Gn 4
4
Win Caín yet' win Abel
1'Ix yi'n sb'a Adán yet' 'ix Eva, yuj cha, scuchn chan̈ 'ix yune'. Xlajw cha, x'alj jun yune 'ix, xya'n sb'ic Caín,#Gn 4.1 A 'a hebreo, a jun b'i tzcuch Caín, lajn yab'x yet' jun paxti " 'ix 'ajx 'ayin". xyaln 'ix 'ixtic: X'alj jun in winc 'unin. A Jehová a x'a'n 'ayin, xchi 'ix. 2X'ec' jun tiempoal, x'alj pax win Abel, win yu'tac Caín. A win Abel cha, cajm calnelu x'aj winac, ax pax win Caín, 'ix munlj win 'a lum lu'um.
3'Ix b'ey tiempo, 'ay jun c'ual, 'ix yij 'at Caín xajmb'al 'a Jehová, atn tas tzyij 'a smunljel. 4'Ixta pax win Abel, 'ix yij 'at pax win xajmb'al 'a Jehová, atn e no sb'ab'l yune scalnelu winac, e no caw wal b'aq'uech. 'Ix schaj sc'ojl Jehová win Abel yet' xajmb'al. 5Ax win Caín, ma'ix schaj sc'ojl Jehová win yet' xajmb'al. Xchichn chan̈ winac, ow xyutj win sat, 6yuj cha, xyaln Jehová 'a win 'ixtic: ¿Tas yuj tzach chichni, ow tzotj a sat? 7Toto wach' tas tza b'o'o, tzaljc'ojlal am aji, palta tu tas tza nib'j a b'o', yuj cha, a maysch'olnil chi q'ueln xo 'och 'ayach yic tzach ya'n telwoc, palta tztac' ach tzac' 'ejm jun maysch'olnil cha, xchi.
8'Ay jun c'ual, 'ix yawtj 'at Caín win Abel cha, yic tz'at eb' b'eyc'oc. Ax yic 'ayc' eb' 'a 'aj 'ix 'at b'eyc'oc cha, 'ix meltzj 'och win Caín 'a win yu'tac cha, 'ix sma'n chamoc. 9'Ix sc'anb'n Jehová 'ixtc 'a win Caín:
—¿'Ajtil 'ay win o'tac Abel? xchi 'a winac. Yuj cha, xta'w win 'ixtic:
—Man̈ wojcoc. ¿Tom wal yilmal win wu'tac chi waji? xchi winac.
10'Ix yaln pax Dios 'ixtc 'a winac:
—¿Tas yuj 'ixta xa b'o'o? A schic'l win o'tac 'ix 'elcn 'a sat lum lum tic o'oj, 'icha to a tzyal sb'a 'ayin, yic tzin b'onyaji. 11A ticnec, tzach catb'tzax can 'el 'a sat lum lum tic, atn lum 'ix 'u'n can 'ejm schic'l win o'tac 'ix a ma' cham cha. 12A yic 'oj a munlj 'a sat lum lum tic, may jac 'oj ec' 'a sat lu'um, ma'oj elj xon jab'oc, ton̈j 'oj a satc' 'a sat lum lum tic, ya' sb'a 'aych 'ec' 'a yolyib'n̈q'uinl tic, xchi 'a winac.
13Yuj cha, xta'w Caín 'ixtc 'a Jehová:
—Caw niwquil yailal jun xcotcn 'a wib'n̈ tic, caw wal ma'oj techjoc wu'uj. 14'In to tzin ej can 'el 'a sat lum lum tic, tzin c'ub'n 'el in b'a 'a ojltac, toxn̈ej 'oj in satq'ui. Yaln̈j mach 'oj wilchj yu'uj, ax in sma'n chamoc, xchi winac.
15Xta'w Jehová 'ixtc 'a winac:
—Ma'ay, toto 'ay mach 'oj a ma'n chamoc, uc 'ejm 'oj scha spac o'oj, xchi.
Yuj cha, ax Jehová x'a'n 'och jun yechl win Caín, sec matz ma'x cham win yuj eb' 'anma'. 16Xlajw xoj cha, 'ix 'el Caín 'a 'aj xpaxtin yet' Jehová, axta xc'och cajn 'a jun lugar Nod sb'i, ata 'ay 'a stojlal 'aj tzq'uel c'u 'a Edén.
A eb' yin̈tl Caín
17'Ix yi'n sb'a Caín yet' yistzil, scuchn chan̈ 'ix jun yune', ax yic x'alj jun 'unn cha, xya'n eb' sb'ic Enoc. 'Ix sb'on Caín jun chon̈ab', xya'n sb'ic Henoc, 'icha sb'i yunnal cha. 18A Henoc, smam Irad, ax Irad smam Mehujael, ax Mehujael smam Metusael, ax Metusael smam Lamec. 19A Lamec cha, chawn̈ xyutj win yistzil: A jun 'ix, Ada sb'i 'ix, ax junx 'ix, Zila sb'i 'ix. 20A 'ix Ada, x'alj jun yune 'ix, xya'n eb' sb'ic Jabal. Atn win Jabal cha, b'ab'l cajm cajb'en noc', yol mantiado tz'aj cajn eb', yic tz'ec' eb' yet' scajb'en noc' cha. 21A Jabal, 'ay jun yu'tac Jubal sb'i. A win cha, b'ab'l yucm arpa, 'utz'm pax 'amay. 22Ax pax 'ix Sila, 'ix 'alj pax jun swinc 'unin, Tubal-caín xyac' eb' sb'ioc. A win cha tenm q'uen winac, sb'o yamc'ab' yet' q'uen bronce yet' q'uen hierro. 'Ay pax jun yanb' winac Naama sb'i.
23'Ay jun 'el, 'ix yal Lamec 'a eb' 'ix yistzil 'ixtic:
Ex wistzil, ach Ada yet' ach Sila, 'ab'c tas 'oj wala': 'Ix in mil cham jun win quelem, yujto in lajw in sma'ni.
24Toto uc 'ejm tzpactzax yic Caín, ax pax wuj an tic, 77 'ejm 'oj pactzaxc 'a eb' tzin ma'ni, xchi winac.
Win yunnal Adán sjel win Abel
25Ax win Adán, x'alj junx yunnal win yet' 'ix Eva, Set#Gn 4.25 A 'a hebreo, a jun b'i tzcuch Set, lajn yab'x yet' jun paxti "sjel". xyac' 'ix scuch win 'unn cha. Xyaln 'ix 'ixtic: A Dios x'a'n junx wune tic, sjelc win Abel mac'b'il cham yuj Caín, xchi 'ix.
26Ax win Set cha, x'alj jun yunnal, xya'n sb'ic Enós. Atn 'a yic jun tiempoal cha, ata 'ix 'el yich yaln sb'a eb' 'anma 'a Jehová.
Biblia Chuj San Sebastian © Sociedades Bíblicas Unidas, 1999.