Salmos 5
5
Salmo 5
Sukan kakan‑ta'vi o nuu Su'si ma ja na ko koto ña'a ya
1Su'si Iya Tátnuni, koniniso'o ni tnu'u ká'an sa nuu ni a,
te katanuu ña'a ni,
vaa tnána u'vi tnána u'vi sa ja ndó'o néni sa a.
2Su'si maa sa, koniniso'o ñukuun ni
ja jikan‑ta'vi jikan‑ta'vi sa nuu ni a,
vaa nuu maa ni ndáka'an ndákachi sa
sukan ndó'o néni sa a,
vaa maa ni kúu rey sa.
3Iya Tátnuni, ndaka xtnee ne'e ma koniniso'o ni
ja ká'an sa nuu ni a, vi Su'si.
Te ndaka xtnee ne'e ma jinkuiñi jiti sa nuu ni,
te ka'an sa nawa jiniñu'u sa ma,
te kondetu sa ja ndakone'e ni
ja ká'an káchi sa nuu ni ma, vi Su'si.
4Vaa ndijin, vi Su'si,
chi masu játna ini ni ja u'vi ka sa'a ñayii ma,
te chukan kúu ja masu kua'a ni tnu'u
ja koo ñayii sa'a ja u'vi ma nuu iyo ni a, vi Su'si.
5Vaa nuu iyo ni a chi masu nde iyo in nuu kúu jin koo
ñayii ka jani ini ja maa i ka kuu‑ka ma
te ñatuu ka kandija i ja tátnuni ni ma.
Vaa ndijin chi saxiko ni ndaka ñayii ka sa'a ja u'vi ma.
6Te xnaa ni ndaka ñayii ka ka'an tnu'u ma,
ji'in ndaka ñayii ka xnda'vi tna'a ma,
ji'in ndaka ñayii ka ja'ni tna'a ma,
te masu kuan‑ta'vi ni i nuu iyo ni a, vi Iya Tátnuni.
7Kovaa saña chi ja kútoo xeen ña'a ni a,
te kuu kivi sa onde nuu iyo ni a, te jinkuiñi jiti sa,
te ni‑yu'u ni‑ini sa ndachiñu'u ña'a sa
ini ve'e nuu ka ndatna'a sa
ja ka ndachiñu'u ña'a sa a, vi Su'si.
8Iya Tátnuni, skaka ña'a ni ichi va'a ma,
te kaxtnu'u ni nuu sa ja na sa'a sa ja va'a ja ndaa ma,
sukan‑va'a ñayii ñatuu ka kunimani nuu sa ma,
máko jin kundee i ja jin xnda'vi ña'a i, vi Su'si.
9Vaa tnu'u ka ka'an i ma, másu inundija i,
vaa onde ini anua i ma nanimaa ja u'vi ka ñu'u,
vaa sukan kaa nuu yinee ndiyi ma
nuna ndanune ma te kuni o
ja nanimaa ja kini ja tne'e ja ni tivi ñu'u ma,
sukan ka kuu tnu'u ka ka'an ñayii ka sa'a ja u'vi ma.
10Te ndaka sukan ka ka'an ka kuu maa i ma,
te jin ndani'i jin ndatna'a maa i.
Vaa kua'a xen‑xeen kuechi ka ndiso i ma,
te xndo'o xneni ni i, te jin ndachunaa maa i kuechi i ma,
vaa masu nde ka kandija i ja ká'an ni a, vi Su'si.
11Kovaa jín koo sii ini xeen ndaka ñayii
ka kukanu ini ña'a ja maa ni ko koto i ma,
te ndimaa jín kata sii ini xen‑xeen i,
vaa maa ni jito va'a i ma.
Ndaka ñayii ka kutoo ña'a i maa ni ma,
na jin koo sii ini xen‑xeen i, vaa iyo ni ji'in i ma.
12Vaa maa ni, vi Iya Tátnuni,
kua'a ni ja vii ja va'a ja jin ni'i ñayii ka sa'a ja va'a ja ndaa ma,
vaa sukan kúnda'vi ini ni i ma,
te kasi ndee kasi ndoso ni
ja ni‑in ja u'vi ma kenda nuu ka iyo i ma, vi Su'si.
© 2013, Wycliffe Bible Translators, Inc. All rights reserved.