Lucas 24
24
Jesus maiwaxinabu bestẽkaina benanibukiaki, na hãtxarã
(Mt 28.1-10; Mc 16.1-8; Jo 20.1-10)
1hanua ma huĩrukũti binuxĩkẽ domingotiã penamahaira maiwati tãpe anu bukatsi hawẽ dapushti sheni ma pewaxinabu buaibũ aĩbu betsaburi hatu txibaĩ hatube bui 2kematã ha mixki beputi ewapahaira tsuãra ma tarãbu betxitã 3hikikaĩ Shanẽ Ibu Jesusũ yura hawa betxiama 4hani tsuã haskara waxina unãma hanua e iki keyutã uĩaĩbũ habianuri hawaira huni dabe hatu bebũ tashnia tari hushupa txashahaira sawea betxitã 5haska uĩ datehairai maĩ beui beti ikaibũ huni dabetã hatu yuikĩ:
—Haskakĩ maiwati merã huni hiwea mã benakanai? 6-7Nenumaki. Ma bestẽkainaki. Galiléia anushũ matu yusĩkĩ yuikĩ: “Earã, matũ Hutxi Kayabi Iuwa huni txakabũ ea atxishũ hiki ea mastabu mawa shaba dabe inũ besti kaya ẽ ana bestẽshanaii, haska Deusũ yubanirã”, akĩ matu yusĩkĩ yuimarã, mã xinãmamẽ? Xinãkãwẽ— hatu wa
8haska Jesusũ hatu yuima ikũ xinãtã 9-10maiwati tãpe anua kaĩbaini Maria Madalena inũ, Joana inũ, Tiagõ ewa Maria inũ, aĩbu betsabu habũ kaka bushũ Jesusũ 11 tsuma kuxipabu inũ habũ Jesus txibãmis betsabu haska uĩkãshu hatu yuibiabu 11hatũ hãtxa hawa ikũwãma: “Haskatãrũ haskanũ humei ikanikiki”, ikaibũ
12hanua Pedro hari txaniaibũ nĩkatã: “Eãri uĩtanũ”, ika tashnikaini maiwati tãpe anu kuxikaĩ uĩnũ ika kakui denikaĩ uke merã uĩkĩ hawẽ yabuxinabu tari hamauri daka uĩtã haska uĩ e iki teku itã Pedrõ haskaxina xinaĩ xinãyabi kaya
Emaús maekiri bai tanabainaibu Jesus hatuki nukunikiaki, na hãtxarã
(Mc 16.12-13)
13hanua Jerusalém anua bui 11 quilômetro mae betsa hawẽ kena Emaús anu habias shabatiã Jesusũ tsuma betsabu dabe bui 14haska wakeaketã tenãxinabu bestẽkainakiri hãtxai 15yuinamekubainaibũ habiatiãri Jesus hatu itxũ tashnitã kakĩ hatu txibaĩ kai hatuki nukukainaya 16hau unãyamanũbũ Deusũ hatũ beru betsa wa 17hanushũ Jesusũ hatu yukakĩ:
—Bai tanabiranirã, hawa yui mã ikubaĩkanai?— hatu wakĩ ana hatu nui txipea nuiyabi buaibũ 18hanushũ habu betsa Cleopasĩ yuikĩ:
—Jerusalém anua haska dasibi waxinabu dasibibũ unãkanikiki. Jerusalém anu bai hubiaxina haskakĩ miã besti mĩ haska uĩyama ixiãmẽ?— aka
19hanushũ hatu yukakĩ:
—Haskaxinamẽ? Ea yuiwe— aka ana yuikĩ:
—Jesus Nazaré anua ewani itxakawakĩ eskaya tenãxinabuki. Mia yuinũ nĩkawe. Deusũ hãtxa yuishunika pepahaira eskakĩ Deus inũ yura itxapabu hawẽ aka uĩmakĩ daya duapa inũ hãtxa kuxipai unãnepai 20pepahairabiakẽ hau tenãnũbũ Deusbe nukunabu hãtxashunika shanẽ ibubu inũ nukũ mae shanẽ ibu betsabũ nawabu anu Jesus yunuabu cruzki hatu mastamabu mawaxinaki. 21Ha inũ, Jesusũ nawabu nitxĩkĩ Israelbu nuku pe mekekĩ Deus nuku daewashũshanai dabanẽ nũ hamẽ dasibi manakakubaĩxinaki. Ha inũ, ma shaba dabe inũ besti binubiakainaya nũ hawa uĩriamaki. 22-23Haska inũ, nukubetã habũ Jesus txibãriamisbu aĩbuaibu penamahaira maiwati tãpe anu bushũ Jesusũ yura hawa uĩama nai tsuma dabe hatu betxãkamea nia uĩaĩbu hatu yuikĩ: “Jesus hiweaki”, hatu wa beshũkiaki. Haska nuku yuiabu datei nuku dateabu e itã nũ nĩkaki. 24Haska nukuki txaniaibũ nukũ haibu betsaburi maiwati tãpe anu bushũ haska aĩbuaibũ yuishu keska uĩkĩ hawa Jesus uĩyama iriakãshukiaki— aka
25hanua Jesusbe hãtxai unãriabuma Jesusũ hatu yuikĩ:
—Deusũ hãtxa yuishunikabũ merabenã Messias Cristokiri kenenibu unãbiakĩ unãshubira ikũ beshmas wakĩ xinã pewariama mã kaneaii. 26Nukũ merabenã Messias shanẽ iburiama hau haskai yumaĩ kanũ Epa Deusũ yununiki— iwanã, 27Deusũ Moisés yusĩa keneniwẽ hatu yusĩ taewakĩ Deusũ hãtxa yuishunikabu dasibibũ yusĩa hãtxawẽri Jesusũ hatu yusĩkĩ hatu unãmakubainaya
28Emaúski kemai buaibũ hatu binubainai dabanẽ 29nemakĩ yuikĩ:
—Ma bari kai mexuikiki. Habianu nukube niti iyuwe— akabu nĩkatã habianu hatube baxikui niti itã 30habianushũ hatubetã pinũ ika bashti itã misi bishũ piti hayabuwẽ taeshũ Deus kẽwãtã tũkeshũ hatu inãyã 31habiatiãri Deusũ hatũ beru ana betsa waya Jesus uĩkĩ unãtanaibũs samama ana damikainaya 32ha dabetã xinaĩ yuinamekĩ:
—Bai tanabirãkĩ Deusũ hãtxa yuishunikabũ yusĩni nuku unãmakĩ nuku yusĩayã nũ huĩti xinã txãkãkũkirãshuki, haskamamẽ?— iki yuinametã 33ma mexubiakẽ ana hanu ikatsi ikama benibirani Jerusalém anu hawaira txĩtũbaĩ Jesusũ 11 tsuma kuxipayabu inũ hatube hawẽ tsumabu betsabu itxabu anu hatu anu hikituxitã 34hanushũ habu itxapabu yuikĩ:
—Ikũki! Ma besteãki, nukũ Shanẽ Iburã, ha Simão Pedroki nukukĩ uĩmashurã— iwanã, yui hatuki txaniaya
35hanushũ haska Jesus unãriamabia bai tanabaĩkĩ Jesusũ ha dabe hatube kakĩ yusĩshu yuitã hanushũ misi tũkeshũ hatu inaĩ anu atimas shabakabi uĩbirã hatu yuiaibũ
Jesus bestẽkaina hawẽ tsumabuki nukunikiaki, na hãtxarã
(Mt 28.16-20; Mc 16.14-18; Jo 20.19-23)
36haskashu yui meneriama hãtxã waĩbũ Jesus hawaira dami naxui itã hatu hãtxa wakĩ yuikĩ:
—Haska mã unãnumamẽ? Ma ẽ huaki. Dateyamakãwẽ— hatu wabia 37datekĩ xinãkĩ yuikĩ: “Narã, yushĩmẽkaĩ?” ikĩ uĩkĩ xinaĩbũ 38Jesusũ ana hatu yuikĩ:
—Haskai mesei datei mã e ikanai? Mã huĩti kuximẽ?— iwanã, 39-40hawẽ mekẽ inũ hawẽ tae hatu uĩmakĩ yuikĩ:
—Ẽ tae inũ ẽ mekẽ uĩkãwẽ, habia ẽ eakirã. Nami inũ shau ẽ haya keska yushĩ hayaismaki. Mekĩ ea unãkãwẽ— hatu wa 41xinã txãkãbiai bika tenekĩ ikũhairawariabuma xinã dabewaibuwẽ taeshũ Jesusũ ana hatu yukakĩ:
—Piti mã hayamẽ? Ea inãkãwẽ— hatu wa 42baka shui inãbu 43hatũ berubi pitã 44yuikĩ:
—“Moisés yusĩni hãtxa inũ Deusũ hãtxa yuishunika betsabũ yusĩni hãtxa inũ Davĩ hawẽ nawakĩ kẽwãti hãtxa Salmoswẽ Deus yubakaniki, hau dasibi haskashanunã”, iwanã, yuinibu ẽ mawariama matu anushũ habiaskari matu yusĩkĩ dasibi ekiri na kenenibu bebũkiri ẽ matu yuikubainimaki— iwanã,
45ha kenenibu una hau nĩka pewanũbũ 46hatu yuikĩ:
—Ekiri kenenibu matu yuinũ nĩkakãwẽ. Deusũ Katua Messias merabenã yumãtã mawa shaba dabe inũ besti kaya ana bestẽshanikiki. 47Haskawẽ taeshũ hawẽ kuxipawẽ hatu yusĩshãkanikiki, hau hatũ txakabu Deuskiri txakabumisbu hau henetã habũ xinã betsa waibu Deusũ buashũshanikiki. Nawa shukua tibi nĩkashanaibu yuini matũ Jerusalém anushũ taewakĩ 48na kakape ekiri txanibaũshãkãwẽ. 49Haska ẽ Epã ea yununi keska wakĩ eãri ẽ maturi yunuaii. Deusũ hawẽ hãtxati kuxipa datetima ẽ matu yunushanai binũ ika na habia Jerusalém anu hiweyushũ manakayukãwẽ. Deusũ hawẽ kuxipa nai anua matu inã bitã nawa dasibibu yusĩkĩ taewashãkãwẽ— hatu watã
Jesus hawẽ tsumabũ berubi Deusũ aininikiaki, na hãtxarã
(Mc 16.19-20)
50haskakũkaĩkĩ shaba betsatiã Jerusalém anua kaĩkaini Betânia anu Jesus kakĩ hawẽ tsumabu iyushũ hawẽ mekẽ sanãshũ hau Deusũ hatu duawakubaĩshanũ hatu yukashunaya 51habu henemabaĩkĩ nai anu hawẽ Epã ainiaya 52hatu henebainai uĩ hawẽ tsumabũ teskãbaĩbaĩshũ Jesus kẽwãtã benimahairai Jerusalém anu ana txĩtũbirã 53Deusũ kuxipa manakakĩ shaba tibi hawẽ Templo anushũ Deus kẽwãkubainibukiaki.
Hatiski, Teófiloõ, na kakape ẽ mia kene keyushũshurã.
Lucas
Currently Selected:
Lucas 24: cbsBR
Highlight
Share
Copy
Want to have your highlights saved across all your devices? Sign up or sign in
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.