Gn 3
3
Tenmtac xyutj sb'a Adán yet' Eva
1Palta a no chan yel xo wal jeln no 'a yib'n̈ smasnil no calte'al noc' sb'o Jehová Dios. Xyaln no 'a 'ix 'ix 'ixtic:
—¿Tom yel 'ix yal Dios, to matz e lo sat smasnil te 'awb'ente tic? xchi no'.
2'Ix ta'w 'ix 'a no 'ixtic:
—Smasnil te 'awb'ente tic, tztac' qui lon sat; 3palta cojn te 'ay 'a snan̈l te 'awb'ente tic, 'ix yal Dios to matz tac' qui lon sat on̈, matz tac' pax qui yamn sat, sec wach' matz on̈ cham ab' on̈, xchi 'ix.
4Yuj cha, xyaln no chan chi 'a 'ix 'ixtic:
—Man̈ yeloc to tzex chami. 5Yujto yojc Dios, to a yic 'oj e lon sat te', 'oj jacwc e nab'en, tz'acn 'oj 'aj e jelnal 'icha Dios, 'oj nachjoc 'el tas wach' yet' tas tu eyu'uj, xchi no 'a 'ix.
6'Ix yiln 'och 'ix te sat cha, to wach' sloxi, wach' pax yilxi, snib'n pax 'ochi sec wach' tz'acw snab'en 'ix yalni. Yuj cha, sch'inn 'elt 'ix jun te sat cha, slon 'ix te'. 'Ayc' pax win yichmil 'ix chi yet'oc, xya'n 'ix te 'a winac, slon pax win te yet' 'ix. 7Xlajw slon eb' te', 'ix nachj 'el yuj eb' to jitn 'el eb', yuj cha, syamn 'och eb' stz'isn syam sb'a xil te higo, xya'n 'och eb' yen̈loc yojltac.
8A yic yemc'ul xo, yic sic xo yoc c'u, xyab'n win yet' 'ix to tzb'eyc' Jehová Dios 'a scal te 'awb'ente'. Yajn̈ej 'ix 'at eb' 'eloc, sc'ub'n 'el sb'a eb' 'a scal te 'awb'ente cha. 9Palta 'ix 'awj Jehová Dios 'a win Adán cha:
—¿'Ajtil 'ayach? xchi Dios.
10'Ix ta'w win 'ixtc 'a 'a:
—Waj 'a tic. 'Ix wab'i to tzach 'ec' 'a scal te 'awb'ente tic, in xiw cha'an̈, yujto jitn in 'eli, yuj cha, xin c'ub'n 'el in b'a, xchi winac.
11'Ix sc'anb'n Dios 'ixtc 'a winac:
—¿Mach x'a'n ojcoc 'eli chajtlto jitn ach 'eli? ¿Tope wal 'ix a lo sat te te 'ix wal 'ayach to matz a lo'o? xchi.
12'Ix ta'w win 'ixtic:
—A 'ix 'ix xac' wistzilc tic, a 'ix x'a'n sat te te 'ayin, yuj cha, xin lon te', xchi winac.
13Xlajw cha, sc'anb'n pax Jehová Dios 'ixtc 'a 'ix 'ix cha:
—¿Tas yuj 'ixta 'ix otj a b'a? xchi. Xta'w 'ix, xyaln 'ix 'ixtc 'a 'a:
—A no chan in 'ixtn paxti', yuj cha, xin lon te', xchi 'ix.
Xyal Dios tas yailal*r* 'oj jawc 'a yib'n̈ junjn eb'
14Xyaln Jehová Dios 'a no chan 'ixtic:
—Yujto 'ix a b'o jun tic, yuj cha, 'oj a chacx can 'el 'a scal smasnil no noc' 'a smasnil tiempo. A sn̈i a c'ojol, a 'oj a b'eylab'oc ax eq'ui. Ax lum pocc 'oj a lo'. 15A ticnec, tzwa'cn 'och chacjb'al 'a a cal yet' 'ix 'ix, yet' smasnil en̈til, yet' yin̈tl 'ix. A yin̈tl 'ix tic, a 'oj ma'nc poj a jolom, ach xo 'oj a chi yich sq'uenl yoc yin̈tl 'ix cha, xchi Dios.
16Xyaln pax 'a 'ix 'ix cha:
—'Oj wac' ab' syail yic et'x one', ax wa'n niwtjoc a yailal yic 'oj 'aljoc one'. Toxn̈ej 'ay yailal 'oj ela', palta 'oj a nib'cn̈ej echmil. A win winc 'oj 'och ajliloc, xchi 'a 'ix.
17Xyaln pax 'ixtc 'a win winc cha:
—Yujto xa yiclj 'a 'ix estzil tic, xa lon sat te te xwal to matz a lo'o, a ticnec, tic wal tzin catb'ej can 'el lum lum tic a mulojoc. Ya' sb'a 'aych 'ec' 'a yolyib'n̈q'uinl tic, 'oj ab' syal a munlji, 'ixta to b'i'an ax yilchj tas tza c'uxu. 18'Oj q'uib' te q'ui'ix yet' te c'ultc 'ay sq'uixl 'a sat lum lum tic, ax a lon te 'itj 'oj pac' 'a scal te c'ultc cha. 19'Oj 'el yalil snan̈l a sat, ax yilchj tas 'oj a c'uxu', masnto 'oj a meltzj 'a lum lum tic jun 'ejm xo, yujto a 'a lum ach coti, yuj cha, 'oj a meltzj can pax 'och lumal jun 'ejm xo, xchi Dios.
20Eva#Gn 3.20 A 'a hebreo, a jun b'i tzcuch Eva, lajn yab'x 'icha jun paxti "pitzan". xyac' Adán sb'ic 'ix yistzil cha, yujto a 'a 'ix xpitzw 'el smasnil 'anma'. 21'Ix sb'o Jehová Dios stz'umal no noc' spichloc win winc yet' yistzil, 'ix ya'n 'och spichloc eb'.
22Xlajw cha, xyaln Jehová Dios: A ticnec 'icha 'on̈c tic, 'ixta x'aj eb' 'anma tic, xnachj 'el tas wach' yet' tas tu yuj eb'. Ax ticnec, slot laj eb' sat te te tz'a'n q'uinal, ax spitzw can eb' 'a smasnil tiempo, xchi.
23Yuj cha, spechn can 'elt Jehová eb' 'anma 'a Edén, 'ix 'ochcn win winc munljoc 'a sat lum lu'um, yujto a 'a lum xcot winac. 24Xlajw yelt can eb' 'anma chi yuj Dios, 'ix ya'n can 'och jun tzo'n̈ eb' querubín 'a stojlal 'aj tzq'uel c'u 'a Edén, yet' jun q'uen espada tzictzni yel sc'aq'uil yic tz'ec' oyyoc, sec wach' man̈x 'a junc mach tztac' yochi, yic tzlon sat te te tz'a'n q'uinl cha.
Biblia Chuj San Sebastian © Sociedades Bíblicas Unidas, 1999.
