Sherpa - 2014 Edition (NT) Non Drama

Sherpa - 2014 Edition (NT) Drama

तमा येशूकी खोरो लोमातिवाला सुङ्‍सुङ, “मी छ्‍युक्‍पु यीकी खोरो खाङ्‍बी लाका चेक लावु मी यीला ज्‍याक्‍नोक। तमा ती मी तीकी खोरो टोङ्‍बा ना तोङ्‍गिनोक सिरुप ताम्‍ङे ति ती ज्‍यिन्‍दाककी थोनोक। ती थोसिमा ज्‍यिन्‍दाककी ती मीला कताङ्‍नी दुक सिक्‍यासुङ, ‘ख्‍योरो कोर्ला ङे थोवु दी ताम्‍ङे ति काङ यिन? ख्‍योरे क्‍यावु तेरी ची ति ङला नाङ। तफेन्‍ला ख्‍युरुङ दी लाका कि मुथुपी।’ ज्‍यिन्‍दाककी तुक सिक्‍यासिमा ती मी तीकी दुका नासाम यी ताङ्‍सुङ, ‘त याङ ङ काङ कितुप? ज्‍यिन्‍दाककी दी लाका नेमा ङला तेन तोङ्‍गुप छाल्‍सुङ। सशिङ कोपला जुला ङार मे, लङ्‍नी सापला ङोछा लङ्‍गिवी। ए ङोतोक, ङे काङ कि गोकिवी सिनी त हाक्‍कोसुङ। तुक क्‍यासिन ङला दी लाका नेमा तेन तङ्‍सिनाङ मीतिवी ङला तिवी खाङ्‍बा गासो शिवी।’ तमा तीकी खोरो ज्‍यिन्‍दाक नेमा छ्‍यावा लङ्‍गुपतिवा रे ताङ रे कताङ्‍नी गोमाला वावु तीला सिक्‍यासुङ, ‘ख्‍युरुङला ङे ज्‍यिन्‍दाककी लाङ गोवु छ्‍यावा ति चो वे?’ तीकी सिक्‍यासुङ, ‘नुम लिटर तोङ्‍डा सुम।’ तमा तीकी तीला सिक्‍यासुङ, ‘ल, तमा ख्‍योरो तमसुक लानी टिम्‍बु देनी लिटर सयी च्‍येङा सिनी टी।’ तमा तीकी यम्‍बा यीला कताङ्‍नी टिसुङ, ‘ख्‍युरुङला लाङ गोवु छ्‍यावा ति चो वे?’ तीकी सिक्‍यासुङ, ‘ट तवु तोङ्‍डा च्‍यिक।’ तमा तीकी तीला सिक्‍यासुङ, ‘ख्‍योरो तमसुकला तवु सयी ग्‍ये सिनी टी।’
तमा ज्‍यिन्‍दाक तीकी ती खोङ्‍तेर्मु मेतुप खोरो खाङ्‍बी लाका चेक लावु मी तीकी किताङ च्‍यङ्‍बु क्‍यावु तप्‍की तीला चिताङ क्‍यासुङ। च्‍यिलासिसिन दी जम्‍बुलिङकी मीतिवी खोप्‍रे पर्ला कितुप किताङ नालु ति ठछ्‍येलीकी गिपाकी मीतिवी ति सिनाङ मङ च्‍यङ्‍बु गिवी। ङ ख्‍यिराङला सिरिन, दी जम्‍बुलिङकी टोङ्‍बा थ्‍वोनी दाक दाक्‍पी थोक्‍ला दाल्‍जातिवा जो, तमा ती टोङ्‍बा सिन्‍सिमा तिवी ख्‍यिराङला नरी लुवु दासाला गासो शुकिवी।”


“सु ताम्‍ङे चेयीला खोङ्‍तेर्मु गिवे, ती ति ताम्‍ङे बङीला साङ खोङ्‍तेर्मु गिवी। तमा सु ताम्‍ङे चेयीला खोङ्‍तेर्मु मेवे, ती ति ताम्‍ङे बङीला साङ खोङ्‍तेर्मु मेङ्‍गिवी। तुक क्‍यानी दोजो ख्‍यिराङ जम्‍बुलिङकी टोङ्‍बाला खोङ्‍तेर्मु मेसुङ सिसिन सी देवाच्‍येनकी टोङ्‍बा टेङ्‍बु ति ख्‍यिराङला चेक तेकिवी? तमा ख्‍यिराङ मी यम्‍बी टोङ्‍बाला खोङ्‍तेर्मु मेसुङ सिसिन सी ख्‍यिराङला थोप गोवु रङगी टोङ्‍बा ति तेर्किवी? लावा च्‍यिककी ज्‍यिन्‍दाक ङ्‍यीला शब्‍ज्‍यी कि मुथुपी। तीकी च्‍यिकला ति ङ्‍यिङ्‍मर किवी, यम्‍बाला ति ङ्‍यिङ्‍ज्‍ये किवी। याङ्‍ना च्‍यिकला ति तेन्‍गिवी, यम्‍बाला ति ङ्‍यप्‍च्‍ये किवी। ती दोके क्‍यानी ख्‍यिराङ कोन्‍छ्‍योक ताङ टोङ्‍बा ङ्‍यिकरला शब्‍ज्‍यी कि मुथुपी।”


ती ताम्‍ङे थोनी टङ्‍गाला देर्पा कितुप फरिसीतिवी येशूला मर्च्या क्‍यासुङ। तमा येशूकी तिवाला सुङ्‍सुङ, “ख्‍यिराङ ति मीतिवी मिङ्‍गाला खोरुङ राङ टेङ्‍बु यिन सिनी छ्‍या देन्‍गिवी। यिने कोन्‍छ्‍योककी ख्‍यिरा सेम चुकै वे सिरुप ति हाक्‍कोकिवी। मीतिवी छासे खक्‍छ्‍येवु वे सिनी नो कितुपतिवाला ति कोन्‍छ्‍योककी छासे क्‍युक्‍टो किवी।” “मोशाकी ठिम ताङ कोन्‍छ्‍योककी लुङ्‍तेम्‍बातिवी येन्‍देनला तेन्‍दुप ति बप्‍तिस्‍मा तेरुप यूहन्‍ना वुङ्‍गुप सेक तिराङ यिन। ती ज्‍युक्‍ला ति कोन्‍छ्‍योककी ग्‍येल्‍खापकी लेन ल्‍यामु ति ख्‍याप्‍टाक कियी नोक, तमा तेरी मीतिवा ती नाङ्‍ला उर्च्युम ग्‍यप्‍नी शुकिनोक। कोन्‍छ्‍योककी ठिम नेमा छिक च्‍यिक तोरुप सिनाङ स ताङ नाम तोरुप ति मङ जोल्‍हमु गिवी।
सी खोरो पेर्मी क्‍युर ज्‍याक्‍नी यम्‍बा पुम्‍पेजा ताङ मुला जेन्‍दी किवे, ती मी तीकी शम्‍डेन कितुप यिन। तमा सी मी यम्‍बाकी क्‍युर्नी ज्‍यकुप पुम्‍पेजाला जेन्‍दी किवे, ती मी तीकी साङ शम्‍डेन कितुप राङ यिन।”

“दासा यीला मी छ्‍युक्‍पु यी नोक। ती ति मज्‍या ल्‍यामु ल्‍यामु कोन्‍नी ङ्‍यिमी टेङ छासे किर्मु क्‍यानी मिजी क्‍योङ्‍गिनोक। तीकी खाङ्‍बी गे चाला लाजरस सिरुप जु तेरीला म तिराङ थेन्‍दुप लाङ्‍साप मी यी देकिनोक। तमा तीकी मी छ्‍युक्‍पुकी च्‍योक्‍ची ख नेमा लुम्‍बुप पुर्मातिवा सोनी खोरो खोक्‍पा ग्‍येङ्‍गुप नो किनोक। ते कीतिवा साङ वानी तीकी म ति लकिनोक।
ज्‍युक्‍ला ती लाङ्‍साप ति शिसुङ, शिसिमा देवाच्‍येनकी लेन क्‍योलुप थुतिवी तीला अब्राहामकी चाला खुर्नी गाल्‍सुङ। ती मी छ्‍युक्‍पु तिङ शिनी मुक्‍तुम ग्‍यप्‍सुङ। तमा ती ति ङ्‍येलाला लुम्‍नी कशेन छेटाङ खुर्सुङ। ती पेला तीकी येर केला ल्‍हासालेन्‍सिन थाक्‍रिङ्‍बुला अब्राहामला थोङ्‍सुङ, तमा तीकी चाला लाजरस वोतुप थोङ्‍सुङ। तमा ती मी छ्‍युक्‍पु तीकी थोर ग्‍यप्‍नी, ‘ओ पपा अब्राहाम, ङला च्‍यम्‍बा क्‍यानी लाजरसला दे तोङ्‍नी। तीकी लाक्‍पी थेप्‍तोक गो नेमा छ्‍यु पानी ङे च्‍येलाक सिल सङ्‍मु जो च्‍यी। ङ याङ दे मेवुर नाङ्‍ला कशेन छेटाङला ख्‍येल्‍नी वे।’ सिनी सिक्‍यासुङ।
यिने अब्राहामकी तीला सिक्‍यासुङ, ‘पुज्‍यो, ख्‍युरुङ नासाम तोङ। ख्‍युरुङ सेन्‍बु वोतुप पेला तेरी गा ताङ किर्मु कितुप ङ्‍येनी वे। यिने दी लाजरस तीकी याङ दुक्‍पा बङी खुर्सुङ। यिने त याङ दीला किर्मु ङ्‍येन वे, ख्‍युरुङ ति छेटाङला ख्‍येल वे। तोजो तिराङ मिन, ङ्‍यिराङ ताङ ख्‍योरो पर्ला छासे मुक्‍तुम तिङ्‍मो यी वे। तुक क्‍यानी दे नेसुर ख्‍योरो ते डोप नो कितुपतिवा साङ डो मुथुपी, तेसुर दे ङ्‍यिरा ते छुर्केन वुङ साङ मुथुपी।’ येलुङ ती छ्‍युक्‍पु तीकी सिक्‍यासुङ, ‘तुकै यिन्‍सिन पपो, ङ ख्‍युरुङला गोङ्‍बा शोयी। ती लाजरसला ङे पाली खाङ्‍बा तोङ। ङे अच्‍युनुप पिन ङ वे। तीकी तिवाला च्‍याङ्‍से क्‍यानी दे च्‍यिनी तिवा दी छेटाङ ख्‍येलुप दासाला वुङ मेख्‍येल्‍शी।’ यिने अब्राहामकी सिक्‍यासुङ, ‘तिवी मुला याङ मोशा ताङ कोन्‍छ्‍योककी लुङ्‍तेम्‍बातिवा वे, तुक क्‍यानी तिवी ताम्‍ङे ङ्‍येन्‍शी।’ तीकी सिक्‍यासुङ, ‘मिन्‍पा, पपा अब्राहाम! शेपतिवी पर ने मी ललाइ सेन्‍बु लानी तिवी ते गल्‍सिन तिवी दिक्‍पा ने सेम ग्‍युर्किवी।’ अब्राहामकी तीला सिक्‍यासुङ, ‘तिवी मोशा ताङ कोन्‍छ्‍योककी लुङ्‍तेम्‍बाकी ताम्‍ङे मेङ्‍येन्‍सुङ सिसिन शेप ने ललाइ सेन्‍बु लासिनाङ तेपा मिकिवी।’”

Listen to लूका 16