Mat 7
7
Kana jo lam ane bako
(Luk 6:37-38,41-42)
1“Kana jo lam ane bako, eji Esowo lꞌki-n tob lam.#7:1 Rom 2:1; 1 Kor 4:5. 2Tibre go mbang nyꞌnehm nyi ń kpo lam ane bako, nyi nyi Esowo bahke tob ko lam-n. Ana ń gare no ka, ano wo Esowo bahke tob gare ka-n.
3“Jen ji wahnge a kpꞌseenge mmolsahk no wob mmonanne go elmahr, a kil eltiiri bada nkporti nyi wob go ega elmahr? 4A bahke sahbe renan, tong mmonanne re, ‘Nong, me n yehk-a mmolsahk no wob-a go elmahr,’ eji nkporti wob-a go elmahr? 5Wobnob tane! Tohko gbo mbang yehke nkporti go ega elmahr, eji a lꞌmal nyehn, yehke mmolsahk no wob go elmahr mmonanne.#7:5 Gal 6:1-5.
6“Kana jo ka ebv nsol Esowo nyi li eje eje, eji bo lꞌkꞌtahm kehm-n eljaake.#7:6 Mat 10:14. Kana jo rod amohkesol ro tv akuk, eji bo lꞌkꞌkadde go bo akpade.
Bahben, ḿ bahke bele
(Luk 11:9-13)
7“Bahben, ḿ bahke bele. Seben, ḿ bahke nyehne. Kahden, bo bahke lennge mbu ka-n. 8Tibre nne awohng awong no lꞌbahb, á bahke bele. Nne no lꞌseb, á bahke nyehne. Nne no lꞌkahd, bo bahke lennge mbu ka-e.
9“Nne awo ewahne no bahke kake mmon ewe eltal, á lꞌbahb-e re á ka-e nsol alehke?#7:9 Mak 11:24. 10Afi á bahke rodo nnyo ka-e, á lꞌbahb-e re á ka-e nsahre? 11Wahn ji li na abi ane, ń kpꞌkahne ana ń kpo ka abon ebahne nsol nyi nno, lꞌlim renan, Nso ejahne no li go ero lꞌki-n tob ka nsol nyi nno, ń lꞌbahb-e?#7:11 Jems 4:3.
12“Nsol kpee nyi ń kpꞌsebe re ane bako jo lim ka-n, nyi nyi ḿ bahke tob jo lim ka bo. Ń lꞌlim ano, wahn ebbum atahm nya Esowo, a alum nya abanyehnamahr bungu no.#7:12 Mat 22:37-40; Rom 13:8-10.
Nfiidifiidi eti mbu
(Luk 13:24)
13“Sehngen go nfiidifiidi eti mbu jio! Tibre mbang nyi li rehng go ellulagun, mbang elfohk elkul nyi, eti mbu eje kpꞌkpange. Ane gbalee ba kpꞌsehnge ona. 14Wo, mbang nyi li rehng go elkpin, mbang asodaroongo nyi. Eti mbu eje li fii.#7:14 Mat 19:24; Elt 14:22. Ane ba kpꞌnyehne mbang nyio li ntiil.
Nnoobo eti, bo kpo liing-e go ege akab
(Luk 6:43-44)
15“Jo gberen akimfahnge abanyehnamahr. Bo kpo ba go egahne, jo ba lim, are ejoro bi. Wo, go bo atahng bo li, are abibbib enyam bi.#7:15 Elt 20:29. 16Go bo akab wo, ḿ bahke bo liingi. Anv, asokonso, nne kpo jꞌje song bong akab avaina? Agasame, nne kpo je song bong akab afiga?#7:16 Gal 5:19-23; Jems 3:12.
17“Eti ji nno ajehng ajehng kpo kab anoobo akab. Esabsab eti kpo kab abi akab. 18Eti ji nno nehm ma kab abi akab. Esabsab eti nehm ma kab anoobo akab. 19Eti ajehng ajehng ji tohko kab anoobo akab, bo bahke gbahke kak agun.#7:19 Jon 15:2,6. 20Go bo akab wo fvfo, ḿ bahke bo liingi.
Wahn n nehme kahn
(Luk 13:25-27)
21“Nne awohng awohng sang no kpo lung-m re, ‘Ntul, Ntul!’ bahke yele go ejahbetul Esowo, sehngem ye ji kpꞌlimi ji Nsoo no li go ero tong-e no re á lim bahke yele.#7:21 Rom 2:13; Jems 1:22. 22Efung bio ane gbalee bahk-m bahbe re, ‘Ntul, wahr sang jo nyehn amahr go ega mbinga, fere jo kam abi atohko yehke go ega mbinga, jo lim akpokosi gbalee go ega mbinga?’#7:22 1 Kor 13:1-2. 23Owo m bahke kehm tongo bo re, ‘Me, wahn n nehme kahn.#7:23 Mat 25:12. Fak-m wahn go esamahr, wahn aneb abꞌbi ba!’
Ana ane abal si ntahk
(Luk 6:47-49)
24“Fvfo, nne awohng awohng no lꞌwuk alum enyame, fere jo lim, á li ana ekahnkahn nne ji si etahk eje kunu go ekpartal.#7:24 1 Kor 10:4. 25Elahb kehm ba na, nnyel kehm yele, kuumu agbunggbung, rehng etahk jio, nfeb kehm kehme ellimi, jo gbul etahk jio. Tikem gbo. Tibre á si kunu go ekpartal.
26“Nne awohng awohng no lꞌwuk alum enyame, kꞌlim, á li ana egboolo nne ji si etahk eje kunu go erikehndi. 27Elahb kehm ba na, nnyel kehm yele, kuumu agbunggbung, rehng etahk jio, nfeb kehm kehme ellimi, jo gbul etahk jio.#7:27 Ell 18:10. Etahk jio kehm gboko, wa rꞌrere rꞌrere.”
Nsahm nyi Jisos
28Eji Jisos ma bung nsol nyia mal, eltibi ene kehm kpoko ellong ane bao esi. 29Á jo tibi bo ana nne no kpi nsahm. Á joom tib ana atꞌtibi ebo ba atahm.
Currently Selected:
Mat 7: ekaNT
Highlight
Share
Copy
Want to have your highlights saved across all your devices? Sign up or sign in
© 2012, The Nigeria Bible Translation Trust and Wycliffe Bible Translators, Inc. All rights reserved.