Medhetethi 6
6
Asa Iitatethi
1Asay sa7a bolla darida wode entaw macca nayti yeletidosona. 2“Xoossaa nayta” geetetiya medhetethati he macca nayti mala lo77o gideysa be7idi entafe bantaw dooridaysata machidosona. 3Goday, “Asas de7o immiya ta Ayyaanay asan merinaw deenna. Asi hayqeysa gidiya gisho, hizape iya laythay issi xeetanne laatama gidana” yaagis. 4He wodenne hessafe guye, Xoossa nayti asa macca nayta ekin, nayti yeletida wode, wogga adussa asati sa7a bolla de7idosona. Enti beni wode olas minonne eretida asata.
5Goday he wode sa7a bolla de7iya asa iitatethi daridaysanne enta wozanay ubba wode qopiyabay iita xalaala gididaysa 6be7idi, ase ha sa7a bolla medhidaysan azzanis; ba wozanan daro qiirotis. 7Taani ase ayis medhadina gada qiirotas. Hessa gisho, Goday, “Taani medhida ase, mehe, do7a, sa7ara gooshetiya medhetethatanne salo kafota sa7a bollafe dhaysana” yaagis. 8Shin Nohey Godaa sinthan saba demmis.
Nohe
9Nohe taarkey haysafe kaallidi xaafetidaysa. Nohey ba wode de7iya asa giddofe Xoossaa ufaysiyanne suure asi. 10Nohey Seema, Kaamanne Yaafeta geetetiya heedzu adde nayta yelis.
11He wode biittay kumethi Xoossa sinthan tunis; biitta ubbay geellatethan kumis. 12Xoossay ha biitta xeelliya wode sa7an de7iya asa ubbay banta ogiya tunisidi de7eysa be7is.
13Hessa gisho, Xoossay Nohe haysada yaagidi kiittis; “Taani asa ubbaa dhaysana hanayis. Enta gaason biittay geellatethan kumida gisho, ase biittafe dhaysana. 14Hessa gisho, mino mithafe new markabe keexa. He markabiya giddon daro qol7ata kessa. Yaatada sooranne karera made melaban meesha. 15Markabiya haysada yaatada keexa; adussatethaa 300 wadha, gompaa 50 wadha, geesa 30 wadha ootha. 16Markabiyas kaara medha; kaarapenne godaape giddon issi wadha gidiya bessi dooya agga. Pengiya markabiyas miye baggara kessa; markabiya heedzu pooqe kessada keexa.
17“Taani salope garsan shempora de7iya medhetetha ubbaa dhaysanaw dhayo haatha yeddada ha sa7aa bolla de7iyaba ubbaa dhaysana. 18Shin taani ta caaquwa neera caaqana. Neeni, ne machiw, ne adde naytanne enta macheta ekada markabiya giddo gela. 19Enti neera de7on daana mela, de7oy de7iya medhetetha ubbaafe qommon qommon addenne macca nam7a nam7a oothada, markabiya giddo gelsa. 20Dumma dumma qommo kafotape, dumma dumma qommo mehetapenne sa7ara gooshetiya dumma dumma qommo medhetetha ubbaafe nam7a nam7a gididi de7on daana mela neeko yo. 21Qassi hintenne do7ati maanaw dumma dumma qommo miya kathi efada, markabiya giddon qola” yaagis.
22Nohey ubbabaaka Xoossay kiitidaysada oothis.
The Word for the World International and The Word for the World Ethiopia
