Komo: Ɔngana á Kɛ̌kɛ (New Testament+)

Ɔngana á Kɛ̌kɛ

Cɔ, bíbí á jaí á mokati kángá cacu, nndɔ ɓáɔɔphana Pasáka, ɓagbɛga á ɓatoɓeigi-phɛ́a na ɓaɗundu-ɛɔphi, ɗáɓáɔɓɔgɔmɛaga mowa á Yéso, ɓâ ndiu oɓá na kɔɓɔɓɔkɔ á ɓakpa.
Ɓî Sɛtáni angí ka měma á Yúda mmbɔ ɓáɔmɔphana Isikaliɔ́ta, mmbé ɗátú ka ɓagoigi nkama na ɓaɓɛ (12), áoga ɔyɔngaga na ɓagbɛga á ɓatoɓeigi-phɛ́a na ɓakɔta á ɓaámbi-endu á Mokonga k'óphangɔ á dungisa á Yéso. Ɓáoɓá na maseye phɛɛ, ɓáɔɔ́kana ka opha akɛ imɔna. Yúda áoɓeekea, mpɔ áokpanga kaɓa mbenɔ ánjá á dungisa Yéso ka ɓɔsɔmɛa.


Ɗáɓi ye esa á ko ímoci á maseye á mokati kángá cacu, ɓî ɗátókeni phúia ɓamponjo á ɓamɔgɔgɔ ka phɛ́a á Pasáka, Yéso áonteka Pɛ́tɛɛ na Yoáni áɔyɔnga gea: «Gǎni ɓɔ́ɔmbɛ kasu eea á Pasáka ɓéɛgɛ.» Ɓáomúsia: «Ɔma sina nde okondi gea ɓɛ́ɔmbɛ eea á Pasáka?» Aǒsikisia te: «Mbenɔ nde ɓongiande ka ntanga-nji, ɓɔmɔnande nkpa moci mmbé ɓodondanande na yɛ n'akumbi mbikiɓo. Ɓômɓea k'éndu nde angiande kau. Ɓongoɗeande gǎkɛ mɛna-endu gea, Mɔkɔta akoúsi ɓe: ‹Ngoisigi áoúsia gea, ɔma sina nde aeagande Pasáka na ɓagoigi nɛkɛ?› Na anophangiande k'ɔ́ma á gǔ k'éndu, n'ande ɔma ángbó phɛɛ, kema bui n'a ye tɔ ɓei. Wa unge ɓɔɓɔngisiagande kasu eea.» Ɓáoga odonda kema bui tɔ ɓíndɔ Yéso ɗěngoɗi, mpɔ ɓáɔɓɔngisiaga eea á Pasáka.


Ka mbenɔ á eaga, Yéso áoika kimoci na ɓateki nɛkɛ. Áǒngoɗea gea: «Netókondi phɛɛ néeɛgɛ Pasáka nde kimoci na ɓenu mosá á tambaga ani. Nenóngoɗi ɓo nga, kéɛgɛku ye Pasáka na ka ɓî kantíti í aúbikanande base ka koɓoamɛ ndea Mokonga.» Mpɔ Yéso áɔbɛɗa kiɓe áɔmɛma, áɔyɔnga: «Bɛɗani ú ɓókatisanɛgɛ sɔsɔɓɛ anu. Nenóngoɗi, kpanga á kɛ̌kɛnde, kénoɛeka ye divai na ka ɓî koɓoamɛ ndea Mokonga abikaeka.» Mpɔ Yéso áɔbɛɗa mokati, áonsega Mokonga, áoɓúnaga ú. Áǒgabea ɓagoigi nɛkɛ n'aɔyɔnga gea: «Nyama ani ungee, nnde negabi ka phɛ́a ka phɔa anu. Geani ɓó ka kanisiani.» Mbusa á eaga, â phɔtɔ ɔbɛɗa kiɓe, áɔyɔnga te: «Kiɓe nde ande ɔngana á kɛ̌kɛ, ka magiani nnde aɗǔkani ka phɔanu.
Cɔ, ɔnani! Njaga á mmbé amɔtɔngi ɓeoeaga kimoci na yɛ gǔ á mɛja ndee. Muna-Nkpa akuwande ɓíndɔ Mokonga ɗáangi. Ande gǎkɛ ngomi phɛɛ ka mmbé antɔngi Muna-Nkpa!» Mpɔ ɓagoigi ɓáokpanga úsianaga sɔsɔɓɛ aɓɔ: «Ani mmbé ageande ɓo?»

Ɓî ɓagoigi nɛkɛ ɓákpangi sana sɔsɔɓɛ aɓɔ ka úba ani mmbé aikande k'ɔ́ma á kɔkɔta, Yéso áǒngoɗea te: «Ɓaamɛ á ɓunde ɓáná Ɓayúda ɓáɔ̌bɛɗanisaga ɓakpa nɛɓɔ akpɛ. Ɓɔ, ɗáɓá gǎkɛ okonda ɓakpa ɓɛ́ɓɔphanɛ: ‹Ɓato á egabɔ›. Cɔ, ka phɔanu nna ɓó. Ambe mmbé ana kɔkɔta sɔsɔɓɛ anu áɓɛ ndiu ɓea miki, mmbé gǎkɛ aoanga áoɓá ɓea mbɛɗanigi. Cɔ, ka ɔlɔ anu ka ɓɔ sina mmbé ana kɔkɔta, mmbé a ka mɛja na mmbé ande mbɛɗanigi? Cɔ, eme ne ka ɔlɔ anu ka bɛɗaneaga anu.
Ɓenu ndiu ɓáunge ɓotóphiphíí ika kimoci n'eme ka tambaga nɛmɔ. Eme gǎkɛ nenóbisíí koɓoamɛ ɓíndɔ abɛ amobisíí. Ka gea, ɓóeɛgɛ na noa ka mɛja nɛmɔ suɓi á koɓoamɛ nɛmɔ, phɔtɔ ɓoikande ka kankaanga á kɔkɔta ka tena nyɔngɔ á ekuna nkama na iɓɛ (12) á Ɓaisilaɛ́li.»


Yéso áɔyɔnga gea: «Simɔ́ni, Simɔ́ni, Sɛtáni anɔmɛmi gea, ánɔpɛcɛ sumbia ɓî ɓámɔ̂ɔpɛca mbó ka ungɔ. Eme gǎkɛ nɛtɔ́mɛmi ka phɔa akɔ ka gea, ɓeekea nɛkɔ kaɓúngɛmbɛ. Na ka sikianaga akɔ, ambe ótetemisɛ měma á ɓana-amakɔ.» Pɛ́tɛɛ áongoɗea te: «Mɔkɔta! Kaɓɛ ka gǎ ka mekakɔ, kaɓɛ ka gǎ kuwa, neɓeeki gǎ kimoci n'oɓɛ.» Mpɔ Yéso áonsikisia te: «Neongoɗi mosá á ɔsa kɔkɔ kesande, omonganande mɔngɔ isaɔ gea kóomoúba.»
Mpɔ, Yéso áǒɓúsia ɓagoigi te: «Netónotekima kángá njombi á imɔna, phɔtɔ kángá ɓonda na ɓiato, ɓotóúki ka kema?» Ɓáonsikisia te: «Áoɓóɓóa!» Áǒngoɗea: «Cɔ, kɛ̌kɛnde, mmbé a gǎkɛ na njombi á imɔna, kaɓɛ ɓonda, ábɛɗɛ, mmbé gǎkɛ nna na píndí, ásombisɛ ngɔ́mbɛ nɛkɛ mpɔ, ásombɛ moci. Nenóngoɗi goto nndɔ nga, ambe átɔtɔkɛanɛ ka phɔani ɓíndɔ ɗáɓáɗundu: ‹Ɗáɓámbisi ka mɔɔmba á ɓato á ɓojeɗe.› Na nnde á ka phɔa ani atɔtɔkɛanande.» Ɓáɔyɔnga: «Mɔkɔta píndí iɓɛ ungee.» Áǒngoɗea te: «Áɓɛ ángaá.»


Mbusa á Yéso júana, áoga ɓíndɔ ɗáɛmbani ně ka mamba á Mijɛitúni, ɓagoigi ɓáomɓea. Aɓí ye ɓî ajú kó, áǒngoɗea: «Mɛmani ka gea ɓókóguɛmbɛ mbenɔ nde ɓáonótombaga.» Mpɔ yɛ áoketa mbamba, áɔsɛkɛɗa ɗanga ábɔa, áogbúka muanku akɛ, áɔmɛma, áɔyɔnga ɓe: «Abɛ, kaɓɛ n'okondi, ómophausa na cǎ ndee kaɓɛmbɛ ka mɔphɛ ani, ambe ndeakɔ ndiu unge átɔtɔkɛanɛ.» [Mpɔ malaéka áotóka na koba, áɔnsɛnɛkɛa áomopha ɓukpɛkpɛ. Áoɓá na ɓɔmbɛ phɛɛ, áosuia mɛma, eungú áɔnɗɔka n'aɓea ntɔngɛ á magia, áogua ka oɗo to! to! to!]
Mbusa ɛ́mɛmi, áoma, áǒɓea ɓagoigi, áǒdonda na ɓáɗe nga nyama aɓɔ ɗádǔki na ɓɛí. Mpɔ áǒngoɗea: «Ɓoɗe ka nyɔngɔ éke? Máni ɓɔ́mɛmɛ ka gea ɓókoguɛmbɛ mbenɔ nde ɓáonótombaga.»


N'a phɔ́tɔ kɔyɔnga, usɛsɛ á ɓakpa áɔsɛnɛka. Nsɔndɔi n'ande ka ɓagoigi nkama na ɓaɓɛ (12) mmbé ɓáɔmɔphana Yúda, áɔsɛkɛɗa bíbí á Yéso, áomumbia. Mpɔ Yéso áongoɗea: «Yúda, ɔmɔtɔngi eme Muna-Nkpa ka umbia ani!»
Ɓî ɓagoigi ɓáɔni nyɔngɔ ndɔ ɗáɔnyɛ́nya ɓáongoɗea Yéso: «Mɔkɔta, ɓémanɛ na píndí nɛsu?» Ka ɓɔ moci áomɓɛta mbɛɗanigi á ngbɛga á ɓatoɓeigi-phɛ́a na tena kɛcuɛ akɛ á njaga á mǔku. Mpɔ Yéso áɔyɔnga gea: «Ásungiɛ wa, ɗeketani!» Áodunga kɛcuɛ á mbɛɗanigi ndɔ áonamisa.
Mpɔ Yéso â goto ǒngoɗea ɓagbɛga á ɓatoɓeigi-phɛ́a, ɓakɔta á ɓaámbi-éndu á Mokonga na ɓagbɛga á ka nji ɓunde ɗáɓábiki ondunga gea: «Ɓokiɗi na píndí na gbutu ka dunga ani ɓea moege-ɓakpa? Cɔ, esa bui ɗétú na ɓenu k'éndu á Mokonga ɗóɓokótuomodunga. Cɔ, mbenɔ nde a ye tɔ nɛnu na ɓukpɛkpɛ á kaiphiɔ.»


Mpɔ ɓáondunga Yéso ɓáonga ně k'éndu ndea ngbɛga á ɓatoɓeigi-phɛ́a. Pɛ́tɛɛ n'aobika nɛkɛ mbusa ɗanga. Ɓî ɗáɓágongi nsa ka měme á ntanga, ɓakpa ɓáotimba ú, Pɛ́tɛɛ áoika sɔsɔɓɛ aɓɔ. Nke moci mbɛɗanigi áɔmɔna Pɛ́tɛɛ n'aiki k'owanga bíbí á nsa, áontúmia n'íso. Mpɔ aɔyɔnga: «Mogaa nde atú phɔtɔ kimoci na Yéso.» Pɛ́tɛɛ â ndiu ongána, áongoɗea nke ndɔ gea: «Kéomúba.» Mbusa ábɔa, nkpa ɓaangbo áɔmɔna áɔyɔnga: «Ɔɓɛ ɔphɔtɔ ka ɓɔ!» Pɛ́tɛɛ áonsikisia: «Ké ka ɓɔ, ca!»
Ɓî anyɛ́nyi ye ɓea mbenɔ moci mbusa á wa, nkpa ɓaangbo â goto osoea gea: «Ande ɗoni gea mmbosi atú phɔtɔ kimoci na yɛ, ande nto á na Galiláya.» Pɛ́tɛɛ áonsikisia: «Moko, keoúba nyɔngɔ ndɔ.» N'a phɔ́tɔ ɔyɔnga, mɔngɔ ímoci kɔkɔ áɔɔsa. Mpɔ Mɔkɔta áǒpháia áontúmia Pɛ́tɛɛ n'íso, wa, Pɛ́tɛɛ áokanisia nyɔngɔ nde Mɔkɔta ɗángoɗi gea: «Mosá á kɔkɔ ɔsa, kesande omonganande mɔngɔ isaɔ.» Pɛ́tɛɛ áojuana na nsɛngɛ áotoɓokea ngamɔ ko!


Ɓakpa ɓunde ɗáɓándungi Yéso ɗáɓáontɛbɛaga na ɓɛta akɛ. Ɓáonɗaka keongi na úsia akɛ Mɔtu-nyɔngɔ ndea Mokonga ca: «Ani mmbé akɔɓɛti?» Na ɓáɔyɔnga ka phɔakɛ nyɔngɔ nɛngbo á bóma akɛ phɛɛ.


Ɓî esa asé ɓagbɛga á ka nji, ɓagbɛga á ɓatoɓeigi-phɛ́a na ɓaɗundu-ɛɔphi, ɓáombika na Yéso mosá á ntua nɛɓɔ á tena nyɔngɔ. Ɓáomúsia gea te: «Aoɓá n'onde Masíya, ósongoɗea.» Áǒsikisia te: «Nanga nɛ́nɔtɔmia, ɓókómoɓeekeɛku. Nanga nénoúsia gǎkɛ, ɓókómosikisiɛku tanda. Cɔ, kpanga kɛ̌kɛnde Muna-Nkpa aikande ka njaga á mǔku ndea Mokonga mɛna-ɓukpɛkpɛ.» Ɓɔbu ɓâ gǎkɛ ɔyɔnga: «O gǎkɛ tɔ Muna-Mokonga?» Áǒsikisia te: «Ɓɛnu ɓáunge ɓɔyɔngi gea nende yɛ.» Mpɔ ɓáɔyɔnga gea: «Ɓî aɓó, ɓékéɓɛku ye na siki á nɗigimisi nga, ɓɛɔ́ki sisasu nyɔngɔ nde atóki k'aphenɔkɔ akɛ.»

Listen to Lóka 22