Piiligu 3
3
Seema nisaala tubikpeeŋu n taasi yabeeri n ŋa
1A jemani maa, waafu n daa n baŋŋi yomsigu gaari buŋkobiri zaa Naawunni n daa n maali la.
Dindaso o daa n ta poga maa saani, a ti boosi u, “Yamonsi n na Naawunni yeli ya da dira tii zaa wala pu ŋa niŋi?”
2Poga maa yeli u, “Ti n tee n di tii zaa wala n ba pu ŋa niŋi. 3Ama tiso n za sunsuuniŋi la, Naawunni yeli ti da pa ti di o wala, koo a siisi u gba, ka pa lala, ti ni kpi.”
4Waafu maa yeli, “Akai, ya ki kpi. 5Naawunni baŋiya maa, ka ya di u, ya nufu ni yoo, ya ba maa Naawunni, a baŋŋi yasuma ni yabeeri.”
6Niŋi n na, poga maa nyaasi, ka tii maa wala veela diibu, a niŋi u naŋgbaŋkuubu maa o n di n di u, ka mari yam.
A zu, o po u di, ka naa n ti o sira gba o di. 7Noba maa niŋi, ba nufu yoo, ba nye maa ba bi so sen, a zu ba naa tii vayelima se n tomi taaba, a so.
8Dindaari maa zaanomaasiri, ba wumi Duuma Naawunni n chaŋina pu maa niŋi, ba zo n sogira tiisi maa puwa.
9Niŋi n na, Duuma Naawunni booli daba maa, “Ya n na e be?”
10Daba maa yeli, “M wumini e n chaŋina pu la niŋi, dabeem gbaa ma, a kpali ni mari alibana zu, ma sogi.”
11Naawunni boosi u, “Ŋani n yeli i ni e marini alibana? E dini tiso ni yeli e da di la wala la?”
12Daba maa yeli u, “Poga la e n naa ti ma la n ti ma tii maa walli ma di.”
13Duuma Naawunni boosi poga maa, “Bo n na e niŋi lala?”
Poga maa yeli u, “Waafu la n yomsi ma, ma di u.”
14Niŋi n na, Duuma Naawunni yeli waafu maa “A kpali bunso e n niŋi a zu, a yi buŋkobiri zaa puwa, e ko ni nye n ŋa naŋgbansiibu, za zinaa wara e ni naa e puu vuura tiŋŋa, ka e dira tanni, a yi e nyevuri niŋi. 15M ni ti dintiri o ba e ni poga maa sunsuuniŋi, ka e biisi ni o biisi gba ni niŋi dindima. O bii ni zaasi e zu, ka e mi dumi o nosiŋkpaari.”
16Niŋi n na, Naawunni yeli poga maa, “M ni ti e mari sufusaaŋu, ka nye beerim, dindaso e n ya n dogi. Ŋama nyaaŋa, e sira yela ni ba e sufu niŋi ga, ka o mini n ni niŋi e zudaana.”
17Niŋi n na, o yeli daba maa gba, “A kpali e ni wumi n ti e poga, ka di tiwaliso ni yeli ya da di la zu, m si tiŋgbaŋaa noori, ka pa e tumi n beligi ga, ka nye bindirigu, a yi e beebu puwa. 18Tiŋgbaŋŋu maa ni buli matimari ni goosi, ka ya dira moo niŋi tiisi wala. 19E ni tumi ga, a nyee zibiiŋu, e bindirigu zu, a yi tiŋgbaŋŋu maa niŋi, ka e lee n pori n kpe tanni maa niŋi. Tanni ba naa n me i, e ni lee n pori n loobi tanni.”
20Adam digili o poga maa yuuri Hawa, o gbinni n niŋi nisaaladima zaa ma. 21Ka Duuma Naawunni naa buŋkobiri gbana maali bimpinna pili Adam ni o poga.
22Niŋi n na, Duuma Naawunni yeli, “Pimparaŋa nisaala pa loobini maa tirima, a baŋŋi yasuma ni yabeeri. A bi daga ti n cheli o ba kpe, ka tee n nye soori n lee n di tiso n tira nyevuri la walli, ka ki lee n kpi, ka ba niŋi n wara.” 23A zu, Duuma Naawunni nyisi u yi pu maa n ba Idin paaligu la, o wa ti koora tiŋgbanso o n ŋma n me u la niŋi. 24O n nyisi u yi pu maa niŋi la, o ti malaakasi ni tokobiso n leegira bugum poli n jinna, pu maa wuluŋpusigu, a kogira nisaaniŋi, nira zaa o da nye soori ta nyevuri tii maa ziya.
Currently Selected:
Piiligu 3: hag
Highlight
Share
Copy
Want to have your highlights saved across all your devices? Sign up or sign in
© 2015, Ghana Institute of Linguistics, Literacy and Bible Translation (GILBTT)