Nugunu - 2017 CABTAL (NT) Non-Drama

Nugunu - 2017 CABTAL (NT) Drama

«Bébeŋéemú nɔnɔ go go hóógónyóo masɔ́mɔ mɛ́nyɔ́ má gioliminyo naá gɛtátáná, goŋaá mɔtɔ uŋkimée a nyó núune. No amɔ́ no má hóogonyo nɔ́ɔnɔ, no do ná bóso go dáŋaba bɛsoɛná bɛ́ɛbɛ naá Baaba bɛnyɔ́ mɔ́ɔnyɔ naá mmoɛná. Gɔ́ɔgɔ o fáananamɔ́ basógasoga muinyí, o do ŋaáa goŋaá batɔ bá go ága oŋgíso, nɔ́ɔ gɔ́ɔ bekuilí bá ŋananamɔ́ naá nnyaŋá sá mbósógólí na naá maayá má bɛbala: bá ŋanana nɔ́ɔnɔ go goŋaá batɔ bá bó búlugenye. Ŋgaá nyó oyáná naá mammana caá: bá báa na go dáŋaba bɛsoɛná bábɔ́. Kanɛ́ maamɔ́ɔ, gɔ́ɔgɔ o fáananamɔ́ basógasoga muinyí, ombɔ́gɔ odádɛ́ yáhɔ yó do háánánáa go íyime bɔ́ɔbɔ ombɔ́gɔ onɔ́mɛ yó ŋananamɔ́, go goŋaá pááná yahɔ yɛ́ɛyɔ ɛ lɔbɛnɔ naá nnindíi. Tɛ́ɔ ɛ ɛ́nana buimée bɔ́ɔbɔ o ŋananamɔ́ naá nnindíi, a ŋga go fáá bɛsoɛná.

«Gɔ́ɔgɔ no bósógolonyomú, no do bɛ́ɛ́mbá aŋa bekuilí: bá maamana go bósógolonyo tɛ́nɛ́ɛ naá nnyaŋá sá mbósógólí na naá maayá má bɛbala, goŋaá batɔ biimée bá bó ɛ́na. Ŋgaá nyó oyáná mammana caá, bá báá na go dáŋaba bɛsoɛná bábɔ́. Kanɛ́ maamɔ́ɔ, gɔ́ɔgɔ o lɛ́galɛgamɔ́ go bósógolonyo, íŋéne naá mamɔ́ nɛgɛlɛ́, o buige gɛasɛ́, o bósógolonyo Tɛ́ɔ, a lɛ́ hɔ́ɔ naá hoóma hɔ́ɔhɔ há lɔ́mɔ́ nnindíi. Kɔ́ɔ Tɛ́ɔ ɛ ɛ́nana buimée bɔ́ɔbɔ o ŋananamɔ́ naá nnindíi, a ŋga go fáá bɛsoɛná. Gɔ́ɔgɔ no bósógolonyomú, no do degényée gɛcɛcá gá dogálɔ, aŋa biindiíyímé Asaŋa bɛ́ ŋananamɔ́. Bɛ́ fege bɛ́ amɔ́ hɔ́ɔlɔ́ gɔ́ɔ Asaŋa a bó bódólonyomú aŋa bɛ́ gálagala makɔ́nɔ́. No do ŋanánáa aŋa bɔ́ɔ, goakɛ́ Isée bɛnyɔ́, a ná lɛ́ go íyimene bɔ́ɔbɔ no lɔ́mɔ́ mbií ya bɔ́ otóotoɛ yá ŋaá no mo úhune.


«Náana gɔ́ɔ no háananamɔ́ go bósógolonyo:
Baaba bɛcɔ́ mɔ́ɔnyɔ naá mmoɛná,
lincíe batɔ biimée ánɛ́ɛ o lɔ́mɔ́,
úlé na Bufuŋe báhɔ,
ŋgáa ndɛ́ga yahɔ ɛ báŋa
naá cí aŋa naá mmoɛná.
Có fáamɔ́ manyáanya mɛ́cɔ́ má ínoni.
Có hééhínyéemú mbudí yɛcɔ́,
aŋa dɛ héehinenyemú báaba bá có budemú.
O do có dɛ́ɛ́ná dɛ dɛ obɛ́ná naá ɛsɔgɛdɔ,
có sódíomú go Ombɛ́.
«Ɛɛ́ɛŋ, no amɔ́ no héehinenye batɔ bɛoba bábɔ́, Isée bɛnyɔ́ mɔ́ɔnyɔ naá mmoɛná a ŋga nyó hééhínényée tɔ́nɔ. Kanɛ́, aáŋa no do hééhínényée batɔ bɛoba bábɔ́, Isée bɛnyɔ́ a dɛ ŋgá nyó héehinenye tɔ́nɔ bɛoba bɛ́nyɔ́.

«Gɔ́ɔgɔ no bécelenemú manyáanya, no do ɛ́dá go gɛ́ga gosóga gosóga aŋa bekuilí bá ŋananamɔ́: bá núgenye mosío mábɔ́ goŋaá mɔtɔ uŋkimée ɛ ɛ́na goŋaá bá bécelene manyáanya. Ŋgaá nyó oyáná mammana caá: bá báá na go dáŋaba bɛsoɛná bábɔ́. Kanɛ́ maamɔ́ɔ, gɔ́ɔgɔ o bécelenemú manyáanya, básogáamɔ́ busío o gunde o béfúe megúdé, go goŋaá batɔ bá dɛ ɛ́ná bá amɔ́ o bécelene manyáanya. Goana Tɛ́ɔ mokáa mɔ́ɔnyɔ a lɔ́mɔ́ hɔ́ɔ hɔ́ɔlɔ́ naá nnindíi, mɔ́ɔ i íyimenemú. Tɛ́ɔ mɔ́ɔnyɔ ɛ ɛ́nanamɔ́ bɔ́ɔbɔ o ŋananamɔ́ naá nnindíi, mɔ́ɔ a ná go déŋebiemú bɛsoɛná.


«No do bábándánáa bonɔ́mɛ naá cí bɔ́ɔbɔ mesígídé na ŋgéŋeŋée mó ná díeŋiemú, ɛ́na lí biíbi bá áda ncíbo bí íbene. Kanɛ́ bándáa nɔnɔ bonɔ́mɛ bɛ́nyɔ́ naá mmoɛná, anáa mesígídé akɛ́ ŋgéŋeŋée mó lɔ́mɔ́ mó do bɛ́ɛ́mbá ba go díeŋie, akɛ́ biíbi bá dɛ báá ba go áda ncíbo, bí íbene. Mammana, anáa bonɔ́mɛ báhɔ bó lɔ́mɔ́, hɔ́ɔ tɔ́nɔ odɛ́má yáhɔ yó lɔ́mɔ́.


«Lámba ya nnyɔ́dɔ ɛ lɔ́mɔ́ niíso. Aáŋa niíso náhɔ nɛ́ lɛ́ nɛgɔ́sɔ, nnyɔ́dɔ yahɔ iŋkimée ɛ lɛ́ naá gise. Kanɛ́ aáŋa niíso náhɔ nɛ́ nóma, nnyɔ́dɔ yahɔ iŋkimée ɛ lɛ́ naá mbíno. Ábɔ aáŋa gise gɛ́ɛgɛ gɛ́ lɔ́mɔ́ naá maamɔ́ɔ gɛ́ lɛ́ mbíno, gɛbɛ́ gá mbíno moatɛ́, ɛɛ́ɛŋ!


«Mɔtɔ a dɛ báá ba go yɔgɔnɛnɔ bagɔ́nɔ́ɔ báandɛ́: a gaá bɛlábɛ́láa ummue, a maamana mɔ́ɔnyɔ untió. Ɛ́na lí, a gaá báladá na ummue, a fánɛna mɔ́ɔnyɔ untió. No do báá ba go yɔgɔnɛnɔ na Asaŋa na Muinyí.


«Nɔ́ɔnɔ gɔ́ɔ nnyó oyanamɔ́ caá: no do yóbímídónóo naá gɛɔyɔ gɛ́nyɔ́ go boóma bá go nyáa, [ɛ́na akɛ́ go boóma bá go bónyo], ɛ́na lí go bɛla bɛ́ɛbɛ no gaá ná báágánáa. Ábɔ, gɛɔyɔ gɛ́ dɛ dómbánáa manyáanya o? Nnyɔ́dɔ ɛ dɛ dómbánáa bɛla o? Ɛ́ná nɔnɔ munoní: mó do gónáa, mó do sáŋáa, mó do bándáa naá bɛɔ́lɔ; kanɛ́ Isée bɛnyɔ́ mɔ́ɔnyɔ naá mmoɛná a mó dúge! No lɛ́ bɛantáanta bá moóma naá oŋgíso yá Asaŋa no mó dómbana! Ánɛ́ɛ kanɛ́ naá bɛɛnyɔ́ɔ a lɔ́mɔ́ ba go bégídene medúgú akɛ́ sɔŋɛ naá gɛɔyɔ gɛ́hɛ́ goŋaá a yóbimidono o? No yóbimidonomú kanɛ́ go bɛla goakɛ́ o? Núúnée nɔnɔ mbínyí na bióli bá sɛ́ naá bodɛ́agadɛ́ aŋa sɛ́ gomamɔ́: sɛ́ dɛ yɔgɔ́nɔ́ɔ, sɛ́ dɛ nogáa bɛla. Kanɛ́ ŋgaá nyó oyáná caá, Salomɔ́ŋɔ mɔ́ɔ moatɛ́ moatɛ, naá nigúmi nɛ́hɛ́ niimée, a lɛ́ kanɛ go báága gɛla gá go éme bonɔ́gɔ́ aŋa mbínyí mmue naá sɛ́. Aáŋa Asaŋa a lɛŋa nɔ́ɔnɔ mbínyí sá bodɛ́agadɛ́ sɛ́ɛsɛ sɛ́ lɔ́mɔ́ ínoni sɛ́ hɔ́ɔ, nembeli bá sɛ́ nɔɔ naá íyuke. Nɛɛ́nɛ a lɔ́mɔ́ a dɛ bɛ́ɛ́mbá bá go ŋa gɛ́nyɔ́ a dómba mbínyí, batɔ bá gioliminyo fágɔfágɔ báaba! No do ɛ́dá kanɛ́ go yóbimidono no gálagala no amɔ́: “Dɛ gaá ná nyáá ɛkádɛ o? Dɛ gaá ná bónyó ɛkádɛ o? Ɛ́na lí, dɛ gaá ná bálɛŋáa na ɛkádɛ o?” Muimée mɔ́ɔmɔ, bindiolímínyóo Asaŋa bɛ́ mó fúmbe kanɛ tɔmbɛ́nɔ́ɔ. Isée bɛnyɔ́ mɔ́ɔnyɔ naá mmoɛná i íyimene buimée bɔ́ɔbɔ no baŋamɔ́. Fúmbée nɔnɔ manɛ́ Bufuŋe bá mmoɛná na botɛ́nɛ́ɛ bá Asaŋa, manɛ́ a ná nyó ɛndɛgɛnɛnamɔ́ muimée mɔ́ɔmɔ. No do yóbímídónóo go nembeli, nembeli a gaá yóbímídónóo go mɔ́ moatɛ́ moatɛ. Buisí buimée bó háanana na gɛdɔmbɔ gá bɔ́!

Listen to Motíosi 6