Tombonuo - WBT (NT+) Drama

Dai olaid kiat nu iri, monido yo si Yisus so bandar om kampung potuturan nu Abar Owarong nu tumimpuun-o Kinoringan mogkuasa soko raja. Opulu om duo mompomaid Niyo ri nga minaid-a so Iyo, om tinu-tinu kowoinoyan baya' sinorungan nu moinat om wokon po boroginis rorooton pinoli'an Niyo, ono yo si Maria Magdalina, baya' sinusuban ni Yisus nu turu moinat sinumarung so iyo ri, si Yuana, sawo ni Kuja, wowaidon so waloi ni Raja Irudis, si Susana, om wokon po kowoinoyan. Kiat so orata' nosiro ri minonabang nosiro so si Yisus om mompomaid Niyo ri.


Osuang lobuw lumoga' dii si Yisus kiat so siombo-ombo nu bandar. Noimpug-o po nosiro, musolig-soligo yo Iyo nu,
“Ido koyuwan noposasad nu sampug. Laid niyo posasad-i, kuwai nopitak so lalan, om opuiningkagan, om inawi' nu bombolog moninduk. Kuwai ya nopitak so tana' kikowotuan. Tinumuu' ya nga osikap linumonot, so' d'ado sungoi nu tana' ri. Kuwai ya nopitak so koruwian. Tinumuu' ya nga notopu'an nu koruwian-i, om linumonot sono.
Nga kuwai ya nopitak so tana' owarong. Tinumuu' sono iri om minubua' sampai noinggatus koosuang nu pinumpung-i,” koo.
Nopupus-o po Iyo musalig-salig, mutongaro po Iyo nu, “Bang kitolingo kou ya, rongowo muyu yo,” koo.


Mongoduato yo mompomaid ni Yisus ong onu orati nu salig-salig iiri.
Sumombuto yo sono Iyo nu, “Tinaakan kou yo nu Kinoringan nu pongoorotian nu gama' Niyo mogkuasa soko raja nu lobuw poimaid so Iyo. Nga, bang so lobuw dai poimaid, musalig-salig Aku, tayon ong osiou pona nosiro nga dai opotongan, om orongou pona nosiro nga dai oorotian,” koo.



Mutongaro yo si Yisus nu, “Itu yo orati nu salig-salig iiri. Sampug-o po iiri nga tinongaran nu Kinoringan. Orati nu sampug nopitak so lalan-i, ono yo lobuw nokorongou nu tinongaran nu Kinoringan, nga lumogaa yo sono Wowaidon nu Moinat monolod nu tinongaran oono so inawo nosiro. Dai yo sono poimaid nosiro nu Kinoringan, om d'ado kowiawan nosiro. Sampug nopitak so tana' kikowotuan-i, soko lobuw insan-o mongorongou nu tinongaran nu Kinoringan, poimaid sono nosiro nu sobana ko osudu', nga dai ya kosondot so inawo nosiro. Pagka soko iri, nosuat-o po nosiro nu ponginaman, dai yo sono nosiro poimaid. Sampug nopitak so koruwian-i, soko lobuw mongkinongou-a nu tinongaran nu Kinoringan, nga tumimpuun nai' nosiro poimaid, gumagau-o nosiro. Mokikokaya om mokisosanang nosiro so wonuo tu. Olupaan-o sono nosiro tinongaran nu Kinoringan, om gogoma'on nosiro dai yo musuat so koinginan Niyo. Sampug nopitak so tana' owarong-i, soko lobuw mongorongou nu tinongaran nu Kinoringan, koondom om mongowaid nu tinongaran oono, om gogoma'on nosiro musuat so koinginan nu Kinoringan soko sampug nokosasad om osuang pinumpung,” koo si Yisus.


Musolig-soligo po si Yisus montuduk so nosiro nu, “D'ado ya lobuw monikit nu politaan om tutuban sono nu montaya, intawa isusuk so poomoturuwan, sondiang ko isiit so dilanggau su' onowawan lobuw masuw so waloi-o.
Ono sono tu, kuwai yo pontudukan Ku dai oorotian nu lobuw, nga, kointolang-a ono nu Kinoringan om oorotian nai'.
Pagka soko ono, kimato muyu yo onu yo po rongowon muyu, so' iri lobuw mongorongou om monorima' nu pontudukan Ku, koorati sono sobana. Nga lobuw dai mongorongou nu pontudukan Ku no, nokuro ong sabat-a oorotian nga lumiong,” koo si Yisus.


Lumogaa yo sono ino om kosusulodan ni Yisus, nga dai nosiro korani dii so iyo so' osuang lobuw. Mutongaro yo ido koyuwan so Iyo nu, “Oo Tuan, nai dilabus ino om kosusulodan Mu no, mokisosambat so Ikau,” koo.
Nga mutongaro yo si Yisus so nosiro nu, “Lobuw mongkinongou nu tinongaran nu Kinoringan om murogama' nu ono, nosiro yo su ino om kosusulodan Ku,” koo.


Ido runat, sinumakoi si Yisus om mompomaid Niyo ri so alud, om mutongaro yo Iyo so nosiro nu, “Muripau toko yo so Liu' Galilia tu,” koo. Tumulako yo nosiro. Nokolintonga' nosiro, nokoturuw si Yisus. Muoso yo sono nu opogon, om raat-i nga ginumumbang om mokitotogob-o alud nosiro ri. Riosi yo Iyo nosiro om tongaro yo nu, “Oo Tuan, matoi toko. Mokilololok-o alud tu!” koo.
Rumioso yo si Yisus om poingkoyodo yo Niyo uos om gumbang-i, om miningkoyod-o sono uos om gumbang-i. Mutongaro yo Iyo so nosiro nu, “Nokuro ka su dai kou poimaid so Aku?” koo.
Noiranan nosiro om linumaa' maid nu mutotangar-tangar nu, “Isai ka lobuw iitu! Insan uos om gumbang-o, musimaid poingkoyodon Niyo,” koo.



Kiat so Galilia, linumombus po nosiro muripau. Nokodudul-o sono nosiro so wonuo nu Gorasa. Tumidong si Yisus, sinumambat sono so Iyo ido kusoi kiat so bandar sinorungan nu moinat. Olaid-o lobuw iiri d'ado pokakas om dai tumoron so waloi, nga polak-polak niyo so kolobongan. Dai po nokosambat lobuw oono so si Yisus, obulit moinat sumarung dii so iyo. Kogosan pona akod longon-i nu rantai om ipatan nu lobuw nga wukat-wukaton-a niyo, om owiton iyo nu moinat so tontong d'ado lobuw. Nosiou-o po nu lobuw iiri si Yisus, sobana ko linumaa' iyo. Linumuap-o yo iyo om sinumurukud-o yo so tiningkuangon ni Yisus. Mutongaro yo sono si Yisus nu, “Oo su ongo moinat, laiw-o so lobuw oono!” koo.
Lumuapo yo sono lobuw sinorungan iiri mutangar so si Yisus nu, “Oo, Yisus, Anak nu Kinoringan Opangkat, kuroon mu ka aku? Mindamo aku so Ikau, kodi aku yo insaadi,” koo.
Duato yo iyo ni Yisus nu, “Isai ka ngaran mu?” koo.
Sumombuto yo lobuw-i nu, “Ngaran ku, si Ligiun,” koo, so' osuang moinat sinumarung dii so iyo.
Obulit moinat-i mutangar so si Yisus nu dai moingin ong polaiwon nosiro om iasuw so uang d'ado nanad.
Orani dii, monginokan su saluw nu ulod so ombaron. Minokilila' sono komoinatan-i so si Yisus nu sumarung so ulod-i. Pinotuudan-a ni Yisus nosiro. Lumobuso yo komoinatan iiri so lobuw-i, om sumorungo yo so ulod-i. Tumuopo yo sono saluw nu ulod iiri so liu' ri om naawi' nolosod.
Nosiou-o po nu lobuw minongipat nu ulod iiri nu soko iri kinourugan nu ulod-i, minogowo sono nosiro lumongkop so bandar om kampung, pokoilo. Miano yo kolobuwan-i monsiou nu iri. Linumoga' nosiro dii si Yisus om nosiou nosiro lobuw baya' sinorungan-i, mogom-ogom umpak so akod ni Yisus. Kipokakas-o iyo om osayu yo pongindan. Kiawi' nosiro linumaa'. Nobotuturan-o sono kolobuwan nokosiou nu kinopoli'an nu lobuw iiri so lobuw suang. Kiawi' lobuw so wonuo nu Gorasa ri minonuu' so si Yisus polaiw, so' lumaa' nosiro. Sumokoyo yo Iyo so alud-i om tumulako yo.
Sobana ko minokiwowaid lobuw baya' sinorungan-i so si Yisus, nga suuo nai' ni Yisus pouli' nu, “Uli' yo om tuturani yo onu winaal so ikau nu Kinoringan,” koo si Yisus.
Lumongkopo yo sono lobuw iiri so bandar om kampung potuturan nu ginama' ni Yisus so iyo ri.



Nokopululi' si Yisus so sondipawon nu liu' ri, osuang lobuw mininsamung so Iyo so' olaid-o nosiro mongindad so Iyo. Ido koyuwan ingoranan so si Yairus, wowaidon so waloi sosombooyangan, linumoga' dii si Yisus. Inuyud niyo sumurukud so tiningkuangon ni Yisus om mindamo nu pologa'on so waloi niyo ri, so' kianak iyo nu woinoi umur opulu om duo toun, osantap morosakit.
Laid ni Yisus manou-panou mian so waloi ni Yairus, osuang lobuw kotomping so Iyo. Kuwai woinoi, opulu yo om duo toun laid morosakit tumuntug, om d'ado ido kopomali'. Sinumoriat-a woinoi iiri so lobuw suang-i lumoga' dii si Yisus so tinoudion, monudul nu pompod nu sabung ni Yisus, om sonduun-duun-a nopoli'an.
Mongoduato yo sono si Yisus nu, “Isai ka minonudul s'Aku?” koo.
Kiawi' lobuw-i dai minongakun. Mutongaro yo si Pitrus nu, “Oo Tuan, osuang lobuw so pitutuk Mu kotomping so Ikau,” koo.
Sumombuto yo si Yisus nu, “Tinudul aku bo nu ido koyuwan. Moilaan ku ya so' noirosaan Ku kuasa linumabus tuui so Aku,” koo. Noilaan-o po nu woinoi-i nu oilaan-a ni Yisus nu iyo yo su minonudul nu pompod nu sabung Niyo ri, lumogaa yo iyo dii si Yisus maid nu mikip-kikip. Tumungubo yo iyo so akod ni Yisus, om paabar so lobuw suang-i ong nokuro su tinudul niyo si Yisus, om nopaabar-a nu iya ya iiri nopoli'an iyo.
Mutongaro yo si Yisus so woinoi iiri nu, “Oo anak, nopoli'an Ku ikau so' poimaid ko so Aku. Panou-o, om otago ya,” koo.
Laid ni Yisus mutangar so woinoi iiri, lumogaa yo ido koyuwan kiat so waloi ni Yairus paabar nu minatoi-o anak niyo ri nu, “Adang-o oguton guru no, so' minatoi-o anak mu ri,” koo.
Norongou-a ni Yisus tuturan nu lobuw iiri, tongaro yo sono Niyo si Yairus nu, “Ikod-o koupus. Poimaid ko yo so Aku. Oluli'an-a anak mu oono,” koo.
Nokologa' yo po si Yisus so waloi ni Yairus, dai linila'an Niyo lobuw wokon masuw so bilik nu lolaing-i sondiang ko si Pitrus, si Yuanis, si Yakubus om ino amo nu lolaing-i. Kiawi' lobuw-i tumangi' oupus. Mutongaro yo si Yisus so nosiro nu, “Ikod kou kitangi'. Okon-a ko minatoi iyo. Moturuw-a ono,” koo.
Muoyako yo lobuw-i so Iyo, so' noilaan nosiro nu minatoi-o lolaing-i.
Kuyuti yo ni Yisus longon nu lolaing iiri om mutongaro yo Iyo nu, “Oo anak, tungag-o!” koo. Sonduun-duun-a noluli'an iyo om tumungago yo. Suuo yo ni Yisus nosiro poponanggu pookan so iyo. Nokotongong ino amo nu lolaing iiri, nga mutongaro yo si Yisus so nosiro nu, “Kodi muyu yo obari so isai pona onu yo po winaal Ku tu,” koo.

Listen to Lukas 8