khe n-gaol pevq nail ngaol.
6A bhai nee ngal-aq, Miqyail ge nail: "Ulcuvq nvq pav pav-ail nail haqbhoil ulcuvq gaoltsi nee nqtavq bhai joe pheeq-ai thaq nail phaq pevq lal yaoq" dai, daoq bivq-a nail ngaol.
7Al heel ngel-i mail, Miqyail neq, nqtavq khe joe pheeq-ai thaq nail pultavq khe ulcuvq dai khi miltsaq khe ulcuvq dai, lav pav khi, thail hai pevq lal-a nail ngaol.
8Nqtavq khe joe pheeq-a thaq nail al bhai neq, nqtavq dai, khul-a nail ngaol. Kivqhail lailma phao nee daq-n khi nqhao phao kev dai jel lal-a nail neq, nvq n teevq n pevq nail ngaol.
9Miqyail gaoq ge nail: "Nqtavq nail kov-uvq bhai miltsaq aqgee bhi dov lal nail galduq, ulcuvq teevq dao bhai jil gil lai yaoq" dai, ge bhiq-a nail khe-ai, pevq lal-a nail ngaol.
10Miltsaq aqgee jiav nail bhai neq, miltsaq dai, khul khi ulcuvq il jil lai thaq nail aqduq bhai neq, iqyaq iq ma dai, khul-a nail ngaol. Miqyail thoil thai hel daiq moel-u phao, aqmeeq nial dai, hel daiq moel-a nail ngaol.
11A bhai nee ngal-aq, Miqyail ge nail: "Aqpavq lovpavq juq nail aqbhaol dai khi aqheeq juq nail aqbhaol iqsanl mail doevq lal yaoq. Aqbhaol thoil juq neq, aqheeq mee nia phaq bhai bhi heeq lee nia nail juq pevq nail ngaol" dai, ge bhiq-a nail khe-ai, pevq lal-a nail ngaol.
12Al heel ngel-i mail, miltsaq nee mail Aqpavq lovpavq juq nail aqbhaol dai khi aqheeq juq nail aqbhaol doevq dee dee lal-a nail ngaol. Miqyail neq thoil thai hel daiq moel-u phao, aqmeeq nial dai hel daiq moel-a nail ngaol.
13Kivqhail lailma nee mail daq-n khi, nqhao phao kev dai, jel lal-a nail neq, hail n teevq n pevq nail ngaol.
14Miqyail gaoq ge nail: "N-gaol dai khi nqkiv tsel pav kivq nail galduq maqkhaiq, aqbhee nail aqn aqkovq khi mail aqyanq bhai tsel pav kivq nail galduq maqkhaiq, nqtavq bhai joe pheeq-ai thaq nail aqduq bhai aqbhaq dov lal yaoq.
15Aqbhaq al neq, nqtavq kovtavq nee mail miltsaq kovtavq bha kev dai aqbhaq bhi bhaq yaoq" dai, ge bhiq-a nail khe-ai, pevq lal-a nail ngaol.
16Miqyail neq, eeq nail aqbhaq nvq phaq lav sav-a nail ngaol. Aqbhaq al nvq phaq neq, n-gaol phao bhi uv thaiq nail haqbhoil aqbhaq heeq ma dai khi, nqkiv phao bhi uv thaiq nail haqbhoil aqbhaq heeq yaq ngaol. Al ovqtavq, aqgil juq bhai iqsanl bhi dov lal-a nail ngaol.
17Miqyail neq, aqbhaq al juq miltsaq bhai bhi bhaq nail galduq, nqtavq bha joe pheeq-ai thaq nail phaq bhai bhi jiav-a nail ngaol.
18N-gaol dai khi nqkiv bhai bhi uv thaiq khi aqnav dai khi, aqbhaq bhai tsel pav nail galduq, nqtavq kovtavq bha aqbhaq al bhi jiav lal-a nail ngaol. Miqyail neq, thoil thai hel daiq moel-u phao, aqmeeq nial dai, hel daiq moel nail ngaol.
19Kivqhail lailma phao nee daq-n khi, nqhao phao kev dai, jel lal-a nail neq, liq n teevq n pevq nail ngaol.
20Miqyail gaoq ge nail: "Ulcuvq bhai jaol nail jaiqyaq dai khi delgil juq iqsanl mail jaol bhee gil lal yaoq. Nqtavq kovtavq bhai gail, mao dai phaq nail keivq-avq juq bhi bhee lal yaoq" dai, ge bhiq-a nail ngaol.
21Al heel ngel-i mail, Miqyail neq, ulcuvq bhai jaol nail jaiqyaq maol ma juq dai khi delgil juq iqsanl bhai maqkhaiq, mao dai phaq nail keivq-avq juq bhai maqkhaiq, teivq-a nail ngaol. Miqyail neq thoil thai hel daiq moel-u phao, aqmeeq nial dai, hel daiq moel nail ngaol.
22"Ulcuvq khe jaol nail jaiqyaq juq neq, iqyaq iq ma nail lavqkhoel bhai teevq bhee jeq-ail el-ail dei-eiq. Keivq-avq juq gail, jeq-ail el-ail dei-eiq" dai, daoq ge khi jaiqyaq juq bhai geeqlaoq bivq-a nail ngaol.
23Kivqhail lailma phao nee daq-n khi, nqhao phao kev dai, jel lal-a nail neq, ngaq n teevq n pevq nail ngaol.
24Miqyail gaoq ge nail: "Miltsaq kovtavq bhai aqdoevq khal doevq nail tsu nail jaiqyaq juq maqkhaiq, miltsaq bhai soiq soiq-ail tsao nail jaiqyaq juq maqkhaiq, haqtsoiq jaiqyaq juq maqkhaiq, al juq nail lavqkhoel khe, maol yaq maol ma juq iqsanl mail bhee lal yaoq" dai, daoq ge bhiq-a nail khe-ai, pevq lal-a nail ngaol.
25Al heel ngel-i mail, Miqyail neq haqtsoiq jaiqyaq juq bhai maqkhaiq, miltsaq bhai soiq soiq-ail tsao nail jaiqyaq juq bhai maqkhaiq, tsu nail jaiqyaq juq bhai maqkhaiq, al juq iqsanl nail lavqkhoel khe, maol yaq maol ma juq iqsanl mail bhai teivq khi, thoil thai hel daiq-u phao, aqmeeq nial dai, hel daiq moel-a nail ngaol.
26A bhai nee ngal-aq, Miqyail neq, "Ngadao juq, ngadao juq nee dul lai dai tsaol-aq yaq bhai teivq bhel. Aqyu juq bhai, ulcuvq khe jaol nail jaiq juq bhai maqkhaiq, keivq-avq juq bhai maqkhaiq, tsu nail jaiqyaq juq bhai maqkhaiq, soiq soiq-ail tsao nail jaiqyaq juq bhai maqkhaiq, haqtsoiq jaiqyaq juq bhai maqkhaiq, miltsaq teevq heeq heeq lao bhai maqkhaiq, bhi uv thaiq nail ngaol" dai, ge bhiq-a nail ngaol.
27Al heel ngel-i mail, Miqyail neq, aivq khe-ai dul lai nail tsaol-aq yaq bhai teivq-a nail ngaol. Teivq-a nail al bhai, yaqyov-aq khi mail yaqmai-aq dai, bhi bhao lal-a nail ngaol.
28Aqyu juq bhai geeqlaoq bivq khi ge nail: "Yaq mao dai bhao yaoq. Miltsaq bhi bhee lal khi bhi uv thaiq yaoq. Ulcuvq khe jaiqyaq juq bhai maqkhaiq, nqtavq khe keivq-avq juq bhai maqkhaiq, miltsaq khe khal doevq nail jaiqyaq juq bhai maqkhaiq, uv thaiq yaoq" dai, ge bhiq-a nail ngaol.
29Miqyail gaoq ge bhiq-a nail: "Hel daiq yaoq. Aqpavq pavq nail aqbhaol juq maqkhaiq, aqheeq heeq nail aqbhaol juq maqkhaiq, nul juq jaq nail galduq, ngal bivq nail ngaol.
30Aqdoevq khal doevq nail haqtsoiq jaiqyaq juq maqkhaiq, keivq-avq juq maqkhaiq, miltsaq bhai soiq soiq-ail tsao nail jaiqyaq juq bhai maqkhaiq, jaq nail galduq, niul seq deel aqbhaol juq iqsanl ngal bivq nail ngaol" dai, ge bhiq-a nail khe-ai, doevq lal-a nail ngaol.
31Miqyail neq, aivq-i mail khal teivq-ai thaq nail bhai hel daiq khi, al jaiq-ail meeq-il dai, hel daiq moel nail ngaol. Kivqhail lailma phao nee daq-n khi, nqhao phao kev dai, jel lal-a nail neq, kovq n teevq n pevq nail ngaol.
Currently Selected:
Genesis 1: aeu
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.