Gen 3
3
Berabero karena.
1 Bada God ghamoghamo iyamonisi kamosiyai na sago ina bera vigayagaya irakata. Tuna na mota. Inae da wavinena ivi nuwatini, ivonei bo, “Vonavaghata da God ivonem da kiiamame peyarina vao kamonai ke kona kani bo?”
2Ma wavinena ivonapotei, “Kegha, tokai kiiamame peyarina vao kamonai kana kani. 3Ma ivonatanikai da vao basunai kii sago kava na ‘amena’ ke kana kani bo kiina ke kana votovoni. Kana berai na kana rabobo.”
4Ma ivonapotei, “Tuna ke vonavaghata, tami ke kona rabobo. 5God iakovi da kota kani na matami ita votawei da kotakova kirakai da ami akova na tuna mani ina akova nakanani. Nuwanuwam kamonai biibiina ma berona kotakova yavui.”
6Ma wavinena ikita da nani kiina iame ikitai da ivi nuwaviivai. Ma inotai da ibiibai da ita kani. Ma bade ina kayowana ghamana da nani akovina ita viiya. Vaghina ma ipura da ikam. Ma tomowina na yavata da wavinena viya iverei da tuna bade ikani. 7Ikam ikovi ma nota iviiya da ti na iyusi kava. Ma kii rugurugusi iyuna ivatura da ikiipapaparisi.
8Nani ravinai ivi ruwa ivi yanei da Bada God vao kamonai ibababa na kii kunukunusiyai ikovemakai. 9Ma kegha, Bada God tomowina kurina ivi kwatu, “Adam, tam imapatana?”
10Ma ivonapotei, “Weni vaona kamonai avi yanem ma taku iyuku kava na ayabumanem, tuna kubiine na akove.”
11Ma Bada God ivona bo, “Iyi ivonem da iyum kava? Avonatanim da nani kiina amena ke kuta kani. Ma tam kukani, bo?”
12Ma tomowina ivona bo, “Wavinena gwabikuwai kuterei, tuna kii amena ivereku da akani.”
13Ma Bada God wavinena ivonei bo, “Avi kubiine weni berana kuberai?”
Ma ivonapotei bo, “Mota ivi beroberoweku da akani.”
God kovogha irereghi.
14Vaghina ma Bada God mota ivonei, “Tam aimimaghim! Weni berana kuberai kubiine ghamoghamo peyarisi kamosiyai tam kovogha ghamana kuna viiya. Karako ma mara ku kudubina kuna tetete. Ma popoku kuna kanikani da am mara ku turina. 15Ma ana berai da tam ma wavinena koni kawapata. Ma bade peim ma wavinena peina yavata ini kawapata nonowa. Mara sago kaekarena kuna kani ma gayamim ini tugudai.”
16Vaghina ma wavinena ivonei bo, “Ana berai da am ropeya kamonai am inivisi ina rakata da ere vokwarakwaram kuni tuwa. Ma ana berai da am kayowana ghamana da kawam. Ma tuna ini badem.”
17Vaghina ma, Adam ivonei bo, “Avonem da kii amena ke kuta kani ma kawam gamona kuvi yanei da kukani. Tuna kubiine dowa aimimagi, da kuni inipika kirakai am yawasa ku kudubina da kuna kam. 18Ma am wayowa kamonai inamona ma iyiyo ina gogo. Ma dipiyai yabayaba kunekwa yawara da kuna kam. 19Kuni poyapoya da kuna kam, nakanani ina nenae da mara sago kuna vovira kuni dowa. Tam dowiyai avovipasipasim da kuvi wawaya ma mara sago na kuna vovira ku dowa.”
20Adam kawana ivi vavei Eve iyamna tuna wavinena na wawaya kudubisi i maduwa.
21Ma Bada God ghamoghamo bekasi iviiya da gara iyamoni, ma Adam kawana yavata ivi kotesi.
Adam ma Eve ikwavinisi ikiibau.
22Nani murinai Bada God ivona bo, “Karako nani wawayisi ivi ruwa na tota nakanani, biibiina ma berona iakovi. Ma ke vaghina da ita vororona da Yawasa Kiina amena ita viiya. Amena ita kani na yawasa makamakii nonowina ita veresi.” 23Tuna kubiine Eden kamonai ikwavinisi ikiibau. Ti i karena na dowiyai ivopasipasisi ma ivonatawesi ikiibau da dowa ita wayowei. 24Ikwavinisi ikovi na vao kupunai kana koyakoyagha iteresi, maramatana ku nevana aneya rewapanisi iteresi da wawaya ke ita rui. Ma seri ghamana ere yebayebarina ma vovokeyakeyuna iterei da ivivi kiivirevirei, tuna na Yawasa Kiina ivivi tarapaparanei.
Currently Selected:
Gen 3: pwgB
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.