Génesis 1
1
Yosë nani maꞌsha acorinsoꞌ
1Yosë nani maꞌsha acorinso shaꞌhuichinquëmaꞌ: Iráca co manta yaꞌhuërinhuëꞌ. Yosëíchin yaꞌhuërin. Caniaritapon, piꞌiroꞌtëꞌton acorin. Ina quëran isoroꞌpantaꞌ, acorin. 2Naporoꞌ isoroꞌpasoꞌ, co ipora pochin nishátërarinhuëꞌ. Yaꞌipi marësáchin ninin, paꞌpi anpotërin. Tashiri noyá iꞌcopitërin. Naporo chachin Yosë ispiritonënsoꞌ, iꞌ aipi yanpo yanpónantarin.
3Naporoꞌ Yosë tapon: “¡Tashinantërinso niiꞌsohuanchin huachi!” tënin. Topachina, niiꞌsohuantërin huachi.
4Niiꞌsohuantërinso nóya nicaton, nisha acorin. Tashintaꞌ, nisha acorin.
5Niiꞌsohuantërinsosoꞌ: “Tahuëri,” itërin. Tashinaontaꞌ: “Tashiꞌ,” itërin. Tashirahuaton tahuëriantahuachina, iꞌhuaraya huarëꞌ aꞌna tahuëriraꞌ, nanirin huachi.
6Ina quëran Yosë taantarin: “¡Niquë niquë iꞌ yaꞌhuëcaso marëꞌ yaꞌcopinamën yaꞌhuëꞌin!” tënin. Topachina, inachachin yaꞌhuërin huachi.
7Yosëri iꞌ yaꞌcopinamën nipachina, ina aipi iꞌ yaꞌhuërin. Inaanaquëntaꞌ, iꞌ yaꞌhuërin.
8Nani acohuachina, inápaquë yaꞌhuërinsosoꞌ: “Piꞌiroꞌtëꞌ,” itërin. Tashiantarahuaton tahuëriantahuachina, iꞌhuaraya huarëꞌ cato tahuëri nanirin huachi.
9Ina quëran Yosë taantarin: “¡Yaniroꞌpaꞌ yaꞌnocaso marëꞌ piꞌiroꞌtëanaquë iꞌ yaꞌhuërinsoꞌ, inaquëráchin niyontoꞌin!” tënin. Topachina, inachachin yaꞌhuërin huachi.
10Yaniroꞌpasoꞌ: “noꞌpaꞌ,” itërin. Iꞌ niyontoninsosoꞌ: “marë,” itërin.
Yaꞌipi acorinsopita noyasáchin nisarin niꞌnin. Ina nicaton, 11Yosë taantarin: “¡Nisha nisha sharoꞌsa papoinaꞌ! Nisha nisha panpatororoꞌsanta nisha nisha yaꞌpirihuanpisoꞌ, papoinaꞌ. ¡Nisha nisha nararoꞌsanta nisha nisha nitopisopita noꞌpaquë papoinaꞌ!” tënin. Topachina, inachachin yaꞌhuërin huachi. 12Ina nohuanton nisha nisha sharoꞌsaꞌ, panpatororoꞌsaꞌ, nararoꞌsaꞌ, inapita isoroꞌpaquë paporin. Acorinsopita nicaton: “¡Ma nóyacha acorahuë paya!” tënin. 13Tashiantarahuaton tahuëriantahuachina, iꞌhuaraya huarëꞌ cara tahuëri nanirin huachi.
14-15Ina quëran Yosë taantarin: “¡Aꞌpininsopita piꞌiroꞌtëquë yaꞌhuëꞌin. Tahuëri, tashi aꞌpintacaso marëꞌ yaꞌhuëꞌin. Inapita aꞌpinpachina, tahuëri, tashiꞌ, nisha nisha acoarin. Naporahuaton yoquiroꞌsaꞌ, piꞌipiroꞌsaꞌ, inapitanta piyapiroꞌsa nitotapi huachi!” tënin. Topachina, inachachin yaꞌhuërin huachi.
16Tahuëri aꞌpinacaso marëꞌ panca masho acorahuaton, tashinta aꞌpinacaso marëꞌ huaꞌhuishin miachin acorin. Tayoraroꞌsanta acorin.
17-18Yosëri inapita isoroꞌpaꞌ aꞌpintacaso marëꞌ piꞌiroꞌtëquë acorin. Tahuëri, tashi aꞌpintarin. Acorinsopita nicaton: “¡Ma nóyacha acorahuë paya!” tënin.
19Tashiantarahuaton tahuëriantahuachina, iꞌhuaraya huarëꞌ catapini tahuëri nanirin huachi.
20Ina quëran Yosë taantarin: “¡Nisha nisha maꞌsharoꞌsa iꞌquë yaꞌhuëcaiso marëꞌ yaꞌhuëꞌin! Nisha nisha samiroꞌsanta yaꞌhuëꞌin. ¡Naporahuaton, nisha nisha inairaroꞌsa yanponacaiso marëꞌ yaꞌhuëꞌin!” tënin. Topachina, inachachin yaꞌhuërin huachi.
21Panca maꞌsharoꞌsa nisha nisha nipisopita, marëquë yaꞌhuëcaiso marëꞌ acorin. Nisha nisha samiroꞌsantaꞌ, acorin. Anpiantëhuanoꞌsantaꞌ, acorin. Acorinsopita nicaton: “¡Ma nóyacha acorahuë paya!” tënin.
22Iꞌquë yaꞌhuëcaiso nipisopita noya yonquirapiton iso pochin shaꞌhuitërin: “¡Naꞌamiatatoma marëroꞌsaquë yaꞌhuëcoꞌ!” itërin. Naporahuaton anpiantëhuanoꞌsantaꞌ, shaꞌhuitërin: “¡Naꞌamiatatoma canpitanta isoroꞌpaquë yaꞌhuëcoꞌ!” itërin.
23Tashiantarahuaton tahuëriantahuachina, iꞌhuaraya huarëꞌ aꞌnatërápo tahuëri nanirin huachi.
24Ina quëran Yosë taantarin: “¡Nisha nisha maꞌsharoꞌsa yaꞌhuëꞌin! Tananquë yaꞌhuëcaiso nipisopita, pëꞌtahuacaiso nipisopita, niohuaratacaiso nipisopita. ¡Inapita yaꞌhuëꞌin!” tënin. Topachina, inachachin yaꞌhuërin huachi.
25Inapita maꞌsharoꞌsaꞌ, yaꞌipi Yosëri acorin. Acorinsopita nicaton: “¡Ma nóyacha acorahuë paya!” tënin.
26Naporo tahuëri chachin tapon: “¡Iporaso huachi piyapi niahuaꞌ! Inaso canpoa pochachin nisarin. Chiníquën nanantaton, samiroꞌsaꞌ, anpiantëhuanoꞌsaꞌ, inapita huaꞌanëntarin. Maꞌsharoꞌsa pëꞌtahuacaiso nipisopita, tananquë yaꞌhuëcaiso nipisopita, niohuaratërinsopita, yaꞌipi inapitanta huaꞌanëntarin,” tënin.
27Yosëri piyapi acoapon, inaora pochachin acorin.
Aꞌnara quëmapi, aꞌnara sanapi. Inaíchin ninin.
28Noya yonquirapiton iso pochin shaꞌhuitërin: “Nóya yaꞌhuëcoꞌ.
Naꞌa huaꞌhuasha yaꞌhuëchinquëmaꞌ.
Shiparimapita naꞌatonaꞌ, yaꞌipi parti yaꞌhuëꞌinaꞌ.
Yaꞌipi huaꞌanëntocoꞌ. Samiroꞌsaꞌ, maꞌsharoꞌsaꞌ,
anpiantëhuanoꞌsaꞌ, niohuaratërinsopita, inapita huaꞌanëntocoꞌ,” itërin.
29Napotahuaton, itaantarin: “Niꞌquëꞌ. Nisha nisha sharoꞌsa apapotërahuë nitërinso capamaso marëꞌ. Notohuaroꞌ nisha nisha nararoꞌsanta nitërinso caꞌquëꞌ, iroquëꞌ. 30Maꞌsharoꞌsaꞌ, anpiantëhuanoꞌsaꞌ, niohuaratërinsopita, inapitaso nipirinhuëꞌ, panpatoro acotërahuë capacaiso marëꞌ” itërin. Napotohuachina, inachachin nipi huachi. 31Naporoꞌ Yosëri yaꞌipi acorinsopita nicaton: “¡Ma nóyacha yaꞌipi acorahuë paya!” tënin. Tashiantarahuaton tahuëriantahuachina, iꞌhuaraya huarëꞌ saota tahuëri nanirin huachi.
© 2011, Wycliffe Bible Translators, Inc. All rights reserved.
