Jon 17
17
E Iesu e singo ber u katunun tsitsilo i tanen
1E Iesu e ranga hakapaia turu katunun tsitsilo i tanen me tara sei uana i Kolö me poeiena:
“O Tamar, a pöata e butu hamanasa talana. Solo sei a Pien i tamölö, ba Pien i tamölö te solo sei hase noulö. 2Alö u halei lia a nitsunono tego tara kap mei lia u katuun hoboto, ba lia te antunan hala ragi u katuun tu hala ramei lö alia a nitöatöa te ka nitöana. 3Nonei teka a maroro tara nitöatöa te ka nitöana: u katuun te atei sile riou lö a Sunahan te mana nitöana, na lia e Iesu Kristo tu hala nema lö. 4Alia u söata seia lö i puta, taraha alia u kato a mamanaka hoboto tu hatei lö alia. 5Bara! O Tamar, hala tale mei lia a nikapan ti gum ma lia i rehimölö, a nikapan tu ka mam mei lia i mam te butuia a han i puta.
6“Alia u hatein a solo mölö turu katunura i puta teka tu hala rai lö alia. Nori u katuun i tamölö, na lö u hala rameien lia, na nori i hengo hanigan nitöani u raranga i tamölö. 7Nori e atei sil taler a mamanaka hoboto te ka megu lia e lama i tamölö. 8Na lia u hala hakapa raien a man raranga tu hale mei lö alia, ba nori te hamane ren. Na nori e atei siler alia u la hamanama i tamölö, na nori e hamaner tu hala mena mei lö alia.
9“Alia e singo bera gien i tamölö. Alia ema singo beragi u katuun hobotora i puta, kaba lia e singo beregu u katuun tu hala ramei lö alia, taraha nori u katuun i tamölö. 10U katuun hoboto i tar u katuun has i tamölö, na u katuun hoboto i tamölö u katuun has i tar. Na nori te haröto ner a nikapan i tar. 11Alia ema ka lel goi tara han i puta teka, alia e la uagou i tamölö, kaba nori e ka roua tara han i puta teka. O Tamagulia alö te göagono korum, alö go tara kap raien tara nitagala i tamölö tu halei meilö alia, ba nori te katoe riou a töa katuun, te kato has uarara. 12Pöata tu ka gono meraien lia, alia u tara kap raien tara nitagala i tamölö. Alia u tara kapir u katuun tu hala ramei lö alia. A töa puku a katuun te taia, temar hatei mam menaien u Buku u Göagono.
13“Na lia e la tala uagou i tamölö. Alia e katoegu u raranga teka i puta ba nori te sasaala nitöa has uar te sasaala uagu lia. 14Na lia u hala raien u raranga i tamölö. Na u katunura tara markatona i puta e omi raren, taraha nori e hereri lia: alia ema katuun uagi tara markatona i puta, na nori ema katuun has uari tara markatona i puta. 15Alia ema rangata silegi alö go luba raien tara han i puta teka. E möa. Alia e rangata silegu tego hatongo kap meraien lö tara nitagala tere Satan. 16Alia ema katuun uagi tara markatona i puta, na nori e hereri lia. Nori ema katuun has uari tara markatona i puta. 17Na u raranga i tamölö e mana nitöana. Alö go ranga hahengo raien ba nori te hatalis ba ner a man markato a man omi. 18Alö u hala mena mei lia turu katuun te ka mer u hakatsina i puta, na lia e hala has mera gien nonei noahas turu katuun teka. 19Na lia e hala menagi a peisar i tamölö tego taguhu merai lia u katuun teka, ba nori te hala has menari a peisaren i tamölö.
20“Alia ema singo peisa beragi u katuun teka i tamölö, alia e singo be has regu u katuun te hengoe riou romana u ranga i taren bate hamana uar i tar. 21Ba nori te hereri a töa katuun. Na lö, O Tamar, e ka mia i tar na lia e ka gia i tamölö, Nori egi ka mei u töa u tori, te kato has uara ra, ba u katunura i puta te tatei atei sil haser tu hala mena mei lö alia. 22Na lia e hala ragien a nikapan tu hala hase mei lö alia. Taraha, alia e ngilegu nori egi herei a toa katuun, te markato has uarara. 23Alia e ka gia i taren na lö e ka has mia i tar, ba nori te tatei tori hoboto has uar iesana. Te kato uanen teka ba u katunura i puta te tatei atei siler tu hala mena mei lö alia, na e tatei atei sil haser alö e ngil koru rem u katuun teka temar ngil has mena milö alia.
24“O Tamagulia, alö u hala rema u katuun teka i tar, na lia e ngilegu nori egina ka gono meiou lia tara makum tena ka goua lia. Ba nori tena tare riou a nikapan i tar, a nikapan tu hale mei lö alia, taraha alö u ngil korueiou lia i mam te butuia a han i puta.
25“O Tamagulia, alö e matskö korum, u katunura tara markatona i puta ema atei sileri lö. Kaba alia e atei sile goulö. Na nori u katuun i tar teka e atei siler tu hala mena mei lö alia. 26Alia u haröto naia lö i taren, na lia e kato noahase gouen tara mamana pöata. Taraha, alia e ngilegu nori gi hiangilngil temar ngil has mena milö alia. Na lia e ka has goua i taren.”
© (Active) Wycliffe Bible Translators, Inc. All rights reserved.
