João 14
14
Epa Deus anu hawẽ kati bairã, Jesuskiaki, na hãtxarã
1nukuri Jesusũ yuikĩ:
—Na haska ẽ txaniayarã, huĩti meteshei dateyamakãwẽ. Deus ikũwãkĩ eari ikũwãkãwẽ. 2Ẽ Epa Deusũ hiwe anu teke shaka itxapa hayaki. Hawẽ hiwe haska hayamakẽ ẽ matu yuiama ikeanaii. Haskakẽ hanu hiwei mã niti ikama ishanũ ẽ matu pewashuĩ kashanaii. 3Hanu maturi ka ẽ hiweai anu mã iriatiruwẽ taea kashũ bebũkiri ẽ matu pewashuĩ kashanaii. Ana hushũ ẽ matu iyushanaii, hanu nũ hiwenũbunã— itã 4—Matunã mã unaiĩ, ha baiwẽ ẽ kairã— nuku waya
5Tomẽ yukakĩ:
—Shanẽ Ibuũ, hanu mĩ kashanairã, nũ unãmaki. Haskatã hawẽ kati bai nũ unãshanai?— aka
6Jesusũ kemakĩ:
—Hawẽ kati bai inũ hawẽ txanima unãti inũ hawẽ hiwekuĩtirã, habia ẽ eaki. Ea besti ikũwãkĩ txibaĩ Epa Deus anu mã hikitirubuki. 7Haska inũ, mã ea unãti wakubainairã, ẽ Epa Deusri mã unãkubainaii. Natiã ea tapĩkubaĩkĩ Epa Deusri mã uĩriakubainaii— nuku waya
8nĩkatã Filipẽ yukakĩ:
—Shanẽ Ibuũ, Epa Deusrã nuku uĩmawe. Uĩtã nũ mia ana bikawamaki— aka
9—Filipeẽ, hatishũ ẽ matube hiwebiakũkainai mĩ ea unãriamamẽ? Txanima ea uĩkĩ Epa Deusri mã uĩaiĩ. Haskakĩ: “Epa Deus nuku uĩmawe”, akĩ mĩ ea yukai? 10Epa Deus inũ ea, nũ dasiarã, mĩ xinãmamẽ? Ẽ xinãnẽ akĩ ẽ matu yuismaki. Hakia Epa Deus ebe ketashameshũ ea yunukĩ hawẽ daya ea amamiski. 11Epa Deus inũ ea nũ dasiarã, ikũwãkãwẽ. Haska ẽ hãtxa besti nĩkatã mã ikũwãtirumarã, ẽ dami matu unãti wamakĩ atimaska ẽ amiswẽ taeshũ ikũwãkãwẽ, nũ dasiarã. 12Txanima ẽ matu yuiai nĩkakãwẽ. Tsuabũra ea ikũwãkĩ ẽ haska amis mã ariakubaĩshanaii. Ha inũ, ẽ Epa Deus anu ẽ kashanaiwẽ taeshũ ẽ kuxipayabũ ea merabewakĩ hatu ikũwãmakĩ dami atimaska ewapa wakĩ ea binushãkanikiki. 13Ẽ kenawẽ taeshũ tsuabũra hamapai Epa Deus mã yuka ẽ hawẽ bakẽ ẽ matu ashũshanaii, ẽ Epã kuxipa matu uĩmakinã. 14Hamapai tibi ẽ kenawẽ mã ea yuka ẽ matu ashũshanaii— iwanã,
Deusũ Yushĩ Pepa Jesusũ hatu yubanikiaki, na hãtxarã
15ana nuku yuikubaĩkĩ:
—Txanima mã ea abuairã, haska ẽ matu yusĩkĩ yunumis xinãkĩ ẽ hãtxa mã txibãkubaĩshanaii. 16Mã haska wakubainaya ẽ matu yukashuna Merabenã Bena betsa Deusũ matu anu yunushanikiki, hau matube hiwei ikibi ipashanunã. 17Merabenã Benarã, hawẽ Yushĩ Txanima Unãmanikaki. Mai anu yurabũ hawa unãbumã inũ uĩabumã Merabenã Bena ikũwãkĩ haibuwatirubumaki. Hakia natiã matu dapi hiwea txipu matube uke merã hiweshanaiwẽ taeshũ Deusũ Yushĩ Txanima Unãmanika mã ma unaiĩ.
18Haskawẽ taeshũ eãnã, baxikĩ bake ibuuma keska wakĩ ẽ matu henebainamaki. Hakia ana matube iki ẽ ana txĩtũkirãshanaii. 19Mawaira hatishuĩra yurabũ ea uĩyama ishãkanikiki. Hakia matunã, mã ana ea uĩyushanaii. Ha inũ, ẽ ana matu hiweshunaiwẽ taea maturi mã hiweriakũkaĩshanaii. 20Ha shabatiã haskakaĩ ẽ Epaki ẽ dasia mã unãyã hanua matuki ana nukui ẽ matuki dasiriatã ẽ matube nipakeshanai mã unãshanaii. 21Haskakẽ tsuabũra ẽ yusĩa nĩkakĩ txibãkubaĩkĩ ea unãmai txanima ea abukubaĩshãkanikiki. Haska inũ, tsuabũra ea abuaibũ ẽ Epa Deusũri hatu aburiashanikiki. Haskaibu shabakabi ẽ hatu unãmashanaii, habũ txanima ea abuaiburã— nuku waya
22Judas betsã yukakĩ:
—Shanẽ Ibuũ, haskakĩ yurabu dasibi uĩmama mĩ nuku besti ana uĩmashanai?— akaya
23Jesusũ kemakĩ:
—Tsuabũra ea abukinã, ẽ yusĩa hãtxa txibãkanikiki. Ẽ Epã hatu abuaya ea inũ ẽ Epa hua nũ hatuwẽ hiweshanaii. 24Hakia tsuabũra ea abuabumarã, ẽ yusĩa hãtxa txibãbumaki. Na hãtxa ẽ matu yusĩa mã nĩkakubainairã, enamaki. Ẽ Epa hatũ ea yununitũ hãtxaki. 25Natiã matube hiweshũ ẽ matu yusĩyukubainaii. 26Hakia hawẽ Yushĩ Pepa matũ Mekenã Bena ẽ kenaya ẽ Epa Deusũ yunua hushũ haska ẽ matu yusĩkubaĩmis dasibi ẽ matu yuiai ana shabakabi matu xinãmakubaĩshanikiki.
27Ẽ hãtxawẽ datei matũ huĩti nixmayamakãwẽ. Deusũ unãnuma hawẽ uke meranu unãnumati ẽ matu inaiĩ. Haska yurabu hatũ xinãwẽ hiwekĩ unãnumai hiwemisbu keska matu inãma hakia Deus anua daewanika kayabi unãnuma ẽ matuki baxiaii. 28“Ka matu anu ẽ ana hushanaii”, ikĩ ẽ yuiai mã ma ea nĩkashuki. Hanua Epa Deus shanẽ ibũ ea binuawẽ taea hanu ẽ kashanaii. Ẽ Epa anu ẽ kashanai mã nĩkaiwẽ taea mã benimakeanaii, txanima ea abu kayabirã. 29Na eska bebũkiri ẽ matu yuiai txipu ikai uĩkĩ ẽ matu hãtxa wai xinãkĩ mã ea ikũwãshanaii. 30-31Hakia mai anu yurabu yununika diabo Satanás ma huaiwẽ taea ana hatishuĩra ẽ matube hãtxamaki. Satanásã ea mei ewẽ kuxipatirumabiakẽ hau xinãshũ ea haska wayunũwẽ, txanima Epa Deus abukĩ haska ea yunua ẽ ashũmis yurabu ẽ hatu uĩmai kairã.
Haskaki. Benirikãwẽ, nenua nũ bunũbunã— nuku wa
Currently Selected:
João 14: cbsBR
Highlight
Share
Copy
Want to have your highlights saved across all your devices? Sign up or sign in
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.