Quechua, Huamalies Dos de Mayo - 2003 Edition (NT) Non-Drama

Quechua, Huamalies Dos de Mayo - 2003 Edition (NT)

Fariseukuna contran kayaptinpis Jesús yachasishqanta wiyayta munarmi runakuna waranqanpa shuntakaykur tanqanakurraq kaykäyarqan. Saymi discïpulunkunata yachasir Jesús nirqan: <<Fariseukunapa levadüranta cuidädu chaskipäyankimantaq. Paykunapa levadüranqa ishkay cära kayashqanmi kaykan. Pakaylapa rurayashqanpis rikakanqami. Pipis mana mayay rurayashqanpis musyakanqami. Sakaycho pakaylapa parlayashqaykipis asikyaqchömi wiyakanqa. Punkuta wichqakurkur shapshapyaylapa parlayashqaykitapis wayi jananman wisarkurmi qayakuypa wilakuyanqa.


<<Kuyaynïkuna, qamkunata kaynömi nï: Ama mansariyankisu pipis wanusiyäshunaykipaq jurapäyäshuptiki. Wanurkasiyäshushpayki mastaqa manami imatapis rurayäshunkinasu. Saypa trukanqa Tayta Dioslata mansapakuyay. Paymi isanqa munayyuq kaykan wanurkasiyäshushpayki infiernuman qaykuyäshunaykipaq. Saymi payta mansapakuyänayki.
<<¿Manaku pisqa pishqukunata ishkay centimulacho rantikuyan? Sayno kaptinpis pishqukunata Tayta Dios imaypis rikanmi. Aqsaykikunapis paypaqqa yupashlami kaykan. Qamkunaqa saysika pishqukunapitapis masmi väliyanki. Sayno kaykaptinqa ama mansariyaysu.


<<Noqa kaynömi nï: Pipis runakunapa nawpancho favornï parlaptinqa Runapa Surinpis Tayta Diospa angilninkunapa nawpancho paykunapa favorninmi parlanqa. Pipis runakunapa nawpancho ñëgamaptinqa noqapis Tayta Diospa angilninkunapa nawpancho ñëgashaqmi.
<<Runapa Surinpa contran parlayaptinqa Tayta Dios perdonanqami. Espíritu Santupa contran parlayaptinmi isanqa Tayta Dios imaypis perdonanqasu.
<<Sinagögakunaman, juezkunaman y autoridäkunaman apayäshuptikipis ama lakikuyankisu: <¿Imataraq nishaq? ¿Imanöraq parlashaq?> niyashpayki. Parlayashqayki hörami Espíritu Santu tantiyasiyäshunki imata niyänaykipaqpis>>.

Runakunapa chawpinpitami juk runa Jesústa nimurqan: <<Rabí, wawqïta niykuy herenciata rakipämänanpaq>>.
Saymi Jesús nirqan: <<Amïgu, sayno manakamänaykipaqqa manami jueznikisu ni albasyaykisu kä>>.
Nirkurmi runakunata nirqan: <<Cuidä imapaqpis wachakash kayankiman. Ali kawayqa manami imaykayuqpis kaychöraqsu kaykan>>.
Sayno niskirmi tinkusiypa yachasir nirqan: <<Juk rïcu runashi murushqanpita saysikata cosechanaq. Sayshi yarpachakur ninaq: <Kanan ¿maymantaq saysika mikuyta churashaq? Wayï manami aypannasu pirwanäpaq>. Sayno yarpachakuykashqanchöshi ninaq: <Pirwa wayïta juchurasirmi mas jatunta sharkasishaq. Nirkurmi sayman lapan shuntashqä mikuynïta pirwashaq y imaykätapis churashaq. Aska watapaq sayno pirwakuykurqa jawkanami mikur upur kushishla kawakushaq>. Sayno yarpachakuykaptinshi Tayta Dios ninaq: <¡Mana ali yarpayyuq runa! ¡Kanan sakaymi wanunki! Lapan pirwakushqayki ¿pipaqraq kanqa?> >>
Jesús sayno parlayta ushaskirmi nirqan: <<Saynömi kikilanpaq imaykatapis shuntaq runataqa päsan. Rïcu karpis Tayta Diospaqqa pobripitapis mas lakipaypaqmi kaykan>>.


Nirkurmi discïpulunkunatapis Jesús nirqan: <<Ama yarpachakuyaysu: <¿Imanöraq kawaykushaq? ¿Imataraq mikuykushaq? ¿Imataraq jatikuykushaq?> nir. Manami mikuylapaq ni mödanalapaq yarpachakunansipaqsu kaykansi. Pishqukuna imano kawayashqantapis tantiyakuyay. Paykuna manami murukuyansu ni cosechayansu ni pirwakuyansu. Sayno kayaptinpis Tayta Diosmi mikuyta puestupan. Tayta Diospaqqa pishqukunapitapis masmi väliyanki.
<<Mayjina yarpachakurpis ¿piraq juk kukush maslatapis shaksharkunman? Saylatapis mana kamäpakuykarqa ¿imanirtaq mikuypaq y mödanapaq lakikuyanki?
<<Waytakuna imano winayashqantapis tantiyakuyay. Waytakuna manami arukuyansu ni puskakuyansu. Noqa kaynömi nï: Waytakuna kuyaylapaq kayashqannöqa manami rey Salomónpa mödanankunapis kuyaylapaq karqansu. Janan shonqula yärakuq runakuna, waray warantin rupasish kananpaq kaykaptinpis qewakunata kuyaylapaqta winaykäsirqa ¿manasuraq qamkunatapis nistäyashqaykita Tayta Dios kamaripäyäshunki?
<<Sayno kaykaptinqa ama lakikuyaysu: <¿Imataraq mikushaq? ¿Imataraq upushaq?> niyashpayki. Kay pasachöqa lapan runakunapis saynömi lakikuyan. Qamkunapa Taytaykiqa imata munayashqaykitapis musyaykanmi. Saypa trukanqa Tayta Dios mandaykashqancho kawayänaykipaq yarpachakuyay. Sayno kawayaptikiqa imata munayashqaykitapis kamaripäyäshunkimi.


<<Kuyaynïkuna, walka uyshanöla karpis ama lakikuyaysu. Qamkunatami Taytayki akrayäshushkanki pay mandaykashqancho kawayänaykipaq.
<<Imaykikunatapis rantikuykur say qellaywan muchuqkunata yanapäyay. Sayno rurarqa riquëzaykita gloriamanmi churaykäyanki. Saytaqa manami suwapis apanqasu ni puyupis ushanqasu. Maymanmi riquëzaykita churayanki saylamanmi shonquyki yarparaykanqa.

<<Seqlaykikuna ali wachkash y aksikikuna sindisish listula kaykäyay. Casaray fiestapita patronnin kutiqta shuyaraq ashmaykunano kayay. Say ashmaykunaqa patronnin chaykur takakuptin juklami punkuta kichapäyanqa. Patronnin chashqanyaq shuyakuq ashmaykunaqa seqaypami kushikuyanqa. Rasunpami nï: Kikin patronmi ashmayninkunata mësaman jamaykasir mandilta jatikurkur sirvinqa. Pulan paqas o walpa waqaypis patronnin kutimur shuyaykaqta tariptin ashmayninkuna kushikuyanqami.
<<Tantiyakuyay. Imay höra suwa shamunanpaq kashqanta musyarqa mana punuypami wayinta pipis täpanman. Saynöla qamkunapis kamarikushla kaykäyay. Mana musyayashqayki hörami elaqpita Runapa Surin shamunqa>>.


Sayno niptinmi Pedro tapurqan: <<Taytay, sayno yachasishqayki ¿noqakunalapaqku o lapan runakunapaqwanku kaykan?>>
Niptinmi Jesús nirqan: <<Mas yärakuypaq y tantiyakuq kaq ashmaynintami wayinman patronnin churan wakin ashmaykunatapis höralancho qarananpaq. Patronnin kutimur yäsishqanno lapantapis ruraykaqta tariykuptinqa say ashmay seqaypami kushikunqa. Rasunpami nï: Say ashmaypa makinmanmi lapan imaykantapis patronnin churanqa. Mana yärakuypaq ashmay karmi isanqa <patronnï manaraqmi kutimunqaraqsu> nir ashmay mayinkunata warmitapis olqutapis maqan y upyaq mayinkunawan mikur upyar jitaräkun. Sayno kaykaptinmi mana yarpashqan höra elaqpita patronnin kutimur wakin mana cäsukuqkunatawan say ashmayta mana kuyapaypa castiganqa.
<<Patronnin nishqanta musyaykar mana wiyakuypa lutanta ruraq ashmaytaqa seqaypami castiganqa. Mana musyayninpa lutanta ruraq ashmaytami isanqa aläpa castiganqasu. Saynölami Tayta Diospis mas yärakushqan kaqkunata cuentata mas mananqa.


<<Noqa shamushkä kay pasacho ninata sarisinäpaqmi. ¡Say nina maynapis rupaykanmanna! Isanqa manaraq sayno kaptin fiyupa nakasimarraqmi wanusiyämanqa. Saytami pasaypa lakikur shuyarä.
<<¿Kay pasacho runakuna jawkala kawayänanpaq shamushqätaku yarpaykäyanki? Manami saypaqsu shamushkä, sinöqa kikinpura chikinakuyänanpaqmi. Saymi kananpita juk wayicho pisqaq tarqa ishkay kaqpa contran kimsa kaq kayanqa. Ishkay kaqnami kimsa kaqpa contran kayanqa. Taytanmi surinta chikinqa y surinmi taytanta chikinqa. Mamanmi wawanta chikinqa y wawannami mamanta chikinqa. Suedranmi lumsuyninta chikinqa y lumsuyninnami suedranta chikinqa>>.


Saycho shuntaraykaq saysika runakunatami Jesús nirqan: <<Inti jeqanan kaqpa pukutay yurimuptin: <Tamyanqanami> niyanki y niyashqaykinölami tamyan. Sur kaqläpita wayra wayrämuptinqa <shananqami> niyanki y niyashqaykinölami shanan. ¡Ishkay cära runakuna! Saykunata tantiyaykarqa ¿imanirtaq rurashqäkunata rikaykar Tayta Dios kachamashqanta tantiyayankisu?


<<¿Imanirtaq tantiyayankisu imano kawayänaykipaq kashqanta?
<<Pipis quejakushuptiki autoridäman manaraq char jukla arreglayay. Mana arreglayaptikiqa juezmanmi apasiyäshunki. Jueznami wardiakunawan carcilman wichqasiyäshunki. Noqa kaynömi nï: Saypita manami yarquyankisu lapan jaqan kayashqaykita manaraq pägapakurqa>>.

Listen to Lucas 12