Texte de la Bible: Gulei © Alliance Biblique du Tchad, 2004 Enregistrement du Nouveau Testament Gulei ℗ 2008 Hosanna

Gulei - 2004 Edition (NT) Drama

Magtub Mann-ra ke Kige ©Alliance Biblique du Tchad, 2004

Kêm ndɔn’t nè nga, Jésu unde loo tee kêm ɓee’t aw ndi nang tà ba-bò’t. Kosdoo-bulege ngain njin nan rann’t njàng-njàng ade an bè ɓaa, al ndi kêm bato’t. Doobulege malang ndi nang rip-rip ngang ba-bò’t. Jésu ede de tà ngain se gostàge ede nè:
– An-in! njèdubu ko karé bè tee aw le dubu ko. Loo ke njèdubu ko nda à dubu koo ɓaa, njar ko ke nange tée toso ka-rebe’t ade helge otoi on-in. Njar ko ke nange tée toso dè her’t. Ke loon’t nè kuwe ubei tede nang ɔlé pêl-pêl dè de’t. Nè loo ke kàde ɔse ramam ɓaa, ko ke ube nga ndolè ade tutu ngarr a tɔ, tede ngire’n aw nang ngain lé. E ke nange tée toso dann konnge’t ade pujuri dè de. Njar ko ke nange tée toso dè nang ke maje’t. Njar ko karé unde kum’n ase aru karé, njè ke rang unde kum’n ase kɔr-mute-mute, njè ke karé ke rang unde kum’n ase kɔr-mute a tɔ. Nanan ke ka mbi’n tò le koo’n tà ɓaa, gar-gar maje kade nel mbi’n oo’n tà nè nga maje.


Njékuwe-gir-Jésuge agi ngɔr ke rann’t deji nin edi nè:
– Ké bain á unn gostàge tá ede’n dooge tà wa?
Jésu tel ile de dè’t ede nè:
– Sei ɓaa, d’ade non si ar ade i geri nyange ke tooi loo ɓɔyɔn’t kêm Konɓee ke danrán. Nè dé ɓaa, d’ade non de ar tite sei lé ɓai. Doo ke rara ke aw se nyan jinn’t ɓaa, d’a d’ade’n made ngain dè’t le kade taa ra’n pel-pel. Nè nanan ke aw se nyan jinn’t lé ɓaa, nyan ke ndêin bè ke tò jinn’t kuwe d’a d’uwe wont taa jinn’t. Gir’n ke nè á m’ede’n de tà se gostàge tede kum de tò tutu kuwe, nè d’an’n loo lé, mbi de tò tutu kuwe, nè d’oo’n tà lé a, dé ger’n gir tàge nè nga lé a tɔ. Tà ke Esaie, njèribe-dè-tà ke tà Nube’t tam kété mari ɔje’n dè de ede nè:
«Sei ooi tàge nè se mbi si kuwe nè i geri gir lé.
Sei an-in nyange nè se kum si kuwe nè i teri get-get lé.
Oiyo, dè ɓengre kosdooge nè nga nder ɗàk-ɗàk.
Dé njé kunn mbi de dè tàge’t nga,
d’utu kum de nám-nám nè bainléa n’a kan-in loo,
dé tɔse mbi de ká-ká dé tɔ
nè bainléa n’a kooi tà.
D’ade ɓengre de nder ɗàk-ɗàk,
nè bainléa n’a geri tà nè nga kade n’ɔsi wan
n’teli ke ram’t le kade m’aje’n dé.»
Tà nè nga aw loon’t deĵ.
Nè sei nga, ra si nel sei tede an-in nyan nè nga se kum si ɓá a, ooi tà’n se mbi si ɓá a tɔ. Kerɔte kuwe, man m’ede sei ndàt, njéribe-dè-tàge ke tà Nube’t se njé ra nyan se dè najennge ngain ndingei le kan-in nyan ke sei an-in nè an-in lé a, ndingei ra de le kooi tà ke sei ooi nè ooi lé a tɔ.


Sei nga, maje kade uri mbi si maje ooi gir gostà ke ɔje dè njèdubu ko nè nga. Loo ke doo oo tà ke ɔje dè Konɓee le Nube nè ger gir tà nè nga lé ɓaa, njèkêmyêr ree ɔr tà ke dé dubu dè ɓengrenn’t nga wont kɔke. Doo nè nga tò asenan se njar ko ke dubu ngang rebe’t bè. Njar ko ke dubu dè her’t nga tò asenan se doo ke oo tà ɓaa, ke loon’t nè kuwe è taa se ranel. Nè tà nè nga ule ngire’n nang rann’t lé, è doo ke nda dè njann’t njáng lé. Loo ke nyantosowurge gai-gai éké nyankumndoo undei loo teei tede tà nè nga ɓaa, ke loon’t nè kuwe, nyan tuge’n ade oso ɓá ta. Njar ko ke dubu dann konnge’t nga, tò asenan se doo ke oo tà nè, nè kêm’n tò kekek a, nyan sú le nyanbawge ke dè nang nè pujuri dè tà nè nga ade ur kuju. Njar ko ke doo dubu dè nang ke maje’t nga tò asenan se doo ke oo tà a, ger gir’n a tɔ. Doo nè nga tò asenan se ko ke unde maje. E ke karé ann aru karé, è ke karé ke rang unde kum’n kɔr-mute-mute, è ke karé ke rang unde kum’n kɔr-mute tɔ.

Go’t gugu Jésu unn gostà karé ke rang ede de ede nè:
– Konɓee ke danrán nga, è tite doo karé ke unn ko nyan ke maje dubu kêm ndɔr’t le’n. Nè loo ke dooge tooi ɓi sibik ɓaa, njèban le’n ree dubu jer danné ɓaa, ɔte ɗák aw. Loo ke ko ke dubu nga ube a, ndann ngann a ɓaa, jer géa tɔje ra’n ke nata a tɔ. Ngann njéndige le kuwe-ndɔr reei rann’t deji nin edi nè: «Kuwe jé, ké njar ko ke maje á ndɔ ke i dubu kêm ndɔr’t lei lé wa? Ké jer in ra danné wa?» E ede de ede nè: «E njèban á ra nyan non.» Ngann njéndige teli deji kuwe de edi nè: «A ɓaa, ké i ndige le kade j’aw jè rein jer nè nga j’um kɔke wa?» «Ḿ-m̀, inyei adi tò bè tede bainléa a kin-in rein-in se ko nan’t . Inyei de adi d’oje nan’t joo mbak sár ndɔ sa ko’t. Kêm ndɔn’t nè ɓita, man kuwe m’a m’ede njésa koge kede nè: I rein-in jer, i tɔi ɗàp-ɗàp le ró pa ɓita ɔsi nja ko nan’t umi damé le’m ɓai.»


Jésu unn gostà karé ke rang ede dooge ɓai ede nè:
– Konɓee ke danrán nga tò asenan se kum kage ke ri’n nè Mutarde ke dingem karé unn aw dubu kêm ndɔr’t le’n bè. Kage Mutarde nga è nyan ke kum’n kide dum kage nyange ke rang malang. Nè loo ke kum’n ube ɓá ɓaa, tɔge dum mbi-kamge ke rang malang tel ule yir-yir. Balkumnge tɔ pel-pel ade helge ke walé reei rai ndisge le de dè’t.


Jésu unn gostà karé ke rang ede kosdoo-bulege ede nè:
– Konɓee ke danrán nga, tò asenan se pululu ke dinye din tênn guru’n dann nduju ke è din kêm ngó mute mboin. Mbɔr ɓaa nduju ke mboin nè nga bere mbak in ti ngiring-ngiring.


Jésu ede kosdoo-bulege tà nyange nè malang se gostàge. Tà karé ke ede de nal gostà goto. E ra titeke bè le kade tà ke njèribe-dè-tà ke tà Nube’t tam kété mari ede nè:
«M’a m’ede de tà se gostàge,
m’a m’ɔr gir nyange ke tooi loo ɓɔyɔn’t mari loo kunde gir nang’t.»
Tà nè nga aw loon’t deĵ.

Loo ke Jésu inye kosdoo-bulege baa, è tel ree ɓéee. Njékuwe-girnge reei ngɔr ke rann’t edi nè:
– Ɔrgir gostà le jer ke tò kêm ndɔr’t nga ade jè.
E tel ile de dè’t ede nè:
– E ke njè dubu njar ko ke maje nga, è man ke m’ee Ngonn doo nga. Ndɔr nga è dè nang nè. Njar ko ke maje nga, è njé ke ndigi le kade Nube on ɓee dè de’t. Jer nga è njé ke ndigi le kade njèkêm majelé on ɓee dè de’t. Njèban ke njèdubu jer nga, è sú. Nan sa ko è ndɔ ke ngeinn’t. Njé sa koge nga ei dooge ke danrán. Titeke dé rein jer le ró’n poro nga, ndɔ ke ngeinn’t ɓaa d’a ra titeke bè tɔ. Man ke m’ee Ngonn doo nga m’a m’ule dooge le’m ke danrán kade rein-in njétuge madege jig’t kade osoi dann kaiya’t a, se njékaltà tà ndukunnge’t le Nube malang kum de nata kɔke kêm Konɓee’t le’m. Dé nè nga malang á d’a rein de kum de pɔtɔk dann por ke nunge palang. E loo ke d’ade non se wuwi jik-jik tutu a, d’ade ton tà de vbat-vbat tutu a tɔ. Nè njé ra nyan se dè najennge à ndubi ra de tite kàde bè kêm Konɓee’t le Bɔ de. Nanan ke ka mbi’n tò le koo’n tà ɓaa, gar gar è tà le kade ur mbi’n maje oo’n tàge ke m’ndi m’tam nè nga.

Konɓee ke danrán nga è tite nyanbaw ke dé ɓɔyɔ’n kêm ndɔr’t. Nja doo karé tuge’n dè nyanbaw’t nè nga ɓaa, è unn aw ɓɔyɔ ke kété ke le’n. Ra’n nel’n ngain ade aw ige nyanbawge le’n malang tel ndogo’n loo ndɔr nè nga.
Konɓee ke danrán nga tò asenan se njé ra gate ke aw sang mede-ngarge ke maje ngain. Loo ke è inge mede-ngar karé ke gate’n è ngain ɓá ɓaa, è tel aw ige nyan kingennge ke kété malang aw ndogo’n mede-ngar nè nga.

Konɓee ke danrán nga tò asenan se bure karé ke d’ile dann ba-bò’t d’ade ɔse nja kanjege ke se ri de-ri de nan’t ree se de nata. Loo ke kanjege rusi bure nè nga neĵ ɓaa, dé ndɔr de dé ree’n nata dè kong’t. Go’t gugu dé tel dé ndi nang d’ɔr dann kanjege ke maje-maje d’um kêm janga’t a, njé ke majelé ɓaa d’um de kɔke a tɔ. Ndɔ ke ngeinn’t nga ɓaa à è titeke bè tɔ. Dooge ke danrán à reei le kɔri kum njékêm majelége dann njé ra nyan se dè najennge’t. Dooge ke danrán à umi njékêm majelége nè nga pɔtɔk dann por ke nunge palang. E loo ke a noin wuwi tutu ɗêl-ɗêl a, a toin tà de tutu vbat-vbat a tɔ.

Jésu deje njékuwe-girnge ede nè:
– Ké i geri gir nyan nè nga malang maje kuwe wa?
Dé tel d’ile’n dè’t d’ede nè:
– Oiyo
Jésu ede de ede nè:
– Gir’n ke nè á njèkɔrgir gute-ndu ke rara ke ndó nyange ke ɔje Konɓee ke danrán ɓaa tò asenan se kuwe-kei ke ɔr nyanbawge le’n ke kige se ke konn unde nata.


Loo ke Jésu ede de gostàge nè nga gir gang ɗás ɓá ɓaa, in loo’t nè kɔke aw. E tel ree kêm ɓee-bò’t le’n ke Nazareth ndó dooge nyan kêm kei kebe nan’t le de. Tà ige de sêl ade dé tam d’ede nè:
– Ké n’ee nga, n’in se kumkunju ke titeke bè ra wa? Ké nan adé tɔgmong á n’ra’n nyankɔbege nè nga wa? Ké n’ee nga n’ee Ngonn le njè ra kule kage karè lé wa? Ké ri konyé è Marie lé wa? Ké Jacques se Joseph, se Simon se Jude nga ei ngakonyége ke dingem lé wa? Ké kon nannége malang ndii dann jéi’t laa lé wa? A ɓaa, ké nyange nè malang nga n’in’n ra wa?

Jésu tel è jig ke tuge de ile de dann kaiya’t. E ede de nè:
– Njèribe-dè-tà ke tà Nube’t nga, njé ke ɓeekon’t le’n se njénojege le’n kuwe karé bere á d’ann’n ke nyan lé.
E ra nyankɔbege ngain kêm ɓee ke Nazareth lé tede kundekêm le de goto.

Listen to Matthieu 13