Quechua, Northern Conchucos Ancash - 2006 Edition (NT) Drama

Quechua, Northern Conchucos Ancash - 2006 Edition (NT)

Pascua fiestapaq soqta junaqllana faltaykaptinmi Betania markaman Jesús aywarqan. Tsaychömi wañunqanpita kawamuq Lázaro täkurqan. Jesús chaykuptinmi kushikurnin meriendata kusinayarqan. Wakin runakunawan mësaman Jesús jamaykuptinmi Lázarupis mikunanpaq jamarqan. Paykunatam Marta qararqan.
Tsaychö mikuykäyaptinmi nardupita rurashqa alläpa chaniyuq perfümita mediu litrutanö María apamurqan. Tsay perfümitam Jesúspa chakinman wiñarkur aqtsanwan tsakitsirqan. Tsay perfümim waji junta mushkurqan. Tsaymi Jesústa rantikunanpaq kaq discïpulun Judas Iscariote nirqan: <<¿Imapaqtan tsay perfümita perditsin? Tsaypa rantinqa juk wata arupukur gänanqantsikchömi rantikushwan karqan. Tsay qellaywannam waktsakunata yanapashwan karqan>>.
Tsaynö nirqan manam waktsakunata yanapayta munartsu, sinöqa suwanan raykum. Qoriyanqan qellayta katsirmi wallka wallkalla suwakuq.
Jesúsnam nirqan: <<Tsay perfümitam churarätsishqa pampayämänan junaqpaq. Tsaynö kaykaptinqa ama imatapis niytsu. Waktsakunaqa qamkunawanmi imaypis kaykäyanqa. Peru noqam sïqa qamkunawan kashaqnatsu>>.

Betania markachö Jesús kaykanqanta musyaskirmi atskaq runakuna aywayarqan. Manam Jesústa rikaqllatsu aywayarqan, sinöqa kawamuq Lázaruta rikaqnömi. Tsaymi mandakuq sacerdötikuna Lázarutapis wañutsiyta munayarqan. Mandakuq sacerdötikunata cäsuyanqanpa rantinmi Lázaruta kawatsimunqanpita atskaq runakuna Jesúsmanna creyiyarqan.


Waränin junaqmi fiestaman aywaq atskaq runakuna musyayarqan Jerusalénman Jesús yaykuykanqanta. Tsaymi palmakunapa rämankunata aparkur Jesústa chaskiyänanpaq aywayarqan. Jesúswan tinkuskirnam qayaykachar niyarqan: <<¡Hosana! ¡Dios Yayapa shutinchö shamuq runa alabashqa kaykullätsun! ¡Qammi Israel runakunapa mandakuqnin rey kanki!>>
Jerusalénmanmi Jesús yaykurqan mallwa ashnun montashqa. Tsaynö yaykunanpaqmi Dios Yayapa palabran nin:
<<Sión runakuna, ama mantsakäyaytsu.
Rikäyay mandaqniki rey mallwa ashnun montashqa shamuykaqta>>.
Tsay höraqa Jerusalénman imanir ashnun montashqa yaykunqanta discïpulunkuna manam tantiyayarqantsu. Peru wañunqanpita kawaskamuptinraqmi Jesús ruranqankuna Dios Yayapa palabranchö ninqanta tantiyayarqan.
Lázaruta Jesús kawatsimunqanta rikaq runakuna maytsaychö willakuyaptinmi Jesústa chaskiq maytsikaq aywayarqan. Tsayta rikarmi fariseukuna niyarqan: <<Kananqa ¿imatatan rurashun? ¡Llapan runakunam payta qatiräyan!>>

Pascuachö Dios Yayata adorayänanpaqmi mana Israel kaqkunapis Jerusalénchö kaykäyarqan. Paykunapita wakinmi Felipiman aywaykur rugakuyarqan: <<Taytay, Jesústa reqiykatsiyällämay>>.
Felipiqa Galileachö Betsaida markapitam karqan.
Felipinam Andrésta willarqan. Tsaypitanam ishkan aywar Jesústa willayarqan: <<Taytay, runakunam reqishuynikita munaykäyan>>. Jesúsnam nirqan: <<Runapa Tsurin glorificashqa kananpaq höra chämushqanam. Rasun kaqtam niyaq: Trïguta mururnin mana pampashqaqa manam jeqamuntsu. Peru pampashqam sïqa jeqamur alli wayun. Kawayninta salvayta munaqkunam kawayninta oqrayanqa. Kawayninta kay patsachö oqraqkunam sïqa kawayninta salvar mana ushakaq kawayta tariyanqa. Pipis servimayta munaq kaqqa qatirämätsun. Qatirämarqa noqa kaykanqächömi kanqa. Servimaq kaqtaqa Taytäpis kuyanqam.

<<Alläpa llakikuymi tsariman. Tsaynö llakikurpis manam Taytäta mañakümantsu wañuypita salvamänanpaq. Wañunäpaqmi kay patsaman shamushkä>>.
Tsaynö nirmi Dios Yayata mañakurqan: <<Taytay, poderyuq kanqaykita musyayänanpaq qam munanqaykinö kaykullätsun>>.
Tsaymi ciëlupita Dios Yaya nimurqan: <<Poderyuq kanqäta musyatsinqänömi yapay musyatsikushaq>>.
Tsayta wiyarmi tsaychö kaykaq runakuna niyarqan: <<¡Maqakuymi!>>
Wakin kaqnam niyarqan: <<¡Angelmi parlamushqa!>>
Jesúsnam nirqan: <<Parlamuqta wiyayanqaykiqa manam noqapaqtsu, sinöqa Dios Yaya kachamanqanta tantiyayänaykipaqmi. Runakunata juzgananpaq höram chaykämunna. Tsaynöllam kay patsapa mandakuqnin qarqushqa kananpaq höran chaykämunna. Kay patsapita pallariyämaptinmi maytsay nación runakunata noqaman creyikayämunanpaq qorishaq>>.
Tsaynömi Jesús tantiyatsirqan imanöpa wañunanpaq kanqanta.
Runakunanam niyarqan: <<Dios Yayapa palabranchömi nin salvamaqnintsik Cristo imayyaqpis kawananpaq kanqanta. Tsaynö kaykaptinqa ¿imanirtan ninki Runapa Tsurin wañunanpaq kanqanta? Tsaypunqa ¿pitan tsay Runapa Tsurin?>>
Jesúsnam nirqan: <<Wallka junaqllanam qamkunawan aktsi kanqa. Manaraq tutapäpukur aktsi kanqanyaq puriyay. Tutapaypa purirqa maypa aywayanqaykitapis manam tantiyayankitsu. Tsaynö kaykaptinqa qamkunawan aktsi kanqanyaq aktsiman creyiyay. Tsaynöpam qamkunapis aktsinö kayanki>>.
Tsaynö niskir pakayllapa aywakuptinmi rikäyarqannatsu.

Atska milagrukuna ruranqanta rikaykarpis Jesúsman manam creyiyarqantsu. Tsaynö mana creyiyänanpaq kanqantam profëta Isaías nirqan:
<<Dios Yaya, willakuyanqäta ¿piraq creyishqa?
Salvakuq kanqaykita musyatsikuptikipis ¿piraq tantiyashqa?>>
Tsay ninqannöllam Jesúsmanpis creyiyarqantsu. Mastam Dios Yaya ninqanta Isaías nirqan:
<<Tsay runakunapa ñawinkunatam qaprayätsishqa.
Paykunapa shonqunkunatam chukruyätsishqa.
Tsaynöpam mana rikar y mana tantiyar arrepentikuyanqatsu.
Tsaynö kayaptinmi noqapis kutikätsishaqtsu>>.
Isaíasmi Jesucristupaq tsaynö qellqarqan gloriachö poderyuq kaykaqta rikar.
Jesúsman wakin runakuna mana creyiyaptinpis atskaqmi payman creyikuyarqan. Wakin kaq Israel autoridäkunapis paymanmi creyiyarqan. Peru tsaynö creyirpis sinagögapita fariseukuna qarquyänanta mantsakurmi willakuyarqantsu. Dios Yayapita alli rikashqa kayanqanpa rantinmi paykunaqa runakunallapita alli rikashqa kayta munayarqan.

Tsaypitanam jinchi Jesús nirqan: <<Noqaman creyikuq kaqqa kachamaqnïmanpis creyiyanmi. Tsaynöllam noqata reqimaq kaqqa kachamaqnïtapis reqiyan. Noqam aktsi kä. Kay patsamanmi shamushkä noqaman creyikuqkuna manana tutapaychönö kawayänanpaq.
<<Manam runakunata condenaqtsu kay patsaman shamushkä, sinöqa salvanäpaqmi. Tsaymi ninqäkunata musyaykar mana cäsukuqkunata noqatsu condenashaq, sinöqa willakuynïkunam día del juiciuchö condenanqa. Noqaqa manam kikïpa yarpaylläpitatsu willakü, sinöqa kachamaqnï Taytä nimanqanllatam. Pay nimanqankunata cäsuqkunaqa mana ushakaq kawaytam tariyanqa. Tsaymi Taytä nimanqannölla llapantapis willakuykä>>.

Listen to Juan 12