San Mateo 3
3
Juan chi õor por choomieu Ẽwandam iek jaau nʉrrarr
(Mr. 1:1-8; Lc. 3:1-9,15-17; Jn. 1:19-28)
1Warrcha Juan chi õor por choomieu Ẽwandam iek jaaubaadem jaar, Judea durr bʉ̃ʉrjã õor chukag eeta sĩejeejim aajem. Mam ich sim aar õor maawaita amag jaaumamua, 2“Pãach khaibag ãsie ewag khĩirjuwia Ẽwandamagta chugpaapi jeeubathʉ̃” aajeejim anʉm. Magnaa ĩchab, “Ya mʉigmua jopcha ich Ẽwandamau maach thumaam khʉʉn Porkhapiju maach ee pʉiju” aajeejim anaabá. 3Mamʉ maan Juanau mag jaau nʉrraju igwiata chi Ẽwandam i jaaumie Isaías khararrau Ẽwandam iek phãawaijã mag phãjiebma:
“Woun ãb ajappai õor barba aajem aar sĩejemuata, ich aar õor barbaimaawai, ‘Maach Poron ya beeimʉʉ sim’ a jaau nʉrraju.
‘I beeju nawe pãach thãar khĩir khaugbat’ aju, ‘thãraucha khõsi i iek ʉkhaag’ ” a phã sim. (Is. 40:3)
4Ich chi Juan khajũa camello khaar denta kha sĩejim aajem; maagwai i ãi jʉ̃ajemjã nemheu den ajim aajem. Ichin pabʉ ee asphitjo sim langosta anʉmta pa miel dʉi kho nʉrrʉm iiuta sĩejeejim aajem, tag deeum nem khoojem chukhu aawai. 5Irua mag jaau nʉrrʉm khaug athaawai, Judea durram khʉʉn Jordán igaau joobaajerr khʉʉn dʉi Jerusalenpienpa i iek ũraan beejeejim aajem. 6Mag beewia amach pekau Ẽwandamag chugpaapi jeeubaawai ichdeu am por choopʉimaajeejim aajem, Jordán ee.
7Pari Juanau oowai ich aig Moiseeu Ẽwandam iek phã pʉatarr wajapcha ʉʉrkhaajerr khʉʉn khapan bee thʉnʉm dʉi ĩchab tagam khʉʉn chi machnaan saduceo anʉm khʉʉnpa bee thʉnʉm oobaawai, amag magjim anʉm:
—Chi khaibagnaan, ¿khaíu pãrag jaauwai Ẽwandamau maach i agkham ed sĩi por chootarr gaaimuapaita pãar i jua machag ãwatbaju a jaaujĩ? 8Sĩi pãach por choopi nʉmuapai chan irua pãar aubam ajim anʉm. Ẽwandam jua machgau dau aphʉʉ amapha nʉm khai, pãach khaibag thumaa ãsie ewag khĩirjuwia, Ẽwandamag isegpi jeeuwia, chadcha Ẽwandam iek ʉkhaajem khʉʉnjo abat ajim anʉm, pãach khapeen dʉijã. 9Oob pãrau chikhamnaan denjo, pãachjã warrgar pãach jooi Abrán khararrjo Ẽwandam dʉi khapeerkha nʉm awi, “Maran Abrán chaainau; mag i chaainkha nʉmta, ¿jãga Ẽwandamau mag maar dau aphʉʉ apibarju?” a khĩirjumiet ajim anaabá. Sĩi mag Abrán chaainkha nʉm gaaimuapaita mag ʉ̃gthar obeerjem akhiin, mokdau mʉg thʉnʉmjã Ẽwandamau õrag paapʉiwia, mʉkhʉʉnjã ĩchab Abrán chaainau aju aai sim. Mamʉ mag Abrán chaain chaar awiajã ichiita Ẽwandam jua machag ãwatab khaba ãwatju. Mag khõch khaba nʉm khai, pãach khaibagta warre Ẽwandamag isegpi jeeubat ajim anʉm. 10Pãrau khaphʉ naabá, nemjĩirjã khaigbamʉn thu werpmaajem. Ich agjota ajugui ajim anʉm ĩchab Ẽwandamau pãar dʉijã. Ya irua pãar chachimʉʉ sim. Ar õor amach khaibag isegwia Ẽwandamag chugpaapi jeeuba nʉm khʉʉnan, ar pa thupʉiwia jʉser aadee orpʉi nʉmjota aju ich Ẽwandamau am dʉi. 11Mua chan pod pãar thãar wajaug paa aubam. Ẽwandamagta pãach khaibag chugpaapi jeeubaawai muan sĩi dodamaupaita pãar por choo chirʉmgui ajim anʉm. Pari mʉ ẽudee ãb urumʉn chadau mʉ khãaijã jua theeg ʉ̃rpai sĩewai, jãguan chad Ẽwandam Akhaarjã pãrag deewi pãar khaibagjã õtdau ee warre orbapʉimjota aju ajim anʉm. Mʉ chan mʉg chirʉm aig sĩi i chogkhaagpaijã serbiibata chirʉmgui ajim anʉm. 12Khĩir khaphʉ abat ajim anʉm: I beem ed i iek ʉkha nʉm khʉʉnan, arroz pom phierrwia wajapha ãkha thʉnʉʉubarmjota aju. Maagwai i iek ʉkhamapha arr khʉʉn, jũrr chi arroz bʉ thʉʉtarrta sĩi ãbamʉg päardʉnaa orbapʉimjo aju. Magbarm chan õtdau thõo khaugba sĩerrʉm eeta ich Ẽwandamaucha barkhʉʉipʉijugui a jaaujeejim anʉm Juanau ich aig bee nʉm khʉʉnag.
Juanau Jesús por chootarr
(Mr. 1:9; Lc. 3:21-22)
13Biek ãb Galilea durrmua Jesús Jordanag majim aajem, Juanau õor por choo sĩerr aar ichjã agjo Juanag ich por choopien. 14Mag mawia, ich por choopienta beejim abaawai, Juanau i por choomaphapaim iekhau irig, —Pʉchdeuta mʉ por chooju aai chirʉmta mag muata pʉ por choobaadejupá ajim anʉm, Juan garmua.
15Magbaawai Jesuu, —Ideu magma ajim anʉm. Ichiita maadeu Ẽwandamau jaau simjo i ipierr thumaa nem wauju aai naabahab ajim anʉm.
Magbaawai Juanau, —Magan chadau ajim aajem.
16Mag, chadcha Juanau i por choopʉijim aajem. Mag ich por choobapäaiwai, durr waaidʉnaa oowai, edaujãata weeudʉbaadem eemua Ẽwandam Akhaar duburjoo khitʉmta beewia i gaai jupchejim aajem. 17Magbarm ee ĩchab ʉ̃gtharmua woun iekjo, “Mʉʉta mʉ Chaai mʉchdeu jãsehne wai chitʉmʉu; i gaaimua mʉ onee chiraajemgui” abarmjã ũrjim anaabá.
Currently Selected:
San Mateo 3: noaA
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.