Gn 12
12
A Dios tz'awtn Abram
1'Ay jun c'ual 'ix yalx Jehová 'a win Abram 'ixtic: 'Actj can a lum tic yet' smasnil eb' ecan, yet' eb' cajn 'a yatut a mam. Tzlajw cha, tzach 'at 'a jun lum lum 'oj in ch'ox 'ayach. 2A en̈til, a 'oj 'och niwc chon̈b'al wu'uj. 'Oj in ch'ox in wach'c'ojlal 'ayach. Yel xo wal 'oj a b'inaxi, o'oj ax schan eb' 'anma yaxilal. 3'Oj wac' in yaxilal 'a eb' wach' 'oj yutc snab'en 'ayach, ax eb' tu 'oj yutc snab'en 'ayach, 'oj in catb'oc can 'el eb'. O'oj ax wa'n yaxilal 'a yib'n̈ smasnil 'anma 'a yolyib'n̈q'uinl tic, xchi Dios.
4-5Xlajw cha, x'elt Abram 'a Harán, 'icha xyutj Jehová yaln 'a 'a. 'Ay 75 ab'il sq'uinal, yic 'ix 'elt 'a jun lugar cha. 'Ix yij cot yistzil, atn 'ix Sarai, xyi'n cot jun yunnal can yu'tac tzcuch Lot, yet' jantcn̈ej tas 'ay 'a 'a, tzyal 'el'chi eb' schecab' yet' smasnil tas 'ix yac' ganar 'a Harán. 'Ix 'och eb' 'a b'eyel masnto xjaw eb' 'a Canaán. 6'Ix sc'axptej 'e't jun tzo'n̈ lugar masnto 'ix jaw 'a Siquem, 'a 'aj 'ay te mach' 'a yol yic More; atn 'aj cajn eb' cananeo 'a yic jun tiempoal cha. 7Ata xch'ox sb'a Jehová 'a Abram cha, 'ix yaln 'ixtic: A jun lum tic 'oj wac' 'a smasnil eb' en̈til, xchi 'a 'a.
Yuj cha, sb'on Abram jun yet'l xajmb'al 'a 'aj tzyal sb'a 'a Jehová, yujto ata xch'ox sb'a Dios 'a 'a. 8Xlajwn̈ej cha, 'ix cotxi, axta 'ix japx 'a eb' lum jolmctac witz 'a snan̈l chon̈b' Bet-el yet' chon̈b' Hai. Ata x'aj cajan. A chon̈b' Bet-el cha, ata 'ay 'a stojlal 'aj tz'em c'u. Ata 'ix sb'o junx yet'l xajmb'al, 'a 'aj tzyal sb'a 'a Jehová. 9Xlajw cha, c'ojnc'ojnil 'ix b'ey coti masnto 'ix jaw 'a lum Neguev.
'Ix 'at Abram 'a Egipto
10Atn 'a yic jun tiempoal cha, ata 'ix jaw jun niwquil wejl 'a yib'n̈ smasnil 'anma 'a yol yic Canaán. Yuj cha, 'ix 'atx Abram, 'ix c'och cajn jun tiempoal 'a Egipto. 11A yic wan sc'och 'a Egipto cha, 'ix yaln 'a Sarai 'ixtic: Ach wistzil, a ticnec 'ay wal jun tas tzin na'a. Ach tic caw wal wach' elxi. 12A yic 'oj ach yilnc ewin 'aj Egipto tic, 'oj yal ewin 'ixtic: A jun 'ix tic yistzil jun winc tic, 'oj schic e winac. Yuj cha, ax in smiln cham ewin o'oj, al ach may tas 'oj ach yutc ewinac, cojnto 'oj a can yet' ewinac. 13Yuj cha, 'oj ala', to wanb' 'ach, sec 'oj tzaljoc ewin wet'oc, sec ma'oj in smil cham ewin o'oj, xchi 'a Sarai.
14Ax yic 'ix c'och Abram 'a Egipto cha, 'ix yiln 'och ewinac to a Sarai caw wach' yilxi. 15An̈jtona', 'ix yiln 'och ewin 'ay yopiso yet' win faraón, to caw wach' yilx 'ix. Yuj cha, 'ix 'at ewin yal 'a winac, xlajw cha, xyi'n 'at ewin 'ix 'a yatut win rey cha.
16Yujn̈ej Sarai, yuj cha, wach' 'ix yutj win rey snab'en 'a Abram cha. Til wal calnelu, wacax, b'uru, 'axna, cameyo, til wal pax ewin checab' yet' eb' 'ix checb' siyj win rey chi 'a winac. 17Palta yujn̈ej syaloc 'ix Sarai, yuj cha, til wal yailal 'ix jaw 'a yib'n̈ win rey chi yuj Jehová, yet' 'a eb' cajn 'a yol yatut. 18Yuj cha, xya'n win rey 'ijx cot Abram, 'ix yaln 'a 'ixtic: ¿Tas wal yuj 'ixta tzin otej? ¿Tas yuj ma'ix al 'ayin, toto estzil 'ix 'ix tic? 19'In to xal 'ayin, to anb' 'ix, ton̈j 'ix ela yic 'ijn 'ix 'och 'ix wistziloc. Ax ticnec, 'ij pax 'ix, tzlajw cha, tzach 'el 'a yol qui nacion̈ tic on̈, xchi win rey chi 'a winac. 20Xlajw cha, 'ix yaln win rey chi 'a eb' soldado, to tz'ijx 'el Abram 'a yol yic Egipto yet' yistzil, yet' pax smasnil tastc 'ay 'a 'a.
Biblia Chuj San Sebastian © Sociedades Bíblicas Unidas, 1999.
