The Susu Bible

Susu - PBT Version (NT)

يِ قٍيٍ نُ دَنفِقٍ تّمُي نَشّ، مِشِ وُلُ وُلُ نَن نُ بَرَ عٍ مَلَن، هَن عٍ نُ عٍ بٌرٍ مَبٌرٌنقٍ. عِسَ وْيّن قْلْ عَ قْشِرَبِرّيٍ نَن سِنفٍ بّ، عَ نَشّ، «وٌ وٌ يّتّ رَتَنفَ قَرِ سّنِيٍ شَ لّبِنِ مَ، نَشَن قِندِشِ قِلَنكَقُيحَ رَ. قٍقٍ نْشُنشِ مُ نَ نَشَن مُ قَمَ مَكّنّندٍ، فُندٌ يٌ مُ نَ نَشَن مُ قَمَ كٌلٌندٍ. نَ كُي، وٌ نَشَن يٌ قَلَمَ كْي رَ، عَ مّمَ نّ يَنيِ رَ. وٌ قٍقٍ مَكْيِكْيِمَ بَنشِ كُي، دُنِحَ بِرِن قَمَ رَكٌلٌندٍ عَ رَ كّنّ مَ.»
«ﭑ بٌورٍيٍ، ﭑ شَ عَ قَلَ وٌ بّ، وٌ نَشَ فَاشُ مِشِيٍ يَ رَ نَشٍيٍ نْمَ مِشِ قَتٍ بّندّ قَشَدٍ، كْنْ عٍ مُ نْمَ قٍقٍ رَ نَ شَنبِ رَ. ﭑ شَ عَ مَسٍن وٌ بّ، عَ لَن وٌ شَ فَاشُ نَشَن يَ رَ. وٌ شَ فَاشُ عَلَ نَن يَ رَ، بَرِ مَ عَ تَن نَن مِشِ قَشَمَ، عَ تَن نَن مَن نْمَ مِشِ وٌلِدٍ يَهَننَمَ. عِيٌ، ﭑ شَ عَ قَلَ وٌ بّ، عَ لَنمَ وٌ شَ فَاشُ عَ تَن نَن يَ رَ.»
«تُرُننَ سُولِ شَ مُ سَرَ مَ بَتَنكَ قِرِن نَ؟ كْنْ عَلَ تَن مُ نّيمُمَ عٍ سٍسٍ مَ. هَلِ شُنسّشّ نَشَن نَ وٌ شُنيِ مَ، عَلَ عَ بِرِن كْنتِ كٌلٌن. وٌ نَشَ فَاشُ، بَرِ مَ وٌ مُنَقَنيِ فبٌ دَنفِ تُرُننَ شْنِ فَلِ رَ.»
«ﭑ شَ عَ قَلَ وٌ بّ، مِشِ يٌ نَشَن ﭑ كٌلٌنمَ عَ مَرِفِ رَ عَدَ مَدِيٍ يَ مَ، ﭑ تَن عَدَ مَ شَ دِ قَن نَ كَنيِ كٌلٌنمَ نّ عَلَ شَ مَلٍكّيٍ يَ عِ. كْنْ نَشَن نَ تٌندِ ﭑ كٌلٌندٍ عَدَ مَدِيٍ يَ عِ، ﭑ قَن تٌندِ مَ نّ نَ كَنيِ كٌلٌندٍ عَلَ شَ مَلٍكّيٍ يَ عِ.»
«مِشِ نَشَن بِرِن وْيّن كٌبِ قَلَمَ عَدَ مَ شَ دِ شَ قٍ رَ، نَ يُنُبِ نْمَ نّ شَقَرِدٍ نَ كَنيِ بّ، كْنْ مِشِ نَشَن عَلَ شَشِلِ سّنِيّنشِ رَ سْتْمَ، نَ يُنُبِ تَن مُ نْمَ شَقَرِدٍ نَ كَنيِ بّ.»
«عٍ نَ وٌ شَنِن سَلِدٍ كِيتِسَيٍ يِرٍ، شَ نَ مُ عَ رَ مَنفَسَنيِ شْن، وٌ نَشَ كْنتْقِلِ وٌ عٍ يَابِمَ كِ نَشّ، شَ نَ مُ عَ رَ وٌ نَشَن مَسٍنمَ عٍ بّ، بَرِ مَ عَلَ شَشِلِ سّنِيّنشِ وٌ رَكٌلٌنمَ نّ نَ وَشَتِ يَتِ مَ، عَ لَن وٌ شَ نَشَن قَلَ.»

مِشِ ندٍ نَشَ عَ قَلَ عِسَ بّ حَمَ تَفِ، «كَرَ مْشْ، عَ قَلَ ﭑ تَارَ بّ عَ شَ مُشُ كّ عِتَشُن، عَ ﭑ فبٍ سٌ ﭑ يِ.» عِسَ نَشَ عَ يَابِ، «ندٍ ﭑ قِندِشِ كِيتِسَ رَ وٌ شُن مَ، شَ نَ مُ عَ رَ وٌ كّ تَشُنمَ رَ؟» عَ مَن نَشَ عَ مَسٍن عٍ بّ، «وٌ عَ عِ كِ قَنيِ، وٌ وٌ يّتّ رَتَنفَ شْيِقٍ سٍ مْولِ بِرِن مَ، بَرِ مَ عِ بَننَ كِيٌكِ، دُنِحّءِفِرِ تِدٍ مُ كٍلِمَ سٍ سْتْي شَ مَ.»
نَ شَنبِ، عِسَ نَشَ يِ تَالِ سَ عٍ بّ، «شّمّ بَننَشِ ندٍ شَ شّ نَشَ قَن كِ قَنيِ. عَ نَشَ عَ مَحْشُن عَ يّتّ مَ، ‹ﭑ مُنسٍ رَبَمَ، بَرِ مَ يِرٍ مُ ﭑ بّ ﭑ نْمَ ﭑ مَ دٌنسٍ بِرِن نَفَتَدٍ دّننَشّ؟› عَ نَشَ نَتّ تٌنفٌ، ‹ﭑ يِ نَن نَبَمَ. ﭑ نَ ﭑ مَ بِلِيٍ رَبِرَ مَ نّ، ﭑ فبّتّيٍ تِ نَشٍيٍ فبٌ عٍ بّ. ﭑ نَ ﭑ مَ دٌنسٍ نُن ﭑ مَ سٍ بِرِن مَلَنمَ نٍيٍ نَن كُي. نَ تّمُي ﭑ نَ عَ قَلَمَ نّ ﭑ يّتّ بّ، ﭑ بَرَ سٍ فبٍفبٍ رَفَتَ نَشَن بُمَ حّ وُيَشِ. ﭑ شَ ﭑ مَلَبُ قَ، ﭑ شَ ﭑ دّفٍ، ﭑ شَ ﭑ مِن، ﭑ شَ حّلّشِن.› كْنْ عَلَ نَشَ عَ مَسٍن عَ بّ، ‹عِ تَن شَشِلِتَرٍ! تٌ كْي يَتِ رَ، عِ نِي بَمَ نّ عِ قَتٍ. عِ نَشَن بِرِن مَلَنشِ، عَ قَ لُمَ ندٍ بّ؟› عَ نَ نَ كِ نّ مِشِ بّ نَشَن سٍ مَلَنمَ عَ يّتّ بّ، كْنْ عَ مُ بَننَشِ عَلَ بّ.»

نَ دَنفِ شَنبِ عِسَ نَشَ عَ مَسٍن عَ قْشِرَبِرّيٍ بّ، «نَ نَن عَ تٌشِ، ﭑ شَ عَ قَلَ وٌ بّ، وٌ نَشَ كْنتْقِلِ بَلٌي شَ قٍ رَ وٌ هَيِ نَ نَشَن مَ يِ دُنِحّءِفِرِ كُي، شَ نَ مُ عَ رَ، دُفِيٍ شَ قٍ رَ وٌ نَشٍيٍ رَفٌرٌ مَ وٌ قَتٍ مَ. وٌ شَ دُنِحّءِفِرِ تِدٍ فبٌ دٌنسٍ بّ، وٌ قَتٍ تِدٍ فبٌ دُفِيٍ بّ. وٌ وٌ مَحْشُن شَاشَيٍ مَ. عٍ مُ سَنسِ سِمَ، عٍ مُ شّ شَبَمَ. سَفَ نُن بِلِ سٍسٍ مُ عٍ يِ، كْنْ عَلَ عٍ رَبَلٌمَ. وٌ تَن تِدٍ فبٌ شْنِيٍ بّ ثٌن! ندٍ نْمَ هَلِ شِ كٍرٍن سَدٍ عَ شَ سِمَيَ شُن عَ شَ كْنتْقِلِقٍ سَابُي رَ؟ شَ وٌ مُ نْمَ نَ قٍ لَنمَ رَ، وٌ قَ كْنتْقِلِمَ قٍ فبّتّيٍ رَ مُنقٍ رَ؟»
«وٌ وُلَ سَنسِ قُفٍ تٌقَنيِيٍ مَتٌ عٍ مِنِمَ كِ نَشّ. عٍ مُ وَلِمَ، عٍ مُ وٌلِفّسّ يَءِلَنمَ، كْنْ ﭑ شَ عَ قَلَ وٌ بّ، هَلِ مَنفّ سُلٍمَنِ شَ دَرِيّ بِرِن كُي، عَ شَ سٌسٍيٍ مُ نُ تٌقَن عَلْ نَ سَنسِ قُفٍ كٍرٍن. شَ عَلَ وُلَ سَنسِ مّينِمَ يِ كِ نّ، نَشَن نَ نَ تٌ، تِنَ عَ فَن، عَ مّينِمَ نّ وٌ تَن مَ دَنفِ نَ رَ ثٌن! وٌ شَ دَنشَنِيَ شُرُن. وٌ نَشَ وٌ شَشِلِ بِرِن تِ دٌنسٍ نُن مِنسٍ رَ. وٌ نَشَ كْنتْقِلِ. كَاقِرِ بِرِن بِرَ مَ نَ قٍ مْولِ نَن تُن قْشْ رَ. كْنْ وٌ تَن بَبَ عَلَ عَ كٌلٌن، عَ وٌ هَيِ نَ نَ سٍيٍ مَ. وٌ شَ عَلَ شَ مَنفّيَ نِينِ سِنفٍ قٍن. وٌ هَيِ نَ نَشَن بِرِن مَ، عَ نَ قَن قِمَ نّ وٌ مَ.»


«وٌ نَشَ فَاشُ، وٌ تَن نَشٍيٍ لُشِ عَلْ ﭑ مَ شُرُ سٍ فْورّ لَنمَ، بَرِ مَ عَ بَرَ وٌ بَبَ عَلَ كّنّن عَ شَ مَنفّيَ نِينِ قِ وٌ مَ. سٍ نَشَن نَ وٌ يِ رَ، وٌ شَ سَ عَ مَتِ، وٌ عَ كْبِرِ قِ سٍتَرٍيٍ مَ. وٌ شَ كْبِرِ بْوتْ سْتْ نَشَن مُ كَنَمَ، وٌ هَرِفٍ سْتْ نَشَن مُ حْنمَ، نَشَن نَ عَرِيَننَ، مُحّتِ مُ دّننَشّ لِمَ، نِمَسٍيٍ قَن مُ كَنَرِ سَمَ دّننَشّ. وٌ هَرِفٍ نَ دّننَشّ، وٌ بْحّ قَن لُمَ مّننِ نّ.»


«وٌ تَفِ عِشِرِشِ نَن شَ لُ عَ رَ، وٌ شَ لَنثُييٍ رَدّشّشِ. وٌ شَ لُ نّ عَلْ مِشِ نَشٍيٍ عٍ مَرِفِ مَمّقٍ كٍلِقٍ قُتِشِرِ شُلُنيِ. عَ نَ قَ، عَ نَادّ كْنكْن، عٍ عَ رَبِمَ نّ عَ بّ كٍرٍن نَ. سّيوّ نَ كٌنيِيٍ بّ، مَرِفِ نَشٍيٍ لِمَ عٍ مُ شِشِ عَ قَ تّمُي. ﭑ شَ نْندِ قَلَ وٌ بّ، مَرِفِ يَتِ قَمَ عَ تَفِ عِشِرِدٍ، عَ قَ مَفٌرٌدٍ قٍن عَ شَ نَ كٌنيِيٍ بّ، عَ قَ عٍ بُن تِ. سّيوّ نَ عٍ بّ، مَرِفِ نَشٍيٍ لِمَ عٍ مُ شِشِ، هَلِ عَ فبِلٍن كْي تَفِ، شَ نَ مُ عَ رَ عَ حَن دَنفِ نَ رَ.»
«وٌ شَ عَ قَهَامُ عَ قَنيِ رَ، شَ بَنشِ كَنيِ عَ كٌلٌن نّ نُ مُحّتِ قَمَ تّمُي نَشّ، عَ مُ عَ لُمَ مُحّتِ شَ سٌ عَ شْنيِ. وٌ قَن، وٌ شَ وٌ تَفِ عِشِرِ، وٌ نَشَ يَنقَ، بَرِ مَ عَدَ مَ شَ دِ قَمَ وَشَتِ نَن مَ وٌ حْشْ مُ نَشَن مَ.»
ثِيّرِ نَشَ عَ مَشْرِن، «مَرِفِ، عِ يِ تَالِ سَشِ مُشُ تَن نَن بّ، كَ بِرِن بّ؟» مَرِفِ نَشَ عَ يَابِ، «ندٍ لُمَ عَلْ وَلِكّ شُنمَتِ نَشَن قِندِشِ شَشِلِمَ دُفُتّفّ رَ؟ عَ مَرِفِ عَ تِمَ عَ شَ بَنشِ وَلِكّيٍ بِرِن شُن مَ، عَ شَ دٌنسٍ تَشُن عٍ رَ عَ وَشَتِ. حّلّشِنيِ نَ نَ كٌنيِ بّ، نَشَن مَرِفِ عَ لِمَ نَ وَلِ رَ. ﭑ شَ نْندِ قَلَ وٌ بّ، نَ مَرِفِ عَ هَرِفٍ بِرِن تَشُمَ نّ نَ كٌنيِ رَ. كْنْ شَ عَ سَ لِ فٌ، نَ كٌنيِ عَ قَلَ عَ يّتّ بّ، ‹ﭑ مَرِفِ بُمَ نّ قَقٍ رَ›، عَ قَ مَرِفِ شَ كٌنيِ شّمّيٍ نُن كٌنيِ فِنّيٍ بْنبْ، عَ شُلُنيِ تِ، عَ سِيسِ؟ لْشْ ندٍ قَمَ، عَ تَن كٌنيِ مُ نَشَن كٌلٌن، عَ حْشْ مُ سَشِ نَشَن مَ، عَ مَرِفِ فبِلٍنمَ نّ. عَ نَ قَ، عَ نَ كٌنيِ حَشَنكَتَمَ نّ عَ حَاشِ رَ، كٌنيِ فبَلٌي سْتْ عٍ نُن كَاقِرِيٍ.»
«كٌنيِ نَشَن عَ مَرِفِ سَفٌ كٌلٌن، كْنْ عَ مُ عَ تَفِ عِشِرِ، عَ مَن مُ عَ سَفٌ رَبَ، عَ قَمَ نّ بْنبْي فبٍفبٍ سْتْدٍ. كْنْ نَشَن مُ عَ مَرِفِ سَفٌ كٌلٌن، شَ عَ بَرَ قٍ رَبَ عَ لَنمَ عَ شَ بْنبْ نَشَن مَ، عَ مُ بْنبْي فبٍفبٍ سْتْمَ. عَ فبٍفبٍ بَرَ سٌ نَشَن يِ، عَ فبٍفبٍ مَن مَشْرِنمَ نّ عَ مَ. عَ فبٍفبٍ بَرَ تَشُ نَشَن نَ، نَ فبٍفبٍ مَن مَشْرِنمَ نّ عَ مَ، ندٍ مَن قَ سَ نَ شُن.»


«ﭑ قَشِ تّ نَن سَدٍ بْشِ مَ. عَ رَقَنمَ ﭑ مَ شَ عَ حَن بَرَ دّشّ! قٌ ﭑ شَ تْورّ بٍلٍبٍلٍ سْتْ. ﭑ بْحّ مُ سَمَ قٌ نَ كَمَلِ تّمُي نَشّ. وٌ حْشْ عَ مَ عَ ﭑ قَشِ بْحّسَ نَن نَ دُنِحَ؟ عَدٍ، ﭑ قَشِ قَتَنيِ نَن نَ. كٍلِ يِ وَشَتِ مَ، شَ مِشِ سُولِ نَ دٍنبَيَ كُي، فٍرٍ لُمَ مِشِ سَشَن نُن مِشِ قِرِن تَفِ. بَبَ عَ شَ دِ شّمّ فٍرٍ مَ نّ، دِ شّمّ قَن عَ بَبَ فٍرٍ. نفَ عَ شَ دِ فِنّ فٍرٍ مَ نّ، دِ فِنّ قَن عَ نفَ فٍرٍ. مَمَ عَ شَ مَمَدِ فٍرٍ مَ نّ، مَمَدِ قَن عَ مَمَ فٍرٍ.»


عِسَ مَن نَشَ عَ قَلَ حَمَ بّ، «وٌ نَ نُشُي تٌ عَ مَلَن نَ سٌفٍفٌرٌدٍ، وٌ عَ قَلَمَ كٍرٍن نَ، ‹تُنّ نَن كٍلِشِ،› عَ قَ لِ نَ نَن مَن يَتِ رَبَمَ. قٌيٍ نَ كٍلِ كْولَ مَ، وٌ عَ قَلَمَ، ‹كُيٍ عِقُرَ مَ نّ،› عَ قَ لِ نَ نَن مَن يَتِ رَبَمَ. وٌ تَن قِلَنكَقُييٍ! وٌ قَتَ بْشِ نُن كٌورٍ حِنفِ كُي كٌلٌندٍ، كْنْ مُنقٍ رَ وٌ مُ قَتَ يِ وَشَتِ قٍيٍ تَن تَفِ رَبَدٍ؟»


«مُنقٍ رَ وٌ تَن يّتّ مُ قٍ مَتٌمَ، وٌ شَ عَ كٌلٌن نَشَن قِندِشِ تِنشِنيِ رَ؟ شَ وٌ نُن عِ كَلَمُ مِشِ نَ سِفَقٍ كِيتِسَ يِرٍ، كَتَ وٌ شَ لَنيِ شِرِ كِرَ شْن، شَ نَ مُ عَ رَ عَ عِ بّندُنمَ نّ هَن كِيتِسَ شْن، كِيتِسَ قَن عِ سٌ كْسِبِلِ يِ رَ، كْسِبِلِ عِ سَ فٍيلِ. ﭑ شَ عَ قَلَ عِ بّ، عِ مُ مِنِمَ مّننِ قٌ عِ كْبِرِ بِرِن قِ هَن بَتَنكَ دْنشْي.»

Listen to لُكِ 12