Mateo 4
4
Ri c'ambal upa ri Jesús
(Mr. 1:12-13; Lc. 4:1-13)
1Tec'uchiri', ri Jesús xc'am bi ruma ri Ruxlabixel ri Dios pa jun luwar catz'intz'otic cha' cac'am upa ruma ritzel winak. 2Ri Jesús xc'oji' chila' yey cuarenta k'ij y cuarenta ak'ab c'u ri' na jinta c'o xutijo. Q'uisbal re wa' xpe numic che.
3Xkib c'u ritzel winak ruc' ri Jesús re cuc'am upa cha' catzak pa mac, jewa' xubi'ij che:
—We katzij at Uc'ajol ri Dios, chat-takan che cha' tak wa'baj cu'an wa —xcha'.
4Ri Jesús xuc'ul uwach:
—Jewa' tz'ibital can chupa Rutzij Upixab ri Dios:
Na xew ta ruma ri wa e c'as ri ticawex,
ma e c'aslic ruma ronoje tak ch'a'tem quel lo puchi' ri Dios Dt. 8:3
—xcha'.
5Ec'uchiri', ritzel winak xuc'am bi pa ri santowilaj tinamit Jerusalem c'a chicaj che ruwi ri Rocho Dios. 6Xubi'ij c'u che:
—We katzij at Uc'ajol ri Dios, chac'aka bi awib c'a chu'lew y na jinta c'o cac'ulumaj, ma jewa' tz'ibital can chupa Rutzij Upixab ri Dios:
Ri Dios quebutak lo ru ángeles awuc'
cha' catquichajij.
Catquichap c'u ruc' ri quik'ab
cha' na ca'chika ta rawakan che juna abaj Sal. 91:11-12
—xcha'.
7Ri Jesús xuc'ul uwach:
—Jewa' tz'ibital can chupa Rutzij Upixab ri Dios:
Mac'am upa ri Dios Kajawxel#4:7 Na utz taj camin uwach ri Dios cha' cuc'ut ruchuk'ab. Dt. 6:16
—xcha'.
8Ec'uchiri', ritzel winak xuc'am tanchi ubi ri Jesús chutza'm jun nimalaj juyub y xuc'ut c'u chwach, ronoje ri takanic ca'an puwi tak ri tinamit che ruwachulew ruc' ronoje ruchomalil tak wa'. 9Xubi'ij c'u che:
—Ronoje tak wa' canya pak'ab we caxucuba' awib chinuwach y calok'nimaj nuk'ij —xcha'.
10Ec'u ri Jesús xubi'ij che:
—Chatela chinuwach Satanás, ma jewa' tz'ibital can chupa Rutzij Upixab ri Dios:
Lic chalok'nimaj uk'ij ri Dios Kajawxel
y xew Rire chanimaj uk'ij Dt. 6:13
—xcha'.
11Ec'u ritzel winak xuya can ri Jesús y xel bi chiri'. Xec'un c'u lo jujun ángeles y xquijeko caquinimaj ri Jesús.
Ri Jesús cujek cac'utun chwi rutakanic ri Dios
(Mr. 1:14-15; Lc. 4:14-15)
12Ri Jesús, echiri' xuto c'o ri Juan pa cárcel, xe'ec tanchi Galilea. 13Xel bi pa ri tinamit Nazaret y xe'jekela pa ri tinamit Capernaúm. Wa' jun tinamit c'o chuchi' ri mar pa ri luwar re Zabulón y re Neftalí. 14Xu'an c'u wa' cha' e cu'ana janipa rutz'ibam can ri k'alajisanel Isaías echiri' xubi'ij:
15Pa ri luwar re Zabulón y re Neftalí,
ri c'o pa rubeyal ri mar,
ch'aka ya' che ri nimaya' Jordán,
pa tak ri luwar re Galilea pa ejekel wi
uq'uiyal winak na e ta aj judi'ab;
16ri ticawex ejekel pa k'eku'm xquil ri K'ijsak
yey ri ejekel pa ri k'eku'm re camic,
xwon ri K'ijsak paquiwi' Is. 9:1-2
xcha'.
17Chwi c'u lo ri' xujek ri Jesús catzijonic, jewa' cubi'ij: «Tzelej tzij alak chwach ri Dios, ma rutakanic ri Dios petinak chila' chicaj lic xa nakaj chi c'o wulok» cacha'.
Ri Jesús quebusiq'uij cajib e aj chapal car
(Mr. 1:16-20; Lc. 5:10-11)
18Echiri' cabin ri Jesús chuchi' ri mar re Galilea, xril pan quiwach queb achijab quichak' quib, jun Simón rubi' (Pedro quecha che) y ri jun chic Andrés rubi'. Rique e aj chapal car, yey e ri' quetajin che uc'akic ri qui atarraya pa ri mar.
19Ec'u ri Jesús xubi'ij chique:
—Chixpetok, chixterej lo chwij, y ri'in can'an chiwe ix aj molol ticawex,#4:19 “Ix aj molol ticawex”: Ri chac xya' chique e quequitzucuj ticawex re quebu'an utijo'n ri Jesús. jela' pacha' i'anom lo chique ri car —xcha chique. 20Y na jampatana xquiya can ri qui atarraya y xeterej bi chirij ri Jesús.
21Xbin c'u pan jubik' chic y xeril chi pan queb achijab quichak' quib, jun Jacobo rubi' y ri jun chic Juan rubi'. Wa ca'ib e uc'ajol ri Zebedeo. Rique e c'o chupa jun barco junam ruc' ri quikaw y quetajin che uc'ojoxic ri qui atarraya. Ec'u ri Jesús xebusiq'uij bi. 22Y na jampatana rique xquiya can ri quibarco y ri quikaw, y xeterej c'u bi chirij ri Jesús.
Ri Jesús cac'utun chiquiwach uq'uiyal winak y lic e q'ui ri quebucunaj
23Ri Jesús xic'ow che ronoje tinamit re Galilea. Cac'utun pa tak sinagogas chujujunal tinamit, cutzijoj ri Utzilaj Tzij re rutakanic ri Dios y cucunaj ronoje uwach yabil c'o chique ri winak.
24Conoje ri e c'o pa tak ri tinamit re Siria xqueta'maj tak ri cu'an ri Jesús. Xequic'am c'u lo chwach Rire conoje ri ticawex ruc' tak uq'uiyal c'axc'olil. Wa' e ri e c'o pa yabil, ri c'ax quic'ulumam, ri e c'o paquik'ab itzel uxlabixel, ri quebumaj tew y ri e sic. Ec'u ri Jesús xebucunaj conoje.
25Lic e q'ui c'u ri xeterej bi chirij. Wa' e petinak Jerusalem y che jujun chic luwar re Judea, cuc' ri e petinak pa tak ri tinamit re Galilea, re Decápolis y che jujun chic tinamit e c'o ch'aka ya' che ri nimaya' Jordán.
© 2009, Wycliffe Bible Translators, Inc. All rights reserved.
