Jenesis 7
7
1Ena yn-medh an Arloedh dhe Noy, ‘Ty hag oll mayni dha ji, dewgh a-bervedh y'n gorhel, rag my re welas dha vos gwiryon dheragov y'n henedh ma. 2A bub best glan, kemmer genes kopel anedha, yn bagasow a seyth, gorow ha benow, hag a'n bestes nag yw glan, unn kopel anedha, gorow ha benow, 3hag a ydhyn an ayr, yn bagasow a seyth, gorow ha benow dhe witha has yn few war enep oll an nor. 4Rag wosa seyth dydh my a wra glaw dhe goedha war an nor dew-ugens dydh ha dew-ugens nos ha pup-tra yn few re wrug vy gwruthyl, y fynnav y dhefendya dhe-ves dhiworth enep an nor.’ 5Ha Noy a wrug war-lergh pup-tra a wrug an Arloedh erghi dhodho.
An Liv Bras
6Noy o hwegh kans bloedh pan dheuth an liv a dhowr war an nor. 7Ha Noy eth a-bervedh, y vebyon, ha'y wreg, ha gwragedh y vebyon ganso a-bervedh y'n gorhel, drefenn dowr an liv. 8Bestes glan, ha bestes nag yw glan, hag ydhyn ha pup-tra a gram war an dor, 9dew ha dew anedha, gorow ha benow, eth dhe Noy a-ji dhe'n gorhel dell wrussa Duw erghi dhe Noy. 10Ha wosa seyth dydh yth esa dowr an liv war an nor.
11Yn hwegh kansves blydhen bewnans Noy, y'n nessa mis, yn seytegves dydh an mis, an keth jydh na y feu oll fentynyow an downder meur terrys igor, ha fenestri nev a veu igerys. 12Hag yth esa an glaw war an nor dew-ugens dydh ha dew-ugens nos.
13Y'n keth jydh na y teuth Noy ha Shem ha Ham ha Yafeth, mebyon Noy, ha gwreg Noy ha gansa teyr gwreg y vebyon a-ji dhe'n gorhel. 14An re ma ha pub tra vew war-lergh y ginda ha pub best war-lergh aga hinda ha pub pryv a gram war an dor war-lergh y ginda ha pub edhen war-lergh y ginda: pub edhen, ha pup-tra askellek. 15I eth dhe Noy a-bervedh y'n gorhel, dew ha dew a bub kig hag ynno anall bewnans. 16An re ow mos a-ji, gorow ha benow a bub kig, a dheuth kepar dell wrussa Duw y erghi; ha'n Arloedh a'n degeas a-ji.
17Yth esa an liv dew-ugens dydh war an nor, ha'n dowrow a veu moghhes, hag i a dhrehevis an gorhel, hag y sevis a-dhiwar an tir. 18Ha'n dowrow a gressyas hag a veu moghhes yn fras war an nor ha'n gorhel esa ow mos war enep an dowrow 19Ha'n dowrow a gressyas yn feur war an nor hag oll an menydhyow ughel yn-dann oll an nev a veu kudhys. 20An dowrow a gressyas pymthek kevelin war-vann, ha'n menydhyow a veu kudhys. 21Hag y ferwis pub kig ow kwaya war an nor, ydhyn, chatel, best, pub kreatur owth hesya war an dor, ha pub den; 22oll an re esa war dir sygh hag anall bewnans yn aga dewfrik a verwis. 23Ha pub tra vew war enep an dor a veu defendys dhe-ves, mab-den, bestes, pryves hag ydhyn nev, ha defendys vons dhe-ves dhiworth an nor, ha ny veu gesys yn few marnas Noy ha'n re esa ganso y'n gorhel. 24Ha'n dowrow a gressyas war an nor kans dydh ha hanter-kans.
Currently Selected:
Jenesis 7: ABK
Highlight
Share
Copy
Want to have your highlights saved across all your devices? Sign up or sign in
© Kesva an Taves Kernewek 2004, 2024
© Cornish Language Board 2004, 2024