Popular Bible Verses from Ore i mexü̃ ga Cuáü̃ ümatüxü̃ 16

Share

Rü guxü̃ma i ñaa ore rü pemaxã nüxü̃ chixu nax chaugagu petaãẽgüxü̃ca̱x. Rü ñoma i naanewa rü tá ngúxü̃ pinge. ¡Natürü peporae! Erü choma rü marü nüxü̃ charüyexera i guxü̃ma i ñoma i naane —ñanagürü.

Rü ngẽxguma núma naxũxgu i Tupanaãxẽ ya Üünexü̃ i aixcüma ixĩxü̃, rü nüma tá pexü̃ nangúexẽxẽ i guxü̃ma i ore i aixcüma ixĩxü̃. Erü nüma rü tama nüechama tá nidexa, natürü ngẽma ore i Chaunatüxü̃tawa rü chauxü̃tawa nüxü̃ naxĩnüxü̃ tá nixĩ i nüxü̃ yaxuxü̃. Rü tá pexü̃ nüxü̃ nacua̱xẽxẽ i guxü̃ma i ta̱xacü i yixcüra tá ngupetüxü̃.

Ñu̱xmarüta i pema rü taxuxü̃ca̱xma chauégagu ípecagü. ¡Naxca̱x ípeca rü tá penayaxu i ngẽma naxca̱x ípecaxü̃! Rü ngẽmaãcü tá aixcüma petaãẽgü.

Natürü aixcüma pemaxã nüxü̃ chixu rü pexca̱x narümemae nixĩ nax Chaunatüca̱x chataeguxü̃. Rü ngẽxguma chi tama Chaunatüxü̃tawa chaxũxgu rü taxũchima núma naxũ ya Naãxẽ ya Üünecü ya perü ngü̃xẽẽruxü̃. Natürü ngẽxguma ngéma chaxũxgu rü choma tá núma chanamu. Rü ngẽxguma núma naxũxgu ya Naãxẽ ya Üünecü rü tá ñoma i naanecüã̱x i duü̃xü̃güxü̃ nüxü̃ nacua̱xẽxẽ nax texé pecadugu maxẽxü̃, rü texé tama pecadugu maxẽxü̃, rü texé tá Tupana tüxü̃ poxcuxü̃.

Rü ngẽxgumarüxü̃ tá pexü̃ nangupetü i pemax, erü ñu̱xma rü penaxĩ̱xãchiãẽgü. Natürü wena táxarü chataegu nax pexü̃ íchayadauxü̃ca̱x. Rü ngẽxguma rü tá pexü̃́ nangẽxma i wüxi i taãxẽ i taxucürüwama texé pexna yaxuxü̃. Rü ngẽxguma tá ínanguxgu i ngẽma ngunexü̃ nax yanguxü̃ i ñaa pemaxã nüxü̃ chixuxü̃, rü taxuca̱xtama ta̱xacüca̱x choxna pecagü, erü Chaunatü tá pexna nanaxã i guxü̃ma i chauégagu nüxna naxca̱x pecaxü̃.

Rü aixcüma pemaxã nüxü̃ chixu rü pema rü tá pexauxe, rü tá pengechaü̃gü. Rü yoxni ñoma i naanecüã̱x i duü̃xü̃gü rü tá nataãẽgü. Natürü woo pema tá pengechaü̃gü, rü ngẽma perü ngechaü̃ rü tá taãẽxü̃ nananguxuchi.