Ngambai Bible

Ngambay - 1994 Nouvelle Version (NT) Drama

Ngambai Bible © Alliance Biblique du Tchad 1989, 2015.

Gée gə́ gogo Jeju ɔr njékwakiláje gə́ raŋg rɔ-siri, wa dee joo-joo ula dee ar dee d’aw nea̰’g kédé mee ɓee-booje lai-lai ləm, gə mee looje lai-lai gə́ yeḛ nja a gə kaw keneŋ lé ləm tɔ. Yeḛ ula dee pana: Dɔ kó gə́ ka̰ kinja lé to yaa̰, nɛ njékḭjaje bula lam ba bèe. Bèe ndá raje tamaji ta mbai gə́ njeko’g lé gə mba karee ula njékḭjaje bula loo-kinja-kó’g ləa. Awje ya, aa ooje, ma m’ula sí keneŋ asəna gə ŋgan badje gə́ ɓugu dee dan jagmjərje’g bèe. Maji kar sí unje ɓɔl-lar əsé ɓɔl-mbá ji sí’g el ləm, əsé markob kula gɔl sí’g el ləm tɔ. Maji kar sí raje dəw kára kara lapia gə kag-rəw el. Kəi gə́ rara gə́ a gə kawje keneŋ ndá tɔrje ndu sí dɔ’g pajena: Maji kar meelɔm nai gə kəi neelé ɓa. Lé dəw gə́ njemeelom sí keneŋ ndá meelɔm lə sí a kɔm dəa’g, ɓó lé bèe el ndá ndutɔr lə sí a tel gə́ rɔ sí’g tɔ. Maji kar sí sije mee kəi’g neelé nja sɔje gə́ aije né gə́ d’a kar sí keneŋ lé tɔ, mbata njekula lé askəm kiŋga nékoga-dɔ-jia ya. Ɓee-boo gə́ rara ɓa gə́ seḭ a teḛje keneŋ ɓa njéɓeeje gə́ keneŋ d’wa sí gə́ rɔ dee’g d’ar sí nésɔ ndá maji kar sí sɔje nésɔ gə́ d’ar sí ləm, ɔrje rɔko̰ rɔ njérɔko̰je gə́ d’isi keneŋ ləm tɔ. Tɔɓəi ula dee pajena: Ɓeeko̰ lə Ala lé si aw gə́ rɔ sí’g nee dəb. Nɛ ɓee-boo gə́ rara gə́ seḭ a teḛje keneŋ ɓa njéɓeeje neelé d’wa sí gə́ rɔ dee’g el ndá ɔd awje gə mba̰-rəwje’g lə dee pajena: Jeḛ n’kunda kor gə́ ɓee lə sí gə́ wa gɔl sí lé kɔd-kɔd j’ɔm dɔ sí-seḭ’g ya. Nɛ lé bèe kara maji kar sí ooje gao, ɓeeko̰ lə Ala lé si aw gə́ nee dəb ŋga. Ma m’ula sí təsərə, rəwta gə́ d’a gə gaŋg dɔ ɓee-boo’g neelé a kal dɔ ta gə́ gaŋg dɔ Sɔdɔm’g lé sula ya.


Nékəmndoo a rai, i ɓee gə́ Korajḭ! Nékəmndoo a rai, i ɓee gə́ Besayida! mbata ɓó lé némɔrije gə́ deḛ ra mbuna sí’g lé deḛ ra togə́bè mee ɓee gə́ Tir gə Sido̰ tɔ ndá d’a si gə kubu-kwa-ndòo ɓa rɔ dee’g kwa ne ndòo rɔ dee dɔ kaiya’g lə dee ləw ba ŋga. Gelee gə́ nee ɓa ta gə́ a kwa dɔ sí ndɔ gaŋg-rəwta’g lé a kur dɔ ka̰ Tir gə Sido̰’g ya. I ɓee gə́ Kapernawum gə́ d’uni gə́ tar saar gə́ dara lé d’a rəm səi gə́ naŋg saar gə́ ɓee lə yoo ya.
Yeḛ gə́ oo ta lə sí ndá yeḛ oo ta ləm-ma ya tɔɓəi yeḛ gə́ ɔs sí-seḭ rəw lé ndá yeḛ ɔsm-ma rəw ya tɔ. Dəw gə́ ɔsm-ma rəw lé ndá yeḛ ɔs dəw gə́ njekulam lé rəw ya tɔ.

Deḛ gə́ rɔ-siri lé tel ree rəa’g gə rɔlel d’ulá pana, Mbaidɔmbaije, aa oo, mbɔl dɔ rii nja ɓa ar ndilje gə́ yèr lé d’oso ne kul no̰ sí’g ya.
Jeju ila dee keneŋ pana: M’aa loo m’oo Njekurai ḭ dara oso naŋg to gə́ ndi gə́ tel bèe. Aa ooje, ma m’ar sí siŋgamoŋ gə mba kar sí tubaje ne dɔ lije ləm, gə dɔ mbai-yḭje ləma, gə dɔ siŋgamoŋ lə njeba̰ bura ləm tɔ. Né kára kara a ra sí karee al dɔ siŋga sí el. Lé bèe kara raje rɔlel gə mba ndilje gə́ yèr gə́ d’oso kul no̰ sí’g lé el, nɛ raje rɔlel mbata ri sí gə́ deḛ ndaŋg mee ɓee gə́ dara lé ɓa.


Mee kàree’g neelé nja rɔ Jeju lelee aree al ne rəa gə goo Ndilmeenda pana: Bɔm, i gə́ to mbai dɔ dara ləm, gə mbai dɔ naŋg nee ləm lé ma m’pidii mbata néje gə́ i ar kəm njékəmkàrje gə kəm njégosonégərje tɔ dɔ’g sum-sum lé i riba dəa ar ŋganje gə́ kari ba lé d’oo. Oiyo Bɔm, ma m’pidii mbata yee nja ɓa i oo gə́ né gə́ kəm ra ya.
Néje lai lé Bɔm ya ɔm dee jim’g yəg ndá dəw kára kara gərm gə́ Ŋgon gə́ bèe lé el nɛ Bɔ-dəwje lé nja kára ba kiao ɓa gərm ya. Dəw kára kara gər Bɔ-dəwje lé gə́ Bɔ-dəwje gə́ bèe lé el to nɛ Ŋgon lé nja kára ba kiao ɓa gəree ləm, dəw gə́ rara gə́ Ŋgon lé ndigi riba səa dəa ɓa a gəree ɓəi ləm tɔ.
Tɔɓəi yeḛ turu rəa gə́ rɔ njékwakiláje’g ula dee ta gə́ wɔji dɔ dee-deḛ nja pana: Deḛ gə́ kəm dee oo né gə́ seḭ ooje ndá rɔ dee lel dee ya. Mbata ma m’ula sí woḭ, né gə́ seḭ ooje gə kəm sí lé njéteggintaje bula ləm, gə mbaije bula ləm tɔ lé deḛ mal malee gə mba koo, nɛ kəm dee kara d’ila dɔ’g bèe el ləm, mbi dee kara oso’g bèe el ləm tɔ.

Yen ŋga dəw kára gə́ to gə́ njeteggin godndu uba naŋg ḭta dəji Jeju ta gə mba kaḭ ne mée pana: Mbai, see m’a ra ɗi gə mba kisi gə kəməgə́ gə no̰ lé wa.
Jeju tel dəjee pana: See ta ɗi ɓa dee ndaŋg mee maktub godndu’g lé wa. See ta ɗi ɓa i tura keneŋ wa.
Yeḛ tel ilá keneŋ pana: Mbaidɔmbaije, Ala ləi lé i a kundá dan kəmi’g ndigee dɔɓəŋgəri’g ləm, gə ŋgaw məəi bura ləm, gə sḭgarɔi bura ləma, gə takə̰ji ləi bura ləm tɔ, tɔɓəi i a kunda mari dan kəmi’g to gə́ i ra ne gə darɔi bèe tɔ.
Jeju tel ilá keneŋ pana: I ilam keneŋ maji ya, ra togə́bè ndá i a kisi ne gə kəmə lé ya.
Nɛ dəw neelé tel dəji Jeju gə mba kɔr ne rɔkul ta neelé dəa’g pana: See na̰ ɓa gə́ njemarm wa.
Jeju un ta ulá pana: Dəw kára ḭ Jerusalem si aw gə́ Jeriko ndá yeḛ uru dan gayim-ɓogoje ar dee d’ubá d’wá kundá mbugu-mbugu tɔr néje rəa’g mbad-mbad d’ubá wɔg d’yá̰ naŋg gə́ yée d’ɔd par-par d’aw. Njekinjanéməs gə́ kára bèe gə́ aw gə rəw neelé gə́ kaw lé loo gə́ yeḛ ree ɔs dəa rɔ dəw’g neelé ndá yeḛ ga̰ gə ŋgəŋgərə rəw unda loo ləa tar gaŋg aw. Dəw gə́ to Lébi kára bèe gə́ aw gə́ rəw neelé loo gə́ yeḛ aa loo ée ndá yeḛ kara ga̰ gə ŋgəŋgərə rəw unda loo ləa tar gaŋg aw tɔ. Nɛ dəw gə́ Samari kára bèe gə́ si aw gə́ mbá’g lé loo gə́ yeḛ ree keneŋ aa loo ée ndá mée tɔsee gə no̰ mbigi-mbigi. Yeḛ rəm pər gə́ rəa’g, podé ubu gə mán-nduú gə́ mḭ na̰’d tər kəm doo’g lé tel tɔ mbərərə, tɔɓəi yeḛ unee undá dɔ mulayḛ̀je’g ləa aw səa Kəi-to-mbàje’g, rəa gə majee bur-bur keneŋ. Bèlè lookàree yeḛ tɔr lar gə́ ndá joo ar njeŋgəm kəi-mbá lé pana: Taa ɓó gə ŋgəm ne maji am səi, tɔɓəi néje lai gə́ i a tuji dəa’g gə́ al dɔ kama gə́ m’ari neelé ndá ndɔ gə́ m’tel ɓa m’a kari lai ɓəi tɔ.
Gə́ məəi’g lé see yeḛ gə́ ra ɓa mbuna deḛ gə́ munda neelé i a kée gə́ kuramar dəw gə́ njekoso ji gayim-ɓogoje’g neelé wa.
Dəw gə́ njetegginta godndu lé tel ilá keneŋ pana: To yeḛ gə́ njekoo kəmtondoo lə dəw neelé ya.
Jeju tel ilá keneŋ pana: Ɔd aw ndá i nja kara aw ra togə́bè tɔ.

Loo gə́ Jeju gə njékwakiláje d’isi d’aw rəbə lé deḛ teḛ mee ɓee gə́ kára bèe ndá dené kára bèe gə́ ria lə Martə wá gə́ rəa’g mee kəi’g ləa, rəa mbá. Ŋgokea̰ gə́ dené kára ria lə Mari si naŋg ŋgira gɔl Mbaidɔmbaije’g si oo ta ləa. Martə lé jɔg rəa unda kunda nésɔ mba ra karee ndá yeḛ ɔd ree dɔ Jeju’g ulá pana: Mbaidɔmbaije, ŋgokɔm gə́ dené gə́ uba kula nee gə́ m’aar m’ra gə mba kar sí neelé ya̰ dɔm’g lé see i oo gə́ né el wa. Ulá aree ḭ ree la səm ɓa.
Mbaidɔmbaije tel ilá keneŋ pana: Martə, Martə, i ar məəi pélé wəs-wəs ləm, jɔg rɔi yaa̰ ləm gə mba néje bula ya. Né kára ba gə́ ndée to lé yee ɓa gə́ né gə́ maji gə́ Mari orè kəmee dɔ’g nja, to né gə́ dəw a kwa rəa’g kɔr pai godo.

Listen to Lugu 10