Matthieu 18
18
?Pene indaa?
(Bono na Marc 9:33–37, Luc 9:46–48)
1Vane aneengie amaviga na gôndé Jésus gôémôévôa mbe: ?Pene g’ôkumu aNzambé indaa? 2Jésus amabambéa muana amuanéngé na amamôtemeda va miso maô. 3Jésus amatubéda mbe: Me nanôbeenda ébégô édué éapie. Okô anye nôsakoa mitéma mianyô gôéba mônongovo ga muanéngé, nôsangeengéa g’ôkumu aNzambé. 4Pene ag’ôkumu aNzambé te ône aasugéda amuene gébé na bôpeeo gôéba ga muanéngé. 5One agobeda viana gandé évi gô inami agobedi te na me.
Gôéyanza mabégô mabévani te édagani
(Bono na Marc 9:42–48, Luc 17:1–2)
6Okô môma anyôngéô ébôméda muana andé môtémovo n’ami, buedi mbe nôditéga étaé évôni va môngônga amômane na nômôgunya gô mubu kabaga abômédadô muanee. 7Gôndéké va tsina éva mane mabôméda môma gôéyanza mane masanyôngéô Nzambé. Tsina nedué édaga te gô mangô. Mabômiame mandé mayekani na masakôdéaka. Ivô ti gô maguga mandé na ône abôméda môkedi.
8Okô ôgogoe woo na ôkôdôe woo ôndé ga pagô gôégôkubéda gô mabégô mabévani, kitsa angô. Gunya angô gôdagôda n’ewe. Okô ôndé n’ogogo ôvo na ôkôdô ôvo, na monyo apie gô môtémoo, ésadaga gôndé éwe. Okô ôndé na mogo moo mabaé na makôdô moo mabaé, na ôkea na gô mungu asoto, te éne éôtéa édagani. Gône te gô sotoge géseemakani. 9Okô mbe isoe yoo éndé ga pagô gôégôkubéda gô mabégô mabévani yuua éangô na gunya éangô gôdagôda n’ewe. Gôndé éwe gôéengéa gô monyo apie na éso évo ésadaga. Ivô gôékea na gô mungu asoto na miso mabaé te éne édagani.
Tsava endombo émadimbanani na ématsutsuni
(Bono na Luc 15:3–7)
10Nôwema kabaga nôbévéda muana, buéyé mbe agébaka môgemôge. Muana na muana andé na môsi g’ôba môyanzi aNzambé gôésungéa angô na pitsi n’omanda va mbene aTéta, ône andé g’ôba. [ 11Gôébégô me, Muana Amôma namaviga gôéoboo ane amadimbanani.]
12Jésus angô mbe: ?Anye nôtasa nayee? Môma andé na mandombo medi môkama. Evo éndombo édimbana. Mane nzima ditenadinayi na mandombo matenamanayi ?asangatsika mangô gô môkôdi ôaa mangô, akebuta éne émadimbanani‐a? 13Vangatsutsua angô éangô, menyani mbe gényônga gévôni géngatsôkéa angô gô évo éndombo éne géngootéa na gényônga samavo mandombo masidimbanani, nzima ditenadinayi na mandombo matenamanayi. 14Gôndé Tétasô n’anyô g’ôba éndé te mônongovo. Asanyôngéô ta na muanéngé môvo adimbana.
Okô muana aTétee n’oo abômiô
15Okô muana aTétee n’oo eendi éwe ébégô ébévani, kiaka ôkedenga angô. Anye n’edi nôdigaa vavo ônigôa angô éne ébévédi angô éwe. Okô agôôkéyiô eembe ônikédi muana aTétee n’oo abaki mbe adimbanani. 16Ivô ôkô angô akina éôkô ndongi yoo, kea na muene môma môvo vo abaé gômbe mane mangavovuni mangookanô n’emoni ébaé, étatô. Te gatôtanga gô Matendeo NaNzambé. 17Okô angô akina dôta ôgi oma abaé, atatô, tsua ébégôe éne na gôndé asi mbumu éaNzambé. Okô akini ôgie asi mbumu éaNzambé, nômbiavamba n’edi. Andé te ga môma asavamba na Nzambé, andé te ga môbongi adepu.
Ene ékatiôni na éne étsôbôyiôni
18Jésus amavovo mbe: Nanôbeenda ébégô édué éapie. Ene ékata anye gô tsengene ékatiô dôta gô tsenge éaNzambé g’ôba. Ene étsôbôa anye gô tsengene étsôbôyiô dôta g’ôba.
19Me Jésus nanôbeenda mbe: Okô omami abaé asi tsengene, avangana gôéduka Nzambé pati yebégô g’ôsambô, Téta, ône andé g’ôba angasingéa môdukée waô. 20Menyami mbe gô tungune éwanya oma buéyé abaé, n’atatô gôéneegeda me, memuene nandé va gatse aô.
Tsava éamôma asiene môkedi ngeba
21Pierre amabambéa Jésus mbe: Kumu, ôkô muanéya eendi me ébégô ébévani kuka yetso ?nangamôsingéa kokoo kuka dikee? ?Te tsambué‐a? 22Jésus amaabéa angô mbe: Me tsoongôa égôaabéa mbe kuka tsambué. Ivô te nzima tsambué kuka tsambué. 23?Me nagoneda ôkumu aNzambé na sôma ndé? Okumu aNzambé ôgono na kumu adukéda ayanzi edi mitete mbe: Ane amasombea me anikédé dode yami. 24Amabandôa étanga dode. Môyanzi môvo amavigédu na vandé angô. Amabaka na môtete ôvôvôni. 25Môyanzine asibaké ta na sôma gévo semôvanéa. Kumu amôtete amavovo na kotene mbe: Bongo môyanzine. Sômbéda angô na môgayedi n’anedi g’ôvéga, na yômee éedi yetso. Vangamanewe ésômbéda angô, ôviga na dodeye. Te yangô dingavanô môtetee wedi. 26Môyanzine amameesegéa na va tsina va mbene akumu edi. Amamôgondo mbe: Ah kumu, kokooye éwe. Eena me ngeba. Vengéaye éwe. Nangagônikédéa ti éetso. 27Kumu amôtetee gô ngeba yedi amavovo mbe: Timôgaka. Kiaka. Osangadôvana môtetee.
28Na mômôgôô nône, vamakusangô amawanya na môkedi, angô abaé asi éyanzevo. Môkedi amabaka n’edi na môtete av’okana. Amamôtsôpa va môngônga mbe: Vana me môtete. 29Môkedi amameesegéa na va tsina va mbene edi. Amamôgondo mbe: Kokooye éwe. Vengéaye éwe. Nangagôvanéa. 30Kumu amôtete asinyôngéô. Ameengéda môkedi na gô eba atsôgôô ngu na vangavanangô môtete. 31Akedi muetso asi éyanzevo ahmeena éne émabuéani. Ahmabaka muetso na mitéma miditani gô éne émeenahngô. Ahmakea ahmamôsunda gôndé kumu éeyanzee. 32Kumu éeyanzee amabambéa môyanzi edi mbe: Ewe te môyanzi môbévani. Gômaduka éwe me ?tsigôene ngeba gôégônzeegeda môtete ôvôni‐a? 33?Ewe ôsoongôa éena môkoo ngeba mônongovo gameena me éwe ngeba‐a? 34Gôsienangô buedi, kumu éeyanza amakeda môyanzine na gôndé akeneyi asi tsôgôô. Angô mbe: Keneani angô ngu na vangavanangô môtetee wami ôvôni wetso. 35Jésus angô mbe: Téta Nzambé ône andé g’ôba anganôénda te mônongovo ôkô anye nôsasingéa akanyô kokoo na mitéma mianyô mietso.
Alliance Biblique du Gabon (Bible Society in Gabon) 1983
