پێدایش 8
8
هار و توپّانئے اێرمۆشی
1هُدایا نوه و هما سجّهێن وَکشیێن هئیوان و دَلوَت یات کرتنت که نوهئے همراهیا بۆجیگا اَتنت. هُدایا زمینئے سرا گواتے راه دات و آپ اێر آیان بوت. 2جُهلانکیانی چَمّگ و آسمانئے دریگ بند بوتگ‌اَتنت و چه آسمانا هئورانی گوارگ هم بند بوتگ‌اَت. 3آپ کمّ کمّا چه زمینئے سرا کمّ بئیان بوت. یکّ سد و پنجاه رۆچا رند آپ جَهل شتگ‌اَت. 4هپتُمی ماهئے هَبدهُمی رۆچا بۆجیگ آراراتئے کۆهانی سرا اۆشتات. 5تان دَهُمی ماها آپ اَنگت کمّ بئیان اَت. دَهُمی ماهئے ائولی رۆچا کۆهانی ٹُلّ زاهر بوتنت.
6چِلّ رۆچا رند، نوها هما دریگ پَچ کرت که آییا بۆجیگا پِر کرتگ‌اَت. 7گوَراگے#8:7 گوَراگ سیاهێن مُرگے که باز جاگها کَلاگ هم گوَشنتی، پارسیا ”کلاغ“. ڈنّا راهی دات. گوَراگا تان هما وهدا بال کرت و گَشت که زمینئے سرئے آپ هُشک بوتنت. 8پدا کپۆتے راهی دات تان بچاریت که آپ چه زمینئے سرا کمّ بوتگ یا نه. 9بله کپۆتا چُشێن جاهے ندیست که وتی پادان اێر بکنت، چێا که سجّهێن زمین اَنگت آپئے چێرا اَت. گڑا کپۆت بۆجیگا، نوهئے کِرّا پِر ترّت. نوها وتی دست شهارت، کپۆتی گِپت و بۆجیگا آورت. 10نوها دگه هپت رۆچ ودار کرت و پدا کپۆتی چه بۆجیگا راه دات. 11وهدے کپۆت بێگاها آییئے کِرّا پِر ترّت، زئیتونئے تازگێن تاکے دپا اَتی. نون نوها زانت که چه زمینئے سرا آپ کمّ بوتگ. 12نوها دگه هپت رۆچ ودار کرت و پدا کپۆتی راه دات. اے بری کپۆت آییئے کِرّا پِر نَترِّت.
13نوهئے اُمرئے شَش سد و یکُمی سالئے ائولی ماهئے ائولی رۆچا زمینئے سرئے آپ هُشک بوتگ‌اَت. نوها بۆجیگئے سرپۆش کشِّت و دیستی که زمین هُشک اِنت. 14دومی ماهئے بیست و هپتُمی رۆچا زمین سَرجما هُشک اَت.
15گڑا هُدایا گۆن نوها گوَشت: 16”چه بۆجیگا در آ، گۆن وتی جَن و چُکّ و نِشاران. 17هما سجّهێن سَهدار که تئیی همراه اَنت، ڈَنّا بَرِش گۆن، بالی مُرگ و جانوَر و سجّهێن لاپکَشّان، تانکه زمینئے سرا رُمب و رمَگ بکننت، چُکّ و بَر بکننت و گێشا گێش ببنت.“ 18گڑا نوه گۆن وتی جَن و چُکّ و نِشاران در آتک. 19سجّهێن جانوَر و سجّهێن لاپکَشّ و سجّهێن بالی مُرگ و زمینئے سرئے سجّهێن سُرِنده چه بۆجیگا در آتکنت، هر یکّے وتی تَهرئے هسابا.
20نون نوها په هُداوندا کُربانجاهے اَڈّ کرت و چه هِلارێن هئیوان و هِلارێن بالی مُرگان لهتێنی زُرت و کُربانجاها سۆچَگی کُربانیگی کرتنت. 21اِشانی وشّێن بۆ که هُداوندئے کِرّا سر بوت، وتی دلا گوَشتی: ”من چه اِد و رند هچبر زمینا انسانئے سئوَبا نالتَ نکنان، بِلّ تُرے چه کَسانیا آییئے دلئے واهگ بَد اَنت. چه اِد و دێم هچبر سجّهێن سَهداران اے پئیما هۆریگا گار و گُمسارَ نکنان که انّون کرتگُن.
22تان هما وهدا که زمین هست‌اِنت
کِشت و کِشار و رۆن و مۆشئے#8:22 رۆن و مۆش، بزان کِشارئے رُنَگ و مُشَگ، کِشارئے بَرئے در آرگ. وهد،
سارتی و گَرمی،
گرماگ و زمستان و
رۆچ و شپَ نه‌اۆشتنت.“
Currently Selected:
پێدایش 8: HPKB
Highlight
Share
Copy
Want to have your highlights saved across all your devices? Sign up or sign in
© 2016-22 Wycliffe Bible Translators, Inc.