Jenesis 4
4
Kayn hag Abel
1Hag Adam a aswonnis Eva y wreg ha hi a gonsevyas ha dineythi Kayn ha leverel ‘My re gavas gour gans gweres an Arloedh.’ 2Hag arta, hi a dhineythis y vroder, Abel, hag Abel o bugel deves mes Kayn o gonisyas dor. 3Ha wosa dydhyow pals y hwarva Kayn dhe dhri offrynn dhe'n Arloedh a frut an dor. 4Hag Abel ynwedh a dros rann a'n re gynsa-genys a'y flokk, hag a'ga blonek. Ha'n Arloedh a viras orth Abel ha'y offrynn. 5Mes orth Kayn ha'y offrynn ny viras, ha Kayn a veu pur serrys, ha'y fas a goedhas. 6Ha'n Arloedh a leveris dhe Kayn, ‘Prag yth osta serrys, ha prag yth yw koedhys dha fas? 7Mar kwre'ta yn ta, a ny vydh drehevys? Ha mar ny wredh yn ta, yma pegh ow skolkya orth an daras; ev yw hwansek dhe'th kavoes, mes ty – ty a wra y fetha.’
8Yn-medh Kayn dhe Abel y vroder, ‘Deun ni yn-mes dhe'n gwel.’#4:8 Yn-medh Kayn dhe Abel y vroder, ‘Deun ni yn-mes dhe'n gwel.’: Amendys war-lergh an Septuagint, an Syriek ha'n Vulgat. Ha pan esens y'n gwel, Kayn a sevis erbynn Abel y vroder ha'y ladha. 9Hag yn-medh an Arloedh dhe Kayn, ‘Ple'ma Abel dha vroder?’ Hag yn-medh ev, ‘Ny wonn. Ov vy gwithyas ow broder?’ 10Hag ev a leveris, ‘Pandr'a wruss'ta? Yma lev goes dha vroder ow karma warnav dhiworth an dor. 11Ha lemmyn milliges osta dhiworth an dor re igoras y anow dhe dhegemmeres goes dha vroder dhiworth dha dhorn. 12Pan wonedhydh an dor, alemma rag ny vynn ev ri dhis y nerth. Ty a vydh gwandryas diannedh war an nor.’ 13Hag yn-medh Kayn dhe'n Arloedh, ‘Brassa yw ow hessydhyans es dell allav y berthi. 14Awotta, ty re'm chasyas hedhyw dhiworth enep an nor, ha my a vydh kudhys dhiworth dha fas, ha my a vydh gwandryas diannedh war an nor, ha seul a'm kaffo a wra ow ladha.’ 15Hag yn-medh an Arloedh dhodho, ‘Ytho piwpynag a lattho Kayn, y fydh dial tylys warnodho seythgweyth.’ Ha'n Arloedh a worras tokyn war Kayn, na wrella denvyth a'n kaffa y weskel. 16Ha Kayn eth yn-mes dhiworth golok an Arloedh ha triga yn pow Nod, est dhe Eden.
Henedh Kayn ha Seth
17Ha Kayn a aswonnis y wreg ha hi a gonsevyas ha dineythi Enok, hag ev a dhrehevis sita ha henwel an sita war-lergh hanow y vab Enok. 18Dhe Enok y feu genys Irad hag Irad a dhineythis Mehuyael ha Mehuyael a dhineythis Methusael ha Methusael a dhineythis Lamek. 19Lamek a gemmeras diw wreg, hanow an eyl o Ada ha hanow hy ben, Silla. 20Ada a dhineythis Yabal; ev o tas an re trigys yn tyldow ha dhedha chatel. 21Hanow y vroder o Yubal. Ev o tas an re a wra devnydh a'n sowtri ha'n salmus. 22Silla ynwedh a dhineythis Tubal Kayn, govelyer pub sort a doulys a vrons hag a horn#4:22 govelyer pub sort a doulys a vrons hag a horn: Amendys. Ebrow lymmer pub gweythor a vrons hag a horn. ; ha hwoer Tubal Kayn o Naama. 23Hag yn-medh Lamek dh'y wragedh,
‘Ada ha Silla, klewewgh ow lev,
hwi wragedh Lamek, goslowewgh orth ow lavar,
rag my re ladhas gour neb a'm brewis
ha den yowynk neb a'm golias.
24Mar pydh Kayn diellys seythgweyth,
ena Lamek seytek gweyth ha tri-ugens.’
25Hag Adam a aswonnis y wreg arta ha hi a dhineythis mab, hag hi a elwis y hanow Seth, rag yn-medh hi, ‘Duw re wrontyas dhymm has arall yn le Abel, rag Kayn a'n ladhas.’ 26Ha dhe Seth, dhodho ev ynwedh y feu dineythys mab hag ev a elwis y hanow Enosh.
Y'n termyn na y tallathas tus gelwel war hanow an Arloedh.
Currently Selected:
Jenesis 4: ABK
Highlight
Share
Copy
Want to have your highlights saved across all your devices? Sign up or sign in
© Kesva an Taves Kernewek 2004, 2024
© Cornish Language Board 2004, 2024